Ebusua no

Hɛn, President a Odzi Kan na n’Apamfo na Asomafo Abaguafo Duebien no a yɛwɔ Jesus Christ N’asɔr a ɔwɔ hɔ ma Nda a Odzi Ekyir Ahotseweefo mu no, bɔ no dawur enyiberdo dɛ banyin na ɔbaa ntamu awar yɛ Nyankopɔn Ne nhyehyɛɛ, na Bɔadze Ne nhyehyɛɛ ma Ne mba hɔn onnyiewiei nkrabea ne fapem nye ebusua.

“Nyimpa nyinara —mbanyin na mbaa—wɔbɔɔ hɔn wɔ Nyankopɔn no su do. Kor biara yɛ sor awofo hɔn sunsum dɔba banyin anaa dɔba ɔbaa, na dɛm ntsi, kor biara wɔ Nyame suban na nkrabea. Dɛ no bɔbea yɛ banyin anaa ɔbaa no yɛ dza ohia tsitsir ma ankorankor biara ansaana ɔbɛba asaase do, ne ɔnnkyebo asetsena ber, na ne onnyiewiei su na botae.

“Wɔ abrabɔ ansaana nyimpa reba asaase gyinabew mu no, nna sunsum mbabanyin na mbabaa nyim na wɔsoom Nyankopɔn dɛ hɔn Onnyiewiei Egya, na wɔgyee Ne nhyehyɛɛ a Ne mba botum edua do enya nyimpadua na woenya asaase do sũahu dze enya kan kɔ wɔ emudzi mu, na ewiei no, obiara enya no krɔnkrɔn nkrabea dɛ onnyiewiei adzedzinyi no, too mu. Enyigye ho nhyehyɛɛ krɔnkrɔn no tum ma ebusua nkitahodzi kɔ do wɔ owu ekyir. Ayɛdze krɔnkrɔn na ahyɛmudzi a wɔyɛ no wɔ temple krɔnkrɔn mu no, ma ankorankor kwan ma wotum san kɔ Nyankopɔn n’enyim na ɔma ebusua kã bɔ mu afebɔɔ.

Mbrasɛm a odzi kan a Nyankopɔn dze maa Adam na Eve no fa hɔn daakye abaatanyɛ dɛ kun na yer. Yɛpaa mu kã dɛ Nyankopɔn Ne mbrasɛm ma Ne mba dɛ wɔndɔr na wɔnhyɛ asaase do mã no, da ho dzi mu. Yɛkɔ do paa mu kã dɛ Nyankopɔn ahyɛ mbra dɛ awo ho tum krɔnkrɔn no wɔdɛ odzi dwuma wɔ banyin na ɔbaa a wɔawar wɔ mbra kwan do, dɛ kun na yer, nkotsee ntamu.

“Yɛ paa mu kã dɛ kwan a wodua do dze bɔ nkwa a ɔnnkyebo yi yɛ Nyame ahyɛdze. Yesi nkwa asetsena yi no krɔnkrɔnyɛ, na no ho hia a ohia wɔ Nyankopɔn ne onnyiewiei nhyehyɛɛ mu no pi.

“Okun na ɔyer wɔ enyiber asodzi dɛ wɔbɔdɔ na wɔahwɛ hɔn ho na hɔn mba. “Mba yɛ Ewuradze n’egyapadze” (Ndwom 127:3). Awofo wɔ dwuma krɔnkrɔn dɛ wɔtsetse hɔn mba wɔ ɔdɔ na tseneneeyɛ mu, wɔma hɔn honandua na sunsum mu ehiadze, wɔkyerɛkyerɛ hɔn ma wɔdodɔ na wɔsom hɔnho nkorkor, wodzi Nyankopɔn Ne mbrasɛm do, na wɔyɛ amamfo a wodzi ɔman ne mbra do wɔ beebiara a wɔtse. Kunnom na yernom—enãnom na egyanom—bobu asɛdze yinom ne nyɛe ho nkontaa wɔ Nyankopɔn enyim

Ebusua no yɛ Nyankopɔn Ne nhyehyɛɛ. Banyin na ɔbaa ntamu awar hia tsitsir ma Ne onnyiewiei nhyehyɛɛ. Mba fata dɛ wɔwo hɔn wɔ awar nhyehyɛɛ mu, na egya nye nã a wɔdze nokwardzi dzi awar nsew no do no, tsetse hɔn. Nsa botum akã ebusua abrabɔ mu enyigye no sɛ wɔtow ne fapem wɔ Ewuradze Jesus Christ ne nkyerɛkyerɛ do a. Awar na ebusua ebusua a wɔkɔdo yie no, wɔkyekyer na wɔkora do wɔ gyedzi, mpaabɔ, nnuhu, fakyɛ, enyidzi, ɔdɔ, ayamuhyehye, edwumayɛ, na agodzi dwumadzi a odzi mu fapem do. Dɛ mbrɛ Nyame ahyehyɛ no, egyanon wɔdɛ wɔhwɛ hɔn ebusua ebusua do wɔ ɔdɔ na tseneneeyɛ mu na ɔyɛ hɔn asodzi dɛ wɔma hɔn ebusua ebusua abrabɔ mu ehiadze na bambɔ. Nãnom hɔn asodzi tsitsir ara nye dɛ wɔtsetse hɔn mba. Asodzi krɔnkrɔn yinom mu no, ɔyɛ egyanom na nãnom hɔn asɛdze dɛ wɔboa hɔn ho dɛ adamfo etsĩpɛmfo. Dzɛmdzi, owu, na gyinabew binom so botum ama ekehia dɛ ankorankor yɛ nsesã. Ebusuafo nkaafo no wɔdɛ wɔma mboa wɔ hiaber mu.

Yɛbɔ kɔkɔ dɛ ankorankor a wɔtõ ahosie ahyɛmudzi, wobu ahokafo anaa mba enyimtsĩa, anaa wobu hɔn enyi gu hɔn ebusua asodzi do no begyina Nyankopɔn enyim ebu ho nkontaa da bi. Yɛkɔ do bɔ kɔkɔ dɛ ebusua ntsetsewmu dze mbusu kɛse a tsetse ber na ndɛ ber yi mu nkɔnhyɛfo ahyɛ ho nkɔm no bɛba ankorankor, nyimpakuw, na amanaman do.

Yɛtotɔ serɛ amamfo a hɔn enyi wɔ adze do, na aban mu dzibewdzifo a wɔwɔ beebiara dɛ wɔdze tsipia bɛma dɛm esusudze yinom a wɔahyehyɛ dɛ ɔbɔkora na wɔahyɛ ebusua a ɔyɛ wiadzemba ne fapem tɔw no dzen.