Jutak ilo Bukwin Wōjke eo Ekwojarjar

Elder Marlin K. Jensen

Jen Jiljilimjuonn̄oul eo

CES Devotional n̄an Young Adults • Māe 6, 2012 • Sacramento, California


 
Elder Marlin K. Jensen

Iakwe in jota ro jeiu im jatū. Eļap aō kam̧oolol barāinwōt lukkuun ettā bwe imaron̄ bōk ijjitōn̄ in eaorōk jen Būreejtōnji eo Kein Kajuon n̄an kōnono n̄an kom̧ jotenin. N̄an jinoe, Ikōņaan bwe kom̧in jeļā bwe eaar wōr juon iien eaar jab ibertoto ānbwinū, koļan bōra eaar kilmeej, im obrak kōn mour āinwōt kom̧—menin ej m̧ōttan wōt ta eo jeje ko rekwojarjar rej ņaetan “Diktak in Epepen ko.” Ijjab lukkuun jeļā oktak in meļeļe eo ejim̧we ak āinjuon jen “diktak ej—bōlen “rum̧ļo̧k” ak “dikļo̧k”—mekarta meļeļe ta eo an menin, ej kōmeļeļeik juon tōre in mour kiiō Ipād ie, im ejjab kōjeram̧m̧an eō!

Men̄e Ij kōnono n̄an kom̧ jān juon m̧ōn jar eo eaiboojoj iturin Sacramento California Temple, Imaron̄ loe ilo kōļmenļo̧kjeņ eo aō jon̄oul taujin iami—kōnono enan̄in 40 kajin ko roktak jen doon—kom̧ ro rej kuk ippān doon peļaakin laļ in. Iaar jeram̧m̧an jen aō kar lowaj elōn̄ iaan laļ ko ami, n̄an ron̄jake ami kōnono im ami kwaļo̧k naan in kam̧ool ilo kajin ko ami, n̄an kam̧ool e kōn meja tōmak eo ami im ami wūjlepļo̧k n̄an Irooj. Ij iakwe im kautiej kom̧ kōn ami wāppen. Ijeļā mour ilo dedjab eo ami emaron̄ in apan̄, im Ijeļā jet iien jej kōm̧m̧an bōd im aikuj in ukweļo̧k. Ak Ij lukkuun kam̧oolol kom̧ kōn ami pukōt n̄an dim wōt ilo ami tōmak ilo Kraist im ilo ko̧jpeļ eo An em̧ōj an jepļaaktok. En̄jake eo Ikōņaan jotenin ej bwe In maron̄ jeram̧m̧an n̄an kōnono jen kajoor eo an Jetōb Kwojarjar im ilo juon wun ej lewaj jipan̄ n̄an juon ļapļo̧k in ami tōmak.

Jikin ko Rekwojarjar

Ewōr jikin ko ioon laļ in me raar ko̧kwojarjar i jen ta eo eaar waļo̧k n̄an i. Ekkar n̄an Kalim̧m̧ur M̧okta, juon iaan jikin kein ej Sinai, Horeb, ak “toļ in Anij “(Exodus 3:1; lale barāinwōt Exodus 3:12; 34:2), ijo Irooj eaar waļo̧kļo̧k n̄an Moses ilo wōjke eo e urur. Ke Moses ej kepaak wōjke eo, Irooj eaar ba n̄an e, “Kwon jab ruwaaktok; kwōn utūk juj ko jān neōm̧, bwe jikin ņe kwōj jutak ie, bwidej e kwōjarjar” (Exodus 3:5).

Baam̧le eo aō im N̄a kar jeram̧m̧an juon kōttan n̄an jokwe ilo juon jikin ekwojarjar. Ilo 1993—emen iiō ko ālkin aō kar kūr n̄an Jiljilimjuonn̄oul eo—kar kajjitōk ippām n̄an jerbal ium̧win ruo iiō ko ilo New York Rochester Mission eo an Kabun̄ in. Mijen in ekitbuuj bukwōn in Palmyra, (ijo Joseph Smith im baam̧le eo an raar jokwe ie enan̄in aolepān 1820 ko) im Fayette (ijo Kabun̄ in eaar ejaak ie ilo Eprōļ 1830 eo). Enan̄in 110 m̧aeļ ko jen turōk in Palmyra ilo bukwōn in Pennsylvania ilo Harmony (ijo Joseph Smith eaar lo Emma Hale ie im ijo raar jokwe ie āinwōt juon kabōl ej kab m̧are tōre eo enan̄in aolepān Bok in Mormon eo eaar ukook ilo jem̧ļo̧kin 1820 ko). Eria in eļap ej bun̄bun̄ āinwōt “Cradle of the Restoration,” ilo ijin ej ijo Kabun̄ in eaar ļotak ie. Ej laļ eaiboojoj eobrak kōn bat, m̧ōko ioon bat ko; leek ko im to̧o̧r ko rereeo; im meņāān, elōn̄ kain armej. Ej barāinwōt juon jikin kar ko̧kwojarjar i jen ta eo eaar waļo̧k ie.

Bukwin Wōjke eo Ekwojarjar

Ilo juon bukwin wōjke eutiej kōn beech ko, oak ko, maple ko, im wōjke ko jet, enan̄in 25 m̧aeļ tuioon̄ in m̧weo im̧ōn baam̧le eo an Joseph im Lucy Mack Smith turin Palmyra, 14 iiō rūtoon Joseph Smith kar loe ilo visiōn Anij Jemān im Nejin, Jisōs Kraist, ilo jipriin̄ in 1820. Waļo̧ktok in ekwojarjar, ilo uwaak n̄an jar eo an Joseph n̄an jeļā m̧ool eo kōn kabun̄ im ewi wāween an maron̄ bōk juon jeorļo̧k in jerawiwi ko an, kar jino in Jepļaaktok eo an ko̧jpeļ eo ilo epepen in āliktata. Eaar barāinwōt kom̧m̧an bwe bukwin wōjke ko ej juon jikin nebar im kautiej ilo bwebwenato an Kabun̄ in ad—juon jikin jej kautiej e kōn āt in “Bukwin Wōjke eo Ekwojarjar.”

Tōre eo Ij jerbal āinwōt juon mijen būreejtōn, baam̧le eo aō im N̄a kar jino iakwe bukwin wōjke in im kar en̄jake kwojarjar eo an. Emakijkij am etal n̄an ijeņ. Kajjojo allōn̄ ke mijenede ro rekāāl raar tōkeektok im barāinwōt ro raar kadedeļo̧k mijen ko aer raar em̧m̧akūt, kōm̧ij bōk er n̄an ijeņ. Imminene in am eaar n̄an kuk ippān doon ilo kōjam in deļo̧n̄tok eo n̄an bukwin wōjke eo, im ālkin al in kōppeļļo̧k eo joten eo—“Joseph Smith’s First Prayer”1—kōm̧ij karuwaineneiktok elder ro im sister ro n̄an aer jeplōklōk im pukōt juon jikin ettoļo̧k ilo bukwin wōjk eo ijo remaron̄ kajjojo kōnono ippān Anij ilo jar im kōm̧m̧an im leļo̧k ripoot eo kōn kalim̧m̧ur ko aer make n̄an E. Lotok kein n̄an Bukwin Wōjke eo Ekwojarjar raar im rej wōt en̄jake ko kaorōki jen aolep ro raar jeram̧m̧an n̄an būki.

Ij kile, mekarta, bwe jet wōt iami remaron̄ naaj loļo̧k Bukwin Wōjke eo Ekwojarjar ilo nememein armej. Kōn wun in, ilo, jipriin̄ in ilo 2012–192 iiō ālkin Visiōn eo Kein Kajuon an Joseph Smith—Ikōņaan bwe kom̧in itok ippa n̄an Bukwin Wōjke eo Ekwojarjar. Jutak ippa ijeņ ilo Aō kwaļo̧k ippāmi jet pija ko maron̄ loi an bukwin wōjke in, wun ko kōn aō iakwe jikin in ekwojarjar, im katak ko raorōk an mour juon emaron̄ in ekkatak jen ijeņ.

Ij kam̧oolol Būratōr Robert Parrott, juon rikōjparok kein eddōk im menin mour ko, ej jerbal ilo Kabun̄ in, eo ej jokwe ilo Palmyra, bwe emaron̄ boktok n̄an aō jeļā kōn jet iaan meļeļe ko kōn Bukwin Wōjke eo Ekwojarjar me Inaaj kwaļo̧ki. Men̄e ejjab juon membōr in tōmak eo ad, Būratōr Parrott ej kautiej Bukwin Wōjke eo Ekwojarjar im ej leļo̧k n̄an e kōjparok im tiljek eo etijem̧ļo̧k.

Pija in Jeje ko Rekwojarjar Rekitbuuj Wōjke ko

Ilo Aō etal ibuļōn Bukwin Wōjke eo Ekwojarjar ak jijet ioon jea ko em̧ōj kōpooji ijin, ekkā an emakijkij Aō kejekļo̧kjeņ kōn wōran in eļap an pija in jeje ko rekwojarjar rekitbuuj wōjke ko, ra ko, okar ko, ine ko, leen ko, im mar ko. Adam im Eve, ro jined im jemed m̧oktata, kar bōk katak eo kein kajuon ilo jikin kallib in wōjke eo. Rikanaan Jekab, ej kouti Zenos ilo Bok in Mormon, ej kwaļo̧k juon m̧ōttan bwebwenato ak bwebwenato eo kōn wōjke oliv e awiaa ke ej katakin kōn ejjeblōklōk im kobatok an Israel (lale Jekab 5). Im wōn ilubwilijid ejjan̄in riit, bar riit, im kōļmenļo̧kjeņ kōn ine in tōmak eo Alma ej karuwaineneik kōj n̄an katōk e kōn kijenmej im kea im jejjet in naajdik ej erom “juon wōjke ej eddōkļo̧k n̄an mour ejjeļo̧k jem̧ļo̧kin”? (Alma 32:41; lale eoon 27–43).

Kōn menin en̄in ej kōn Bukwin Wōjke eo Ekwojarjar. Juon rilale eo etiljek an menin kōm̧anm̧an—eļaptata n̄e ej kōjparok jen juon rilale menin mour eo ekapāāl Būratōr Robert Parrott—maron̄ ekkatak jet katak ko rem̧m̧an jān jekjek ko rejelet jukjukinped ko rej pād ijeņ. Ikōņaan in kwaļo̧k ilo tukaduin emen iaan katak ko ippāmi jotenin.

Katak ko an Mour jān Bukwin Wōjke eo Ekwojarjar

Katak nōm̧ba 1:Wōjke ko aolep iien rej eddōk jujelļo̧k meram eo.

Juon iaan men ko rekaitoktok limo n̄an alooje ilo Bukwin Wōjke eo Ekwojarjar ej an wōjke ko eddōk ioon tōrerein m̧aan m̧ar eo, barāinwōt an ko jet ekkar elōn̄ iaer jen iaļ ko itulowa. Rej eddōk ņamōjtak—n̄an kōjekdoon m̧ōttan ko rej aitokļo̧k ilōn̄ er, innām jujellōn̄ļo̧k n̄an nom̧etok jon̄an wōt maron̄ meram in al eo. Kā ko kāer rōm̧al im ra ko raer rej jutak ilo ejjeļo̧k kainōknōk eoktak n̄an wōjke ko iturier ko rej eddōk jejjet lōn̄ļo̧k. Wōjke ko, āinwōt aolep men otemjej rej mour, aikuj meram in al n̄an mour im n̄an ejaak. Renaaj kōm̧m̧ane aolepān ilo aer kajoor n̄an ņometok jon̄an eo emaron̄ meram in al n̄an kōm̧m̧an photosynthesis—wāween jerbal eo n̄an ukōt kajoor in meram eo n̄an kajoor in kemikōļ eo, ak “kaaņ” kōjerbale jen aolep menin mour im eddōk ko.

Ijeļā bwe kōļmenļo̧kjeņ ko ami reddik, im em̧ōj aer eromaak kadede jeļā ia in metaphor in jān Bukwin Wōjke eo Ekwojarjar ej bōk kōj n̄an e! Meram ej juon m̧akūtkūt elukkuun aorōk edim ilo jikin eo an jetōb jān ilo menin kōm̧anm̧an ko. Menin ejim̧we kōnke meram ej aorōk n̄an eddōkļo̧k eo an jetōb eo ad im kile likio in ad aorōk āinwōt m̧aan im kōrā ro nejin Anij.

Maroklep ej oktan meram im ej bōk jikin kajoor ko ilo laļ in ko rej pukōt n̄an kōjepel kōj jān Anij im n̄an kajekdoon karōk eo An ekwojarjar n̄an mour ko ad. Ekkā ilo ālkin marok ak ilo jikin ko remarok bwe kajoor ko an nana rej jerbal e kareel eo aer eļap. Ilo tōre in kom̧ tōpare ilo mour, nuknuk ko kōn kien erreo, m̧akūtkūt ko kōn ko̧o̧t, kāāmbōļ, m̧akūtkūt in kakkure ko kōn Naan in Māletlet, im m̧wil ko jet Jemedwōj Ilan̄ em̧ōj an kamo̧iki rej irar ko ekkā aer waļo̧k ium̧win libobo an maroklep. Men̄e jej kālet n̄an kōm̧m̧ane men eo ebōd ilo raan —n̄an waanjon̄ak, jen ko̧o̧t ilo juon teej, kōjerbal meļeļe ko ejjab ad n̄an je juon peba, ruruwe kōn juon armej, kōjerbal naan nana, ak riab—jej jab maron̄ jipan̄ ak bōk en̄jake ko kōn maroklep.

Ilo m̧ool, Jetōb eo an Kraist ej letok meram n̄an aolep armej eo ej itok n̄an laļ in, im Jetōb eo ej kōmeramļo̧k aolep armej ilo aolepān laļ in eo ej eo̧ron̄ ainikien Jetōb eo.

Im aolep armej ro rej eo̧ron̄ ainikien Jetōb eo rej itok n̄an Anij, aaet Jemān (laleD&C 84:46–47).

Eoon in jān Doctrine and Covenants ej kōmeļeļeik an armej tōpar lan̄, Anij ej letok jipan̄ ilo jetōb eo ewōr ippād aolep—eļan̄n̄e jej jab bōbrae jabdewōt jene—n̄an etal n̄an meram eo im ilo kōm̧m̧an āindein, n̄an jibadōkļo̧k Anij im Nejin im n̄an erom āinwōt Er. Kōn E make, Kraist eaar ba, “N̄a, meram in laļ; eo ej ļoor Eō e jamin etal ilo marok, a enaaj an meram in mour”(Jon 8:12).

Ilo meļeļe jeje ko rekwojarjar, kom̧ maron̄ kwaļo̧k eļap kōn juon naan kōn naan ko jet emakijkij an waļo̧k iturin. Ilo ami ekkatak jeje ko rekwojarjar, lale ewi emakijkij in an naan ko meram, Jetōb, m̧ool im Jisōs Kraist loe aer epaake doon. Rej epaake naan ko juon wōt meļeļeir, im aolepāer rej kepaak kōj lōn̄ļo̧k n̄an juon wāween mour eutiej ļo̧k im kwojarjar ļo̧k.

Kōn aolepān būruwō Ij rōjan̄ kom̧ n̄an kōttoļo̧k maroklep in jerawiwi ilo aolep jekjek ko renana im n̄an kobrak mour ko ami kōn Jetōb eo, m̧ool eo, im meram eo an Rilo̧mo̧o̧r eo, Jisōs Kraist. Kom̧ maron̄ kōm̧m̧ane menin jen ami pukōt ro m̧ōttami rem̧m̧an, al im kōjan̄jan̄ ko reim̧we, jeļāļo̧kjeņ eo jen bok ko rem̧m̧an (eļaptata jeje ko rekwojarjar), iien jar ko rem̧ool, iien ko relur ippān menin kōm̧anm̧an ko, m̧akūtkūt im bwebwenato ko ewōr tokjāer, im juon mour ej pād ioļapļap in Kraist im katak ko An iakwe im jerbal in jipan̄. Aolep iien kememej, im eļaptata ilo pukōt juon m̧ōttā am̧ indeeo, Irooj eaar kōmlet bwe m̧ool ej kabwijer m̧ool; wānōk ej iakwe wānōk; meram ej eddāp n̄an meram eo (D&C 88:40). Pedped in an em̧m̧an ej reel n̄an em̧m̧an eo ej kōpooj kōjatdikdik bwe eļan̄n̄e jej mour ilo juon mour kōn meram eo an ko̧jpeļ eo, jenaaj lukkuun loe juon m̧ōttā eo ej etetal ilo ejja iaļ in ewāppen. Ijeļā bwe ilo an ļapļo̧k ad kobrak mour ko ad make kōn meram eo, ej dikļo̧k ruum̧ ijo n̄an maroklep eo im ad lukkuun epaake n̄an erom āinwōt Kraist, Meram eo an Laļ in.

Kōn kōjeram̧m̧an in ejeno̧lok aō jotenin n̄an kōnono n̄an kom̧ āinwōt Armej ro Rekwojarjar ilo Raan–ko Āliktata ro reddik, Ikōņaan kautiejļo̧k juon ainikien kakkōl ak barāinwōt juon ainikien rōjan̄ im kōjatdikdik kōn maroklep eo emaron̄ lukkuun taļo̧n̄e mour ko ami eļan̄n̄e kom̧ij bōk koņaami ilo pija ko rettoon. Kōjerbal mweiuk in pija ko rettoon ilo jabdewōt wāween ej kōmetak Anij im rube kean̄ eo An eo me jejjab aikuj lōn̄ barāinwōt kōm̧m̧an jabdewōt āinļo̧k wōt (D&C 59:6). Kōjerbal pija ettoon aolep iien ej tōļļo̧k n̄an bar rube kien erreo. Karelel ko rālij n̄an pija ko rettoon im bōk koņaan ilo jekjek ko an jerawiwi an m̧ōm̧ an kanniōk ekkā an kōm̧m̧ane juon an̄ūrlep eo ej aikuj jerbale im kōm̧m̧an n̄an e ejja kōjparok eo wōt me ej ilo̧k n̄an an̄ūrlep ko an arko̧o̧l ak uno ko rekajoor.

Eļan̄n̄e pija ettoon em̧ōj an kadede jelet mour eo ami, im ej juon jorāān ewaļo̧k im ej wōnm̧aanļo̧k wōt, Ij akweļap ippāmi n̄an pukōt jim̧or jipan̄ an ritōl im ro retijem̧ļo̧k. Jouj im jeļā bwe juon an̄ūrlep an pija ettoon ej jab men bajjōk “juon jorāān edik” me kom̧ maron̄ tariņaeik kōn jar eo ami make, ekkatak jeje ko rekwojarjar, im ļapļo̧k ilo peek kom̧ make.

Kōnke juon an̄ūrlep n̄an pija ettoon emaron̄ kadikļo̧k kajoor eo ami n̄an kālet men eo em̧m̧an ioon men eo enana, kom̧ naaj aikuj in meanwōr im ettā n̄an dāpij Pinmuur eo an Jisōs Kraist im jeram̧m̧an jen kajoor eo ej kōmaron̄ Pinmuur eo. Ta meļeļe in menin ilo naan ko rem̧ool, ej bwe eļan̄n̄e kom̧ij kōjerbal kijejeto eo ami em̧m̧an tata—eo ej kitbuuj ilo̧k ilowaan juon jerbal in ukweļo̧k ippān jipan̄ eo an bisop eo ami ak branch būreejtōn eo n̄an bōk jeorļo̧k bōd in jerawiwi im ilo̧k wōt ilo juon jerbal in kamomo ekitbuuj kapilōk im jipan̄ an kumi n̄an eļļā ioon an̄ūrlep eo ami—kōmaron̄ kajoor eo an Pinmuur eo (eo Baibōļ Dictionary eo ej kōmeļeļeik āinwōt juon meļeļe ekwojarjar an jipan̄ ak kajoor2), naaj jipan̄ kom̧ n̄an eļļā ioon kareel an juon an̄ūrlep an pija ettoon im eļļā ioon n̄an kājmour jān jelet ko reļļap. Jen kajoor in Pinmuur eo, jim̧or jeorļo̧k bōd an jerawiwi im kamomo jān an̄ūrlep repidodo, im jim̧or em̧m̧an.

Jouj, kōjekdoon maroklep, im āinwōt wōjke ko, aolep iien rej pukōt n̄an eddōkļo̧k jujelļo̧k n̄an meram eo.

Katak nōm̧ba 2: Wōjke ko rej aikuj jum̧ae n̄an kakūrm̧ool jon̄ak eo kōn kōm̧anm̧an eo aer.

Ļōmņak ko rellōn̄ ikijeen forest management kar ļoor ium̧win iiō ko rellōn̄ ilo kōjparok Bukwin Wōjke eo Ekwojarjar. Ilo juon iien juon pailōt teej kar kālete im juon kamminene ebun̄bun̄ āinwōt “release thinning” kar kōjerbale. Eaar jerbal ilo wāween in: Rilale wōjke ko raar kile ta eo raar en̄jake kōn kōjeram̧m̧an eo an wōjke ko reddik rājmour ilo pailōt teej eo, innām rej mwijitiļo̧k im julo̧k wōjke ko edik aer kalle leen ko rejeram̧m̧an im m̧anļo̧k ujooj ko ium̧win wōjke eo. Ļōmņak eo em̧ool bwe jen kar m̧anļo̧k ujooj ko ium̧win wōjke eo ej bōk jikier kōn dān, meram in al, im bwidej eo eūne, wōjke ko kar kāleti renaaj kar “jo̧o̧r” n̄an eddōk im ejaak ilo wāween ko rej uwaer.

Ālkin jet iiō ko eaar alikkar bwe oktak eo eaar waļo̧k. Ilo an kar anemkwoj jān ujooj ko ium̧win wōjke ko, wōjke ko kar kāleti raar kalle. Ijjeļo̧kin aer aetokļo̧k ņae meram eo, raar rum̧wij aer kajju aer eddōk, ejaak elōn̄ okar ko me renaaj lukkuun kar jej tokjāer n̄e ānbwiner enaaj kilōk, im wōjke ko raar jino tebuļo̧k. Ijoke, wōjke ko me kar kōm̧akūt er raar bar eddōk āinwōt m̧ōttan mar ko reļļap ko, rej jamin naaj erom wōjke ko rejeram̧m̧an, ak kar wōnm̧aanļo̧k im kōjerbal dān im ōōn ko. Mar kein āinwōt wōjke ko raar wōnm̧aanļo̧k wōt im jiāe ippān wōjke ko kar kāleti, ak ilo juon wāween ejjab maron̄ bōktok eddōk eo em̧m̧an n̄an er jim̧or. Āinwōt juon tōprak, ejjeļo̧k iaan wōjke ko ilo paiļōt teej eo kar keidi ilo juon jon̄an ak kajoor n̄an wōjke ko raar pād wōt im eddōkļo̧k ilo piktokier im ko kar jiāe im kar eļļā ioon jum̧ae bwe ren maron̄ mour im eddōk.

Āinwōt ami jeļā, juon iaan kii in katak ko an Bok in Mormon eo ej bwe eaikuj in wōr juon jum̧ae ilo men otemjeļo̧k. Juon laļ eo āinjuon ej bōktok kālet ko ikōtaan em̧m̧an im nana bwe anemkwoj eo en maron̄ jerbal. Jon̄an aorōkier wōt juon, kōn menin, ej pedped eo me jum̧ae ej aikuj in pād n̄an eddōkļo̧k eo an jetōb bwe en waļo̧k—ak, āinwōt an jemed Liai karōke, n̄an “kwojarjar” n̄an bōk m̧aantak (2 Nipai 2:11). Ikōņaan kwaļo̧k meļeļein pedped in—bwe eddōkļo̧k an jetōb eo ej aikuj jum̧ae im kōjdat—im barāinwōt kōjerbal pedped in n̄an ded jab eo ami ej juon kii n̄an bōk im erom lukkuun m̧ōņōņō ilo mour. Ej barāinwōt pen n̄an en̄jake aikuj eo an juon make n̄an eddōkļo̧k im ejaak.

Ejjab etto ak tokālik, kōj aolep naaj ioon jum̧ae im kōjdat. Jet iaer renaaj itok āinwōt juon tōprak in ad pād ijin ilo mour in ilo juon laļ emej. Ekkā an waļo̧k n̄an aolep armej. Jum̧ae in emaron̄ bōk elōn̄ jekjek ko. Emaron̄ kitbuuj kajoor ko an kein kōm̧anm̧an ko. Emaron̄ kitbuuj nan̄inmej im mej (Āinwōt imaron̄ in bōk plu men̄e uno ej bōbrae e!). Emaron̄ in itok jekjek in kapo ko. N̄an jet emaron̄ jab tōprak kōtmen ko. (Inaaj kar kōņaan erom 6 ne 5 inij aetok, ak Iaar katak bwe in m̧ōņōņō kōn 5 ne 9 inij bwe Iaar kwaļo̧k—im kōn ettā in ejej uwaan an jikin kōnono in jabdewōt iien Ij kōm̧m̧ane juon kōnono). Emaron̄ in itok ilo jekjek in ajimakeke, jab wānōk im m̧ōjņo̧ ko an ānbwin ak kōmālij—laajrak in kajoor ko ejjeļo̧k jem̧ļo̧kier, im barāinwōt kōjeram̧m̧an ko an eddōk im ejaak an juon make eļan̄n̄e ewōr ippād tōmak n̄an juon jetn̄ake eaitok im kijenmej kake aolepān. Ij bōk kainōm̧m̧an eo eļap jān naan ko an Anij n̄an Joseph Smith ilo Liberty Jail ilo juon iien ke eddodo ko an Joseph raar eppen: Irooj eaar jiron̄ Joseph Smith bwe aolep en̄taan ko an renaaj leļo̧k n̄an e en̄jake im renaaj n̄an em̧m̧anļo̧k eo an (D&C 122:7).

Jet iien jum̧ae im eppen rej itok kōn kālet ko ad make rebōd. Ājmour eo enana ak jorāān eo maron̄ tōprak in juon jekjek in mour ejjab kea, liājļōļ im burom̧ōj rej itok jān rubi kakien ko an Anij, jej ajļo̧k tokālik n̄e jaar likjab in kōjerbal aolep iien im tōļan ko kar litok n̄an kōj—aolepāer rej jekjek ko jaar make kōm̧anm̧ani. Ewi jon̄an an ļap ad aolep lukkuun kam̧oolol kōn Rilo̧mo̧o̧r eo ad, eo Pinmuur eo eaar kōpooj juon iaļ n̄an kōj n̄an kōkōm̧anm̧anļo̧k men otemjej ej rub.

Iaar kile bwe n̄e jej jelm̧ae jum̧ae emakijkij ad kajjitōk “etke”–Etke n̄a? Etke kiiō? Etke menin?—n̄āāt eo n̄an kajjitōk “ta” eo enaaj meļeļe ļo̧k. Iaar jilikinļo̧k juon leta in kainōm̧m̧an n̄an ruo ripālele ro raar inepata kōnke ļeo pālele eaar do̧lool kōn juon nan̄inmej ejjeļo̧k unokan. Uwaak eo aer eaar ettā: raar kōllaajraki kōjeram̧m̧an ko Anij eaar leļo̧k n̄an er ilo elōn̄ iiō ko raar ippān doon innām raar lukkuun kōļmenļo̧kjeņ “ta” eo me Anij eaar kajjieon̄ in katakin er ilo iien kamminene in āliktata.

Ewōr wōjke ko ilo Bukwin Wōjke eo Ekwojarjar me Būratōr Parrott ej kūr er “wōjke ko em̧m̧an paoktokier.” Wōjke kein me rej kōm̧eļeļeik bwe jum̧ae emaron̄ jerbal n̄an ad jeram̧m̧an im bwe ilo ad ļaptata emakijkij n̄an maron̄ bōk. Wōjke kein raar aikuj in bar m̧akūtkūt im ukōt im jet iien jo̧o̧r jān jekjek ko rellōn̄ an jum̧ae ko ak kōjdat ko—juon joruur ej itaak, juon kajoor in beltok an kōto, juon eddo in sno ak aiij, eddo eo im kakkure kōn jatiljek an armej, im aaet jet iien m̧akūtkūt an juon wōjke ituruum̧! Jen jekjek in jum̧ae kein eaar itok jet iaan wōjke ko reppen im kalimomo ilo bukwin wōjke in. Ta eo emaron̄ ejjeļo̧k ippāer ilo jon̄an aer aiboojoj, eļapļo̧k aer m̧ootļōn̄ļo̧k ilo kajoor im ilo m̧wil.

Jān en̄jake in mour eo aō make, Imaron̄ kam̧ool bwe jum̧ae, eppen, im jerata rej kalle m̧wil im eddōkļo̧k. Jet iaan en̄jake ko rapan̄ im kipel ilo mour eo aō make—rej en̄jake ko aō make renana tammier im aō make jaje kiki tōre eo ij jodikdik, mijen eo aō n̄an Germany āinwōt juon kar likao, im ekkatak kajin Germany, bōk juon law degree im pāje teej eo, kijejeto ko aō n̄an erom juon ļeo pālele im baba eo ekkar im n̄an kakke jim̧or ilo jetōb im ānbwin n̄an baam̧le eo aō im ralitōk ajri ro, jako eo an ro jinō im jema im ro jet iaikwe, barāinwōt ilo̧bwilej im inepata kōn paotokin jerbal in jipan̄ eo aō āinwōt juon Ritōl Eutiej an Kabun̄ (ekitbuuj kōppopo im lewaj kōnono in n̄an kom̧ jotenin)—aolep men kein im elōn̄ļo̧k, apan̄ im eppen, raar letok n̄an eō en̄jake im raar n̄an em̧m̧an eo aō!

Ijeļā ejjab juon men epidodo n̄an kōm̧m̧ane n̄an kom̧ jodikdik ro bwe juon metak jidikdik ej em̧m̧an n̄an kom̧, ak ilo m̧ool ej. Eļan̄n̄e jaar iten bōk men [ko] otemjej an Jemād (D&C 84:38), eban waļo̧k eļan̄n̄e jej jab leļo̧k men otemjej ippād n̄an ukōtļo̧k. Jemedwōj Ilan̄ ekōņaan bwe ļaddik im leddik ro nejin routiej im āinwōt Liai eaar katakin, kwojarjar emaron̄ bōk m̧aantak wōt jen jerata im mālijjon̄. Armej, āinwōt wōjke ko, rej aikuji jum̧ae eo n̄an kakūrm̧ool jon̄ak in kōm̧anm̧an eo aer.

Katak nōm̧ba  3: Wōjke ko rej em̧m̧an aer eddōk ilo mar ko, ejjab ilo m̧akeļo̧k.

Eļan̄n̄e kom̧ij ļōmņak kōn menin, ilo jekjekin mour ej jab ekkā lo juon wōjke ej jutak makeļo̧k iaan. Aolep iien rej ejaak kumi in wōjke ilo bukwin wōjke ko, im iien n̄an iien, bukwin wōjke ko maron̄ erom m̧ar ko. Bukwin Wōjke eo Ekwojarjar, kōn menin, eļapļo̧k an oktakļo̧k jen juon kumi in wōjke ko. Ej juon ecosystem ekaipokpok eo ekitbuuj elōn̄ men in mour ko jen aolep menin eddōk im menin mour ko. Ewōr juon jekjek eo kile ilubwilijen aolep kain wut ko rellōn̄, wōjke ko, menin eddōk, wōjke ko, fungi ko, menin eddōk ko reiaļo im maroro, bao ko, rodent ko, rabit ko, deer, im menin kōm̧anm̧an ko jet rej pād ijeņ. Menin mour kein rej m̧akūtkūt ippān doon im pedped wōt ioon doon n̄an m̧ōn̄ā, jikin kōpād, im juon iaio im ippān doon an jukjukinped ijo aolep remaron̄ en̄jake aolep m̧akūtkūt in aer mour.

Karōk eo an Anij n̄an mour ko ad ej ļōmake juon iiaio im ippān doon ejjeļo̧k oktak n̄an kōj. Jej pād n̄an jerbale lo̧mo̧o̧r eo ad ippān doon, jab makeļo̧k iaad. Kabun̄ eo ej kalōk im̧ōn kweilo̧k ko, jab n̄an pād makeļo̧k ie. Kar kajjitōk ippād n̄an kobaļo̧k ilo juon ward ak branch—jab n̄an bōk ak kālet jarlepju eo ad āinwōt tōmak ko ad. Kakien in em̧m̧an ej kōm̧m̧an bwe jen katak n̄an ekkatak jerbal ippān doon im n̄an bōk eddo n̄an bisop ak branch būreejtōn n̄an m̧wil eo m̧wiliid jaab n̄an ko im tilekek n̄e iien ej eppen tok! Jaar kean̄ n̄an iakwe ro riturūr (ekoba baam̧le membōr ro ad), im ekkatak n̄an iakwe ro repaake kōj jet iien eļapļo̧k an pen jen iakwe eo ettoļo̧k “aolepān laļ in” Jān jinoin Jepļaaktok eo, kean̄ in eaar pād n̄an Armej ro Rekwojarjar bwe ren “itok n̄an Zaion” im n̄an koba ilo jukjukinped ko ijoko jemaron̄ ekkatak n̄an mour ilo aenōm̧m̧an im ippān doon ilo jipan̄ doon jen kautiej bujen peptaij eo ad “ineek eddo ko … kainōm̧m̧an ro rej pād ilo aikuj in aenōm̧m̧an” (Mosaia 18:8–9). Āinwōt ajri ro nejin Anij, jej jab maron̄ in jeram̧m̧an ilo make ļo̧k iaad jen juon wōjke eo emaron̄ in. Wōjke ko rājmour raikuji juon ecosystem; armej ro rājmour rakuji doon.

Lukkuun kam̧oolol, ewōr ilo kōj aolep juon kōņaan in ippān doon, n̄an jem̧jerā, n̄an m̧ōttā ro routiej. Āinwōt membōr in baam̧le an Anij indeeo, kōj aolep kar januwaade jubōro im kōjparok eo me epaake im jem̧jerā eo ejjeļo̧k maron̄ letok. Kom̧ naaj ekkatak bwe kōm̧anm̧an eo an kain jem̧jerā kein rebōk iien, kijejeto, im juon iakwe em̧ool eo eobrak. Āinwōt an Mormon kwaļo̧k e, "Iakwe-em̧ool … ejjab kapukōt men ko an”(Moronai 7:45)—ejjab unin kōnono eo an make, jab an make kōņaan, im ilo m̧ool jab an make ikdele. Men̄e Intōrnet im site in social networking ko rejjab kabwe kōn juon jekjek in ippān doon, rejjab bōk jikin m̧ool eo, peļļo̧k, im jelm̧ae māj n̄an māj ekōnono eo ej aikuj waļo̧k n̄an m̧ool im jem̧jerā eo ejjeļo̧k jem̧ļo̧kin n̄an maron̄ ejaake.

Jeļā bwe jikin ekkatak eo im̧aan tata im em̧m̧an tata n̄an ekkatak jeļā jerbal ippān ro jet ej ilo m̧weo. Ej ilo m̧weo me jej ekkatak katak ko kōn jerbal in jipan̄, jab ļōmņak kōn kōj make, jeorļo̧k bōd, im kijenmej rej men ko raorōk n̄an ejaak eo an jem̧jerā eo ejjeļo̧k jem̧ļo̧kin ippān ro jet. Ij ļōmņak kōn wun in ej m̧ōttan wōt ad erom "armej ro rereeo an tampeļ" ej menin aikuj eo bwe jej mour ilo iakwe im inem̧m̧an ippān membōr in baam̧le eo am.

Ilo m̧ōņōņō, ejaak eo eim̧we an Kabun̄ eo barāinwōt ej bōktok iien ko rem̧m̧an im ekkar ko ijoko jemaron̄ in ejaak ippān doon ie. Jān ro nejim reddiktata n̄an ro rerūttotata, kōm̧ ar jen juon ward ak branch im kar pād ilo jekjek ko ijoko jem̧jerā ippān ro jet im ippān doon eaar maron̄ tōprak. Ilo kūr ko an Kabun̄, kweilo̧k ko, kūlaaj ko, doulul ko, ko̧o̧njeļ ko, m̧akūtkūt ko, im iien ko rem̧m̧an rellōn̄ n̄an iiaio, jej ejaake m̧wil ko im kapāāl in ekkōnono ko me rej jipan̄ kōpooj kōj n̄an ijjitōn̄ in ippān doon ko me renaaj waļo̧k ilo lan̄. Ilo kōnono kōn ijjitōn̄ in eutiejļo̧k, Irooj kōn Joseph Smith, eaar ba bwe ejja ippān doon eo ej waļo̧k ilubwilijid ilo mour in enaaj waļo̧k ilubwilijid ilo mour eo tok juon, enaaj jerbal wōt ippān aiboojoj eo ejjeļo̧k jem̧ļo̧kin, eo ej aiboojoj eo jejjab lan̄lōn̄ kake kiiō (D&C 130:2).

Eļan̄n̄e jej kōjatdikdik n̄an lan̄lōn̄ kōn ippān doon eo ilan̄ im iiaio ko an raiboojoj ilo laļ eo ej itok, jej aikuj in wōnm̧aanļo̧k n̄an lōļļe ilo ippān doon barāinwōt ilo jetōb tōre in ijin ioon laļ in. Armej, rej āinwōt wōjke ko, em̧m̧an aer eddōk ilo jukjukinped ko, jaab ilo makeļo̧k iaer.

Katak nōm̧ba 4: Wōjke ko rej letok kajoor jān ōōn ko kōm̧anm̧an jen epepen in wōjke ko m̧oktaļo̧k.

Eaar wōr juon tōre ilo kōjparok Bukwin Wōjke eo Ekwojarjar iien ro raar bōk eddo raar pepe bwe bukwin wōjke eo ej aikuj em̧m̧an paotokin. Būroojaak in jerbal in jipan̄ ko n̄an jodikdik im mijenede ro raar ejaak n̄an rakij bukwin wōjke eo an wōjke ko raar wōtlo̧k im okar ko, ujooj ko, im barāinwōt m̧ōttan okar ko im bōlōk ko remej. Ium̧win kamminene in, eaar jab aitok m̧okta jen aorōk eo an bukwin wōjke eo kar jino dikļo̧k. Wōjke eo erum̧ij an kar eddōk, jet wōt wōjke ko rekāāl raar jino eddōk, jet menin mour jen wut ko rauwia im menin eddōk ko raar jino jakoļo̧k, im elōn̄ menin mour ko rauwia im bao ko raar mej.

Ke Būratōr Parrott eaar bōk jikin kōjparok bukwin wōjke eo jet iiō ko ļo̧k, eaar kean̄ bwe bukwin wōjke eo eaikuj in pād wōt ilo piktokin jon̄an wōt maron̄. Wōjke ko raar wōtlo̧k im okar ko raar pād wōt n̄an kain̄in̄i im ko̧rļo̧k bwidej eo. Bōlōk ko raar pād wōt ijo raar wōtlo̧k ie. Rilotok ro kar kajjitōk ippāer n̄an pād wōt ilo iaļ ko rekakkōļļe bwe bukwin wōjke eo en jab maron̄ kaapōn̄e im bwidej eo ilowaan bukwin wōjke eo en jab lukkuun kōmtal. Ilowaan wōt jejjo iiō ko, bukwin wōjke eo eaar jino bar jerbal im bar kōkāāl e make ilo juon wāween ejejuwaan. Rainin ej em̧m̧an an eddōk ilo juon jekjek erreo, ippān menin eddōk im juon mour eauwia eobrak.

Ium̧win jiljilimjuon iiō ko kiiō eaar aō jeram̧m̧an n̄an jerbal āinwōt rikōm̧m̧an bwebwenato im rirekoot an Kabun̄ in. En̄in ej juon opiij me eaar kōm̧m̧an jen Rikanaan Joseph Smith ilo uwaak eo n̄an kean̄ eo an Irooj n̄an e ilo raan eo Kabun̄ in eaar ejaak: Irooj eaar kean̄ bwe jej aikuj kōjparok juon rekoot (D&C 21:1). Jān raan in—ijjino kōn ijjitōn̄ eo an Oliver Cowdery āinwōt rikōm̧m̧an bwebwenato im rirekoot an Kabun̄ in im ej wōnm̧aanļo̧k wōt m̧ae iien in— juon rekoot ekabwlōn̄lōn̄ an bwebwenato in Kabun̄ in kar kōjparok e. John whitmer eaar bōk jikin Oliver Cowdery im kar jiron̄ jen Irooj n̄an kōjparok juon bwebwenato. N̄an kōjparok bwebwenato in aolep men ko raorōk ko renaaj n̄an em̧m̧anļo̧k eo an Kabun̄ eo im n̄an diktak in epepen ko me renaaj rūttoļo̧k ioon ānen Zaion (D&C 69:3, 8).

Etke jej kōjparok rekoot im aini, kokņi, im kwaļo̧k kōn bwebwenato rej kōlan̄lōn̄ aorōk rot in ilo Kabun̄ in an Jisōs Kraist? Etke ekauwōtata n̄an kom̧ āinwōt men eo m̧ōttan “diktakin epepen ko” rainin n̄an kōļmenļo̧kjeņ kake im leļo̧k kajoor jān epepen ko ļo̧k?

Ilo uwaak, Ij ļōmņake bwe menin epen n̄an lukkuun mour kake kiiō—ejjab ļap n̄an ekkat n̄an mejān kajjik eo ad ilju im jekļaj—ilo an ejjeļo̧k pedped an tōre eo ļo̧k. M̧ool in eaar bōktok kipel n̄an kōlmenļo̧kjeņ eo am jet allōn̄ ko rem̧ootļo̧k ilo kweilo̧k ippān ruo ripālele rem̧m̧an ro raar en̄jake kapo ejjab lukkuun ekkā an waļo̧k, eo Ij kwaļo̧k e kōn mālim. Ālkin jet iiō in m̧are ko im ļotak an jejjo ajri ro, kōrā eo pālele eaar pād ilo juon kūrāāj eļap. Eaar pād wōt ilo aujpitōļ jejjo allōn̄ ko ilo juon jekjek en̄akļo̧kjeņ. Ke eaar itok, eaar en̄taan kōn juon jajeļo̧kjeņ in ememļo̧kjeņ eo elikio! Eaar jab jeļā jabdewōt. Ilo an ejjeļo̧k, an ememļo̧kjeņ, kōn m̧okta, ejjeļo̧k ippān meļeļe. Eaar jab jeļā ļeo pāleen, ajri ro nejin, ak ro jinen im jemān! Ke ļeo pāleen ej kwaļo̧k bwebwenato in n̄an n̄a, eaar kwaļo̧k bwe ilo allōn̄ ko im̧aan ālkin kūreej eo, eaar inepata bwe kōrā eo pāleen enaaj jōbābwe eļan̄n̄e eban kar etal. Eaar barāinwōt mijak bwe kōrā eo pāleen ej jamin naaj iakwe e bar juon alen. Ilo tōre eo erro ad lo doon, eaar wulio, likao in ikkure eobrak kooļ ibōran. Kiiō, ilo lukwōļpen mour eo an, eaar kilep im ejjab lōn̄ kooļ ibōran!

Ilo m̧ool kōn aolep inepata, men̄e jim̧ettan wōt rekoot eo eaar kōjparoke. Ļeo pāleen eaar kōjparok leta ko eaar jei jen kōrā eo pāleen m̧okta im tōre eo ilo mijen eo an. M̧ool kein raar litok bwe erro ruo raar m̧ool in iakwe doon. Eaar barāinwōt kōjparok juon jōnōļ eo ej kitbuuj wāween jipan̄ ko. Ejjab etto, ium̧win jet iiō ko, kōrā in pāleen eaar ļap ememļo̧kjeņ eo an kōn m̧okta eaar jepļaaktok n̄an e kar kwaļo̧k kōn bwebwenato in jen ro ej akwe.

Jekjek in ejenolo̧k im em̧m̧an ej kōmeļeļeik aorōk eo an jem̧jerā an tōre eo m̧okta n̄an kiiō im n̄an tokālik. Ej jipan̄ kōj eļapļo̧k kautiej meļeļe eo an Irooj kōn m̧ool eo āinwōt eaar waļo̧ktok n̄an Joseph Smith: M̧ool ej jeļāļo̧kjeņ an men otemjej ilo aer pād kiiō, kar mokta, im iien eo ej itok (D&C 93:24). Jeļāļo̧kjeņ eo ewōr ippād kōn tōre ko ad mokta kōnke rekoot ko kar maron̄ kōjparoki, im ilju im jekļaj eo ad kōnke jeje ko rekwojarjar im katak ko an rikanaan ro remour, rej letok n̄an kōj kareel eo mej ej kōtļo̧k jerbal ko rejjejjet kōn anemkwoj eo ad tōre eo jej pād ie kiiō. Ilo juon uwaak, jeļāļo̧kjeņ in ej letok n̄an kōj juon erreilo̧k eo eļapļo̧k kōn anij kōnke ej bōktok n̄an kōj epaakeļo̧k eo n̄an maron̄ eo An n̄an bōk men otemjej rej waļo̧k im̧aan Mejān (D&C 38:2).

Āinwōt membōr ro an Kabun̄ in jān elōn̄ laļ ko, jej aolep kwaļo̧k bwebwenato eo mokta an Kabun̄ in ilo emakijkij. Ej aorōk n̄an kōj aolep n̄an ad jeļā kōn bwebwenato eo kōn Kabun̄ in ad, eļaptata ta eo ej ņaetan “bwebwenato ko jinoin” Bwebwenato kein—Visiōn eo Jinoin an Joseph Smith, itok eo an Bok in Mormon eo, waļo̧ktok eo an enjeļ in lan̄ jen Jon Ri Peptaij, Piter, Jemes, im Jon, Elijah, Elias, im ro jet—rej kitbuuj pedped in m̧ool ko ioon pedped in Jepļaaktok eo an ko̧jpeļ eo.

Jeram̧m̧an, ilo iiō in technological in ijo meļeļe ej waļo̧k eļap ie—jet iaan m̧akūtkūt ko reppen im armej ilo bwebwenato in Kabun̄ in—jet Armej ro Rekwojarjar ilo Raan–ko Āliktata kar jino ebbeer ilo tōmak eo aer im jino kajjitōk tōmak ko etto. N̄an kain kajjitōk rōt kein Ij lewaj aō iakwe im meļeļe im kam̧ool bwe eļan̄n̄e jenaaj mour jen pedped ko an ko̧jpeļ eo im ļoor katak ko an bwebwenato an Kabun̄ in—katak eļap n̄an bōk juon meļeļe eļapļo̧k ijjeļo̧kin juon jeļāļo̧kjeņ ejabwe ak ejjab likio—Jetōb Kwojarjar eo enaaj kapen tōmak eo aer ilo m̧akūtkūt eo eaorōk ilo bwebwenato an Kabun̄ in jen kōnono inem̧m̧an im ļoļātāt. Ilo wāween in remaron̄ in amņak ilo kam̧ool ko ad kōn bwebwenato eo an jepļaaktok eo an Kabun̄ im “jab bar maron̄ … m̧akūtkūt kōn jabdewōt kōto in katak” (Epesōs 4:14). Iaar dumeje iaļ eo an aolepān mour eo aō ioon en̄jake in aenōm̧m̧an eo kōn Visiōn eo an Joseph Smith im m̧akūtkūt ko an jepļaaktok eo an ko̧jpeļ eo an Kabun̄ in, āinwōt elōn̄ iami, im Ijeļā jej jamin naaj inepata.

Bwebwenato eo ilo an epād ilo jekjek eo an epidodo ej juon rekoot in armej ro im mour ko aer, im jān mour ko ej itok bwebwenato ko im katak ko me rej dāpij ta eo jej tōmak ie, ta eo jej jutak kake, im ta eo jej aikuj in kōm̧m̧ane ilo jelm̧ae jerata. Ejjab aolep bwebwenato ko rej ekkōn ad bwebwenato kōn m̧akūtkūt in piktokin Visiōn eo Kein Kajuon an Joseph Smith ak mijen eo an Wilford Woodruff n̄an England. Ilo m̧ool, jet bwebwenato ko rejuwaer rej itok jān mour ko rem̧ool an Armej ro Rekwojarjar ilo Raan–ko Āliktata, me kōj rej aolep. Rej lukkuun jitōn bōro im jipan̄ kōj n̄e bwebwenato ko rej kitbuuj rūtto ro ad make etto.

Ilo jekjek in, ilo 1920 ko jim̧aō im jibū Jensen—raar jerbal awa ko raitok im eppen—raar kipel n̄an kōro̧o̧lļo̧k n̄an ruwiakake eo juon jikin kallib raar wiaki im eo raar mour ie ilo bukwōn eo ilo Idaho. Raar kōņaan in ro̧o̧lļo̧k ippān ajri ro nejier reddik n̄an bukwōn eo aer ilo Utah ak raar jab maron̄ em̧m̧akūt jen Idaho m̧ae raar kōļļāik $350 m̧uri. Menin ej āinwōt juon jon̄an eo edik rainin, ak eaar lukkuun ļap tōre ko. Jim̧a eaar kajjieon̄ m̧urik jāān eo jān em̧m̧aan ro eaar wōr ippāer, ak eaar ejjeļo̧k tōprak. M̧uri jān juon bāān̄ eaar jab kajjitōk eo kōnke eaar ejjeļo̧k m̧weiūk ko aer. E im Būbū raar jar kōn jipan̄ aolep raan. Juon jibbon̄ in Jabōt ilo kweilo̧k eo an priesthood, juon em̧m̧aan Jim̧a eaar jab lukkuun jeļā kajjeen eaar kepaak e im jiron̄ļo̧k e bwe eaar ron̄ inepata eo an im enaaj kam̧urik jim̧a $350 taļa ippān kōtmene eo bwe n̄e Jim̧a ero̧o̧lļo̧k n̄an Utah, enaaj ukōtļo̧k jāān eo n̄an em̧m̧aan eo iien eo wōt. Koņ eo aer eaar dedeļo̧k ippān juon idik pā, im Jim̧a eaar kōjparok naan eo an.

Bwebwenato in ekadu eaar rekoot jen bubu Jensen ej juon menin aorōk an baam̧le eo. Ej im̧we eō jen kōmeļeļeik m̧wil ko an lukkuun jerbal, m̧ool, eļļā ioon jerata, jipan̄ an baam̧le, im eļaptata, eaar kwaļo̧k pā eo pein Anij ilo mour ko an ro jim̧aō im jibu retiljek. Iaar kepaakļo̧k kajoor in eļap im kar rōjan̄ jān waanjon̄ak eo aer im jān waanjon̄ak eo an ro jet, jim̧or ko reļļap im ko rekkā, an epepen ko m̧okta.

Kom̧ maron̄ loe ejja kain bwebwenato rot in ilo āne ko ānemi ilowaan baam̧le ko ami. Ijo rej waļo̧k ie, Ij rōjan̄ kom̧ n̄an aini bwebwenato kein, n̄an kōjparoki, im n̄an kwaļo̧ki. Kōjparoki n̄an jakeļo̧k jān juon epepen n̄an bar juon. Ajri ro nejū (im eļaptata kiiō ro jibū) aolep iien rej iakwe n̄e Ij jiron̄ er bwebwenato ko kōn “iien eo Iaar juon ļaddik jidikdik”! Iaar ron̄jake an waļo̧k menin bwe juon armej ejjab maron̄ ļapļo̧k jen bwebwenato ko an, im Ij tōmak ej barāinwōt m̧ool eo an baam̧le ko. Bwebwenato ko rem̧m̧an—eļan̄n̄e rem̧ool—rej kōm̧m̧ane juon bwebwenato em̧m̧an. Keememej, armej, rej āinwōt wōjke ko, rej kepaak kajoor eo jān ōōn ko kōm̧m̧an jen epepen ko m̧oktaļo̧k.

Kōjem̧ļo̧k

Kiiō, ilo Aō kōjem̧ļo̧k e, Ikōņaan bwe kom̧in ro̧o̧ltok ippa n̄an Bukwin Wōjke eo Ekwojarjar im jutak ippa ijeņ iturin juon iaan wōjke ko ņaetaer “wōjke in kam̧ool” Wōjke kein me raar eddōkļo̧k ilo bukwin wōjke in ium̧win 192 iiō ko ilo iien eo Visiōn eo Kein Kajuon an Joseph Smith. Ewōr jilu iaer rej mour wōt ilo bukwin wōjke eo im jilu wōjke in kam̧ool ko raar mej rej jutak wōt jen jerbal in kijejeto ko rōkapāāl an Būratōr Parrott.

Ke kōm̧ ar jerbale mijen eo am iturin Palmyra, jet iien Ij etal n̄an Bukwin Wōjke eo Ekwojarjar makeļo̧k im jutak ilo kautiej turin wōjke in kam̧ool eo aō em̧m̧an tata. Jet iien Ij kōļmenļo̧kjeņ bwe eļan̄n̄e wōjke in emaron̄ kar kōnono enaaj maron̄ kar jiron̄ eō ta eaar kam̧ool e raan in jibriin̄ eo ilo 1820. Ak Iaar jab lukkuun aikuj bwe wōjke eo en jiron̄ tok eō—em̧ōj aō jeļā kadede. Jen wānōk in en̄jake an jetōb im en̄jake ko jinoin ilo iien jodikdik eo aō im ej wōnm̧aanļo̧k wōt n̄an awa in, Iaar itok n̄an jeļā, m̧akeļo̧k iaaō jān armej ro jet, bwe Anij, Jemād, ej mour. Ijeļā, barāinwōt, bwe Nejin, Jisōs Kraist, ej Rilo̧mo̧o̧r eo im Ripinmuur eo an aolep armej. Ijeļā Armej rein ruo rekwojajarjar raar waļo̧ktok n̄an Joseph Smith ilo Bukwin Wōjke eo Ekwojajarjar ilo jipriin̄ 1820. Raar kotak Joseph āinwōt rikanaan eo jinoin tata an iien in, epepen in āliktata an ko̧jpeļ eo. Jerbal ium̧win tōl kwojarjar eo Aer, Joseph eaar ukōt Bok in Mormon, kar bōk kii ko an priesthood, im ejaak Kabun̄ eo an Kraist bar juon alen ilo raan kein āliktata. Jelukkuun jeram̧m̧an bwe jemaron̄ mour ilo iien in im n̄an erom membōr ro uwaan Kabun̄ in an Kraist.

Aiboojoj kein an m̧ool ko Iaar kam̧ool kaki ewōr jinoer ilo Bukwin Wōjke eo Ekwojarjar. Āinwōt ami kar jutak ippa ilo Bukwin Wōjke eo Ekwojarjar jotenin, kom̧in jutal aolep iien ilo kōļmenļo̧kjeņ ko ami im ilo būruwōmi ilo jikin eo ekwojarjar im mour m̧ool n̄an m̧ool ko me Anij eaar jino kwaļo̧ki ijin.

Kememej, barāinwōt, katak ko an mour me Bukwin Wōjke eo Ekwojarjar ej katakin:

  1. 1.

    N̄e kajoor in maroklep ej pukōt n̄an kakkure kom̧—ilo aer kar juon kōttan kajjieon̄ e Joseph Smith eo edik, jutak ilo Bukwin Wōjke eo Ekwojarjar im kememej juran meram eo, emeram ļo̧k jen meram in aļ ” (lale Joseph Smith—History 1:15–17).

  2. 2.

    N̄e jum̧ae im jerata ej peek ami iaļ im kōjatdikdik ejjab meram eo, jutak ilo Bukwin Wōjke eo Ekwojarjar im kememej bwe men otemjej renaaj lewaj ami en̄jake, im renaaj n̄an em̧m̧anļo̧k eo ami (D&C 122:7).

  3. 3.

    N̄e ajimakeke im makeļo̧k remakijkiji kom̧ im ami kakkōt n̄an ejaake kūrm̧ool in jem̧jerā an armej, jutak ilo Bukwin Wōjke eo Ekwojarjar ippān jukjukinped eo an Armej ro Rekwojarjar ilo Raan–ko Āliktata ro raar kōm̧m̧an bujen n̄an jipan̄ kotak eddodo ko ami im kainōm̧m̧an kom̧ ilo ami aikuj.

  4. 4.

    Im n̄e en̄jake ko ak armej ak m̧ool eo edapitōk ej kapan̄ ami tōmak im kōm̧m̧an pere kōn Jepļaaktok eo an ko̧jpeļ eo an Jisōs Kraist, jutak ilo Bukwin Wōjke eo Ekwojarjar im bōk kajoor im rōjan̄ jān epepen eo an Armej ro Rekwojarjar ilo Raan–ko Āliktata ro retiljek ro raar dim jutak wōt ijin m̧okta jen kom̧.

En̄in ej jar eo aō kōn kom̧, ro jera reddik, im Ij lewaj menin kōn iakwe im ilo etan Jisōs Kraist, amen.

© 2012 jen Intellectual Reserve, Inc. Aolep jim̧we rej pād ippān. Kōmālim ilo kajin English: 5/12. Kōmālim ukook eo: 5/12. Translation of Stand in the Sacred Grove.Language. PD50039048 874

Show References

    Kakeememej ko

  1.  

    1.  Hymns, no. 26.

  2.  

    2. Lale Bible Dictionary, “Atonement”; lale barāinwōt Guide n̄an Scriptures, “Atone, Atonement,” scripture.lds.org.