Mi Bin Luk Han blong God Finis long Laef blong Mi?

Sista Susan Bedna

JES Divosen blong Ol Yang Adalt • 3 Maj 2013 • Yunivesiti blong Teksas Arlington CES

Taem mi stap travel raon long wol wetem hasban blong mi, mi sore blong luk se plante yang pipol oli filim se oli stap olgetawan nomo mo no ting se Lod i save, o we i lavem olgeta wanwan. Mi bin prea from ol prinsipol we bae mi save tokbaot tedei long naet we bae i helpem yu save se Lod i save yu mo lavem yu. Mi prea from help blong Spirit taem mi stap givimaot mesej ia.

Bae mi yusum ol toktok blong wan singsing blong seminari olsem plan blong toktok blong mi:

Yumi mas gat ol sora blong harem toktok blong Lod,
Mo ol ae blong luk plan blong Hem,
Ol leg blong folem rod blong Hem,
Mo ol hat blong andastanem
(Steven K. Jones, “Hearts that Understand,” Hold to the Rod Songbook [1988], 20)

Ol Sora blong Harem Toktok blong Lod

Fastaem, yumi mas gat ol sora blong harem toktok blong Lod. Yumi save harem voes blong Lod taem yumi stadi olgeta skripja (luk long D&C 18:34–36). Taem mi bin gat sem yia long yufala, Spensa W. Kimbol i bin Presiden blong Jos. Wan kwot blong hem i bin gaedem mi truaot long laef blong mi. “Hem i talem: Mi bin faenem se taem mi no tekem series rilesensip blong mi wetem God, mo taem God i no stap lisin mo toktok long mi, hemia, mi stap longwe. Sapos mi stadi long ol skripja oltaem mo wetem wan tru hat, bae mi kam moa kolosap mo fasin long saed blong spirit i kambak.” (Teachings of Presidents of the Church: Spencer W. Kimball [2006], 67).

Mi testifae se sapos yumi gat ol sora blong harem toktok blong Lod, bae yumi filim lav blong Hem taem Hem i toktok long yumi tru olgeta skripja.

Ol Ae blong Luk Plan blong Hem

Nambatu, yumi mas gat ol ae blong luk plan blong Hem. Wan dei, mi bin stap tingbaot wan riten misinari we mi bin save hem, mo sek se mi bin kasem wan imel long hem. Hem i bin talem long mi olsem wanem hem i bin filim se Lod i bin mekem ol merikel taem hem i stap long misin, be taem hem i bin kambak hom, hem i stap tingting samtaem sapos Lod i bin save gud abaot hem.

Long ansa blong mi long hem, mi bin serem sam impoten kaonsel we Elda Henri B. Aering i bin mekem long ol studen blong BYY-Aedaho. Hem i talem: “Mi blesem yu evri dei, sapos yu askem long prea blong Hem i soem long yu ples we han blong God i stap long hem long laef blong yu long dei ia, mi blesem yu se bae yu luk. Bae i soem long yu. Se bae yu luk se Hem i lidim mo gaedem mo leftemap yu, mo we Hem i save yu” (“A Steady, Upward Course” [Brigham Young University–Idaho devotional, Sept. 18, 2001], web.byui.edu/devotionalsandspeeches).

Afta mi eksplenem olsem wanem mi bin prea evri dei from blesing ia mo bin luk han blong God we i kam blong tajem mi tru ol gudfala tingting we hem i raetem. Mo mi talem tru long hem se Papa long Heven bae i mekem semmak long hem.

Mi testifae, se taem yumi prea blong gat ol ae blong luk plan blong Hem, bae yumi kam blong save gud hao God i stap long ol laef blong yumi mo save se Hem i save yumi.

Ol Leg blong Folem Rod blong Hem

Nambatri, yumi mas gat ol leg blong folem rod blong Hem. Plante long ol yang adalt i no hapi, mo lusum hop mo karej from ol samting we oli ting se bae i hapen long ol laef blong olgeta, i no hapen yet. Sam oli mistek blong biliv se sapos God i no givim olgeta glad o ol blesing we oli hop blong kasem o we oli sud gat, i soem se Hem i no kea. Blong soem se oli no glad wetem God, sam oli lusum fet, oli no respektem ol kavenan blong olgeta, putum ol tras blong olgeta long ol samting blong wol, mo nomo wantem dipen long God be olgetawan nomo. Sapos nomo oli gat ol leg blong folem rod blong stret mo gud fasin, be no, oli kamaot long gospel plan, go folem laef long wol mo go lus. Yumi evriwan i save wan we i “no stap long rod”. Yumi save filim lav blong God long ol laef blong yumi taem yumi luk ol gudfala fasin blong plante man mo yumi go aot blong givim seves mo blong sevem man.

Rod blong Lod, ol profet, sia mo reveleta oli bin makem i klia tru ol tijing blong olgeta. Long nekis manis hem i jeneral konfrens. Mi testifae se, sapos yumi lukaot wetem prea wan kwestin o wari blong yumiwan, Lod bae i ansarem yumi tru ol mesej blong wokman blong Hem we Hem i jusum. Bae yumi filim lav mo wari blong Hem mo mekem se i gat plante strong paoa long tingting mo strong leg blong folem rod blong Hem naoia mo blong oltaem.

Ol Hat blong Andastanem

Nambafo, yumi nidim ol hat blong andastanem presen blong Atonmen blong Jisas Kraes. Elda Bedna i bin tijim: “Hem i wan samting blong save se Jisas Kraes i bin kam long wol blong ded from yumi—hemia i stamba mo fandesen blong doktrin blong Kraes. Be yumi nidim tu blong stap glad tu from Lod i wantem tumas, tru long Atonmen blong Hem mo tru paoa blong Tabu Spirit, blong stap laef insaed long yumi—i no blong lidim yumi nomo be blong givim paoa long yumi tu” (“The Atonement and the Journey of Mortality,” Ensign, Epril 2012, 42)..

Long mi, Atonmen blong Jisas Kraes i givim kamfot long wanwan man mo wan strong pruf from lav blong God long yumi. Hem i mekem yumi kam moa strong blong mekem ol samting we i had—ol samting we yumi no ting se yumi save mekem. Hem i helpem yumi blong stap strong taem yumi no andastanem tingting mo taem blong God long ol laef blong yumi. Mi testifae se God i stap laef, mo bae yumi filim lav blong Hem mo save se Hem i save yumi taem yumi givim hat blong yumi blong andastanem moa fulwan ol blesing blong Atonmen blong Pikinini blong Hem, Jisas Kraes.

Yumi mas gat ol sora blong harem toktok blong Lod,
Mo ol ae blong luk plan blong Hem
Ol laef blong folem rod blong Hem,
Mo ol hat blong andastanem.
(Jones, “Hearts that Understand,” 20)

Long nem blong Jisas Kraes, amen.

© 2013 i kam long Intellectual Reserve, Inc. Oli holem evri raet. Oli letem long Inglis: 8/12. Oli letem translesen: 8/12. Translesen blong Have I Seen the Hand of God in My Life? Bislama. PD50045417 852