ព្រះយេស៊ូវ គឺជាព្រះគ្រីស្ទ — ដែលជាម្ចាស់នៃមេត្រីភាពរបស់យើង ។
បងប្អូនប្រុសស្រីជាទីស្រឡាញ់ នេះជាបទពិសោធន៍ដ៏អស្ចារ្យណាស់ ។ តន្ត្រីបានប្រគុំយ៉ាងពិរោះបំផុត ហើយសារលិខិតនានា បានបណ្ដាលឲ្យដួងចិត្តរបស់យើងបានស្កប់ស្កល់ ។ អារម្មណ៍នៃបុណ្យគ្រីស្ទម៉ាស ធ្វើឲ្យព្រលឹងរបស់យើងរំជើបរំជួលណាស់ !
អនុស្សាវរីយ៍នៃបុណ្យគ្រីស្ទម៉ាស នាំឲ្យយើងចងចាំពីក្រុមគ្រួសារ អំណោយ និងការបម្រើគ្នាទៅវិញទៅមក ។ ទាំងនេះ គឺជាមូលហេតុដ៏ពិតនៃបុណ្យគ្រីស្ទម៉ាស ដែលសំខាន់ជាងគេនោះជាអំណោយ ដែលព្រះវរបិតាសួគ៌បានប្រទានឲ្យ ។ « ដ្បិតព្រះទ្រង់ស្រឡាញ់មនុស្សលោកដល់ម្ល៉េះ បានជាទ្រង់ប្រទានព្រះរាជបុត្រាទ្រង់តែមួយ ដើម្បីឲ្យអ្នកណាដែលជឿដល់បុត្រនោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ » ។ 1
ការផ្ដោតអារម្មណ៍លើព្រះអម្ចាស់ និង ជីវិតអស់កល្បជានិច្ច អាចជួយយើងពុំមែនគ្រាន់តែនៅពេលបុណ្យគ្រីស្ទម៉ាសនោះទេ គឺជួយយើងលុយកាត់ឧបសគ្គនានានៃជីវិតរមែងស្លាប់ ។ មនុស្សពុំល្អគ្រប់លក្ខណ៍រស់នៅលើពិភពលោកជាមួយនឹងមនុស្សពុំល្អគ្រប់លក្ខណ៍ដទៃទៀត ។ ពិភពរបស់យើង គឺជាពិភពមួយធ្លាក់ ដែលត្រូវបានទម្លាក់ដោយបំណុលដ៏ច្រើនហួសប្រមាណ សង្គ្រាម គ្រោះធម្មជាតិ ជំងឺឆ្លង និងមរណភាព ។
ឧបសគ្គផ្ទាល់ខ្លួនកើតមាន ។ ឪពុកម្នាក់អាចបាត់បង់ការងារ ។ ម្ដាយវ័យក្មេងអាចធ្លាក់ខ្លួនឈឺធ្ងន់ ។ កូនប្រុស ឬ កូនស្រីម្នាក់ អាចវង្វេងដើរផ្លូវខុស ។ ទោះអ្វីក៏ដោយដែលបណ្ដាលឲ្យមានការព្រួយបារម្ភនោះ យើងម្នាក់ៗប្រាថ្នាចង់បានមេត្រីភាពក្នុងចិត្ត ។
សារលិខិតរបស់ខ្ញុំនាល្ងាចនេះ ស្ដីពីប្រភពនៃមេត្រីភាពដ៏ពិត និង ជានិរន្តរ៍ ព្រះយេស៊ូវ គឺជាព្រះគ្រីស្ទ — ដែលជាម្ចាស់នៃមេត្រីភាពរបស់យើង ។ 2 ងារមួយនេះត្រូវបានតាំងឡើងបន្ថែមលើងារដទៃៗទៀត ដែលទ្រង់ត្រូវតាំងឡើងតាំងពីមុនផែនដីមកម្ល៉េះ ។
ទ្រង់ត្រូវបានចាក់ប្រេងតាំងដោយព្រះវរបិតាទ្រង់ ដើម្បីធ្វើជាព្រះអង្គសង្គ្រោះនៃមនុស្សលោក ។ ងារទាំងពីរនេះគឺ — ព្រះមែស៊ី និង ព្រះគ្រីស្ទ — ដែលកំណត់ដែនទំនួលខុសត្រូវរបស់ទ្រង់ថា ជាមួយអង្គដែលត្រូវបានចាក់ប្រេងតាំង ។ 3
នៅក្រោមព្រះរាជកិច្ចដឹកនាំរបស់ព្រះវរបិតាទ្រង់ ព្រះយេស៊ូវ គឺជាព្រះដ៏បង្កបង្កើតនៃផែនដីនេះ និង ពិភពដទៃៗទៀត ។ 4 ព្រះយេស៊ូវ គឺជាអង្គគាំទ្រយើងនៅចំពោះព្រះវរបិតា ។ 5 ព្រះយេស៊ូវគឺជា អេម៉ាញូអែលដែលត្រូវបានសន្យាថានឹងយាងមក 6 យើងជាព្រះដ៏ជាព្រះ និង ជាព្រះយេហូវ៉ាក្នុងជំនាន់សម្ព័ន្ធមេត្រីចាស់ ។ 7
ទ្រង់ត្រូវបានបញ្ជូនដោយព្រះវរបិតាទ្រង់ ដើម្បីសម្រេចបានដង្វាយធួន ដែលជាកត្តាមួយដ៏សំខាន់សម្រាប់ប្រវត្តិសាស្ត្រមនុស្សលោក ។ ដោយសារតែដង្វាយធួនរបស់ទ្រង់ ជីវិតរមែងស្លាប់បានក្លាយជាជីវិតមួយដ៏ពិត សម្រាប់មនុស្សទាំងពួង ហើយជីវិតដ៏នៅអស់កល្បជានិច្ច អាចមានដល់អស់អ្នកទាំងឡាយណាដែលជ្រើសដើរតាមទ្រង់ ។ 8 ទិសដៅទាំងនេះគឺជាកិច្ចការ និង សិរីល្អនៃព្រះដ៏មានមហិទ្ធិឫទ្ធិ ។ 9
ព្រះយេស៊ូវ បានធ្វើជាគំរូមួយដ៏អស្ចារ្យសម្រាប់យើង ដោយបានបង្រៀនពីរបៀបរស់នៅ ស្រឡាញ់ និងសិក្សារៀនសូត្រ ។ ទ្រង់បានបង្រៀនយើងពីរបៀបអធិស្ឋាន អភ័យទោស និង កាន់ខ្ជាប់ដរាបដល់ចុងបំផុត ។ 10
ទ្រង់បានបង្រៀនយើងពីរបៀបខ្វាយខ្វល់ពីមនុស្សដទៃឲ្យច្រើន ជាងយើងខ្វាយខ្វល់ពីខ្លួនឯង ។ ទ្រង់បានបង្រៀនយើងពីសេចក្តីមេត្តាករុណា និងសណ្ដានចិត្តល្អ — ដែលធ្វើការផ្លាស់ប្ដូរនៅក្នុងជីវិតរស់នៅយើង តាមរយៈព្រះចេស្ដារបស់ទ្រង់ ។ ទ្រង់បានបង្រៀនយើងពីរបៀបស្វែងរកមេត្រីភាពក្នុងចិត្ត និង គំនិត ។ នៅថ្ងៃណាមួយ ពួកយើងនឹងឈរនៅចំពោះព្រះភក្រ្តទ្រង់ក្នុងនាមទ្រង់ជាចៅក្រមដ៏យុត្តិធម៌ និង ជាមេសម្រេចក្ដីដ៏ប្រកបដោយមេត្តាធម៌ ។ 11
ព្រះរាជកិច្ចទំនួលខុសត្រូវដ៏ពិសិដ្ឋទាំងនេះរបស់ព្រះអម្ចាស់ នាំឲ្យយើងគោរពបូជាទ្រង់ជាម្ចាស់នៃមេត្រីភាពដ៏មិនចេះផុតរលត់នៃយើង ។ យើងសរសើរតម្កើងទ្រង់សម្រាប់ឯកសិទ្ធយើងជាឪពុកម្ដាយ ជីដូនជីតា និងជាគ្រូបង្រៀននៃកូនចៅ ។
រដូវបុណ្យគ្រីស្ទម៉ាស ជាពេលវេលាដ៏មានតម្លៃសម្រាប់ក្រុមគ្រួសារ ។ ពេលវេលានៅជាមួយក្រុមគ្រួសារគឺជាពេលវេលាដ៏ពិសិដ្ឋ ។ ពួកយើងអាចជួយកូនៗរបស់យើងត្រឡប់ទៅរកព្រះអង្គសង្គ្រោះ ។ តន្ត្រីអាចជួយយើងបាន ។ កូនៗរបស់យើងចូលចិត្តច្រៀងបទ « ខ្ញុំព្យាយាមក្លាយដូចព្រះយេស៊ូវ » 12
ព្រះយេស៊ូវបានមានបន្ទូលថា « ទុកឲ្យកូនក្មេងមកឯខ្ញុំចុះ កុំឃាត់វាឡើយ ដ្បិតនគរស្ថានសួគ៌មានសុទ្ធតែមនុស្សដូចវារាល់គ្នា » ។ 13
ទ្រង់អាចនាំសេចក្ដីសុខសាន្តដល់អ្នកដែលមានជីវិតត្រូវបានញាំញីដោយសង្គ្រាម ។ គ្រួសារជាច្រើនត្រូវរំខានដោយករណីយកិច្ចយោធា បានបន្សល់ទុកនូវអនុស្សាវរីយ៏សង្គ្រាម ដែលដក់ជាប់ក្នុងចិត្តខ្ញុំអំឡុងសង្គ្រាមនៅប្រទេស កូរ៉េ ។
សង្គ្រាមនៅសម័យយើងនេះមានសភាពកាន់តែជឿនលឿន ហើយនៅតែធ្វើឲ្យគ្រួសារបែកបាក់ ។ អ្នកដែលរងទុក្ខអាចបែកមករកព្រះអម្ចាស់បាន ។ សារលិខិតទ្រង់ជាសារលិខិតលួងចិត្តនៃមេត្រីភាពលើផែនដី និង ក្ដីសុខដល់មនុស្សលោក ។ 14
មេត្រីភាពអាចកើតមានដល់អ្នកដែលមានអារម្មណ៍សោកសៅ ។ រាងកាយខ្លះមានរបួស ។ មនុស្សដទៃទៀតពើតផ្សាខាងវិញ្ញាណដោយហេតុតែការបាត់បង់មនុស្សជាទីស្រឡាញ់ ឬ ការប៉ះទង្គិចខាងអារម្មណ៍ ។ បងប្អូនប្រុសស្រី មេត្រីភាពអាចកើតមានដល់ព្រលឹងអ្នក ពេលអ្នកស្ថាបនាក្ដីជំនឿលើម្ចាស់នៃមេត្រីភាព ។
« តើនៅក្នុងចំណោមអ្នករាល់គ្នាមានអ្នកណាឈឺទេ ? ចូរនាំអ្នកទាំងនោះមកទីនេះចុះ ។ តើមាននរណាខ្វិន ឬខ្វាក់ ឬគ ឬបាក់ដៃបាក់ជើង ឬឃ្លង់ ឬស្ពឹកស្រពន់ ឬថ្លង់ … ឬក៏ត្រូវរងទុក្ខដោយហេតុណាផ្សេងទៀត ? ចូរនាំពួកគេមកទីនេះចុះ ហើយយើងនឹងប្រោសឲ្យពួកគេបានជា » ។ 15
« ដ្បិតយើងឃើញថា សេចក្ដីជំនឿរបស់អ្នករាល់គ្នាល្មមគ្រប់គ្រាន់ ដើម្បីឲ្យយើងប្រោសអ្នកឲ្យបានជាហើយ » ។ 16
មេត្រីភាពអាចកើតមានដល់បុគ្គលម្នាក់ដែលឈឺចាប់ដោយទុក្ខព្រួយ ។ ទោះជាទុក្ខព្រួយកើតចេញពីកំហុស ឬ អំពើបាបក្ដី ក៏ព្រះអម្ចាស់មានព្រះទ័យតម្រូវឲ្យមានការប្រែចិត្ត ។ បទគម្ពីរអង្វរយើងឲ្យ « រត់ [ ពី ] សេចក្ដីស្រើបស្រាលរបស់យុវវ័យចេញ … [ ហើយ ] អំពាវនាវដល់ព្រះអម្ចាស់អំពីចិត្តដ៏បរិសុទ្ធវិញ » ។17 ក្រោយមក « ប្រទាលមុខសះនៅស្រុកកាឡាត » អាចប្រោសព្រលឹងដែលរងទុក្ខដោយអំពើបាប ។ 18
សូមគិតពីការផ្លាស់ប្ដូរចិត្តរបស់ ចន ញូវតុន កើតនៅទីក្រុង ឡុងដ៏ ក្នុងឆ្នាំ 1725 ។ គាត់ប្រែចិត្តពីជីវិតពេញដោយបាបជាឈ្មួញលក់ទាសករ ហើយក្លាយជាសាសនាចារ្យនិកាយអែងហ្គ្លិកខេន ។ ដោយមានការផ្លាស់ប្តូរចិត្តគំនិតដ៏ខ្លាំងនោះ ចន បានសរសេរទំនុកតម្កើង « ព្រះគុណអស្ចារ្យ » ។
ព្រះគុណអស្ចារ្យ ! ជាស័ព្ទពិរោះ
ដែលប្រោសមនុស្សយ៉ាងដូចខ្ញុំ ។
ពីដើមបាត់បង់ តែទ្រង់សង្គ្រោះ
ក៏ខ្វាក់ តែទ្រង់អប់រំ ។ 19
« នៅស្ថានសួគ៌នឹងមានសេចក្ដីអំណរយ៉ាងនោះដែរ ដោយសារមនុស្សបាបតែម្នាក់ដែលប្រែចិត្តវិញ » ។ 20
មេត្រីភាពអាចកើតមានដល់អ្នកដែលនឿយព្រួយមានបន្ទុកធ្ងន់ ៖
« អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក ។
« ចូរទទួលនឹមខ្ញុំ ហើយរៀននឹងខ្ញុំចុះ ដ្បិតខ្ញុំស្លូត ហើយមានចិត្តសុភាព នោះអ្នករាល់គ្នានឹងបានសេចក្ដីសម្រាកដល់ព្រលឹង ។
« ពីព្រោះនឹមខ្ញុំងាយទេ ហើយបន្ទុកខ្ញុំក៏ស្រាល » ។ 21
មេត្រីភាព អាចកើតមានដល់អ្នកដែលយំសោក ។ ព្រះអម្ចាស់បានបន្ទូលថា « មានពរហើយ អស់អ្នកដែលយំសោក ៖ ដ្បិតអ្នកទាំងនោះ នឹងបានសេចក្ដីកម្សាន្តចិត្ត » ។ 22 ពេលយើងទ្រាំឈឺចាប់ដោយបាត់បង់មនុស្សជាទីស្រឡាញ់ យើងអាចពេញដោយមេត្រីភាពនៃព្រះអម្ចាស់ តាមរយៈការខ្សឹបប្រាប់របស់ព្រះវិញ្ញាណ ។
« អ្នកណាដែលស្លាប់ក្នុងយើង នោះនឹងមិនត្រូវភ្លក់សេចក្ដីស្លាប់ឡើយ ដ្បិតសេចក្ដីស្លាប់នឹងបានទៅជាសេចក្ដីផ្អែមល្ហែមដល់ពួកគេវិញ » ។ 23
« ខ្ញុំទុកសេចក្ដីសុខនៅនឹងអ្នករាល់គ្នា គឺខ្ញុំឲ្យសេចក្ដីសុខសាន្តរបស់ខ្ញុំដល់អ្នករាល់គ្នា ហើយដែលខ្ញុំឲ្យនោះមិនមែនដូចជាលោកិយឲ្យទេ កុំឲ្យចិត្តអ្នករាល់គ្នាថប់បារម្ភ ឬភ័យឡើយ » ។24
« ខ្ញុំជាសេចក្ដីរស់ឡើងវិញ ហើយជាជីវិត អ្នកណាដែលជឿដល់ខ្ញុំទោះបើបានស្លាប់ហើយ គង់តែនឹងរស់ឡើងវិញដែរ ៖
« ឯអ្នកដែលរស់នៅ ហើយជឿដល់ខ្ញុំ នោះមិនត្រូវស្លាប់ឡើយ » ។ 25
មេត្រីភាព អាចកើតមានដល់អ្នកដែលស្វះស្វែងរកម្ចាស់នៃមេត្រីភាពដោយអស់ពីចិត្ត ។ សារលិខិតទ្រង់ជាសារលិខិតផ្អែមល្ហែម និងសង្គ្រោះ ដែលអ្នកផ្សាយសាសនាយើងប្រកាសពេញពិភពលោក ។ គេផ្សាយដំណឹងល្អនៃព្រះយេស៊ូវគ្រីស្ទដែលបានស្ដារឡើងវិញ តាមរយៈព្យាការី យ៉ូសែប ស៊្មីធ ។26 អ្នកផ្សាយសាសនា បង្រៀនបន្ទូលព្រះអម្ចាស់ដែលផ្លាស់ប្ដូរជីវិតនេះថា ៖ « បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តិរបស់ខ្ញុំចុះ » ។ 27
មេត្រីភាព អាចកើតមានដល់អ្នកជ្រើសដើរតាមមាគ៌ារបស់ព្រះ ។ ការអញ្ជើញរបស់ទ្រង់ ត្រូវបានស្ដែងក្នុងបន្ទូលប្រាំម៉ាត់ថា ៖ « ចូរ មកតាមខ្ញុំចុះ » ។ 28
យើងនឹងច្រៀងសរសើរម្ចាស់នៃមេត្រីភាព 29 ដ្បិតទ្រង់នឹងយាងមកម្ដងទៀត ។ នោះ « សិរីល្អនៃព្រះយេហូវ៉ានឹងសម្ដែងមក គ្រប់មនុស្សទាំងឡាយនឹងបានឃើញព្រមគ្នា » ។ 30 ដោយជាព្រះមែស៊ីនៃសហសវត្សរ៍ ទ្រង់នឹងជាស្ដេចលើអស់ទាំងអស់ទាំងស្ដេច ជាព្រះអម្ចាស់លើអស់ទាំងព្រះអម្ចាស់ ។ 31
ពេលយើងដើរតាមព្រះយេស៊ូវគ្រីស្ទ ទ្រង់នឹងនាំយើងទៅនៅនឹងទ្រង់ និង ព្រះវរបិតាសួគ៌យើងជាគ្រួសារមួយ ។ ការឆ្លងកាត់ឧបសគ្គជាច្រើនរបស់យើងក្នុងជីវិតរមែងស្លាប់ បើយើងនៅតែស្មោះត្រង់នឹងក្ដីសញ្ញានានាដែលយើងធ្វើ បើយើងកាន់ខ្ជាប់ដល់ចុងបំផុត នោះយើងនឹងមានគុណសម្បត្តិគ្រប់គ្រាន់ចំពោះអំណោយមហិមាជាងអ្វីទាំងអស់ពីព្រះ គឺជាជីវិតអស់កល្ប ។ 32 ក្នុងវត្តមានដ៏បរិសុទ្ធទ្រង់ គ្រួសារយើងអាចរួមរស់ជានិរន្តរ៍ ។
បងប្អូនប្រុសស្រីជាទីស្រឡាញ់ខ្ញុំអើយ សូមឲ្យព្រះប្រទានពរដល់អ្នក ! សូមឲ្យបុគ្គលម្នាក់ៗមានបុណ្យគ្រីស្ទម៉ាសដ៏រីករាយ ! ហើយសូមឲ្យអ្នក និងមនុស្សជាទីស្រឡាញ់របស់អ្នក រីករាយនឹងព្រះពរព្រះអម្ចាស់របស់យើងជាដរាប — ដែលជាម្ចាស់នៃមេត្រីភាព — ខ្ញុំសូមអធិស្ឋានក្នុងព្រះនាមព្រះយេស៊ូវគ្រីស្ទ អាម៉ែន ។