Mga Debosyonal sa Pasko
Ang Tinuod nga Kalipay sa Pasko


Ang Tinuod nga Kalipay sa Pasko

Hinigugma kong mga kaigsoonan, akong kalipay nga gikauban kamo karon samtang nagsaulog kita, pinaagi sa pulong ug awit, sa pagkatawo sa atong Manluluwas ug Manunubos—gani si Jesukristo, ang Ginoo.

Ang Pasko usa ka mahimayaong panahon sa tuig. Panahon usab kini nga busy ang kadaghanan nato. Akong panghinaut ug pag-ampo nga unta dili kita masubrahan sa pagpangandam niini nga kapaskohan nga mahatagan na hinoon nato og importansya ang sayop nga mga butang ug kalimtan ang simpol nga mga kalipay sa pagsaulog sa pagkatawo sa Usa nga Balaan sa Betlehem.

Ang pagpangita sa tinuod nga kalipay sa Pasko dili moabut sa pagdali-dali aron mas daghan ang mahuman. Atong makaplagan ang tinuod nga kalipay sa Pasko kon ang Manluluwas maoy himoon natong sentro sa kapaskohan.

Natawo sa kwadra, giduyan sa pasungan, mianhi Siya gikan sa langit sa pagpuyo sa yuta isip mortal nga tawo ug pag-establisar sa gingharian sa Dios. Ang mahimayaon Niya nga gugma mibag-o sa panghunahuna sa kalibutan. Nagpakabuhi Siya alang nato, ug namatay alang nato. Kita, unsa kaha ang atong ikahatag agig balus Kaniya?

Ganahan ko sa mga pulong nga gisulat sa Ingles nga magbabalak si Christina Rossetti:

Unsay akong ikahatag Kaniya,

Ako nga kabus?

Kon usa pa ko ka magbalantay

Magdala ko og nati nga karnero.

Kon usa pa ko ka Mago

Mobuhat ko sa akong bahin,

Pero unsay akong ikahatag Kaniya?

Ang akong kasingkasing.1

Sa atong pagsaulog sa Pasko kinahanglan nga kini usa ka pagpamalandong sa gugma ug walay paghinakog nga maoy gitudlo sa Manluluwas. Ang paghatag, dili pagdawat, maoy magpahingpit sa espiritu sa Pasko. Mas magmabination kita sa usag usa. Uban sa gugma atong tabangan ang mga nagkalisud. Mahumok ang atong kasingkasing. Mga kaaway mapasaylo, mga higala mahinumduman, ug ang Dios masunod. Ang diwa sa Pasko mosanag sa bintana sa kalag, ug atong makita ang busy nga kinabuhi sa kalibutan ug mobati nga mas importante ang tawo kay sa mga butang. Sa pag-angkon sa tinuod nga diwa sa Pasko, gikinihanglan ra nga ilisan ang katapusang pulong, ug mahimo na kining Espiritu ni Kristo.

Si Presidente David O. McKay miingon: “Ang tinuod nga kalipay moabut lang pinaagi sa paglipay sa uban—sa tinuorayng paggamit sa doktrina sa Manluluwas bahin sa pagwagtang sa kaugalingong kinabuhi aron maangkon kini . Sa pagmubo, ang espiritu sa Pasko mao ang espiritu ni Kristo, nga mopalambo sa atong kasingkasing sa inigsoong gugma ug pakighigala ug modasig kanato alang sa mabinationg pagserbisyo.

“Ang espiritu sa ebanghelyo ni Jesukristo, ang pagsunod niini maoy magdala og ‘kalinaw sa yuta,’ kay nagpasabut kini nga—panagdait sa mga tawo.”2

Hinaut nga mohatag kita sama sa hinatagan sa Manluluwas. Sa pagtugyan sa kaugalingon isip balaang gasa. Mohatag kita isip usa ka pahinumdom sa tanang gihatag sa Manluluwas. Hinaut nga kita mohatag sab og mga gasa nga may mahangturong bili, kauban sa atong mga gasa nga mangabuak ra o makalimtan ra. Pagkadako kaha sa kaayohan niini sa kalibutan kon tanan kita mohatag og gasa sa panabut ug kalooy, pagserbisyo, ug pakighigala, kamabination ug kaaghop.

Samtang ang Kapaskohan moputos kanato sa tanan niining himaya, hinaut nga kita, sama sa mga Mago, mangita sa sanag, tinuorayng bitoon nga mogiya kanato sa atong pagsaulog sa pagkatawo sa Manluluwas. Hinaut nga kitang tanan mobiyahe ngadto sa Betlehem uban sa espiritu, nga magdala sa malumo, mabinationg kasingkasing isip atong gasa sa Manluluwas.

Akong mga kaigsoonan, hinaut nga ang tanan makabaton og puno sa kalipay nga Pasko. Pangandoy ko kini ug pag-ampo, sa sagradong pangalan sa atong Manluluwas, si Jesukristo, amen.

Mubo nga mga sulat

  1. Sa Jack M. Lyon ug uban pa, eds., Best-Loved Poems of the LDS People (1996), 166–67.

  2. David O. McKay, Gospel Ideals (1953), 551.