Ta eo ej Waļo̧k Tokālik?

Meri Kūrijmōj!

En̄in ej season in Kūrijm̧ōj, im ajri ro rej jipan̄ bōktok lem̧ōņōņō in Kūrijm̧ōj n̄an būruwōd. Jej jerwane juon men eļan̄n̄e jejjab lale Kūrijm̧ōj āinwōt an ajri ro lale, bwe ajri ro rej ļait ko, rej ron̄jake al, im rej āt bwiin melu in wōjke in Kūrijm̧ōj im tōn̄al ko kōn m̧ool in laudin̄din̄. Jej lo jepā ko rebūrōrō im bo̧ti ko reddik ņae wintō kūlaj ko an im̧ōn wia eo ilo aer ettōņak kōn jibbon̄ in Kūrijm̧ōj, im addi jiddik ko peier rej bwini raan ko m̧ae 25 in Tijem̧ba. Ro jinen im jemen rej barāinwōt bōnbōn raan ko m̧ae 25 raan in Kūrijm̧ōj. Rej ettōņak kōn aer pojak n̄an jibbon̄ in Kūrijmōj āinwōt aer karōk im kōm̧m̧ani menin leļo̧k ko n̄an ajri ro nejier.

Ke iaar juon ajri, jinō ekkā an kiij juon menin letok an Kūrijm̧ōj n̄an eō im leddik boo ro jatū. Ekōn kijon̄ kōpooj mejin eo an ilo ruum̧ in kiki eo an im jino jerbal eo juon allōn̄ m̧okta ļo̧k, eaar kanooj kiil kōjām in ruum̧ in kiki eo ilo an kar jerbal. Ke raan in Kūrijm̧ōj eaar epaaktok ekōn kijon̄ keke in jota ļo̧k m̧ae bon̄. Ke men ko raar nan̄in dedeļo̧k—ijjelo̧kin jon̄e n̄an kōm̧ im kōkaļļeik aetokier n̄an aer jejjet—ekōn̄ kijon̄ kōm̧m̧ane juon karōk n̄an dāpij wōt menin letok ko an n̄an kōm̧. En̄in ej unin an pinej mejām juon illo̧k juon, bōk kōm n̄an ruum̧ in kiki eo an, im kanuknuk kōm kōn men eo ilōn̄ in bōram, iien otemjej lukōj wōt mejām. Kiiō ekanooj em̧m̧an an jerbal … ijjello̧kin iien eo taļboon eo eaar jan̄ ilo ruum̧ eo juon.

Naan ko an ke ej ilo̧k, “Inaaj bar ro̧o̧ltok, im jab lale.” Komaron̄ kajjitōk, “Ta eo enaaj waļo̧k tokālik?”

Inaaj jiron̄ kom̧: eaar juon jumper ebūrōrō emeeoeo.

In kwaļo̧k ekōjkan kajjitōk eo, “Ta eo eaar waļo̧k tokālik?” eaar wōr meļeļe in Kūrijm̧ōj em̧ool.

Eaar waļo̧k ilo juon rālepen raan in Tijem̧ba ke Amy Johnston, juon Cub Scout den leader ilo Gilbert, Arizona, kar bōk iien eo em̧m̧an n̄an katakin juon kumi in ļaddik ro rem̧m̧an ded ralitōk aer iiō kōn ļotak eo an Jisōs. Eaar en̄jake bwe en likūt m̧akūtkūt eo an Scout eo me eaar karōke im kōnono n̄an Cub Scout ro kōn Kūrijm̧ōj eo kein kajuon. Eaar aiin ļaddik ro ipeļaakin ilo ruum̧ eo an baam̧le eo an im riiti jet eoon ko jān jeje ko rekwojarjar ilo an kōjerbal pija ko n̄an jipan̄ kwaļo̧k bwebwenato eo ekwojarjar kōn Meri im Josep, im seperd ro, iju eo, im an ļotak nin̄nin̄ eo Jisōs ilo jikin kweilo̧k Betleem.

Eaar riit:

“Im barāinwōt Josep ear wanlōn̄ļo̧k jān Galili, jān jikin kweilo̧k Nazareth, n̄an Judia, n̄an jikin kweilo̧k an Devid, ņa etan Betleem; …

“Bwe ren je e, ippān Meri m̧okta jān airro pālele, im e bōro̧ro. …

“Im ej keotak m̧aanjien, im kirboke, im kababu E ilo menjer; bwe ejjeļo̧k jikier ilo im̧ōn ruwamāejet.

“Im ilo āne eo ewor seperd rej pād ilo jikin wūjooj, im lale bwijin sip ko aer ilo bon̄.

“Im, lo, enjeļ in Irooj ej jutak iturir, im wōj an Irooj ej romaak ioer; im eļap aer lōļņo̧n̄.

“Im enjeļ ej ba n̄an er, “Kom̧win jab lōļn̄o̧n̄, bwe lo, ij bōkwōj n̄an kom̧ naan ko rem̧m̧an, naan in lan̄lōn̄ eļap, im enaaj n̄an armej otemjeļo̧k.

“Bwe rainin e ļotak n̄an kom̧ ilo jikin kweilo̧k an Devid, Ri Lo̧mo̧o̧r, E Kraist Irooj.”¹

Ke ej kōnono kōn ļotak eo an Jisōs, eaar kile bwe aolep ļaddik ro raar ron̄jake jidik in iien eo, bōtaab juon ļaddik, John, eaar ron̄jake kōn eļap itok-limo. John eaar juon ļaddik eo eobrak kōn kajoor me enan̄in jab tōt wōt, bōtaab ke liin ej bwebwenato, eaar lukkuun ron̄jake im kar kajjitōk, “Ekwe, ta eo eaar waļo̧k tokālik?”

Kōn menin liin eaar wōnm̧aanļo̧k wōt im jiron̄ ļaddik ro kōn iien eo Jisōs eaar ļaddik. Liin eaar ba, “Jisōs eaar juon ļaddik, āinwōt kom̧. Eaar kōņaan ettōr im ikkure. Bōtaab eaar barāinwōt rūtto ļo̧k im ‘kajoor ilo jetōb.’”² Liin eaar jiron̄ er bwe ke Jisōs eaar 12 an iiō, eaar etal ippān baam̧le eo an ļo̧k n̄an Jerusalem. Meri im Josep raar jepļaak n̄an kapijuknen ke rej kile bwe ejako ļaddik eo nejier ippāer. Raar m̧ōkaj in jepļaak ļo̧k n̄an Jerusalem im raar lo Jisōs ilo tam̧peļ eo ej kōnono ippān rimāletlet ro im rikaki ro me rej kajjitōkin E kajjitōk ko, im jeje ko rekwojarjar rej ba bwe aolep ro raar ron̄jake E raar “bwilōn̄ kōn an māletlet im naan in uwaak ko.”³

John eaar kajjitōk. “Ekwe, ta eo eaar waļo̧k tokālik?” Amy eaar jiron̄ ļaddik ro kōn jerbal in kwaļo̧k eo an Jisōs Kraist, ekōjkan an kar obrak kōn Jetōb in Irooj. Jej riit ilo Baibōļ eo ke Eaar kwaļo̧k ko̧jpeļ eo n̄an ro rijeram̧ōl, Eaar kōm̧m̧ani menin bwilōn̄ ko, Eaar kemour ripilo im rinan̄inmej, im aaet Eaar kōjerkak armej jān mej. Eaar ba, “Kom̧win yokwe ami ri kōjdat, [im] kōm̧anm̧an em̧m̧an n̄an ro rej kōjdat kom̧.”⁴

John eaar alikkar an em̧akūt kōn ta eo eaar ba im kōņaan jeļā eļapļo̧k. Eaar bar kajjitōk, “Im, kōn menin ta eo eaar waļo̧k tok ālik?” Liin eaar jiron̄ ļaddik ro bwe jet armej raar jum̧ae Jisōs im raar dike E. Raar lukkuun pepe n̄an bōk mour eo An. Liin eaar jiron̄ Cub Scout ro reddik kōn Kejota eo Āliktata, jikin kallib Getsemane, im ekōjkan an kar Jisōs debwāāl innām kar jerkakpeje. Liin eaar jeļā bwe aolep bwebwenato ko raar kāal n̄an John, eo eaar lukkuun kōņaan jeļā eļapļo̧k.

Innām liin eaar kajoor an en̄jake n̄an bōjrak, kūr kajjojo ļaddik ro kōn etaer, im ba, “Jisōs Kraist eaar mej kōn kwe.” John eaar lukkuun ron̄jake ke liin ej kōnono n̄an kajjojo ļaddik ro. Innām liin eaar kalimjōk e im ba, “John, Jisōs eaar mej kōn kwe.” Eaar kalimjōk e innām ba ilo kōļmenļo̧kjeņ, “Eaar mej kōn eō?”

Amy eaar ba, “Jetōb eaar lukkuun kajoor ilo ruum̧ eo an baam̧le eo am ilo tōre eo ke juon ļaddik eo edik eaar en̄jake im̧we eo an Jetōb Kwojarjar kōn bōlen kein kajuon.” Liin eaar ba, “Ijjab jeļā ta tok ālik eo n̄an John, eo baam̧le eo an kar em̧m̧akūt ettoļo̧k. Bōtaab ij jar bwe ine ko me raar ekkat ilo juon kweilo̧k an Cub Scout ruo wiik m̧okta jen Kūrijm̧ōj naaj eddōkļo̧k im bōktok n̄an e juon jon̄ak eo eobrak kōn meram eo an ko̧jpeļ eo juon raan.”

Ālkin an season eo jem̧ļo̧k, tōm̧a in Kūrijm̧ōj ko rej wōļļaļtak, melu in pine rej jakoļo̧k imejatoto, im al in Kūrijm̧ōj ko ejako aer bar jan̄ ilo radio, kōj, āinwōt John, maron̄ in kajjitōk, “Ta eo ej waļo̧k tok ālik?”

Bwilōn̄ im ļo̧kjeņ an kōn Kūrijm̧ōj ej juon ijjino. Kūrijm̧ōj ej kakeememej kōj bwe nin̄nin̄ eo eaar ļotak ilo Betleem eaar letok n̄an kōj unin mour, im ta eo ej waļo̧k tok ālik n̄an kōj eļap ej wāween ad bōk Rilo̧mo̧o̧r eo ad, Jisōs Kraist, im ļoor E. Kajjojo raan jen karuwaineneik tok Jetōb eo An n̄an mour ko ad. Jej lo meram eo ippān ro jet, jej ron̄jake ainikien lan̄lōn̄ ko ippān ajri ro me rej bōktok kōjatdikdik im m̧ōņōņō kōn ilju im jeklaj. Jen pukot un ko n̄an ippān doon, kobaik ro jet (ilo iien ad m̧ōņōņō), n̄an jerbal, im n̄an lōn̄aj (jetōb ko an ro jet), ilo ad ekkatak ta lukkuun meļeļe ko n̄an jeļā ad Rilo̧mo̧o̧r, Jisōs Kraist. Jej lo kōj ilo ad bwine raan ko m̧ae iien ko ilo mour ko ad n̄e eļap ļo̧k ad en̄jake iakwe eo An—n̄an waanjon̄ok, ļotak an juon nin̄nin̄, peptaij an juon ajri, im an juon mijinede ilo̧k, m̧are ilo tam̧peļ, im bōk m̧ōttan kwojkwoj eo kajjojo wiik. Kōn mour āinwōt Kraist im tōmak an juon ajri edik jej pukot E im jej en̄jake iakwe eo An.

“Eļan̄n̄e kom̧ jab … erom āinwōt ajri re dik, kom̧ jāmin deļo̧n̄ ilo aelōn̄ in lan̄.”⁵

Ej juon karōk eaiboojoj, karōk in Jemed eaar ejaake me kōn Nejin M̧aan, ad Rilo̧mo̧o̧r Jisōs Kraist, jemaron̄ in bar jepļaak ļo̧k im mour Ippān im lem̧ōņōņō kōn aolep men ko ewōr ippān Jemed, bwe en̄in ej uwaak eo āliktata n̄an kajjitōk eo “Ta eo ej waļo̧k tok ālik?” Rilo̧mo̧o̧r eaar ba bwe eo ej bōk eō ej bōk Jema; Im eo ej bōk Jema ej bōk aelōn̄ in kiin̄ eo an Jema; kōn menin aolep men ko ewōr ippān Jema naaj leļo̧k n̄an e.”⁶

Pojak n̄an bōk E ej letok aolep meļeļe kāāl n̄an pojak n̄an Tijem̧ba 25.

John, jekdo̧o̧n ia eo kwoj pād ie, Rijilo̧k ro remour raar ba: “Kemij lukkun rie im kamol bwe mour eo An, eo ej drilep in bwebwenato armej otemjej, ar jab ijjino ilo Bethlehem im ar jab jemlok iontol Calvary. Eaar manje eo jinoin Nejin Jemeruij Ilan̄, Ear make wōt Nejin Man ilo kanniek, eo ej Dri Lomor an lal.”⁷

John, menin letok eo An n̄an kōj ej ta eo ej waļo̧k tok ālik.

Ej m̧ool, im Eaar kōm̧m̧ane n̄an kwe. Jān m̧ool in eļap ij kam̧ool ilo Etan, Jisōs Kraist, amen.