Kuh Luhlahlfongi ke Iwaclah luhn Jisus Kraist Sihmlac ke Insiyacsr?

Sel Linda K. Burton

Prestuhn Luhlahp luhn Rilif Sosaiti


 
Linda K. Burton
Oruh, liyacacng, ac engankihn olwelah lasr uh fah oruh mwe ahkpwacyei lah Iwaclah luhn Jisus Kraist pwacyena lah sihmlac ke insiyacsr.

Tahmtahel sacohk wiyuck, kowos oasr ke nuhnak luhk ac insiyuck ke mahlwem pucspucs ke nga motko kunohkohn upac se inge. Tuhsruhk nga tiacna puhla fal nuh ke kunohkohn fihliyucki nuh sihk uh, nga etuh lah pahng se inge tuhkuh sin Leum yurin mwet pahluh sollac Lal, ac ingena, ma ingacn fal. Ma suhmuhslah uh luti lah “finne ke puhsrwen [Leum] kuh ke puhsrwen mwet kuhlwacnsap [Lal], el oacna sie.”1

Sie sin mwe sang sacohk ma wi pahng se inge pa ma pwacye lah Pahpah Lucng el luhngse tuhlihk muhtwacn nuh kwewa Nahtuhl uh. Nga puhla luhngse Lal nuh sesr kais sie!

Oacna kowos, nga luhngse ma suhmuhslah uh! Lun puk lal Jeremiah kuht sokwack sie ma suhmuhslah ma arulacna sacohk nuh insiyuck. Jeremiah el moul ke sie pacl ac acn na upac, tuhsruhk Leum el lwelah elan liye na met “sie pacl ke finsrak ke puhlan fahsrweni luhn Mwet Israel ke lwen-sahflah”2—lwen lasr. Jeremiah el palye:

“Ohinge ingoh, Nga fah likiyac masap luhk in elos, ac suhmuhslah insiaclos; Nga fah God lalos ac elos fah mwet luhk. …

“… Mweyen mwet nuh kwewa fah etweyuc, muhtwacack mwet suc fuhlwactlacna. Nga fah nuhnak muhnahs ke ma koluk lalos. Nga Leum pa fahk ma inge.”3

Kuht pa mwet Jeremiah el liye ah. Yac kuht suli Leum in suhmuhslah masap, kuh mwe luti, lun insiyacsr? Yac kuht luhlahlfongi lah oasr nuhnak muhnahs ke Iwaclah ma Jeremiah el sramsramkihn in kapsra nuh sesr sifacna uh?

Yac ekahsr somlah ah, Elder Jeffrey R. Holland el akacsruhi ke nuhnak lal ke luhlahlfongi fokoko luhn sramtweack fahsr sac ma fahsr nuh Salt Lake Valley finne tukun misac luhn tuhlihk nahtuhlos. El fahk, “Elos tiac oruh ma ingacn nuh ke sie prokracm, elos tiac oruh nuh ke sie u in mukwikwi, elos oruh ke srihpen luhlahlfongi ke wosasuc luhn Jisus Kraist oasr lun nguhnalos, oasr lun kuhpahsr ke sri kaclos an.”

El ahkkahlwemye, ke puhla fihsrwacsrsrwacsr:

“Pa ingacn inkacnek sefanna ninac ingacn kuh in pihkihnyac [tuhlihk nahtuhlos] lun sie pohk in fuhlao ac fuhfahsryucsr nuh met, fahk, ‘Facl uliyucklac oasr acn ingoh. Kuht ac orwaclah nuh ke infahlfahl uh.’

“Elos kuh in fahk lah ke srihpen olwelah ac mwe luti ac luhlahlfongi ac fwackyuck ac nguhn.”

El ahksahfye ke kahs in nuhnak muhlat inge: “Kuht fin kuh in liyacacng elah ingacn ke sucu lasr ac ke Alu uh, sahp puhs ma sahyac ac muhtwacwacack sifacna karuhnguhnuhlosyang. Sahp puhs ma tiac enenweyuck sahyac ac tilac yohk srihpac nuh sesr. Fwackyuck nuh sihk lah mwe wiwac pahtpaht uh tiac arlac pahluhk. Oacna ke mwet mahtuh lasr uh enenuh in sulaclah ma elos us uh, sahp pacl inge uh kuh in oruh kuht in sulaclah, ‘Meac kuht kuh in sang nuh ke mwe wiwac pahtpaht soko inge?’ Ma yohk srihpac nuh ke nguhnasr uh. Pa ma oasr lun kuhpahsr ke sri kacsr uh.”4 Kuh, ke kahs sahyac uh, pa ma ma sihmlac insiyacsr uh!

In ekihn sie prestuhnsi sasuc ke Rilif Sosaiti, kuht suk Leum pacl nuh kwewa in etuh ma yohk srihpac El ke kuht in sang nuh lun mwe wiwac pahtpaht luhn Rilif Sosaiti lasr uh in tahfwelah in mokle nuh met orekma Lal uh. Kuht puhla lah Pahpah Lucng lac kena ma se met kuht in kahsruh tuhlihk muhtwacn sacohk Nahtuhl uh in kahlwem ke mwe luti ke Iwaclah luhn Jisus Kraist uh. Ke kuht oruh ma inge, kuht etuh lah luhlahlfongi lasr fah yohkwelihk, oacna kena lasr in moul suwohs uh. Ahkluo, ke kuht nuhnkuh enenuh yohk in ahkkweye sucu ac lohm uh, kuht puhla lah Leum el fah lwelah kuht in ahkkweye tuhlihk muhtwacn sacohk Nahtuhl in tu na kuh nuh ke olwelah lalos uh. Ke olwelah uh liyeyuckyang uh, sucu uh ac ahkkweyeyuck. Sahflah, kuht puhla lah El fah lwelah kuht in orekma ke tuhkweni yurin u srihsrihk sahyac uh ac yurin mwet kol pristut lasr uh, kampare in suk ac kahsruh elos suc enenuh in ahkyohkye luhlahlfongi ac suwohs. Pa mwe luti ke Iwaclah, olwelah, ac sie sin sie.

Kuht kuh in ahkkweye sucu uh ac kahsruh mwet sahyac uh fuhkah fin kuht tiac suhmuhslah ke insiyacsr sifacna sie luhlahlfongi loal ac fokoko ke Jisus Kraist ac Iwaclah ma pahtpaht Lal? Ofong, nga luhngse akacsruhi ke ip yohk tolu ke Iwaclah sac lah kuht fin suhmuhslah ke insiyacsr ac ahkyohkye luhlahlfongi lasr ke Jisus Kraist. Pa mwe finsrak luhk tuh kahlwemkihnyacn ip yohk inge fah ahkinsewowoye kais sie sesr finne kuht sasuc nuh ke Alu uh kuh wi ke pacl loesloes.

Ip yohk ahk 1: “Ma nuh kwewa ma tiac fal ke moul uh kuh in oreklac suwohs ke Iwaclah luhn Jisus Kraist.”5

Kuht, wi kowos, fahkwack mwe lohoh ke Iwaclah luhn Mwet Lahngo lasr, Jisus Kraist. Fahkwack luhlahlfongi lasr uh, oacna luhlahlfongi lowos an, sihmlac ke insiyacsr ke srihpen kuht sun ma upac puhkantwen ma oruh kuht kapwack ke nguhn. Fin wacngihn etuh se ke plwacn in engan luhn Pahpah Lucng ac Iwaclah luhn Mwet Lahngo oacna ma yohk srihpac emet ke plwacn sac, ma upac inge kuh in muh tiacna fal. Kuht ac tuhkweni akacsruhi ke ma upac luhn moul uh. Tuhsruhk ke inse luhlahlfongi yohk uh sihmlac, “Ma nuh kwewa ma tiac fal ke moul uh kuh in oreklac suwohs ke Iwaclah luhn Jisus Kraist.”

Efuh kuh Leum elan lwelah kweok ac ma upac uh in tuhkuh nuh yohrohsr ke moul se inge? Fahk na muh, pa ip ke plwacn nuh ke kapwack ac orwaclah wo lasr! Kuht “sasa ke engan”6 ke kuht etuh lah oasr pacl wowo lasr in tuhkuh nuh facluh in puhlakihn moul in mahno uh. Elder Dallin H. Oaks el luti, “Eklac ma kuht nuh kwewa enenuh in puhlakihn ke moul lasr uh kwacna tuhkuh fihsrwacsr ke kweok ac ma upac likina ahkwoye ac mihs.”7

Mwe srihkasrak luhn sie tahmtahel sramtweack fahsr sac yohk luhlahlfongi la suhmuhslah ma pwacye inge. Mary Lois Walker el pahyuckyak ke matwac yac 17 nuh sel John T. Morris fin acn St. Louis, Missouri. Elos fahsr ahluhkwelah acn tuhpahsrpahsr uh wi Mwet Luhlahlfongi ke yac 1853, utyak nuh Salt Lake Valley tukun na yac se emet ke pahyuck lalos an. Ke fuhfahsryucsr lalos an elos kweokkihn ma upac oacna Mwet Luhlahlfongi sahyac ah. Tuhsruhk kweok ac ma upac lalos an tiacna tui nuh ke elos sun acn Salt Lake Valley ah. Yac na tohkoh ah Mary, yac 19 ke pacl sacn, el suhmuhslah: ‘Sie tuhlihk mukul isuslac nuh sesr. … Sie ekuh ah ke el yac luo kuh tolu matwac ah … sie ma mahmah nuh sihk, ‘Ac wacngihnlac tuhlihk srihsrihk sacn.’”

Ke pacl in winter moul luhn ahwowo sac tui. “Kuht oruh ma nuh kwewa kuht kuh, … tuhsruhk ahwowo sac koluklac liki met ah. … Ke lwen ahkluo ke Fepweri el misac … na oruh nga nuhmlah sie kuhp mwen ke fahsrwelihk liki mahno ac srah luhk sifacna.” Tuhsruhk ma upac lal uh soenna tari. Mukul tuhmwacl Mary ah masack, ac wik tolu tukun ahwowo se nahtuhl ah misac, el misac.

Mary el suhmuhslah: “Nga pac, ke nga srwackna mwet fuhsr, wacngihnlac ke pacl fototo se ke lwen 20, luhn mukul tuhmuhk ac tuhlihk sefanna nuhtihk, ke sie acn mael siofok sasuc liki sucu luhk ac ke ma upac pucspucs met likiyuc … ac nga finsrak tuh nga pac, kuh in misac ac wi mwet sacohk [uh].”

Mary el kalweni: “Sie ekuhn Sacnri ah nga oruh sie fahsr wi kawuck se luhk. … ahkacsmakihnyeyuck nga ke [mukul tuhmuhk ah] wacngihnlac ac muhkahimtacl yohk luhk ac ke nga tuhng na upac nga kuh in liye oacna sie aruhrruhma ke nuhnak luhk, ma upac yohk ke moul uh ma nga kuh in sun ac puhlakihn ma na pwacye kac uh ke kuh yohk. Sie welac loal tuhkuh nuh feik, tuh mwet lokoalok se etuh pacl in acnwuck uh, tuhsruhk [Mwet Lahngo, Jisus Kraist] wiyacsr El fokoko in molwelah. Ke … kahsruh ma ituckyang sin Pahpah, nga kuh in acnwuck ke kuh ma tahklac lain yuc ke pacl se inge.”8

Mary el lotwelah ke el tuhfahna matwac 19 ah lah Iwaclah sac use nuh sesr ahkpwacyeye lah ma nuh kwewa ma tiac fal ke moul se inge kuh ac fah oreklac suwohs—finne ke ahsor loal uh.

Ip yohk ahk 2: Oasr kuh ke Iwaclah uh oruh kuht in kuhtanglah mukul ac muhtwacn suhfal ac eklac mwet tuhma lutlut pwacye luhn Jisus Kraist.9

Oasr inkacnek se in etuh ke kuht lotwelah sie mwe luti kuh ip yohk ke wosasuc uh. Pa ke pacl se ma kuht kuh in luti mwe luti ac ip yohk in ukwe sie inkacnek ma sie tuhlihk kuh in kahlwem kac. Sie mwe kahsruh yohk in luti tuhlihk uh in kahlwem ke Iwaclah sac oasr soko sramsram sukokyak ke lesin luhn U luhn Tuhlihk Srihsrihk an. Sahp ma inge kuh in kahsrwe kuht luti tuhlihk nahtuhsr, nuhtin nahtuhsr, kuh kawuck lasr sifacna ke alu sahyac uh ma kena in kahlwem ke mwe luti yohk srihpac se inge uh.

“Sie [muhtwacn] fahsr sisken inkacnek soko puhtatyang nuh lun sie luhf na loal [el] koflah in fanyak. Ma nuh kwewa [el] oruh, [el] koflah [sifacna] fanyak. [Muhtwacn] sac pahng ke kahsruh ac enganwack ke sie mwet fahsryak kuhlwacng lohng [el] ac isyac sie nien fan nuh ke luhf sac. Ma se inge lwelah [el] in fanyak liki luhf sac ac eis sukohsohk [lal].

“Kuht oacna [muhtwacn] se lun luhf sac. Oruh ma koluk uh oacna puhtatyang nuh lun luhf sac, ac kuht tiac kuh in sifacna fanyak. Oacna ke mwet fahsryak kuhlwacng sac lohng tuhng in kahsruh [luhn muhtwacn sac], Pahpah Lucng El suhpwacma Wen Kuloh nahtuhl in sang kuh in kahinglac. Iwaclah luhn Jisus Kraist kuh in kapsreyuck nuh ke isyac nien fan sac; ac use nuh sesr kuh in fanyak.”10 Tuhsruhk Mwet Lahngo El oruh yohk likina in isyac nien fan sac, El “fani nuh lun luhf sac ac oruh kuh nuh sesr in orekmakihn nien fan sac in kahinglac.”11 “Oacna ke [muhtwacn se] lun luhf sac enenuh in fanuhkyac nien fan sac, kuht enenuh in auliyak ke ma koluk uh ac ahkos ip yohk ke wosasuc ac akwuck uh in fanyak liki luhf lasr ac oruh orekma ke Iwaclah ke moul lasr uh. Pwacyena, tukun ma nuh kwewa kuht kuh in oruh, Iwaclah sac oruh kuh nuh sesr in eklac suwohs in fohlohk nuh ye muhtuhn Pahpah Lucng.”12

Oasr pacl wowo se luhk tuhfahna tari in ohsun nuh sin sie mwet sramtweack in lwen inge, sie tuhlihk muhtwacn sacohk nuhtin God suc tuhfahna welah Alu uh fin acn Chile. El sie ninac lolacp nahtuh tuhlihk mukul fuhsr luo. Ke kuh luhn Iwaclah sac, el kuh in muhlkuhnlah ma somlah lal ac ingena kampare in oruh sie mwet tuhma lutlut pwacye luhn Jisus Kraist. Ke nga nuhnkuh kacl uh, sie ip yohk lutiyuck sel Elder David A. Bednar tuhkuh nuh sihk: “Pa sie ma in etuh lah Jisus Kraist El tuhkuh nuh facluh in misac kacsr—ma ingacn yohk srihpac ac pwelucng nuh ke mwe luti luhn Kraist. Tuhsruhk kuht enenuh pac in luhngsekihn lah Leum El kena, ke Iwaclah Lal ac ke kuh luhn Nguhn Muhtahl, in moul kacsr—tiac in kol kuht muhkwena tuhsruhk in sang kuh nuh sesr pac.”13

Ke tahmtahel Chile se inge ac nga sramsramkihn ohiyac in muhta na ke inkacnek in kol nuh ke moul ma pahtpaht, el ahkpwacyei nuh sihk na pwacye lah el nuhnkuh in kalweni nuh ke inkacnek soko an. El kuhflah liki inkacnek soko an inkaiyacn moul lal an, ac el fahkwack lah wacngihn “ma ingoh” liki inkacnek soko an ma el luhngse sulpac oruh ke moul lal an. Kuh fokoko ke Iwaclah sac moul oasr insiacl. Sihmlac oasr insiyacl.

Kuh sacn tiac oruh muhkwena kuht in fanyak liki luhf sac tuhsruhk oacyacpac use nuh sesr in tahfwelah nuh ke inkacnek oasrihksrihk ma kol fohlohk nuh ye muhtuhn Pahpah tuhmasr Inkuhsrao uh.

Ip yohk ahk 3: Iwaclah sac pa mwe ahkpwacye yohk emet lasr ke luhngse luhn Pahpah nuh sin tuhlihk Nahtuhl uh.

Kuht enenuh in oruh wo in nuhnkuh ke nuhnak mokleyuck se sel Elder Oaks inge: “Nuhnkuh ke luhpan ahsor luhn Pahpah tuhmasr Inkuhsrao in suhpwacma Wen Nahtuhl in ahkfalyelah kweok tiac kuh in ahkuhtweyucki nuh ke ma koluk lasr uh. Pa ingacn mwe ahkpwacye yohk se emet ke luhngse Lal nuh sesr kais sie!”14

Oruh yohk ke luhngse sacn enenuh in eis kuhti nuh ke intesr ke pruhe puhsisacl in sang kuloh nuh sin Pahpah Lucng ke luhngse kuht fal ke El suhpwacma Wen Kuloh Sefanna ac Wen wolacna Nahtuhl in kweokkihn ma koluk lasr, inse toasr, ac ma nuh kwewa ma atacn suhfal ke moul lasr kais sie uh.

Esam muhtwacn se Prestuhn Dieter F. Uchtdorf el sramsramkihn tuhfahna tari ah? El fahk: “Sie muhtwacn suc puhlakihn ma upac ac kweok ke yac pucspucs fahk ke sronin muhta lal uh, ‘nga tuhfahna akihlen lah nga oacna sie tala pwepuh 20 mahi se, mihsacsac uh, fohkfohk, ahkkolukyeyuck, ac kihnetnet uh. Tuhsruhk nga srwackna tala pwepuh 20 ah. Oasr srihpuck. Finne ngwetngwetuhk tena yohk ac finne tokolopyak ac orekmakihnyuck, nga srwackna luhpan tala 20 uh.”15

Muhtwacn se inge etuh lah el sie tuhlihk muhtwacn sacohk nuhtin Pahpah tuhmwacl Inkuhsrao ac lah el yohk srihpac nuh Sel in suhpwacma Wen Nahtuhl in iwaclah kacl, kais sie. Tahmtahel nuh kwewa ke Alu uh enenuh in etuh ma muhtwacn se inge etuh uh—lah el sie tuhlihk muhtwacn sacohk nuhtin God. Etuh yohk srihpaciyacsr nuh Sel ekuhllah fuhkah kuht in liyacacng olwelah lasr uh? Etuh yohk srihpaciyacsr nuh Sel ahkyohkye kena lasr in kahsruh elos suc enenuh in kahlwem ke Iwaclah sac oacna kuht—loal na upac? Ke kais sie sesr oasr mwe luti ke Iwaclah uh sihmlac loal insiyacsr uh, na kuht ac muhtwacwacack in oruh kain mwet se ma Leum el luhngse kuht in oruh ke El ac sifil tuhkuh uh. El ac akihlen kuht oacna mwet tuhma lutlut pwacye Lal.

Lwelah Iwaclah luhn Jisus Kraist in orwaclah sie “eklac kuh” in moklweack insiyacsr.16 Ke kuht acsmaklac nuh ke mwe luti se inge, fahkwack sin sie lihpufacn luhn God in pwengwelihk ke engan luhlahp,17 nga olwelah lah kuht fah puhla oacna mwet lal Tohkohsrah Benjamin puhla ah. Tukun elos pruhe upac tuh Iwaclah sac kuh in ituckyang nuh ke moul lalos ah, elos sesseslah ke engan18 ac kena in utyak nuh ke olwelah nuh sin God in oruh kena lal ac in ahkostwen nuh ke masap lal ke ma nuh kwewa.”19 Oruh, liyacacng, ac engankihn ke olwelah lasr uh fah oruh mwe ahkpwacyei lah Iwaclah luhn Jisus Kraist uh pwacyena lah sihmlac ke insiyacsr. Nuhnak muhnahs esam, ip yohk tolu inge, tahmtahel an:

  1. 1.

    “Ma nuh kwewa ma tiac fal ke moul uh kuh in ahksuwohsyeyucklac ke Iwaclah luhn Jisus Kraist.”20

  2. 2.

    Oasr kuh ke Iwaclah sac in oruh kuht in kuhtanglah mukul kuh muhtwacn suhfal ac oruh mwet tuhma lutlut pwacye luhn Jisus Kraist.21

  3. 3.

    Iwaclah sac pa mwe ahkpwacye wo emet lasr in eis luhngse luhn Pahpah nuh sin tuhlihk Nahtuhl uh.22

“Tukun lwen ingacn, Leum el fahk, Nga fah fihliyac masap luhk ke ipin insiyaclos, ac suhmuhslah ke insiyaclos; ac fah God lalos, ac elos fah mwet luhk.”23 Nga suli kuht in siyuck sin Leum in suhmuhslah ip yohk ke Iwaclah uh lun insiyacsr. Nga fahkwack lah elos pwacye. Ke inen Jisus Kraist, amen.

Show References

    Mwe kahsruh

  1.  

    1. Liye Doctrine and Covenants 1:38.

  2.  

    2.  Old Testament: Gospel Doctrine Teacher’s Manual (2001), 198.

  3.  

    3.  Jeremiah 31:33–34; ahkuhtweyac wo ituckyang.

  4.  

    4. Jeffrey R. Holland, “Roundtable Discussion,” Worldwide Leadership Training Meeting, Fepweri 9, 2008, 28.

  5.  

    5.  Preach My Gospel : A Guide to Missionary Service (2004), 52.

  6.  

    6.  Job 38:7.

  7.  

    7. Dallin H. Oaks, “The Challenge to Become,” Liahona, Jacnweri 2001, 42; Ensign, Nohfuhmpuh 2000, 33.

  8.  

    8. Sihm mahtuh lal Mary Lois Walker Morris (kapi oasr sel Linda Kjar Burton).

  9.  

    9. Liye David A. Bednar, “The Atonement and the Journey of Mortality,” Liahona, Eprel 2012, 12–19; Ensign, Eprel 2012, 40–47.

  10.  

    10.  Primary 7: New Testament (1997), 104.

  11.  

    11. Joseph Fielding Smith, Doctrines of Salvation, comp. Bruce R. McConkie, 3 vols. (1954–56), 1:123.

  12.  

    12.  Primary 7 , 104.

  13.  

    13. David A. Bednar, Liahona, Eprel 2012, 14; Ensign, Eprel 2012, 42.

  14.  

    14. Dallin H. Oaks, “Love and Law,” Liahona ac Ensign, Nohfuhmpuh 2009, 26.

  15.  

    15. Dieter F. Uchtdorf, “You Are My Hands,” Liahona ac Ensign, Mei 2010, 69.

  16.  

    16. Liye Alma 5:12–14.

  17.  

    17. Liye Mosiah 3:3.

  18.  

    18. Liye Mosiah 4:1–3.

  19.  

    19. Liye Mosiah 5:2–5.

  20.  

    20.  Preach My Gospel, 52.

  21.  

    21. Liye David A. Bednar, Liahona, Eprel 2012, 12–19; Ensign, Eprel 2012, 40–47.

  22.  

    22. Liye Dallin H. Oaks, Liahona ac Ensign, Nohfuhmpuh 2009, 26.

  23.  

    23.  Jeremiah 31:33; ahkuhtweyac wo ituckyang.