• Home
  • Broadcasts
  • A Klaumerang er a Tngakireng er a Jesus Kristo Ngellechukl er a Chelsel a Rengud?

A Klaumerang er a Tngakireng er a Jesus Kristo Ngellechukl er a Chelsel a Rengud?

Mla er a Linda K. Burton

Relief Society General President


 
Linda K. Burton
Omeruul, oltirakl, me a outkeu er a telbiled a mo cholchotel el kmo a Tngakireng er a Jesus Kristo a meral llechukl er a chelsel a rengud.

Betik er a renguk el rodos, kom blecheol el ngara uldesuek me a renguk er a aikal betok el buil er a kumdasu er tial meringel ngerachel. Meng diak ku melchesiu er ngak el sebechek tial ngerachel mla mei er ngak, ak medengei el kmo tial okedong a mla ra Rubak loeak a mlengilt el profet er Ngii, me chelechang, e tia di ungil belsul. A chedaol llechukl a olisechakl el kmo a lokiu a ngor er a Rubak malechub eng mesiungel, e ng kmal di osisiu.1

A tara mekreos el sengk er tial okedong a mo medengelii a beltkil a rengul a Chedam er a Babeluades el mora rokui el redil Ngelekel. Ak mla melchesuar a beltik el reng er Ngii el mei er a derta er kid!

Ak di uai kemiu, el soak a chedaol llechukl! Meng ngara babier er a Jeremia e kede mes a bades el ngii a kmal rutechii a renguk. A Jeremia kiliei er a mle chetituokel el taem ma basio, eng di a Rubak a milecherei meng “milsa taem ra le ngarngii a omengideb ra uriul-klebesei er a Israel”2—chelechal sils er kid. Ng ulemlaoch a Jeremiah:

“A uriul er a ikal klebesei, ng millekoi a Rubak, e ak mesterir a llechuk er a chelsir, e lemusech er a rengrir e mo Dios er tir, me tir a mo chedak. …

“… Te mo medengelkak, el ngara kekerei el mora kot el klou, ng dilung a Rubak: ele ak mo ousubes a kngterir, e mo diak luut el mo melbedebek a kngterir.”3

Kid tirkel rechad el Jeremia milsterir. Kid kede mla siotai er a Rubak meng lemusech a llechul, malechub eng osisecheklel, er a rengud? Ke doumerang el kmo a klausubes el mengai er a Tngakireng el Jermia milsaod er ngii ng mei er a derta er kid?

Sesel rak er a mla memong ea Elder J Jeffrey R. Holland a uluchais a blo lomelchesuar el dmolech el klaumerang er a rekot el chedal a ikelesia el mle outekangel merael bedul a Salt Lake Valley er a le mad a rengelekir. Ng dilu, “Ng di mlak loruul er ngii el kirel a brokuram, e dimlak loruul er ngii mel bol kaseues, te milruul er ngii ele klaumera er tir er a ebangkelio er a Jesus Kristo a mla er a rengrir, e mla er a klisichel a bedengir,”

Ng dilu el mla er a rengul:

“Tia di mle tal rolel e tirkal edil a mlo sebecherir el melakl er a [rengelekir] el seluk er a blil a blauang e liluut er a omerollir, a melekoi el kmo, ‘A baradis a di ngara keskelel sei. Ng sebeched el rolii tial mora beluu.’

“Ng mle sebecherir el melekoi el uaisei le aikaikid a uchul ng telbiil me a llach me a klaumerang me a ocholt me a reng.”

Ng mlo melekoi aikal kired lomdasu el tekoi: “Alsekum ng sebeched lolab aikal teletael ngara telungalek er kid me a Ikelesia, ea bebil er a tekoi a locha sebechel di ngii el moungil. Ea locha bebil er a diak a usbechelllel tekoi a sebechel mocheroid er a klengar er kid. Te silbedak er a ikal kareta lotekau a diak el betok el klalou. Meng diua tirkal chedad er a ngaramong el mle kirir el melilt aikel bo lolab el klalo, tial 21st century a locha mo rullid el mo melilt, ‘Ngera sebeched el smuk er a ikal kareta?’ Aikaikid aikel meklou a ultutelel ngara rengul a chad; e meklou a ultutelel er a klengar.”4 Ng dirrek, el sebeched el kmo, aikaikid aikel ngii a llechukl er a rengud!

Chelechal kuk beches lomerredel er a Relief Society, ea ki meluluuch el mora Rubak el mo medengei aikel meklou a ultutelel tekoi el Ngii a soal a ki mlecha er a kareta er a Relief Society me lolemolem a Urerel el bedul uchei. A Chedam er a Babeluades a soal a kot e ki molengeseu er a rengelekel el mo medengelii a osisechakl el ngara Tngakireng er a Jesus Kristo. Mesel bo dodengei, ea klaumerang er kid a mo mesisiich, e mo soad el kiei lokiu a llemalt. Ongerung, chelechal bla kim ues a kirel mekedmokl el mo melisiich a telungalek me a blai, ea ki mlo melchesiu el Rubak a soal a ki bo molisiich a rengrir a Rengelekel el mo semeriar lulrekodel a telbiil el riruul. Sel dotirakl a telbiil, eng mo smisichii a telungalek. A ulebongel, ea ki omelchesiu el kmo Ngii a soal aki moureor el ta rengmam lobengkel a bebil er a rechelel me a dirrek el mengeteklir a re priesthood, loba blak el reng losiik er tirkel lousbech a ngeso me bol sebechir el mo mesisiich er a klaumera me a llemalt. Nglungucham me a derta er kid lobkais a rengul me a Rubak bol botk a osisechakl er a Tngakireng, telbiil, ma uldekial a reng.

Kede mekera dolisiich a telungalek malechub e dolngeseu er a rebebil dilmerko domuchel llemuches a rengud a dmolech el klaumerang er a Jesus Kristo me a diak a ulebengelel Tngakireng er Ngii? Chelechal kesus eng soak el mo meskemiu a kldei el osisechakl er a Tkangireng el sekum kede lmusech er a rengud eng mo smisichii a klaumera er kid er a Jesus Kristo. Ngurungulek sel bododengei aikal osisechakl eng mo omekngeltengat er a derta er kid el beches malechub e kede meketeketa el chedal a ikelesia.

Kot el Osisechakl: “A rokui el diak el tabesul er a klengar a sebechel mo meruul el mo melemalt lokiu a Tngakireng er a Jesus Kristo.”5

Kemam, lobengkemiu, a sioning er a Tngakireng er a Osobeled, el Jesus Kristo. A klaumera er kemam, el uai kemiu, a mla meluches er a rengmam er a kim ngara ringel me a ongarm. Ma lak a klaudengei er kid er a uldesuel a Demad er a Babeluades me a Tngakireng er a Osobel el ngii a klou a ultutelel er tial uldasu, ea ikal ongarm a ual diak el tabesul. Kede rokui el soiseb er a ongarm er a klengar. Engdi a reng loltirakl a llechukl er ngii “a rokui el diak el tabesul er a klengar a sebechel muklemalt lokiu a Tngakireng er a Jesus Kristo.”

Ngera uchul me a Rubak a mechei ongarm me a ringel meng mei er a klengar er kid? A beot lomesodel a kmo, ng tebedechel a uldasu el kirel a ulekuruled me a ngesechekled! Kede “uleldiu el mui er a deureng”6sera bododengei el kmo ngarngii a techelled el mo chad er a beluulechad e chormii tial klengar. Elder Dallin H. Oaks ulsisechakl, “A belted a morngii lokiu a ringel me a ongarm er a bai lokiu a ungil teletael me a budech.”7

A okesiu el mengai er tirkal rodos er a uchelel a ikelesia ochotii tial klemerang. A Mary Lois Walker a mlo bechiil er a lteruich me a euid a rekil el mo er a John T. Morris er a beluu er a St. Louis, Missouri. Te mlo imuul er a ked lobengterir a re Santo er a1853, e soiseb er a Salt Lake Valley er a telkib el taem ruriul er a kot el klsel. A omerollir, ete mlo chuarm er a ngelsonges er a ikel lousbech el di ua rebebil er a re Santo. Engdi a ringel me a ongarm a dimlak el ngemed er a lebo er a Salt Lake Valley. A ta el rak ruriul, ea Mary, el mle teruich me a etui a rekil, a milluches: “Ak mlechell ra ngelekam el sechal. … A ta el kesus er a leru malechub eng edei el bilel… eng mlar ngii a mengelulau er ngak, ‘A ngalek a mo mad.’”

A bocha el taem er a kelekolt, eng kal tolechoi a di merael mo mechitechut. “Aki mlo er a tkul rebab el sebecham, … Eng di ongeru el kebesengil a Ongeru el Buil eng mlad … me a kmlo chemau a ringel mlo chacheroid er a techek me a rsechek.” A ongarm el mlo er ngii a dimlak el bolak. A bechil a Mary a dirrek el mlo smecher, me a edei el sandei er a lemad a ngelekel, eng medei.

A Mary milluches: “Me ngak, el dirk mle ngeasek el dil, a mlochib er a di mle kedeb el taem er a di chelsel a lluich el klebesei, a bechik me a di ta el ngelekek, e mla er a diak el beluak e cheroid er a rechedak e ultekau er a klou el berraod el ngar medak … me a kuureng el kmo, ak bai mad el dirrek me a kmo teloi er a [re]betik er a renguk.”

A Mary a millemolem: “A ta el kesus el mle Sandei e ak milrael lobengkel a sechelik. … Ak mlo dobedebekii a [bechik] el dibus ma klsabisi er ngak me tia er a klengelang e ak milsa, el di ua kumes el ngara uldesuek, a meklou el ringel ra klengar el kirek el mo soiseb er ngii e mlo melchesiu el kmal mle mesisiich. A klou el klengit el reng a mlo er ngak, e le a cherarou a medengelii a taem eng oldechelakl er kid, engdi a [Osobeled, el Jesus Kristo] a sebechel lolsobel. Me ngokiu … a ngeso ra Chedam, eng mlo sebechek el mtok ngii el rokui el klisiich el ual blechobech lomtok er ngak er tiaikid el taem.” 8

A Mary a silubii er a lteruich me a etiu a rekil el kmo a Tngakireng a meskid a mesisiich el klemedengei el kmo a rokui el tekoi el diak el tabesul er a klengar a sebechel mo muklemalt—luldimukl er a meklou el ringel.

Ongeru el Osisechakl: Ngarngii a klisiich el ngara Tngakireng el rullid meng sebeched el mo mesisiich er a klechad ra tech e mo meral oltirakl er a Jesus Kristo.9

Ngarngii a rolel eng sebeched el mo medengei el kmo a suobel malechub eng osisechakl el ngara ebangkelio a bla desuub. Tia sel bol sebeched losisecheklii a ngalek ra suobel meng mo sebechel medengelii. A klou a ultutelel osisechekill el mora rengalek el mo medengelii a Tngakireng a debetik er ngii er a osisechakl er a Primary. Tia locha mo sebechel ngosukid el mo olisechakl er a rengeleked, rengelekir a rengeleked, malechub a resechelid er a kuk ta er a klechelid el sorir el mo medengelii tial klou a ultutelel losisechakl.

“A [redil] merael er a rael a rirebet ra deliobech el kmal dmolech me [ng] dimlak el sebechel melemiakl el tuobed. Ma bek el lurruul e [ng], dimlak el sebechel [di ngii] el me tuobed. Ng kal [redil] a ulengit a ngeso e mlo outkeu er a ta er a chad er a lorael mei eng [rirengesii] meng mocha nguu a hasingo el meriou er a chelsel a deliobech. Meng mocha [sebechel] tuobed e dikeal chelseches.

“Me kid a kmal diua ngkal [redil] el ngara deliobech. A meruul a klengit a diua derebet ra deliobech, e diak el sebeched el di kid el tang e me tuobed. Meng kmal diua ngkel bekokouii el chad el rirngesii ngikal [redil] el lolengit a ngeso, a Chedam er a Babeluades uldureklii a Dita el Ngelekel Sechal el mo sobecheklid el mo tuobed. A Tngakireng er a Jesus Kristo a sebechel diua olsiseb er a hasingo er a chelsel a deliobech; ng meskid sel bo doeak ngii el me tuobed.” 10 Engdi a Osobel a remuul a betok e diak el dil nguu a hasingo el meriou el merkong, Ng me soiseb ra chelsel a deliobech ngosukid el mo sebeched lousbech er a hasingo el tuobed.”11 “E di ua ngkal [redil] el ngara chelsel a deliobech el kirel melemiakl er tial hasingo, ng kired el mo ouchel a rengud er a kngtid e mo oltirakl a osisechakl me a suobel er a ebangkelio el mo ngoikid el mo melemiakl el tuobed er a deliobech e morulii tial Tngakireng meng mo oureor er a klengar er kid. Tiaikid, a sebeched el rulii, ea Tngakireng a ngosukid meng mo sebeched el mo klikiid el lmuut el mora Chedam er a Babeluades.”12

Ak mal dirk mlo ngarngii a techellek el kebetech ngak ma ta er a ketengel mo chedal a ikelesia, ng ungil ngelekel a Dios el redil el kmal dirk ulebult el mora Ikelesia er a Chile. Ng mle mesobil e teru a rengelekel. Ngokiu a klisichel a Tngakireng, eng mocha sebechel choitii a klengar ngii er a ngaramong e chelechang eng blak a rengul el mo meral oltirakl er a Jesus Kristo. Sel kumdasu er ngii, ea osisechakl el lulsisechakl er ngii a Elder David A. Bednar a mera uldesuek: “Ng kuk di imong er a tekoi el dodengei el kmo a Jesus Kristo a mlei er a beluulechad el mlo mad el kired—tiang a klou a ultutelel e dodai er a osisecheklel a Kristo. Eng di kid a kired el mo obang omereng el saul el Rubak a soal, lokiu a Tngakireng er Ngii e ma klisichel a Chedaol Reng, el mokiei el ngara chelsed—e diak el dil lomekrael er kid ng dirrek el mo melisiich er kid.”13

Me ng kal odos er a Chile me ngak er a ki mosaod el kirel a kmo ng mekerang e dingar tial rael el ngoikii el mora diak a ulebengelel klengar, eng kmal mle semeriar e milenglou er a renguk el kmo ng kmal blak a rengul el mo melemolem er tial rael. Ng mlo cheroid er tial rael er a klengar er ngii, meng millekoi el kmo ng diak a ngerang “el ngar sei” el cheroid el rael el soal muut lolab el mei olsiseb er a klengar er ngii. Tial loureor el klisichel a Tngakireng a ngara chelsel a rengul. Ng mla melluches er a chelsel a rengul.

Tial klisiich a diak el dil sebechel ngoikid el mo melemiakl el tuobed ra deliobech ng bai dirrek el meskid a klisiich el mo melemolem er tial ibutek e kekerei el rael el ngoikid el muut el mora Demad er a Babeluades.

Ongedei losisechakl: A Tngakireng a kot el klou el olechotel mer kid er a beltkil a rengul a Chedam el mora Rengelekel.

Ngungil bo domdasu er tial mesisiich el uldasu el mla er a Elder Oaks: “Ka momdasu el locha kmal mlo mekngit a rengul a Demad er a Babeluades er a lodureklii a Ngelekel el mo otekangel a diak el sebeched el medengelii el ringel el kirel a ngtid. Tia kot el klou el olechotel a beltkil a Rengul el mei er a derta er kid!”14

Tial kot el ngarbab el olchotel a beltikel reng a kirel rulii a derta er kid el mooutubaruach el ngara nglunguuch el mereng a sulel a Demad er a Babeluades el oubeltikel reng er kid meng sebechel milcherei a Dita el klikiid el Ngelekem el mo chuarm el kirel a kngtik, kngtil a renguk, me a rokui el ngii a diak el tabesul er a klengar er kid.

Ke dobedebekii ngkel redil el President Dieter F. Uchtdorf el dirk lullekoi el ngii? Ng millekoi: “A ta er a redil el mla er a ringel me a klengit el reng el mla mo rak e millekoi el llemangel, ‘Ak kora mla mo melchesuar er ngak el kora ikel mechut el lluich el kluk el babier luduoud—chelimetemet, selodel, idokel, telemall, el ngarngii a ultil. Eng di ngak a dirk lluich el kluk. Ngarngii a belkuk er a kmo ngerang. A ltang diak lungil osenged er ngak e dirrek alta e ak mla mechelebed e ngar sel sorir rengak, ak kmal dirk ngarngii a belkuk el cherrungel el lluich el kluk’”15

Ngikal redil a medengei el kmo ng ngelekel a Demal er a Babeluades meng klou a ultutelel el mo er Ngii meng uldureklii a Ngelekel el mo melngakl er ngii, el tang. A rokui el odos er a Ikelesia a kirel medengei aikal lodengei ngikal redil—el kmo ngii a ngelekel a Dios el loubeltikereng er morngii. Ng mekera sel dodengelii a ultuteled el mo er Ngii a le ngedechii a doltirakl a telbiled? Ng mekera sel dodengelii a ultuteled el mo er Ngii a lengedechii a klemeriar reng er kid el mesiou er a rebebil? Ng mekera sel dodengelii a ultuteled el mo er Ngii a le sisichii a klemeriar reng er kid el mo olngeseu er tirkel ousbech el mo medengelii a Tngakireng el di uai kid—el kmal dmolech? A derta re kid sel dobang a osisechakl er a Tngakireng el llechukl er a chelsel a rengud, e kede me omuchel el mo meral tirkel chad el Rubak a soal a bo de uai tir sel luut el mei. Ng mo dongchid el meral oltirakl er Ngii.

Mei me a Tngakireng er a Jesus Kristo bol uchul a “klou el bult” er a rengud. 16Me sel bo de klekar el kirel tial osisechakl, el mlodingel er kid er a anghel er a Dios el “ungil chais er a klou el deureng,”17 E ak yaksok er kid el mo melchesuar el di ua rechedal a King Benjamin. A uriul er a loluluuch me a Tngakireng bo loureor er a klengar er tir, “me te mlo mui er a deureng.”18 me a ki kongei el mo soiseb er a telbiil kemam … me a Dios el mo meruul a soal e mo omkerreu a llechul er a rokui el tekoi el bo lollach er kemam.”19 Omeruul, oltirakl, me a outkeu er a telbiled a mo cholchotel el kmo a Tngakireng er a Jesus Kristo a meral llechukl er a chelsel a rengud. Kulengit me bo molbedebek, aikal kldei el osisechakl, e rodos:

  1. 1.

    “A rokui el diak el tabesul ra klengar a sebechel mo melemalt lokiu a Tngakireng er a Jesus Kristo.”20

  2. 2.

    Ngarngii a klisiich er a Tngakireng el mo sebeched el mo mesisiich er a tech e mo meral oltirakl er a Jesus Kristo.21

  3. 3.

    A Tngakireng a ochotii a klou el beltkil a rengul a Chedam el mo er a Rengelekel.22

“A uriul er a ikel klebesei, ng millekoi a Rubak, e ak mo ngmai a llechuk el mo er a chelsir, e mo lmuches er a chelsel a rengrir; e mo Dios er tir, e tir a mo chedak.”23Ak siotai er kid el mo olengit er a Rubak el mo lmuches aika el osisechakl er a Tngakireng er a chelsel a rengud. Ak kuuchais el kmo aika klemerang. Loba ngklel a Jesus Kristo, amen.

Show References

    Uleklatk

  1.  

    1. MesaDoctrine and Covenants 1:38.

  2.  

    2.  Uodel el Renged: Gospel Doctrine Teacher’s Manual (2001), 198.

  3.  

    3.  Jeremia 31:33–34; smisichii a belkul.

  4.  

    4. Jeffrey R. Holland, “Roundtable Discussion,” Worldwide Leadership Training Meeting, Feb. 9, 2008, 28.

  5.  

    5.  Preach My Gospel : A Guide to Missionary Service (2004), 52.

  6.  

    6.  Job 38:7.

  7.  

    7. Dallin H. Oaks, “The Challenge to Become,” Liahona, Jan. 2001, 42; Ensign, Nov. 2000, 33.

  8.  

    8. Babier er a klengar er a Mary Lois Walker Morris (a llecheklel a lobang a Linda Kjar Burton).

  9.  

    9. Mesa David A. Bednar, “The Atonement and the Journey of Mortality,” Liahona, Apr. 2012, 12–19; Ensign, Apr. 2012, 40–47.

  10.  

    10.  Primary 7: Beches el Renged (1997), 104.

  11.  

    11. Joseph Fielding Smith, Mesa Doctrines of Salvation, comp. Bruce R. McConkie, 3 vols. (1954–56), 1:123.

  12.  

    12.  Primary 7 , 104.

  13.  

    13. David A. Bednar, Liahona, Apr. 2012, 14; Ensign, Apr. 2012, 42.

  14.  

    14. Dallin H. Oaks, “Love and Law,” Liahona me a Ensign, Nov. 2009, 26.

  15.  

    15. Dieter F. Uchtdorf, “You Are My Hands,” Liahona and Ensign, May 2010, 69.

  16.  

    16. Mesa Alma 5:12–14.

  17.  

    17.  Mosiah 3:3.

  18.  

    18. Mesa Mosiah 4:1–3.

  19.  

    19. Mesa Mosiah 5:2–5.

  20.  

    20.  Preach My Gospel, 52.

  21.  

    21. Mesa David A. Bednar, Liahona, Apr. 2012, 12–19; Ensign, Apr. 2012, 40–47.

  22.  

    22. Mesa Dallin H. Oaks, Liahona me a Ensign, Nov. 2009, 26.

  23.  

    23.  Jeremia 31:33; smisichii a belkul.