Kan Yoloey e Michaen’ko fare Bayul rok Yesus Kristus nga lan e gumircha dad?

Rok Linda  K. Burton

President ko Ulung ko Ppin ko Galasia


 
Linda K. Burton
Napan gadad be fal’eg, fol, min falfalan’ ko pi m’ag rodad ran yip’ ngodad ni kan yoloey fare Bayul ko Yesus Kristus nga lan gumircha’dad.

Pi walag nib ppin nib t’uf rog, gamed bay u tafney rog nge gumircha’eg nib yo’or e pul napan kug lemnag marnga’agen e muruwel momaw’ ney. Dab gu lemnag ni gub cheag ko muruwel ni ken pii’ ngog, machane, gu manang ni ke pinningeg Somoel udakaen a profet ni ke mel’eg, ma ere ke fel’. Ud filed ko thin nib thothup ni gar,"demturug rogon, laman [Somoel] fa pi tapigpig [Rok], t’ab rogon.” 1

Reb e tawath nrib t’uf ni bay ko calling rog e lowan’ ni rib t’uf gubin e fak nib ppin ngak Chitimangdad nu Tharimy. Kug thamiy e t’ufeg Rok ni fan ko gadad gubin!

Boed gimed, gu ba’adag e thin ni thothup! U lan e babyor ko Jeremiah bay e scripture nrib t’uf ko gumircha’eg. Ke paer Jeremiah ko ngiyal’ nge tafen nrib mom’aw, machane Somoel ke pag ni nge gu’ e “ngiyal ko athap u lan e kunkunuy ko gidii’ nu Israel u tin tomur e rran”2—rran rodad. Ke prophesy nag Jeremiah:

Ra taw ko ngiyal’ nem, ke yoeg Somoel, ni bay gut ay e motochiyel rog nga lanin’rad mu gu yoloy ngalan ngorongorrad. Bay gu mang Got rorad, ma bay ra manged girdi’ rog.

“…Yad gubin ni bay ra nanged gag ni mus rok e en nth’abi sobut’ nge mada’ ngak e en nth’abi tolang rorad. Bay gu n’ag fan e denen rorad u wun’ug ma dab ku gu leamnag e kireb ni kar ngongoliyed.”3

Gadad e gidii’ ni ke gu’ Jeremiah. Ere kad paged Somoel ni ngan yoloy e motochiyel, fa machib, nga lan gumircha’dad? Be michuwun’dad ni n’ag fan ran yib ngodad udakaen fare Bayul ni ke non Jeremiah marnga’agaen?

Boech e duw faram Elder Jeffrey  R. Holland ke weliy pi thamtham rok marnga’agen e mich nib gel ko pi pioneer ni kar milikag gad ngak re Loway nu Salt Lake mus ni ke yim’ pifakrad. Ke yoeg, “Dar rin’ed ni fan ko ulung fa mo’olung ko gidii’, kar rin’ed e ren’ir ni bachan ni bay e michaen’ ko fare gospel ku Yesus Kristus nga lan ya’el rorad, ni bay u langin e ngorongorad.”

Ke weliy nib cheag:

“Amrogon ke rayog pi nina’ ke k’eyaged pi [madway rorad] ngalan e kahol nge yaen nga m’on min yoeg, ‘Ni bay e nam ni michmicheg ubang ngaram. Ran tawdad nga loway.’

Ke rayog ni ngar yoeged ngay ni bachan pi m’ag nge micheg nge michaen’ nge thogthog ko Kan Thothup.”

Ke mu’ ko numon rok ni ga’ar pi thin ney: “F’an rayog ni ngad tayed ren’em nga lan pi tabinaw nge Galasia rodad, sana ran fal’eg rograd bo’or e n’en. Sana yo’or nib yo’r e tin ni de t’uf rodad ran mul’ u barba’. Kug rung’ag ni pi cart rorad ran fek buchuw. Boed likigal rodad kar mel’eg e tin ni ngan fekey, sana tiney e rran ra t’uf ni ngad mel’eg, “Mang gu tay u cart ney?’ I’ir e kengin ko ya’el rodad; I’ir e tin ni bay nga lan yil’ rodad.”4 Fa, ngan noeg reb rogon, ni’ir e tin kan yoloey nga lan ngorogngordad.

Gamad bin bi’ech e presidency ko Ulung ko Ppin ko Galasa kug ning Somoel nib almarin ni ngad nanged e tin nibe t’uf ni ngad tayed nga lan kart rodad ko Relief Society ni ngad ayuweged e muruwel rok. Kug thamiyed ni Chitimangdad nu Tharimy ni ba’adag som’on ni ngad ayuweged pifak Rok nib ppin nrib t’uf ngak ni ngar nanged fan fare Bayul ku Yesus Kristus. Napan ngad nanged fan riy, gu nanged ra ga’ nag e michaen’ dad ma amrogon ngad pired nib fel’ rogon. Bin l’agruw, u napan kug lemniged nbe t’uf ni ngad gel niged pi tabinaw rodad, kug thamiyed ni Somoel ni ba’adag ni ngad fonow pifak nib ppin ni ngan fol ko pi m’ag kar fal’eged. Fini ngad chiyliy pi m’ag rodad, ra matangiy e tabinaw rodad. Ma bin tomur, gu thamiyed ni ba’adag ni ngad muruwel gad nga ta’abang ko yug ulung u galasia nge pi tapowiy’ ko priesthood, ni ngad gay min ayuweg picha nib t’uf, ni nge yog nin gar mon’og e yafos rorad. Ni’ir e meybil rodad ni gadad gubin ran bing gumircha’dad ngak Somoel ni nge yog ni nge yoloey ngalangin e nangaen’ ko fare Bayul, m’ag nge ta’abang gad.

Ke uragon ran lemnag ni ngad gel nigad pi tabinaw fa ayuweg bee’ mus ni kan yoloey nga lan ngorongordad nib to’aer e michaen’ ku Yesus Kristus nge Bayul rok nib machalbog? Ko re nep’ ney gu ba’adag nggu gog dalip e kengin ko fare Bayul ni, fa’an kan yoloey riy nga lan ngorrongordad, ran ga’ nag michaen’ dad u Yesus Kristus. Be athap rog ni re nangaen’ ko pin’ey ran tawath nagdad dem turug f’anre gur bi’ech ko Galasa fa dangay.

Kengin ni ta’areb: “Gubin e pin’em ma dani papluw ko mornga’agen e yafos ni rayog ni ngan fal’eg nib mangil dakaen fare Bayul ku Yesus Kristus”5

Boed gimed, be michuwun’maed ko fare Bayul ko Somoel rodad ni Yesus Kristus. Michaen’ maed, boed michaen’med, kan yoloey ngalan ngorrongordad ma ke aywueg med ko pi sikeng nge magowan. F’anre ni dariy e nangaen’ ko tunum rok Chitimangdad nu Tharmiy fa Bayul ko Somoel ni kengin riy, ran taw ni de papluw pi sikeng fa magowan ney. Gadad gubin ra taw ko pi sikeng ko yafos rodad nga ta’abang. Machane kan yoloey nga lan pi ngorongoren nib michaen ni, “Gubin e pin’em ma dani papluw ko mornga’agen e yafos ni rayog ni ngan fal’eg nib mangil dakaen fare Bayul ku Yesus Kristus.”

Mang fan Somel be pag ni nge yib e gafgow nge sikeng ngodad nga lan e yafos ney? Fulweg riy e rib moem, ya gafgow ran ayuwegdad ni ngad mon’og! Kug “tolul gad nib falflan”6 napan kug nanged ni gu ra baed nga fayleng nge paer nga dakaen. Elder Dallin  H. Oaks ke fil, “Thiliyeg nib t’uf ko gumircha’dad ma yaen ngodad bo’or e yay udakaen e gafgow nge sikeng, gathi u dakaen gapasaen’.”7

Bay e ppin nib michaen’ ngay ni kan weliy nib fel’ rogon. Mary Lois Walker ke m’ag pa’ napan 17 e duw rok ngak John  T. Morris u St.  Louis, Missouri. Kar th’abew e falang mar un gow ko pi gidii’ ku Got u lan e duw ni 1853, ma kar taw go ko loway nu Salt Lake de’ n’uw napan tomuren kar m’ag pa’ gow t’areb e duw. Kar gafgow gow t’ab rogon ko milikag rorow. Machane de tal’ e gafgow napan kar taw gow nga loway nu Salt Lake. Bin tomur e duw, Mary ni 19 e duw rok ke yoloey, “Ke gargle e pagal ngomow. … Reb e nep’ napan l’agruw fa dalip e pul rok …ke yib e kathkath ngog ni ‘Gu ra malog cha’nir.’”

Napan pi pul ni garbeb, fare titi ke m’ar. “Kug rin’ gubin ni rayog, … machane ke m’ar nib almarin … ko bin l’agruw e rran nu February ke yim’ … ma ere kug unum ko kap nib mo’oy ni’ir e kefel’ ngak yalach nge racha’eg.” Machane de mu’ pi sikeng rok. Pum’on ko Mary ke m’ar, ma dalip e wik tomuren titi rorow, ke yim’.

Ke yoloy Mary: “Amrogog, kemus lich e duw rog, ma nga lan 20 e rran kug malog pum’on rog nge bitir rog, nga lan e nam ni dab kug nang nib orel nib orel ko tabinaw rog ma bay e sik’eng nib n’uw o’mon owcheg … ma amrogon kug athap nggu gum’ nge un ko pi gidii’ rog nib [t’uf].”

Me ul’ul’Mary: “Reb e balyal’ nu Madnom gag nge fagaer rog kug warrow nga but. … Kug puguran ni ke yim’ [pum’on rog] nge kug thamiy nrib kiribaen ni kemus gag ni magaey ma napan kug yoer nib almarin kug guy, boed e likay u lanin’ug, e burey nib’ n’uw ko yafos ni thingar gu waen ngay ma kug thamiy ni dariy e ayuw rog. Kug thamiy ren’ey nib gel, ya fare to’ogor ma nang we’in ni ngan malang ngodad, machane [Somoel] rodad [ni Yesus Kristus] be gel ni ngad thapegdad. Udakaen … ayuw ke pii’ Chitimangiy, kug cham ngak gubin e magowan nge sikeng ni bay rog chirofen nem.”8

Ke fil rogon Mary napan be fel’ yangren ni 19 e duw ni fare Bayul ran pii’ ngodad gapasaen’ ni gubin e tin ni dani papluw ko re yafos ney raygog ma riyul’ ran fal’eg rogon—ku amrogon pi gafgow nib to’aer.

Kengin ni l’agruw: Bay gelingin ko fare Bayul nra ayuweg dad ni ngad gel gad e pangiy ko pum’on fa ppin nu fayleng min mang gachalpen Yesus Kristus.9

Bay e rogon ni rayog ni ngad nanged napan kan yoloy machib ko gospel nga lan ngorongordad. Napan rayog ni ngu filed rogon riy nga rarogon ni rayog e bitir ni ngan nang fan riy. N’en ni ran ayuw gad ni ngad sensey nag pi bitir mornga’agen fare Bayul e fanathin ni bay ko lesson u Primary. Sana ran ayuwegdad u napan ngu filed pifakdad, bitir rorad, fa pi fagaer rodad ni be yaen ko reb e taliw ni ba’adagrad ni ngar nanged fan e re gospel ney.

“Bay e [ppin] ni ke yaen nga but’ me aw nga langin e loew nib to’aer ni de yoeg ni nge nomeg wuru’ riy. Dem turug e n’en [ke] rin, de yoeg [ni nge] nomeg wuru’ riy. Re [ppin] ke pinning ko ayuw me falflan’ napan ke rungag riy e tamilikag nib bugol me fekey e tawo’ ngak. Ke pag ni nge nomeg u wuru fare loew nge athapeg puf matowan rok bayay.

“Gadad e boed rogon fare [ppin] ni bay ko fare loew. Napan ngad denen gad be boed ngad aw gaed nga loew, ma de yoeg ni ngad nomeg wuru’ riy kemus gadad. Boed rogon facha’ nib bugol ke rungag pi yoer ko fare [ppin], Chitimangdad nu Tharimy ke l’oeg e Fak nib T’uf rok ni nge bayuliydad ko ren’em. Fa bayul ko Yesus Kristus ran t’areb nag ngak fare tawo’; ran ayuwegdad ni ngad nomeg u wuru’ fare loew.”10 Machane Somoel dab kemus pii’ ngodad e tawo’. Ya ran “aw nga but’ ngodad min ayuweg dad ni ngad koeled fare tawo’ min nomeg riy.”11 “Boed fare [ppin] nga lan e loew ke nomeg nga dakaen fare tawo’, thingarda kalgad ngan’ dad ko pi denen min fol ko pi kengin e gospelni ngad chubeg u wuru’ fare loew min athapeg e Bayul nga lan yafos rodad. Ere, tomren gubin e ngongol rodad, fare Bayul ran ayuwegdad ni ngad bi’ech gad min sul ngak Chitimangdad nu Tharimy.”12

De’ n’uw napan kug mada’ nag e pioneer ko tiney e rran, ni’ir e fak Got nib ppin nib t’uf ngak ni ke tawfe de’ n’uw napan u Chile. Ni’ir e nina ma bay l’aguw e pagal rok nib fel’ yangren. Udakaen e gelingin ko fare Bayul, ke rayog ni nge pag talin e tin ke yaen som’on ma chiney be gay rogon ni nge mang e gachalpen ku Yesus Kristus nib yul’yul’. Napan gu lemnag mornga’agen, me yib nga lanin’ug e kengin ke fil Elder David  A. Bednar ngay: “Bay reb e n’en ni ngan nang ke yib Yesus Kristus nga fayleng ni nge yim ni fan ngodad—ren’ey e dayif ko fare machib rok Kristus. Machane ku amrogon thingarda nanged ni Somoel ba’adag, udakaen fare bayul rok nge gelengin e Kan Thothup, ni nge par ulangidad—gathi mus ni nge motochiyel nagdad, machane ku ninge pii’ gelingdad.”13

Napan gag nge fare ppin nu Chile kug puruy gow ko uragon ran lek e kanawo’ ngak yafos ni manemus, ke sminmin me yoeg ngog ni ke m’ag u waen’ ni nge athamgil ngadakaen e kanawo. De fol riy nib yo’or faram ko yafos rok, ma ke yoeg ni dariy ban’en “u barba’ riy” ni ke ba’adag ni nge fekey ko yafos rok bayay. Gelingin ko fare bayuyl ke ayuweg me paer nga langin cha’nem. Kan yoloey nga lan ngorongor.

Gelingin nem ran ayuwegdad ni ngad nomeg gad u wuru’ fare loew, ma ku ran pii’ ngodad gelingin ni ngad athamgil nga dakaen e kanawo’ nib wu’in’in mab achigchig radan ni be fekey ngak Chitimangdad nu Tharimy.

Kengin ni dalip: Fare Bayul be yip ngodad ni gadad b’tuf ngak Chitimangdad nu Tharimy.

Mangil ni ngad lemniged ko pi thin nib fel’ rok Elder Oaks ni ga’ar: “Mu lemniged ko fare kirebaen’ ni ke yib ngak Chitimangdad nu Tharimy fini ke l’oeg Fak rok ni nge thamiy gafgow ni th’abi gel ni fan ko denen rodad. Ren’ey be yip’ ngodad fare adag ni bay Rok ni fan dad!”14

Fa binem e ngongoliy nib t’ufeg ran fekdad iyaen ni ngad ragbug nga but’ u meybil nge pinning e magaer ngak Chitimangdad nu Tharimy ni gadad b’tuf ngak ni ke l’oeg Fak nib T’uf mab machalbog Rok ni nge gafgow ni fan ko denen, amith, nge gubin ni dani papluw nga lan yafos rodad.

Mu sulaen’med fare ppin ke yoeg President Dieter F. Uchtdorf mornga’agen de’ nuw napan? Ke yoeg: “Reb e ppin ke yaen nga fithik e gafgow ko yo’or e duw ke yoeg u dakaen e lu’ rok, ‘Ke yib nang fan ngog ni gag boed e salpiy ni $20—kan yit’ nga but, ma kan dariy fan nag. Machane ke magaey e puluwag ni $20. Ke magaey puluwag. Mus ni dab gu fel’ usun nge mus ni kug yit’ nga but mug dariy fan nag, ke magaey puluwag ni gubin e $20.’”15

Re ppin ney e manang ni’ir e fak ni b ppin nib t’uf ngak Chitimgangdad nu Tharimy, ma be puluwan’ rok ni magaey ni Ke l’oeg Fak ni nge bayuliy Ir. Urngin e ppin ko fare Galasia bt’uf ni ngan nang e tin ni nang re ppin ney—ni ir e fak nib ppin nib t’uf ngak Got. Ke uragon e nangaen’ ko puluwdad ran ayuwegdad chiyliy pi m’ag? Ke uragon e nangaen’ ko puluwdad ran fekdad iyaen ko ayuw ngak yug bee’? Ke uragon e nangaen’ ko puluwdad ga’ nag e pangiydad ni ngan ayuweg picha ni yad b’tuf fare Bayul boed gadad—nib to’aer? Napan kan yoloey e machib ko fare Bayul nga lan gumircha’dad nib to’aer, amrogon gadad ra mang e gidii’ ni Somoel ra ba’adag dad manged ngay napan ni ge yib bayay. Ran nang ni gadad e gachalpen Rok nib riyul’.

Aygi fare Bayul rok Yesus Kristus “thiliyeg gumircha’dad nib gel.”16 Napan gu oed gad nge michaen’dad ngak llowan’ ney, kan noeg e angel rok Got e “thin nib fel’ ko falfalaen’ nib gel,”17 gu micheg ni gadad ra thamiy beod pi gidii’ rok Pilung ni Benjamin. Tomuren kar meybil gad nib gel ni ran ayuwegrad fare Bayul, “mar sug gaed ko falfalaen’,”18 mar “rib m’agaen’ [raed] ni [nggar] fal’eged e m’ag u [thilraed] … Got ni [nggar] rin’ed e tin ba’adag, [mar] fol ko pi motochiyel rok’ u fithik’ gubin ban’en.”19 Napan gadad be fal’eg, fol, min falfalan’ ko pi m’ag ran yip’ ngodad ni kan yoloey fare Bayul rok Yesus Kristus nga lan ngorongordad. Wenig ni ngam tay u wun’med pi walag dalip e ren’ey:

  1. 1.

    “Gibin ni dani papluw ko re yafos ney e ran fal’eg riy udakaen fare Bayul ku Yesus Kristus.”20

  2. 2.

    Bay gelingin ko fare Bayul ni ran aywegdad ni ngad gel niged e pangin ko pum’on fa ppin nu fayleng min manged gidii’en Yesus Kristus.21

  3. 3.

    Fare Bayul be yip’ ngodad ni th’abi tamilang riy ni gadad b’tuf ngak Chitimangdad nu Tharimy.22

“Ra taw ko ngiyal’nem, ni ga’ar Somoel, ni bay gut ay e motochiyel rog nga lanin’rad mu gu yoloy ngalan ngorongorrad bay gu mang Got rorad, ma bay ra manged girdi’ rog.”23 Gu pinningdad ni ngad ninged Somoel ni ngan yoloey pi kenginn ney ko fare Bayul nga lan ngorongordad. Gu micheg ni ba riyul’ riy’. U fithingan ku Yesus Kristus, amen.

Mostrar referencias

    Notes

  1.  

    1. Muguy ko Doctrine and Covenants 1:38.

  2.  

    2.  Old Testament: Gospel Doctrine Teacher’s Manual (2001), 198.

  3.  

    3.  Jeremiah 31:33–34; kan gel nag thin.

  4.  

    4. Jeffrey R. Holland, “Roundtable Discussion,” Worldwide Leadership Training Meeting, Feb. 9, 2008, 28.

  5.  

    5.  Preach My Gospel : A Guide to Missionary Service (2004), 52.

  6.  

    6.  Job 38:7.

  7.  

    7. Dallin H. Oaks, “The Challenge to Become,” Liahona, Jan. 2001, 42; Ensign, Nov. 2000, 33.

  8.  

    8. Autobiography of Mary Lois Walker Morris (copy ni bay ko Linda Kjar Burton).

  9.  

    9. Mu guy David A. Bednar, “The Atonement and the Journey of Mortality,” Liahona, Apr. 2012, 12–19; Ensign, Apr. 2012, 40–47.

  10.  

    10.  Primary 7: New Testament (1997), 104.

  11.  

    11. Joseph Fielding Smith, Doctrines of Salvation, comp. Bruce R. McConkie, 3 vols. (1954–56), 1:123.

  12.  

    12.  Primary 7 , 104.

  13.  

    13. David A. Bednar, Liahona, Apr. 2012, 14; Ensign, Apr. 2012, 42.

  14.  

    14. Dallin H. Oaks, “Love and Law,” Liahona ma Ensign, Nov. 2009, 26.

  15.  

    15. Dieter F. Uchtdorf, “You Are My Hands,” Liahona ma Ensign, May 2010, 69.

  16.  

    16. Mu guy Alma 5:12–14.

  17.  

    17.  Mosiah 3:3.

  18.  

    18. Mu guy Mosiah 4:1–3.

  19.  

    19. Mu guy Mosiah 5:2–5.

  20.  

    20.  Preach My Gospel, 52.

  21.  

    21. Mu guy David A. Bednar, Liahona, Apr. 2012, 12–19; Ensign, Apr. 2012, 40–47.

  22.  

    22. Mu guy Dallin H. Oaks, Liahona ma Ensign , Nov. 2009, 26.

  23.  

    23.  Jeremiah 31:33; kan gel nag e thin riy