Leum El Tiacna Muhlkihn Komlac

Sel Linda S. Reeves

Mwet in Kahsruh Ahkluo ke Prestuhnsi Luhlahp luhn Rilif Sosaiti


 
Linda S. Reeves
Pahpah tuhmasr Inkuhsrao ac Mwet Lahngo lasr, Jisus Kraist, etuh kuht ac luhngse kuht. … Kuht kuh in puhla luhngse ac pahkomuhta Lalos ke kweok lasr.

Na ke kuht ohsun nuh sin tahmtahel raunweack facluh, kuht lut ke fokokoiyacn kahs in lohoh lom. Puhs na pwacye suwos oasr ke sie kuh fihl se ahkluo ke mempucr luhn Alu uh. Kuht liye puhkantwen tahmtahel kuhlwacnsap ke kunohkohn puhkantwen, forfor loes in wi alu, ac kihsackuhnwacng in orwaclah ac liyacacng akwuck muhtahl ke tempuhl. Kuht ahkfuhlwactye kom. Kom pa mwet mahtuh luhn Leum!

Pacl fototo somlah ah, mukul tuhmuhk, Mel, ac nga ohsun nuh sin mwet kol orekma se pahngpahng Mollie Lenthal ke kuht muhtwacta nuh ke museum se fin acn Australia. Kuht sokwack lah Mollie, el muhtwacn na wowo se matwacl oasr ke yac 70 ma, wacngihn tuhlihk nahtuhl ac el tena pahyuck. El muhkwena tuhlihk se, ac sucu lal ah misac ke yac puhs somlah ah. Sucu fototo lal oasr tuhlihk luo ac ma wiyacl suc muhta loeslac. Nga sana puhlahack ke Nguhn fahk nuh sihk, apkuhran na in Pahpah Lucng lacn sramsram: “Mollie el tiac muhkuh! Mollie el tuhlihk muhtwacn nuhtihk! Nga pa pahpah tuhmwacl uh! El tuhlihk muhtwacn arulacna yohk srihpac ke sucu luhk ac el tiac wi muhkwena uh!

Sie sramsram nga luhngse ke moul luhn Mwet Lahngo pa ke sramsram kacl Lazarus. Ma suhmuhslah uh sruhmuhn nuh sesr lah “Jisus el luhngse Martha, ... tahmtahel lal [Mary], ac [tamuhlwel laltahl] Lazarus.”1 Kahs suhpweyucklac nuh yurin Jisus lah Lazarus el arulacna mas, tuhsruhk Jisus el tiac sa tuhkuh; El muhta wihn lwen luo, el fahk lah “mas se inge ... ma in nahwelah God, lah Wen nuhtin God fah eis wolacna kac.”2

Lohng lah Jisus elac tuhkuh, Martha “el som ac ohsun nuh sel,”3 fahk nuh Sel lah mac sikyak. Lazarus el “oan in kuclyuck lwen ahkosr.”4 Ahsor, Martha el kahsruhsr fohlohk nuh lom sel in fahk nuh sel Mary lah el tuhkuh.5 Mary el toasr ke ahsor kahsruhsr nuh yohrohl Jisus, puhtati nuh ke Niyacl, ac tuhng.6

Sruhmuhnyuck nuh sesr lah “ke Jisus el liyaclwack [Mary] ke el tuhng ah, … el tuhng in nguhn, ac kuf,” ac el siyuck lah piyac acn elos fihlilyac we uh.

“Elos fahk nuh sel, Leum, tuhkuh ac liye.”7

Na kuht riti kuhtuh sin pahkotwen yohk, kahs in luhngse ke ma suhmuhslah: “Jisus el tuhng.”8

Mwet tuhma lutlut James E. Talmage el suhmuhslah: “Ngwetngwet luhn muhtwacn luo inge kuf ke ahsor, … oruh Jisus el ahsor [weluhlos], ac El tuhng in Nguhn ac elyah yohk.”9 Puhlakihn se inge fahkwack ke pahkotwen, pahkomuhta, ac luhngse ma Mwet Lahngo lasr, ac Pahpah Tuhmasr Inkuhsrao puhla nuh sin kais sie sesr pacl nuh kwewa ke kuht puhla toasr ke mwe kweok, ma koluk, ma upac, ac ngal luhn moul.

Pain kowos tahmtahel an, Pahpah tuhmasr Inkuhsrao, Jisus Kraist, el etwekuht ac luhngse kuht. Eltahl etuh ke pacl kuht ngal ac kweok ke oacna sie ohiyac. Eltahl tiac fahk, “Wona fin kom ngal ingena, ke srihpen pacl sa ma nuh kwewa ac fahk eklac wolac. Kom ac fah ahkkweyeyucklac, kuh mukul tomom ac fah konwacack orekma, kuh tuhlihk nuhtum suc som liki kom ac fah fohlohk uh.” Elos puhla luhpan kweok lasr, ac kuht kuh in puhla luhngse ac pahkomuhta ke mwe kweok lasr.

Alma el fahkwack:

“Ac el fah fahsr nuh met, puhla kweok ac ma koluk ac mwe sruhf ke oacna sie; ac ma se inge lah kahs kuh in nwacklah suc fahklah el ac fah eslah mwe kweok ac mas luhn mwet lal.

Ac el ac fah eslah … mwe muhnahs lalos, lah insiyacl fah sesseslah ke pahkomuhta, … tuh el ac etuh … fuhkah in kahsruh mwet lal nuh ke mwe muhnahs lalos.”10

Ke kuht motko fin kuht etweyuck sin Mwet Lahngo lasr ac Pahpah tuhmasr Inkuhsrao kuh luhpahkah Elos etwekuht, kuht kuh in esamwack kahs luhn Mwet Lahngo nuh sel Oliver Cowdery:

“Fin kom kena sie pac mwe lohoh, oruh kom esamwack fong se kom tuhng nuh sihk ke insiyom, lah kom kuh in etuh ma pwacye luhn ma inge.”11

Met Leum el fahk nuh sel, “Wacngihn sie fanna mwet sahyacn God suc kuh in etuh nuhnak lom ac luhngse luhn insiyom.”12

Leum el ahkacsmakihnyacl Oliver lah El etuh ip nuh kwewa ke pruhe kwacfe—ac esamwack—pacl fal, ac fong se inge.

Yac puhs somlah ah mukul tuhmuhk muhtwacwacack arulacna mas ke sie mas suc puhs mwet wi. Ke wik som ac mas lal kweoki, nga muhtwacwacack in luhlahlfongi lah el ac misac. Nga tiac fahk nuh sin oacna sie ke fosrngah luhk. Oasr sucu luhlahp ac sucu fuhsr ac luhngse luhn pahyuck ma pahtpaht, ac nuhnak ke wacngihnlac mukul tuhmuhk ac tuhfahlah tuhlihk nuhtihk sifacna nwekyuclac ke muhkahimtacl, ahsor, ac finne ahngyahng. Nga mwekihn in fahk lah nga forlah liki Pahpah tuhmuhk Inkuhsrao. Ke lwen Nga tui tilac pruhe; Nga tui tilac orek plwacn; Nga tuhng. Nga som nuh ke na nga konwacack lah nga tiac kuh in sifacna.

Ke pacl se met ke pacl puhs, Nga sikuckmuhtuhnteyak ac fuhlweacng insiyuck nuh sin Pahpah tuhmuhk Inkuhsrao, kwacfe ke nuhnak muhnahs ke forlah Luhkwel, fahk nuh Sel nohfohn nuhnak yohk luhk, ac sahflahiyac nga tuhngyak lah fin pa inge ma El kena nga in oruh, Nga ac oruh. Nga etuh lah oasr plwacn Lal nuh ke moul lasr.

Ke Nga tahfwelah sikuckmuhtuhntei in sang insiyuck, ma wolacna, mihs upac, puhla luhngse tuhkuh nuh sihk. Oacna fin plwacngkiht in luhngse sohksohk ye muhtuhk. Apkuhran in fin nga kuh in puhla Pahpah Inkuhsrao fahk, “Pa ingacn nohfohn ma nga enenuh in etuh.” Nga sulaclah in tiac sifil forlah Luhkwel. Kahkahsrihki ac wo ohiyac mukul tuhmuhk muhtwacwacack kweyak nuh ke na el kwelac na pwacye.

Yac tohkoh mukul tuhmuhk ac nga sikuckmuhtuhntei ke sisken tuhlihk muhtwacn yac 17 se nahtuhsr ac siyuck ke moul lal. Pacl se inge top kac pa moh, tuhsruhk puhla oacna sie ke luhngse ac mihs ke olwelah luhn Mwet Lahngo lasr arulacna fokoko, ac kuht etuh lah finne Pahpah tuhmasr Inkuhsrao el isacl elan fohlohk nuh yohrohl, ma nuh kwewa ac wo. Kuht muhtwacwacack in etuh lah meac kalmeyac in sang mwe toasr lasr nuh sin Leum, in etuh lah El luhngse kuht ac puhla pahkomuhta nuh sesr ke ahsor ac kweok lasr.

Sie pacl wowo luhn pahpah-nuh sin-wen ke Puk luhn Mormon pa ke Alma Fuhsr el fahkwack luhlahlfongi nuh sin wen nahtuhl Helaman. Alma el ahkuhtweyac “sahngweng” lah el puhla ke el petsacelah tuhkuh nuh yurin God in nuhnuhnkuh ke ma koluk puhkantwen lal. Tukun puhla toasr luhn ma koluk lal nohfohn lwen tolu ac fong tolu, el auliyak ac siyuck sin Mwet Lahngo in oasr pahkomuhta lal sel. El ahkuhtweyac nuh sel Helaman ke “oaskuh ac wolacna” engan ke esamwack kweok lal “wacngihnlac.” Sahyacn puhla “sahngweng” nuhnkuh ke tuhkuh nuh ye muhtuhn siyah luhn God, Alma el liye sie mwemwe ke “God el muhta ye siyah lal” ac fahk, “Nguhnihk pwacye oasr insac.”13

Tiac pa inge ke kuht puhla uh, tahmtahel sacohk luhk, ke kuht auliyak ac liye luhngse, pahkomuhta, ac nuhnak kuht puhla ke Pahpah tuhmasr Inkuhsrao ac Mwet Lahngo lasr—lah kuht oacyacpac “loessuhlah nuh we,” in eis kena sin luhngse Lalos?

Oacna ke Leum el fahkwack nuh sihk lah El tiac muhlkuhnlah tuhlihk muhtwacn sacohk nahtuhl Mollie Lenthal, Nga fahkwack lah El tiac muhlkihnkomlac! Oacna sie ma koluk kuh mwe muhnahs kuh ngal kuh mwe fosrngah kuh ma upac kom puhlakihn, El etuh ac kahlwem ke kain pacl se inge. El luhngse kom! Ac El ac fah us kom ke pacl se ingacn, oacna ke El oruh nuh sel Mary ac Martha ah. El ahkfalyelah lusen pacl se lah El ac etuh fuhkah in kahsrwe kom. Sang ma toasr lom nuh Sel. Fahk nuh sin Pahpah tomom Inkuhsrao fuhkah puhla lom. Fahk nuh Sel ke kweok lom ac ma upac ac sang nuh Sel. Suk ma suhmuhslah lwen nuh kwewa. Na kom ac fah oacyacpac konwacack kolyuck ac kahsruh.

Mwet Lahngo lasr El siyuck:

“Kuh muhtwacn se kuh in muhlkuhnlah tuhlihk nahtuhl, lah el tiac enenuh in oasr pahkomuhta ke wen nahtuhl insiyacl? Ahok, sahp elos kuh in muhlkuhnlah, na fah Nga tiac kuh in muhlkihnkomlac. …

“… Nga sruhlwekomlac ke lain lun pouk.”14

Ac siyuck Lal nuh sesr: “Ac kom liye lah Nga sapkihn tuh in wacngihn suwos fah wacngihnlac, tuhsruhk in sapkihn tuh kom fah tuhkuh nuh yuruk, kom in kuh in puhla ac liye; finne tuh kom fah oruh nuh fin facluh.”15

Pa inge mwe siyuck lasr. Kuht enenuh in puhla ac liye sesr sifacna ac fah kahsruh nohfohn tuhlihk nuhtin Pahpah Lucng in puhla ac liye ac etuh lah Mwet Lahngo lasr eis nuh sel sifacna tiac ke ma koluk nuh kwewa lasr tuhsruhk oacyacpac ngal lasr ac kweok lasr ac ma koluk tuh Elan kuh in etuh ma kuht puhla ac in kahsrwe kuht fuhkah. Nga fahkwack Kacl ke inen Jisus Kraist, amen.

Mostrar referencias

    Mwe Kahsruh

  1.  

    1.  John 11:5.

  2.  

    2.  John 11:4.

  3.  

    3.  John 11:20.

  4.  

    4.  John 11:17.

  5.  

    5. Liye John 11:28.

  6.  

    6. Liye John 11:32.

  7.  

    7.  John 11:33–34.

  8.  

    8.  John 11:35.

  9.  

    9. James E. Talmage, Jesus the Christ, 3rd ed. (1916), 493.

  10.  

    10. Liye Alma 7:11–12.

  11.  

    11. Liye Doctrine and Covenants 6:22.

  12.  

    12.  Doctrine and Covenants 6:16.

  13.  

    13. Liye Alma 36:14–22 ; ahkuhtweyac wo ituckyang.

  14.  

    14. Liye 1 Nephi 21:15–16.

  15.  

    15. Liye 3 Nephi 18:25; ahkuhtweyac wo ituckyang.