Pepehd Mehlel Ong Atail Pwukoa Kan

Sang Carole M. Stephens

Sounsawas Keieu nan Presidensi Lap en Pwihn en Sawas en Lih


 
Carole M. Stephens
Kitail anahne pepehd mehlel ong atail pwukoa oh doula nan pwoson ni atail pahn alehda manaman kaloalamwahu, kakehlail, kakoahiek, oh kamwahu en Tomwo.

Mwurin ahi alehdi ahi pwukoa nan presidensi en Pwihn en Sawas en Lih, I pehm me I anahne wehwehkihla mwahu irail lih akan me papahier mwohi. I kepingahla mehlel padahk kan en Sister Zina D. Young, sounsawas keieu nan keriau en presidensi lap en Pwihn en Sawas en Lih. Liho mahsanih, “Riei lih akan, kitail konehng pepehd mehlel ong atail pwukoa kan.” 1 I medewe duwen lepin mahsen pwukat pepehd oh pwukoaoh pil ropiropseli nan pwuhk sarawi kan.

Nan Kadehde Kapw, Pohl pil padahkihieng Souleng kan en ahnsouo:

“Ahnsou me kumwail pahn pirida sang amwail meir: Pwe ahnsoun atail mourla kerendohngkitailehr. …

“Rotorot en nipwong kereniongehr sohrala oh marain en rahn nektehn pwarodo. ...kitail pwuhriong nan tehtehn marain.” 2

Nan Pwuken Mormon, Alma padahkihong aramas akan duwen pwukoa sarawi en irail kan me wiahda inou rehn Koht:

“Nin duwen amwail kin anahne kodohng nan kehl en Koht, oh pahn kin adanikihla sapwellime aramas akan, oh kin men wahda en emen katoutou kan pwe irail en kak marahrahda;

“Ehi, oh me kumwail kin men mauk iang irail akan me kin mauk; ehi, oh kin kamwaiti irail akan me anahne en kin kamwaitala, oh en wia nin duwen sounkadehde kan en Koht ni ahnsou koaros oh ni mehkoaros, oh ni wasa koaros. ...

“Met I indahiong kumwail, ma met iei duwen anahnepen amwail mohngiong kan, dahme kumwail kin uhwong ki amwail en pepdaiskihla mwaren Kauno, nin duwen mehn kadehde ehu mwowe me kumwail wiahiongehr ih inou ehu, me kumwail pahn papah ih oh kolokol sapwellime kosonned akan, pwe en ketin kapwiliwei rehmwail sapwellime Ngehno ni mwuledek?

“Oh met ni en aramas akan rongadahr mahsen pwukat, irail eri lopwolopwadahr ki arail perendahr, oh werikihda: Met iei anahnepen aht mohngiong kan.” 3

Ahn Sister Young mahseno oh iren pwuhk sarawi pwukat elehieng I en medewe duwen “pwukoa kan” me kitail anahne pirida nsenohkihda rahn wet.

Kitail kin wiahda inou ehu ahnsou me kitail pepdaisla. Elder Robert D. Hales padahngki, “Ahnsou me kitail kin wiahda oh kolokol inou kan, kitail kin mweseldahsang sampah oh pidelong ong nan wehin Koht.” 4

Kitail kin wekila. Mwomwatail kin wekila oh atail mwekid kin wekila. Dahme kitail kin rong oh wadek oh nda kin wekila, oh dahme kitail kin likauwih pil kin wekila pwe kitail wialahr sapwellimen Koht lih, katengteng ong Ih sang ni inou.

Ahnsou me kitail kasarawi en wiahla towe mehlel, kitail kin alehdi kisakis en Ngehn Sarawi, pwuhng en kaweid sang emen rehn Koht Sahm, Nah oh Ngehn Sarawi en kahluwa kitail, en kaloalamwahuih kitail, oh en sileikitail. E kin kaperkinkitail ahnsou me kitail kin kasongosong en pohnsehsehla atail inou kan oh pwuralahng sampah. President Boyd K. Packer padahngki me sohte emen kitail “pahn kakete wiahda ehu sapwung laud ni atail sohte pahn alehdi keperpe mahs sang ni kemwekid kapehm kan en Ngehn Sarawi.” 5

Pwehn alehdi kisakis wet oh kolokol Ngehno rehtail ahnsou koaros, kitail anahne en warohng oh kin tetehkete irair en mohngiongitail kan. Mohngiongitail me mwuterek? Kitail ahniki mohngiong me karakarahk, mohngiong me kak alehda padahk, mohngiong limpoak? De mohngiongitail kan ekisekis keptakaila ni atail kin mweidehng katairong en sampah en kakediropwih kitail sang kapehm kan me uhdahn kohsang rehn Ngehno?

Ahnsou me kitail pepdaisla, mohngiongitail kan wekila oh kehnda Koht. Nan seiloak wet en mour, kitail anahne kin kalapw peidek rehn pein kitail, “Ma [I] pehmehr wekidekala ieu nan mohngiong[i], … [I] kakehr pehmada met?” 6 Oh ma soh, ah dahme sohki?

Tohto Souleng en mahs kan me “pehmehr wekidekla laud wet nan … mohngiong[irail] kan.” 7 E kamwakidirailda pwe ren alehda kapai kan en tehnpas sarawi me kin kakehlailih irail nan arail pwukoa kan. Tepin Souleng en Imwin Rahn Akan nan Nauvoo patohla “ni tehnpas sarawi rahn ehu pwon oh lella nihpwong” 8 pwehn alehdi tiahk sarawi kan oh wiahda inou mwohn arail pahn seiloaklahng palikapi.

Sarah Rich, emen lih en Pwihn en Sawas en Lih nan Nauvoo, koasoia met: “Kapai tohto me se alehdi nan tehnpas en Kauno, me kahrehda aht peren oh nsenamwahu nan aht pahtou kan koaros oh elehieng aht kak pwoson Koht, ni aht ese me E pahn ketin kahluwaikit oh utungkit nan seiloak me se sohpai ong wasa me se sehse.” 9

Sang ni mohngiong kan me wengkihla pwoson Sounkomouro, re kehliki manaman en Sapwellime Tomwo. Irail kin pirida ong mwekid. Irail ese nan arail mohngiong kan me mie mehmen—Sounkomouro—me mwahngi arail kahpwal kan pwehki Ah ketin lokolokehr pwehki irail nan Mwetuwel en Kedsemeni oh pohn lohpwuo. E ketin pehmehr arail masak, arail peikasal, arail weirek, oh arail kin loaloid. E ketin lokolongkihier arail pahtou, arail kalokolok, arail duhpek, arail pwangadahr oh arail paisuwed en me salongasang irail. Oh pwehki Ah ketin lokolongkihier mepwukat koaros, E kak mahsanihong irail, “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla.” 10

Oh irail kohdo. Irail likih oh idawehnla soukohpo. Irail wehwehki me seiloako pahn reirei, arail pwukoa apwal. Irail wehwehki me irail pahn anahne tohnmetei, ahpw ni arail utuhtkihda arail pwoson oh kolokol tengeteng arail inou kan, irail onopehr ni pali ngehn.

Mwohn arail mweselsang Nauvoo, ehu pwihn en Souleng kan ntingihdi nan ehu pere nan tehnpas sarawi me re pekeus sang loale. Eh koasoia, “Kauno mwahngihier aht meiroang: kumwail idawehn kihtdo.” 11

Me keren I iang ehu pwihn en mwahnakapw oh peinakapw nan aht ward-o pwe sen pwurehng wia songen seiloak me souleng en mahs ko wiahier. Ni menseng koaros I kin peidek rehi, "Ia ahi tohnmetei en? Ia mwomwen ei pahn idawehn irail?”

Ni keriau en rahn en aht seiloako, se wawaingkihier werat riahka kan mwail waluh (13 km) ni ahnsou me se lel wasahkis pohn ahlo me adaniki “ahn lih akan ansoun waik.” Ohl oh lih katohrohrpeseng, ohl akan tiengla pohn ukadao. Ni aht tepida waik werat riahka kan, I sarada oh kilangada nait ohlen priesthood ko, me pwulopwul oh me mah, irek pohn keilen ahlo pali koaros, arail lisoarop kan kohsang pwehn kasalehda arail wauneki lih akan.

Ahlo tepida mwomwen mengei, ahpw sohte pwand se tepida alu nan pihk loal, oh inenen ukada. I itiekidi oh wie siksiken riahkao uwen ahi kehl koaros oh likamw mehkot lel riahkao oh I sarada kilangada Lexi, emen peinakapw ko me wia tohn ahi wasa. E waikadalahr were riahkao pohn uluhlo oh, ni eh kilangada me se anahne sawas ahpw tang pwurodo. Ni aht leldahla poweo, I uhdahn men pwuredihla sewese irail kan mwuri, ahpw I esingek suwed, oh uwen mohngiongie eh wie kumwukumw laud pak kei I medewehda me I pahn soumwahu en mohngiong! I kaping kalahnganki ahi kilang ekei irail pweinakapw akan arail pwilikihda werarail riahka kan oh tang pwuredihla pwe ren sawas.

Ni ansou me koaros leldahla powe, se uhdi ahnsou kis pwe sen ntingihdi aht pepehm kan nan nait pwuken ketemen kan. I ntingihdi me: “I sohte kaunopada paliwereiet mwahu ihme kahrehda I sohte kak sewese irail akan me kohkohdahdo mwuri. Mwein I sohte pahn pwurehng waik ehu riahka, ahpw I sohte men katiasang sewese riei peinakapw kan ni pali ngehn, sohte pak ehu!”

E wia irair kesempwal ehu me kapiriehda ong ahi pwukoa kan en pali ngehn ong ahi peneinei oh mehteikan. Nan aht seiloako, I medewehla dahme I koledihier.

Keieu I tamanda riei lih akan, irail akan me waikehr oh irail akan me leledohr rahn wet kin kelehpw waik werarail riahka kan. Kerenieng persent 20 en lih me iang pwihn me seiloangki riahka ko kelehpw ekis ansou nan ahlo. Irail iei lih akan me saikinte pwopwoud, me mweipeseng, de me liohdi. Tohto irail iei nohno me kiripwlahr. 12 Irail koaros doadoahkpene—lih en inou, me pwulopwul oh me mah, me mih nan irair wekpeseng kan en mour, seiseiloak pohn ahl tehpwoat, ong kahrepe tehieu.

Irail akan me tangala pwehn sewese riarail lih akan me anahne sawas katamankinie irail akan me kin sawas, koaros me kitail kak kilang oh me kitail sohte kak kilang, me kin mwadang en kasawiada, kilangada anahn ehu, oh kin mwekid.

I tamanda mahsen en Kauno ni eh ketin mahsanih me E pahn tiengla mwohtail, me E pahn ket pali maun oh pil pali meing, oh Sapwellime Ngehn pahn mih nan mohngiongitail kan, oh Sapwellime tohnleng kan pahn kapilkitailpene pwehn utungkitailda. 13

Keskesihnen ni pali koaros en ahlo iei irail ohl me pwoson, peik, oh kin kapwaiada inou. Manaman en arail priesthood—manaman me Koht ketin doadoahngki pwehn kapaiada Sapwellime kan—kamarainiada, kakehlailiada, oh utungkitada. Ohl pwukat wia mehn ketemen me kitail sohte kin kelehpw. Kitail kak ahniki manaman wet ahnsou koaros ni atail kin kolokol atail inou kan.

I tamanda irail ohl oko me tohrohrsang arail peneinei kan, kahrehieng arail pwoud kan ahr uhd kelehpw waik riahka kan. Ohl tohto mehla nan seiloako. Ekei neirail pwutak kan mihmi pwe ren papah nan misin nan uhdahn sapwarailo. Mehteikan mweselda mwowe pwehn kaunop mwohn arail peneinei kan ahr pahn lella Salt Lake Valley. Ekei ohl akan sohte iang sang ni pilipil, pwehki re pilada en sohte kolokol arail inou kan.

Duwehte irail akan me tienglahr mwowe, me tohto rahn wet wie momour nan irair me sohte uhdahn mwahu. Kitail kin doulahte padahk oh kin nantihong me mwahu pwe kitail wehwehki me doulahte nannanti pahn kolokol kitail en pweida pohn ahlo oh kaunop kitail ong ansou mwahu kan en alehdi kapai kan koaros me inoupe miehier ni atail kin “koapworopworki Kauno.” 14

Emenemen kitail lelohngehr oh pil pahn doulahte lelohng kasongosong nan atail mour. Mour mwotomwot wet wia ahnsoun alehdi kasongsong, oh kitail pahn ahneki ahnsou mwahu en doadoahngki atail saledek en pilipil oh pilada dahme kitail pahn esehla sang kasongosong me uhdahn pahn kohdo.

Ni atail wia sapwellimen Koht lih, kitail kin doulahte pohn ahl en pwoson pwehki kitail kasawiada, ni duwen me President Thomas S. Monson padahngki, “Tiahk sarawi kan en komour me kin alahldi nan tehnpas sarawi mweidohng kitail en ehu rahn pwuralahng rehn Samatail Nanleng nan irair en peneinei soutuk oh pwehn kapaikihda kapai kan oh manaman sang powe, wia mehkot me warohng atail tohnmetei oh kak koaros.” 15

Eh sohte itar kitail en iangete seiloako; kitail anahne pepehd mehlel ong atail pwukoa oh doula nan pwoson ni atail pahn alehda manaman kaloalamwahu, kakehlail, kakoahiek, oh kamwahu en Tomwo.

Riei lih akan, I poakohng kumwail. I sohte ese mwaramwail kan, ahpw I ese ihs kumwail! Kitail wia Sapwellime lih me kin kolokol inou nan Sapwellime wehi, oh kapaikihda manaman sang ni atail inou kan, kitail onopadahr en wia atail pwukoa.

Pwihn en Sawas en Lih kin kaunop lih akan ong kapai kan en mour soutuk sang ni eh kin kapirada palingenitail en kalaudehla atail pwoson oh pein atail mour pwung. Kitail tepikihda pein kitail. Kitail tepida wasa me kitail pato ie. Kitail tepida rahn wet. Ni atail pahn pepehd ni pali ngehnitail, kitail pahn ahpwete kak en kakehlailih peneinei kan oh wasahn kousoan akan oh sewese mehteikan.

Met wia doadoahk en komour, oh manaman en kakehlail oh kakoahiek en Tomwo me kin elehieng met eh kak pweida. Pirida ong ihs kitail. Pirida oh nsenohkihda atail pwukoa. Kitail wia sapwellimen Samatail Nanleng lih akan, me e ketin poakohng. Duwen met I kadehdehki ni mwaren Sises Krais, ahmen.

Show References

    Iren Sawas Akan

  1.  

    1. Zina D. Young, nan Woman’s Exponent, Oaktohpe 15, 1877, 74.

  2.  

    2.  Rom 13:11–12.

  3.  

    3.  Mosiah 18:8–11.

  4.  

    4. Robert D. Hales, “Modesty: Reverence for the Lord,” Liahona, Oakos 2008, 21; Ensign, Oakos 2008, 36.

  5.  

    5. Boyd K. Packer, “How to Survive in Enemy Territory,” Liahona, Oaktohpe 2012, 35; New Era, Epreil 2012, 3.

  6.  

    6.  Alma 5:26.

  7.  

    7.  Alma 5:14.

  8.  

    8.  Daughters in My Kingdom: The History and Work of Relief Society (2011), 29.

  9.  

    9. Sarah Rich, nan Daughters in My Kingdom, 30.

  10.  

    10.  Madiu 11:28.

  11.  

    11. Nan Daughters in My Kingdom, 30.

  12.  

    12. Ropirop wiawi sang Jolene S. Allphin sang soai kan ntingdien ahd akan en kompani; tehk Tell My Story, Too, 8th ed. (2012).

  13.  

    13. TehkDoctrine and Covenants 84:88.

  14.  

    14.  Aiseia 40:31.

  15.  

    15. Thomas S. Monson, “The Holy Temple—a Beacon to the World,” Liahona oh Ensign, Mei 2011, 92.