Mo Klekar el Kirel a Ngercheled

Mla er a Carole M. Stephens

Kot el Counselor er a Cherrengelel Omerreder er a Relief Society


 
Carole M. Stephens
Ng kired el mo klekar el kirel a ngercheled e melemolem el ngara klaumerang sel dosiik er a ongelaod, melisiich, mesebechakl, e omkungil el klisichel a Tngakireng.

Uriur er a okedongek el mora cherrengelel omerreder er a Relief Society, eak mlo omelchesiu er ngak el soak el kmal mo ungil medengelterir tirkel redil el milesiou ruchei er ngak. Ng mlo mechas a renguk er a osischeklel a Sister Zina D. Young, el mle kot el counselor er a cherrengelel omerreder er a Relief Society. Ng dilu el kmo, “Rodos, ng kired el mo klekar el kriel a ngercheled.”1 Ak mlo melbedebek er a tekoi el klekar me a ngerachel e ulsiik a bebil er a omesodel er a chedaol llechukl.

Chelsel a Beches el Renged, ea Paulus a ulsisechakl er a Reasanto:

“Ng mla mo taem el bo de klekar e diak de mechiuaiu: ele sils er a osobeled a kmedang. …

“Ng mla mo merek a klebesei, ea llomes a meremang: … me de bilid er a llomes.”2

Chelsel a Babier er a Mormon, ea Alma a ulsisechakl er a rechedal kirel a chedaol ngerachel er tirkel siliseb er a telbiil lobengkel a Dios:

“Me chelechang, el somiu el mei er a rengedel a Dios, e mo okedongall el chedal, e somiu el mo olngeseu er a berraod er a ta me a tang, me bol kebekakl;

“Oi, kom kongei el mo lmangel lobengterir a relmangel; oi, e mengelaod er a rousbech ongelaod, e dechor el sioning er a Dios er a rokui el taem me a rokui el tekoi, er a rokui el basio el mnga er ngii. …

“Chelecha kmu er kemiu el kmo, alsekum e tiaikid a soal a rengmiu, e ngera meng diak bom nguu a techolbechelid el ngara ngklel a Rubak, el sioning el mo er ngii el kom mla soiseb er a telbiil lobengkel, el mo mesiou er ngii e oltirakl a llechul, me bo luchul e lochebelii a Reng er ngii el mei er kemiu?

“Me a rechad er a rengesa aikal tekoi, ete ulemrotech chimorir er a deureng, e uleldiu el kmo: Tiaikid a somam.”3

A tekingel a Sister Young me a ikal ngara chedaol llechukl a rirellak el mo omtab a “ngerachel” el kid a kired el klekar er chelechang.

Sel de metecholb, e kede soiseb er a telbiil. A Elder Robert D. Hales a ulsisechakl, “Sel doruul e doltirakl a telbiil, e kede mo iikrii a beluulechad e soiseb er a rengedel a Dios.”4

Kede mengodech. Kid a mengodech, me a omerelled meng mengodech. A tekoi el dorrenges me a donguiu me a dolekoi a mengodech, me a ikel doubail meng ngodech ele kid el mla mo ngelekel a Dios el rengodech el mo er Ngii lokiu a telbiil.

Sel de moterekokl, e kede nguu a sengkel Chedaol Reng, el llemelted el omelchesiu er a ongedei el chedal a Kledios el mo omekrael er kid, mengelaod er kid, e omecheliu er kid. Ngii omeklatk er kid sel de mechetikaik el mo er cheroid er a telbiieled el bedul a beluulechad. A President Boyd K. Packer a olisechakl el kmo ng diak a ta er kid “el ruebet er a klou el klengit el diak ba le kot el nguu a uleklatk er a odbechel Chedaol Reng.”5

Me a mo uchul e kede nguu tial sengk me a Chedaol Reng a mo obengked, eng kired el mo klikiid e blak a rengud el merritel a chelsel a rengud. A rengud ng medemdemek? Ngariou a rengud, mosisechakl a rengud, e chelellakl a rengud? A lechub a rengud a mla merael mo medecherecher leng mla mo diak dorrenges er a chelellakl el odbechel a Chedaol Reng?

Se er a de metecholb, ea rengud a mlengodech e klekar el bedul a Dios. Me sel dolemolem er tial klengar er a beluulechad, eng kired el blechoel oker er kid, “Alsekum [eak mla] melchesuar a ngeldechel a reng. … eng [sebechek] el melchesuar er chelechang?”6 Ea, lak, e ngera uchul?

Betok er a ruchelir a Resanto a mlo “melchesuar tial klou el ngeldechel a reng er a [rengrir].”7 Ng rirelterir el mo ngmai a klengeltengat er a templo el mlo smisicheterir er a ngerchelir. A ruchelir a Resanto er a Nauvoo a mlo er a “templo el tal sils el mo klebesei”8 el mlo melai chedaol ruoll e soiseb er a chelsel a kuk bebil er a telbiil ruchei er a lorael el bedul a dims.

A Sarah Rich, el odos er a Relief Society er a Nauvoo, a dillii tiang: “Betok el klengeltengat a ki mngilai er a chelsel a blil a Rubak, el mlo uchul a deuil a rengmam me a ongelaod er a chelsel a rokui el klengit el reng e rirellemam el mo klou a klaumernag er kemam er a Dios, el medengei el kmo Ngii a mo omekrael e melisiich er kemam er tial diak ki modengelii el omerael el ngar medemam.”9

Ngultuil er a reng el mla mengodech lokiu a klaumerang er a Osobel, ete mle ultuil er a klisichel a Tngakireng er Ngii. Te mlo klekar el mo meruul. Te mle medengei er a chelsel a rengrir el kmo ng mla er ngii a di ta el—Osobel—el ngii a mle medengei a ringel el bla er a chelsel ele Ngii a mlo er a ringel el kirir er a Sers er a Gethsemane me a kerus. Ng ulemelchesiu a dektir, klaumededenger tir, ringel, me a klesabisi le bla er ngii. Ng mlora ringel el kirel a kngtil a rengrir, odechellakl el mlor tir, sengerenger, chelitechut,me a kodall. Me Ngii el mlo er a ringel el kirel aikal rokui, e Ngii a sebechel kmu er tir, “Mei er ngak, kemiu el chellungel a berraod, eak mo meskemiu a ulengull.”10

Me te mlei. Te ulemerang e ultirakl er a profet. Te mle medengei el kmo omerael a mo kemanget, e meringel a ngerchelir. Te mle medengei el kmo te mo chuarm, eng di ngultuil er a klaumerang er tir me a telbiielir, el bla el ruul, ete mle kldmokl er a chedaol tekoi.

Uchei er a ltobed er a Nauvoo, ea rebebil er a Resanto a lilchesii a klemechir er a kboub er a chelsel a templo el tir a mla morimel el mo iikrii. Ng kmul kmo, “A Rubak a mla mes a ki blo mcharm er ngii el ureram: moltirakl okesiu er kemam.”11

Ak dirk mlara kemanget el omerael el lolechotir tirkel uchelel a ikelesia lobengterir a rengeasek el sechal me a redil er a ward er kemam. Bek el tutau ea kuker ngak, “Ngera bok charm er ngii? Ak mekera oltirakl okesiu er tir?”

Ongeru er a sils er a omerael, ea ki mla mengurs a kareta er kemam el eai el mile (12 km) ea ki mlei er a basio el okedongall el “redil mengurs.” A rsechal me a redil a mle blii, ea rsechal a mlo ruchei. Tia er a ki bo mongurs a kareta el mo er bab, ea kulmes er tirkal loba priesthood el sechal ngarbab, mekekerei me a remeklou, el blechobech er a bita me a bitang el tkul a rael, el mla ngmai a ulekungir el lolechotel omengull er tir el mora redil.

Ng mle telkib el ungil a rael, el di mle telkib eng chelechol, ea rois a kmal mla mo oldengelengel. A kulemes er iou e kmal blak a renguk el oldubech e mlo omelchesiu er a mengurs me a kulemes er bab e mesa Lexi, el ta er a ngeasek el dil e tonari er ngak. Ng mla kursii a kareta er ngii el mo er bab, e ulemes er kemam el ousbech a ngesou, meng rurta el mei. Aki mle meringel el merael mong el mocha rebab e chemoit aikal kareta. Ng kmal mle soak el lemuut el remurt el me olngeseu er tirkal luleak kullek, eng di ak meral loltirakl er a telik, ea renguk a meral melkedukem me a tekoi el heart attacka mle betok el bel siseb er a uldesuek! Ng mlo dmeu a renguk lomes er a rebebil er a rengeasek el redil el chemoit a kareta er tir e remurt el mo olngeseu er a rebebil.

Uriur er a le mei er bab a rebek el chad, ea ki mlo meluches aikel ki mo melchesiu er a journal er kemam. Ak milluches: “Ng dimlak sal mle ungil kldmokl meng dimlak el sebechek el mo ngosuterir tirkel luleak kullek. Ng locha diak luut el mo oldubech a kareta, ng di ng dimlak el soak el tomall a rengir a rodos er ngak er a kuk chedaol tekoi, ng diak!”

Ng mle chedaol teletael el rirellak el mo klekar el kirel chedaol ngerchelek el mora telungalek er ngak me a rebebil er a rechad. Chelsel tial omerollam, eak mlo melbedebek aikel blak suub.

A kot, a kulemdasu er a rodos er ngak, tirkel milngursme tirkel melemolem el mengurs a kareta er tir er chelechal sils. Ng kmeed el lluich me a edei el basent er tirkel redil el mla er sel kareta a di mle tir. A rebebil a dirkak le bechiil, rebebil a mle mesobil malechub ete mla melakl, ea rebebil a mle bechiil eng di te mle chacheroid tir me a rebecherir.12 Te mlo dmak e oureor—redil er a telbiil, mekekerei me a remeklou, el kakerous a teletael er a klengar tir, e ngara osisiu el rael, loba chimo el moktek.

Tirkel rirurt el mo olngeseu er a rodos er tir a mekletkak er a rengara siik, a desterir me a re diak, el mereched el omtab, omes a usbechall, e tuobed el mora siik.

Ak mlo melatk a tekingel a Rubak: Se er a ledu el kmo Ngii a mo ruchei. E Ngii a mo ngara kadikm me a katur er kid, ea Reng er Ngii a mo ngara chelsel a rengud, ea reanghel er Ngii, a mo mesebechakl er kid.”13

Tirkel mle dechor er a tkul a rael a mle mesisiich a klaumerang er tir, bekongesenges, e oltirakl a telbiil el chad. A priesthood er tir—el ngii a klisiich el Dios ousbech er ngii el omekngeltengat er a Rengelekel—milsebechakl, millisiich, e ulengeseu er kemam. Tir a mle uleklatk el mei er kemam el kmo ng diak dil kemam el tang. Tial klisiich a sebeched el di blechoel obang alsekum kede oltirakl a telbiieled.

A kumdasu el kirir tirkel sechal el mlo chacheroid tir me a telungalek er tir el betok a uchul, el milchiteterir meng di tir el mengurs a kareta. Betok el sechal a mlad er tia el omerael. A rebebil er a rengalek el sechal a kiliei el mora mision er a ikel basio le bla er ngii. A rebebil a di mla mo ruchei e mengedmokl el kirir a retelungalek er tir el me kmerd er a Salt Lake Valley. A rebebil a kuk di mle dibus, ele tir el dimlak el sorir el oltirakl a telbiielir.

El uai tirkel ucheled, betok er kid a kiei er a chelsel a teletael el diak el sal ungil. Kede melemolem el olisechakl e osiik el kirel sel ngii a mo ungil ele kede medengei el kmo a dolasem el melemolem el ngara rael e dongedmokl er kid el kirel a techall er medad e kede mo ngmai aikel klengeltengat el “Rubak a mla kudmokl el mengiil er kid.”14

A dersta er kid a mla ngarngii e melemolem el mo er ngii ongarm er a klengar kid. Tial klengar er a beluulechad a taem er a skeng, e kid a mo melemolem er sel techelled el mimokl el melilt aikel desuub er a chelsel ongarm el ngii a mei er kid.

Me kid el ngelekel a Dios, a kired el melemolem el ngara rael er a klemerang, ele kid el mtebengar el uaia osischeklel a President Thomas S. Monson, “Aikel chedaol ruoll el kirel a mo suobel el ngara chelsel a templo el meskid a kengei el lemuut el mora Chedam er a Babeluades el telungalek e mo ngmai a klengeltengat me a klisiich er bab a kmal meklou a belkul er a ikel bek el ringel me a ongarm.”15

Ng diak el klebech a di de ngara omerael; ng kired el mo klekar e melemolem loba klaumerang sel dosiik ongelaod, omelisiich, kengei, me a omekungil el klisichel a Tngakireng.

Rodos er ngak, ng betik a renguk er kemiu. Ng diak sal ungil medengelterir a rebetok er kemiu, eng di ak medengei el kmo kom rua techang! Kid a ngalek el redil er a telbiil er a Rengedel, e olab a klisiich lokiu a telbiil, me kede kldmokl el kirel a ngercheled.

A Relief Society a kudmekelterir a redil el kirel a klengeltengat er a diak a ulebengelel klengar el lokisid el kirel chedaol tekoi me bo de mesisiich er a klaumerang me a llemalt. Mei e domuchel er kid. Mei e domuchel er sel de ngarngii. Mei e domuchel er chelechang. Sel de klekar er a chedaol tekoi, e kede mo sebeched el melisiich a telungalek me a blai e olngeseu er a rebebil.

Tia urerel a osobelel a klengar, ea klisichel me a kengei er a Tngakireng a uchul eng sebechel mekedmokl. Mo mui el klekar er a kmo kede rua techang. Klekar el kirel a ngercheled. Kid a redil el ngelekel a Chedam er a Babeluades, el betik a rengul er kid. Aikang ak dung el ngara ngklel a Jesus Kristo, amen.

Mostrar referencias

    Uleklatk

  1.  

    1. Zina D. Young, in Woman’s Exponent, Oct. 15, 1877, 74.

  2.  

    2.  Rom13:11–12.

  3.  

    3.  Mosiah 18:8–11.

  4.  

    4. Robert D. Hales, “Modesty: Reverence for the Lord,” Liahona, Aug. 2008, 21; Ensign, Aug. 2008, 36.

  5.  

    5. Boyd K. Packer, “How to Survive in Enemy Territory,” Liahona, Oct. 2012, 35; New Era, Apr. 2012, 3.

  6.  

    6.  Alma 5:26.

  7.  

    7.  Alma 5:14.

  8.  

    8.  Daughters in My Kingdom: The History and Work of Relief Society (2011), 29.

  9.  

    9. Sarah Rich, er a Daughters in My Kingdom, 30.

  10.  

    10.  Mateus 11:28.

  11.  

    11. Er a Daughters in My Kingdom, 30.

  12.  

    12. Omesuub el kildmeklii a Jolene S. Allphin er a chelsel a cheldecheduch; mesa Tell My Story, Too, 8th ed. (2012).

  13.  

    13. MesaDoctrine and Covenants 84:88.

  14.  

    14.  Isaiah 40:31.

  15.  

    15. Thomas S. Monson, “The Holy Temple—a Beacon to the World,” Liahona me a Ensign, May 2011, 92.