Tiyaen’dad nga Murwel Rodad

Rok Carole M. Stephens

Bin Somm’on e Counselor ulane Relief Society General Presidency


 
Carole M. Stephens
Ngadtiyan’dad ko murwel rodad nge athamgilgaed ufithik e mich nap’an ngad ngoliyed e gol, gelngin, rayog nge gelnog e gelngin ko e Bayul.

Tomuren nikan piningeg nga Relief Society general presidency, mug thamiy ni guba’adag ninggu nang boech mornga’agen fapi ppin ni kar ayuw gaed nib m’on rog. Gu ba adag fapi machib ku Sister Zina  D. Young, ni i’ir e bin somm’on e counselor ulane bin la’agruwi Relief Society general presidency. Ke ga’ar, “Pi Walageg nib Ppin, thingar dinanged fan e pi muruwel rodad1Kug tafney nag fare gal thin ni nanged fan nge muruwel mug gay boech ulane fapi chep nib thothup.

Ulane Bin Be’ech e M’ag, Paul eke fil ngak fapi Gidii’en Got u lane rran rok:

“Ya ngiyal’ ni ngdarod riy ngak Got e ke chugur e chiney e ngiyal’ ni ba’aram nsom’on ni mich Jesus u wun’dad. …

“Kari chugur ni nge chuw e neap’: … marod ngad feked talin e cham ni yima cham ngay ufithik’ e tamilang.”2

Ulangin fare Babyor ku Mormon, Alma e ke fil ngak e gidii’ rok mornga’agen e muruwel nib thothup ngak e gidii’ ni kar ngongoliyed e m’ag ngak Got:

“Ere chiney, e bachan e gimed ba’adag ni ngam baed ko ulung rok’ Got, ma noeg ni gimed e gidii’ rok’, mab m’agaen’med ngay ni ngam ayuweged gimed, ni nge yog ni ngam ba’ud gaed;

Arragon, mab m’agaen’med ngay ni nge kirbaen’med ngak’ e pi’in nibe kirbaen’; arragon, mi gimed fal’eg laniyaen’ e pi’in nib t’uf rok’ ni ngan fal’eg laniyaen’, ma ngam pired ni gimed e pi mich rok’ Got ni gubin e ngiyal’ ngo fithik’ gubin ban’en, nge gubin yang. …

“Ere chiney e gube yoeg ngomed, fa’anra ireray e athap ko gum’ircha’ romed, ere mangfan ni dab ni tawfe nagmed u fithgan Somoel, nib mich riy ngak’ ni kam fal’eged ba m’ag u thilmed, ni gimed ra pigpig ngak mi gimed fol ko pi motochiyel rok’, ni nge yog ni pii’ e Kan ni Thothup rok’ nga dakeanmed?

“Ere ngiyal’ ney u nap’an ni rung’ag fapi gidii’ e pi thin ney, mar weywey gaed ko falfalaen’, miyaed ga’ar: Ireray e re athap ko gum’ircha’ romaed.”3

Thin ku Sister Young nge fapi chep nib thothup e ke pug ulanin’ug ninggu lemnag mornga’agen fapi “muruwel” ni ngarin pugdad ngay e daba’.

Nap’an ni gadaed ra tawfe, ma kadfal’eged e m’ag. Elder Robert  D. Hales e ke fil ni ga’ar, “Nap’an ni gadaed ra fal’eg man cha’ariy fapi m’ag, ma kad chuw gaed ko tin fayleng ban’en ma gadaed yib nga lane e gil’lungun Got.”4

Kad Thil gaed. Ke thil ya’andadma kad mithmith gaed nib thil rogon. Pin’en gadaed be motoyil ngay ma gadaed be bi’eg nge thin rodaed e ke thil, nge n’en ni gadaed be chuw ngay e ke thilni bachan ni kad manged e bitir nib ppin ku Got, kan ma’g paa’ dad Ngak udakaen e m’ag.

Nap’an nikan confirm nag dad, ma keyog fare taw’ath ko fare Kan nib Thothup, e matoy ninge paer e chongin Got ninge pow’iy dad, me gapas nagdad, me matangiydad. Ma ayuweg daednap’an ni ra yib e lumel ngodaed ni ngad chuw gaed ko fapi m’ag rodad ngad suloed ko tin fayleng ban’en. President Boyd  K. Packer e ke fil ni dariy bagdaed ni “rayog ni ngad rin’ed e oloboch ni rib kireb ni dabi ayuweg daed fare Kan ni Thothup ngodad.”5

Fa’anra ngad athapeged e biney e tawa’ath me paer fare Kan Thothup rodaed ni gubin ngiyal’, ma thingar di mat’awgaed mad matan giyed e rogon ko gumircha’ daed. Ke munguy e gum’racha’en daed? Ba sobutaen’ gumiracha’dad, e gumiracha’ey nima fil, e gumiracha’ey nib gol? Fa sana el gumiracha’daed nap’an ni kad paged bukun laman e fayleng nge palog nag daed ko fare Kan Thothup?

Nap’an ni kan tawfe gaed, me thil gumiracha’dad ma sap gaed ngak Got. Nap’an ni gadaed bay ko biney e yafos, ma ba tu’uf ni gubin ngiyal’ ma ngad fithed gadaed, “fa’anra [kug] thamiyed gum’ircha’med ni ke thil, … be yog ni ngam thamiyed e chiney?”6 Ma, fa’anra danga’, ma arame mang fan?”

Bo’or Gidii’en Got kafram nikar “thamiyed gum’ircha’[raed] ni ke thil.”7 Ke fal’eg rograed ni ngeyog e pi tawa’ath u temple ngoraed me pii’ gelingraed ningar ko pi muruwel roraed. Gidii’en Got ni kafram u Nauvoo ar ranoed “nga lane temple ni gubin e rran nge mada’ ko nep”8 ninge athapeg e pi gam’ing man rrin’ e m’ag um’on ningar tabab gaed ko milekag roraed i sar nga ngael’.

Sarah Rich, reb e ppin ko Relief Society u Nauvoo, e ke ga’ar: “Keyog e bukun e tawa’ath ngomaed u lane na’un rok Somoel, ni ke pi’ efaflaen ngodaed nge gapas nap’an gubin e kirbaen’ me yag rodaed ningad michaen’dad ngak Got, ni gadad manang ni Ra powi’iy nag dad me matan giy dad nap’an e milekag rodad.”9

Gumiracha’ey nike thil udakean e mich ngak fare Tathapeg, man pagan’uy ko wo’en rogon ko Bayul Rok. Kar na’ab gaed ni ngar mith mith gaed. Yaed manang u lan gumiracha’raed ni kemus ni ta’areb—fare Tathapeg—ni manang fan e dibchay nge lumel roraed ni bachan nike gafgow riy ni fan roraed ulane e Milay’ nu Gethsemane nge ngadakaen fare kruth. Ke thamiy e murus roraed, marwaraen’, amith roraed, nge kireb yaed ni go’ yaed. Ke gafgow u fithik e pin’ey, magawon roraed, bilig, mo’owaer roraed, nge yam’. Ma bachan nike gafgow ko gubin e pinn’ney, ma rayog ninge ga’ar ngoraed, “Mired ngog, ni gimed gubin e pi’in ke aw parowmed i fek e n’en nib tomal ni gimed be fek, mu gu pi’ e toffan ngomed.”10

Ma kar baed nga Utah. Pagan’raed ma yead be fol ko fare profet. Yaed manang ni fare milekag ba n’uw napan, ma muruwel roraed ba momaw’. Yaed manang ni ba t’uf e maligach, machane mich roraed e ke ayuweg raed kar chich’iy raed ko fapi m’ag roraed, ka fal’ rogon raed nib mangil rogon.

Um’on ni kug chuw u Nauvoo, ma u lungi Gidii’en Got e kar yoloeyed e mulwol ko assembly hall u langgin e temple ni kan tuluf raed riy. Ba ga’ar, “En Somoel e ke guy e maligach romaed: mu lekmaed.”11

Kafin gu un ko milekag ko pioneer ni gomowi pagal nge ppin nib fel’ yangren ko ward romaed. Ra reb e kadbul ma gumafitheg, “Mange maligach rog? Urogon ninggu lek e wo’ roraed?”

Nap’an e bin l’agruw e rran ko fare milekag, ma kug chuchuuyed fapi handcart romaed ni mereb e mile (13 km) ni ngug waroed riy ko yangi kanawo’ ni kanoeg e “chuchuuy ko ppin” ngay. Pumo’on nge ppin u but e kan dar, ma pi pumo’on e kan pi’ raed nga m’on, nga talang ko fare burey. Nap’an ni gu pipi’yed fapi handcart romaed,, mug sap nga talang mug guy e pi walagmad nibay e priesthood roraed, pagal nge labthir,nga gali barba’ e kanawo’, mar lufed fapi orwaech roraed ni yibe taw fan fapi ppin.

Moem rogon fare kanawo’ ko somm’on, machane ta’aboch riy fini waergaed u chimalong nib to’ar, nge fare burey e ke mari yit’. Kug sap nga kanawo’ mug pipi’ gelngin nini rayog rog nap’an ni gu thamiy bee’ nibe tel ecart rog mug sap nga lang muguy Lexi, ba ppin nib fel’ yangren nge yoror rog. Be pipi’ e handcart rok nga dakaen fare burey ma, napan ni guy nike t’uf e ayuw romaed, me sul. Napan ni gu taw gaed iyan nga talang. Mari gu ba’adag ninggu mil nga tomur ni ngguayuweg e gidii’ u tomur rog, machane ke tomal e pogofan rog, mari be thom thom gumiracha’eg nib alamrin ni buguthin ni heart attack e yib nga lanin’ug ni bukun yay! Mug yaliy u fithik e falfalen’ nap’an ni boech e ppin nikar taleged e handcart roraed mar suled ningar ayuw gaed.

Napan ni gubin e gidii’ ma kar tawgaed nga talang, ma gamaed yoloyed mornga’agen e laniyaen’ maed nga lane journal romaed ko nochi taym. Ku yoloey ni: “Daworug fal’eg rogon u gelngin e dowef rog ni fal’ rogon ere dariy gelngig ni ngug boech e gidii’. Sana daki t’uf ni nggu gerngiy e handcart biyay, machane dabgu pag e walageg nib ppin ko tin ko ya’el, bi’id!”

Bangiyal’ nib t’uf ko ya’el kan pinningeg ni ngu pugeg ko muruwel rog ko tabinaw rog nge ku boech e gidii’. Nap’an e milekag romaed, mug tafiney nag e pin’en ni kug fil.

Somm’on ma ku lem nag e pi walageg nib ppin, i kar gerngiyed mar athamgil gaed edaba’ ningar telgaed i yigo’ e handcart roraed. Chuchugur ko 20 pasent e ppin ulane fare ulungi handcart nem kar ronoed i yigo’raed, e badke bang riy. Iraray e pi ppin ni dawori mabgol gaed, boech e kar dar gaed e pumo’on roraed, boech e ke yim’ e pumo’on roraed. Bukun yaed e bay e bitir machane dariy’ e pumo’on fa figirngin kar yim’.12 Kar murwel gaed u ta’abang—walagen nib ppin u m’ag, nib rugod nge labthir, nib thil rogon u yafos roraed, ta’abrogon e kanawo’, ma ba ta’abrogon e thap.

Picha’an nikar ranoed ningar ayuweged e walagraed nib ppin nib tu’uf e ayuw roraed e be yibe nga n’ug e picha’an ni ta’ayuw, ni yima guy ma dani ma guy ni yaed ba papey i yaliy daed, nang fan e nen nib t’uf, me pi’ e ayuw man mithmith.

Ku lemnag fapi thin rok Somoel ni yoeg ni ra yaen u powchen daed, nira paer u baen mat’aw i pa’ daed nge baen gilay’ i pa’ daed, ma Kan Thothup Rok e ra paer u gumiracha’dad, ma fapi angel Rok e ra liyegdad, me chibiydaed nga lang.13

U gali barba’ e kanawo’ ni bay e pumo’on nib yul’yul’, ma fol, ma yaed ma cha’ariy e m’ag roraed. Gelngin e priesthood roraed—e gelngin Got ni murwel ngay ni nge yibliy pifaak ni gubin—chibiy’daed, pii’ gelngindaed, me ayuwegdad. Pi pumo’on ney e pow ni darma pagdaed ni yigo’dad. Rayog ni ngeyog e biney e gelngiy ngodaedni ngiyal’ napan ni gadaed ra cha’ariy e pi m’ag rodaed.

Ku leam nag fapi pumo’on ni kar chuweged nap’an fare milekag ko tabinaw, ni kan pag raed ni ngar gerngiyed e handcart roraed ni go’ Oren e pumo’on e karim’ad napan fare malekag. Boech pagal e kar pired ni ngar serve niged e mission ko nam roraed. Boech e chuw ni kar m’on gaed ko boech e bin somm’on e ulungningar fal’eged gubin ban’en ni fan e wub ko pi tabinaw rodad ulane Salt Lake Valley. Boech e dar moey gaed, ya kar dulgiyed ni dabir cha’ariyed e pi m’ag roraed.

Woed e picha’an ni kar ranoed ko somm’on, bo’or e gidii’ dadba’ e ma paer u fithik e gafgow ni dani mangil. Gadaed be athamgil ni ngad filed ma gadaed athamgil fan e mangil ya gadaed manang ni athamgil rae ra fek daed nga tomur e kanawo’ me fal’eg rogadaed ko tin ban’en ni ngeyog gubin e pi tawa’ath nikan dugliy napan ni gadaed be “soen nag fare Somoel.”14

Ra bagdaed ma ra buch ma ra ulul ni ra buch e sikeng u lane yafos rodad. Biney e yafas e ngiyal’ ko sikeng, ma gadaed ra ulul ni nge yag e murwel ngodaed ni ngad murwel gaed ko agency rodaed ko mange ngad filed ko fare sikeng ni bay yib.

Gadaed faak Got nib ppin, gadad be athamgil ko fare kanawo’ ko mich, ya gadaed manang ni woed ni ke fil President Thomas  S. Monson: “Fapi gam’ing nike yag u lane temple e ma bing wo’en ngodad ningad suloed boran ngak e Chitamangdad nu Tharmiy nga lane tabinaew nib manechubog man athapeged e tawa’ath nge gelngin u tharmiy e dabyog i pir’eg ma ba fel’ puluwaen’ ko gubin e maligach nge gay rogon.”15

Dani gaman ni kemus ni gabey ko fare milekag; ngarin na’ab gaed ko muruwel rodaed ma gadaed athamgil u fithik e mich nap’an ni gadaed ra gayed e gapas, gelngiy, rogon, nge gelngin e gol ko fare Bayul.

Pi Walageg nib ppin, ri gimed ba tu’uf rog. Dagu nangmed nib mangil rogon, machane gumanang ko gur mini! Gadaed e ppin ni faak ni gadaed ma cha’ariy e m’ag rodaed u lan gililungun, ma kad tawa’ath gaed u dakean e pi m’ag rodaed, ma kad redy gaed ko murwel rodaed.

Relief Society e ma fal’eg rogon e ppin ni fan ko fapi tawa’ath ko yafas nib manechubog ni nge na’ab nag daed ni nge gel nag e mich rodaed nge ma’taw rodad. Ngad tabab gaed rodad. Ngad tabab gaed ko gin ni kad tabab gaed riy. Ngad tabab gaed e daba’. Nap’an ni kad od gaed nib polo’, gadaed ra cheg nag ni ngad pi’yed gelngin e tabinaew nge ku boech e gidii’.

Iraray e muruwel ko tamilangeg rogon min thap me yag gelngin fare Bayul ni nge n’anggin nge buch. Na’ab ko gadaed mini’. Na’ab ko muruwel rodad. Gadad gubin ma gadaed ppin ni faak e Chitamangdad nu Tharmiy, ma gadaed ba tu’uf Rok. Biney e gube micheg nag u dakaen fithingan Yesus Kristus, amen.

Mostrar referencias

    Notes

  1.  

    1. Zina D. Young, in Woman’s Exponent, Oct. 15, 1877, 74.

  2.  

    2.  Roma 13:11–12.

  3.  

    3.  Mosiah 18:8–11.

  4.  

    4. Robert D. Hales, “Modesty: Reverence for the Lord,” Liahona, Aug. 2008, 21; Ensign, Aug. 2008, 36.

  5.  

    5. Boyd K. Packer, “How to Survive in Enemy Territory,” Liahona, Oct. 2012, 35; New Era, Apr. 2012, 3.

  6.  

    6.  Alma 5:26.

  7.  

    7.  Alma 5:14.

  8.  

    8.  Daughters in My Kingdom: The History and Work of Relief Society (2011), 29.

  9.  

    9. Sarah Rich, ulane Daughters in My Kingdom, 30.

  10.  

    10.  Matthew 11:28.

  11.  

    11. Ulane Daughters in My Kingdom, 30.

  12.  

    12. Mu yaliy nike ngongliy Jolene S. Allphin ko boech e yaat nge mornga’agen e company u lane; mu guy Tell My Story, Too, 8th ed. (2012).

  13.  

    13. Muguy ko Doctrine and Covenants 84:88.

  14.  

    14.  Isaiah 40:31.

  15.  

    15. Thomas S. Monson, “The Holy Temple—a Beacon to the World,” Liahona nge Ensign, May 2011, 92.