Eis Mwe Insewowo luhn Wuhlweacng Lowos

Sel Linda S. Reeves

Mwet in Kahsruh Ahkluo ke Prestuhnsi Luhlahp luhn Rilif Sosaiti


 
Linda S. Reeves
Ke kuht ahksasucye ac ahkfuhlwactye olwelah lasr uh, ma toasr lasr uh kuh in muhlahlahi, ac kuht kuh in kalweni in eklac nwacsnwacslah ac fokokoi.

Tahmtahel, oasr wolacna yohk an in sulpac wi kowos.

Nga tuhfahna ohsun nuh sin sie muhtwacn suc ahkolah in pacptaislac. Sacnri se inge el sun lohm alu ah ac fahsr ke mael luo (3 km) ke fohk fuhrahrrahr na toasr. El sana som nuh ke lohm fahsr ah, eslah nuknuk fohk fuhrahrrahr lal ah, yihlac, ac nokomwacng nuknuk in Sacnri nwacsnwacs ah. Ke miting luhn Rilif Sosaiti ah el sruhmuhn ke eklac lal ah. Nga mokleyuckyak na upac ke kena yohk lal in owolac wo ac nwacsnwacs ke auliyak ac kihsac in iwaclah luhn Mwet Lahngo ac kena yohk lal in fuhlweack “moul mahtuh” lal elan kuh in orwaclah olwelah muhtahl yurin Pahpah tuhmasr Inkuhsrao. El fahsrwelihk liki mukul se lal ah, el kuhtanglah mwe pahlah in kuh in moulkihn Kahs in Lahlmwetmwet, tilac wi orekma in Sacnri se lal, ac tilac kawuck nuh sin mwet aetuhi ke el ahkkahlwemye plwacn lal in pacptaislac ah. El arulacna rahrah in auliyak ke ma koluk lal tuh elan kuh in owolac nwacsnwacslah ac puhla luhngse molwelah luhn Mwet Lahngo. Nga mokleyuckyak ke olutu sac ke kena lal in eklac nwacsnwacs ke kwewana moul in mahno ac nguhn.

Kuht etuh lah inkaiyowos orwaclah pac kain kihsac uh ke kom puhlakihn mwe lohoh luhn Nguhn Muhtahl ac kena in auliyak, in pacptaislac, ac in nwacsnwacslah. Sahp ac wacngihn sie pacl ke kuht puhla luhngse wolacna luhn Mwet Lahngo in yohk oacna kuht oruh ke kuht auliyak ac puhla mokleyuck ke luhngse lal nuh sesr ac ahkpwacyei nuh sesr ke luhngse ac lwelah Lal.

Sacnri ekahsr somlah ah ke nga porongo pruhe nuh ke kuhfa luhn Leum uh, nga mokleyuck ke ohiyac ma prist ah fahk kais sie kahs ke puhla na yohk. Tok kuhtuh nga pahngon prist sac in kuloh nuh sel ke kahsruh oruh kuhfa luhn Leum in sie puhlakihnyuck ke loal ke nguhnnguhn nuh sihk ac mwet alu ah. El tiacna oasr lohm ah, tuhsruhk ninac kiyacl ah topuk, “O, el fah engan na pwacye lah kom pahng! Pa inge pacl se emet lal in oruh pruhe nuh ke kuhfa luhn Leum, ac kuht tuhkweni ahkolah, sramsram ke yohk srihpaciyacn kuhfa luhn Leum ac suwohs in ahksasucye olwelah ke pacptais lasr yurin Mwet Lahngo.” Fuhkah luhpan luhngse luhk nuh sin ninac se inge ke lutiyacn tuhlihk mukul se nahtuhl ke kuh ke olwelah luhn pacptais uh ac ohiyac el kuh in kahsruh mempucr ke ward sac in puhla kuh sac.

Sie pac ninac nga etuh muhkwena muhta ke alu ah ke yac pucspucs wi tuhlihk fuhsr ahkosr nahtuhl. Sessahlah in kuh in lohacng na nuh sin Mwet Lahngo ke pacl in kuhfa luhn Leum uh, el orwaclah sie plwacn. Ingena el srihke in eis pacl kais sie Sactte liye wik se lal ah ac nuhnkuh ke olwelah lal uh ac ma el enenuh in auliyak kac. “Na,” el fahk, “finne kain in puhlakihn fuhkah luhk yurin tuhlihk nuhtihk ah ke Sacnri, nga ahkolah in ipeis kuhfa luhn Leum, ahksasucye olwelah luhk uh, ac puhla ke kuh nwacsnwacs ke Iwaclah sac.”

Efuh kuh Mwet Lahngo El sang ma yohk srihpac puhkantwen nuh ke kuhfa luhn Leum, tahmtahel sacohk? Yohk srihpac fuhkah ma ahksasucyeyuck ke wik nuh kwewa ke olwelah lasr ke pacptais se inge ac oruh nuh ke moul lasr uh? Yac kuht akihlen kuh luhn Mwet Lahngo in ahknwacsnwacsye kuhtlac na pwacye wik nuh kwewa ke kuht nwacsnwacs ac nuhnkuh in ipeis kuhfa luhn Leum? Prestuhn Boyd K. Packer el fahkwack, “Pa ingacn olwelah ke wosasuc luhn Jisus Kraist ac Iwaclah sac: … ke sahflahiyacn [moul lasr, kuht] kuh in som liki lihsrlihsr sac ke auliyak luhn ma koluk [lasr] uh ac in nwacsnwacslah ke srah luhn Kraist.”1

Prestuhnsi lasr uh puhla engan yohk ke tahmtahel wiyacsr uh ac sucu lalos uh orwaclah ac liyacacng olwelah uh, tuhsruhk insiyacsr ahsor keim suc puhlakihn ma upac yohk ke moul lom uh ke srihpen olwelah kuhnanuclac luhn mwet kom luhngse an. Mwet pahluh Jacob tamuhlwel nuh sel Nephi, el sapkihnyuck sin Leum in sramsram nuh sin tamuhlwel lal ke muhtwacn ac tuhlihk suwohswohs ke lwen lal ah. Nga fahkwack luhlahlfongi lah kahs lal ah sruokyucki yohkna nuh ke lwen lasr uh. El sramsram nuh sesr oacna Mwet Lahngo Elan Sifacna sramsram. Jacob el toasrlacna … ke elyah yohk ke el fahkwack luhlahlfongi nuh sin mukul pahyuck ac pahpah uh.

Jacob el fahk nuh selos lah ma ingacn ahkahsoryacl oruh el enenuh in orekmakihn kahs kohsroh pucspucs … ye muhtuhn muhtwacn kiyaclos ac tuhlihk nahtuhlos an, puhs sin puhla lalos an arulacna luhngse ac nwacsnwacs ac fihsrwacsrsrwacsr. …

“… Tuhng luhn insiyaclos som nuh lucng yurin God. … Inse pucspucs misac, patpatuh ke kihnet loal.”2

Nuh sin muhtwacn ac tuhlihk liyacacng olwelah suc moul ke pacl lal ac mihsenge uh, Jacob el olwelah:

“Kuht fin ngwet nuh sin God ke nuhnak fokoko, ac pruhe nuh sel ke luhlahlfongi yohk, ac el fah kahsrwe kuht ke ma upac lasr uh. …

“… Kuht enenuh in ngwetwack nuh lucng ac eis kahs wolacna luhn God, ac ipeis luhngse Lal.”3

Tahmtahel, nga fahkwack luhlahlfongi ke fokoko ac kuh luhn pruhe ke kuht ahkkahlwemye ngal ac kena loal uh nuh sin Pahpah tuhmasr Inkuhsrao ac ke top ma eisyuck ke kuht eis in yohk ma suhmuhslah ac kahs luhn mwet pahluh uh.

Apkuhran in yac tolu somlah ah sie e na koluk kuhnahoslah lun tabernacle sacohk, ac mahtuh se fin acn Provo, Utah ah. Muhsahllah la uh nuhnkweyuck oacna sie ma koluk upac nuh sin kwewana mura sac ac mempucr ke Alu uh. Puhs mwet nuhnkuh, “Efuh kuh Leum El lwelah ma inge in sikyak? Pwacyena El kuh in tulokihnyac e sac kuh tulokihnyac muhsahllah la uh.”

Mahlwem singucul tohkoh, puhlan pacl in toeni luhlahp ke Ohktohpa 2011, sie puhsra ahkkahlwemye lut ma kuh in lohngyuck ke Prestuhn Thomas S. Monson el ahkkahlwemye lah tabernacle se ma apkuhran in kuhnausyucklac nohfohn ah ac eklac sie tempuhl muhtahl—sie lohm sin Leum! Sa na kuht kuh in liye ma Leum El nuh etuh na uh! El tiacna orwaclah e sac, tuhsruhk El lwelah e sac in kuhnahoslah acn loac. El liye tabernacle sac oacna sie tempuhl na kahto—sie lohm na pwacye nuh ke oreyacn wuhlweacng muhtahl ma pahtpaht.4

Tahmtahel sacohk wiyuck, Leum El lwelah nuh sesr in srihkeyuck ac sikengiyuck, kuhtuh pacl uh nuh ke kuhiyacsr nohfohn. Kuht liye tari moul luhn mwet luhngseyuck—ac sahp mwet lasr uh—ma isisyak nuh infohk uh ac nuhnkuh lah efuh sie Pahpah luhngse ac wo Inkuhsrao kuh in lwelah kain ma inge sikyak. Tuhsruhk El tiacna fihlikuhti ke tiac kahsruh, El tu ahsrwelah paho, rahrahlac in suli kuht in tuhkuh nuh Sel. El muhsaheack moul lasr nuh ke tempuhl kahto ma Nguhn Lal kuh in muhta we ma pahtpaht.

Lun Doctrine and Covenants 58:3–4, Leum El fahk nuh sesr:

Kuht tiac kuh in liye ke muhtahsr sifacna—tuh ke pacl met ah—orwaclah luhn God lasr ke ma ingacn fah tuhkuh tohkohyang ac wolacna ma ac tuhkuh tukun mwe ahkfohs upac uh.

Ke srihpen tukun mwe ahkfohs yohk tuhkuh mwe insewowo. Ke ma inge lwen se fah tuhkuh ke kuht fah susui ke wolacna yohk.”

Tahmtahel, nga fahkwack luhlahlfongi lah oasr plwacn se luhn Leum nuh ke kais sie moul lasr. Ma sikyak uh tiacna sie mwe lut kuh sie ma sasuc nuh Sel. El etuh nohfohn ac luhngse nohfohn. El rahrah in kahsrwe kuht, in ahkkweye kuht, ac in ahkfihsracsrye ngal lasr ke kuht fungyang nuh ke kuh luhn Iwaclah sac ac ahkfuhlwactye olwelah lasr uh. Ma upac ac mwe ahkfohs ma kuht puhlakihn uh kuh in pa ma sefanna in kol kuhtlac in tuhkuh nuh Sel ac fungyang nuh ke olwelah lasr kuht in muh kuh in fohlohk nuh ye Muhtahl ac eis ma nuh kwewa luhn Pahpah.

Yac ekahsr somlah inge nga enenuh ac kena in puhla luhngse luhn Leum yohk likina met ah, in eis fwackyuck luhk sifacna, in etuh yohk ke olwelah luhk in tempuhl ac in eis mwe toasr luhk in muhlahlahlac. Ke nga pruhe na nuh ke mwe insewowo inge uh, nga puhla Nguhn kolyuc in som nuh tempuhl ac sifilpac porongo in wo kais sie kahs ke mwe insewowo utuckuh nuh feik uh. Nga fahkwack luhlahlfongi lah ke nga porongo ahkwoyac ac srihke in ahkyohkye luhlahlfongi luhk, Leum El pahkomuhtuhk ac kahsrweyuc orwaclah ma toasr luhk muhlahlahi. El kahsrweyuc in puhla mihs yohk ke pruhe ma soenna toplac uh. Kuht orwacni sin Leum in liyacacng Olwelah Lal ke kuht liyacacng olwelah lasr ac ahkyohkye luhlahlfongi lasr.5 Tuhkuh nuh tempuhl, tahmtahel sacohk, ac eis mwe insewowo lom uh!

Nga luhngse in sramsram ke sie pac inkacnek ma kuh in use nuh sesr nuhnak kuh ac luhlahlfongi. Kuht kuhtuh pacl uh, ke muhtwacn uh, eis sie finsrak in arulacna yohk srihpac nuh sesr sifacna. Ke puhlan pacl inge kuht enenuh in suk Nguhn ac siyuck, “Tuh ma inge ma Leum El ke nga in nuhnkuh keik sifacna, kuh Setuhn el srihke in ahkmuhnahsyeyuc? Esam ohiyac luhn Pahpah tuhmasr Inkuhsrao, suc luhngse suwohswohs ac ma pahtpaht.6 El kena in ahkkweye kuht, tiac ahkmuhnahsye kuht.

Ke mempucr luhn Alu uh, kuht ac kuhtuh pacl uh puhla lah kuht enenuh in ip ke sie “sucu LDS suwohswohs” in kuh in eisyuck sin Leum. Kuht kwacna puhla lah kuht tiacna mwe wi nuh ke tohkohsrahi fin kuht puhla lah kuht tiacna sun petsac sacn. Tahmtahel sacohk, ke ma nuh kwewa fwacklac ac oreklac uh, ma ac yohk srihpac nuh sin Pahpah tuhmasr suc Inkuhsrao uh pa ohiyacn liyacacng olwelah lasr uh ac luhpah ma kuht srihke in ukwe srihkasrak luhn Mwet Lahngo lasr, Jisus Kraist.

Nga fahkwack luhlahlfongi lah Jisus Kraist pa Mwet Lahngo ac Mwet Molwelah lasr. Ke srihpen kihsac ke iwaclah Lal, kuht kuh in owolac nwacsnwacslah wik nuh kwewa ke kuht suwohswohs in ipeis ke kuhfa luhn Leum Lal. Ke kuht ahksasucye ac ahkfuhlwactye olwelah lasr uh, ma toasr lasr uh kuh in muhlahlahi ac kuht kuh in kalweni in eklac nwacsnwacslah ac fokokoi in muh ke sahflahiyacn moul lasr uh kuht fah oacwaclah suwohswohs in eis moul fuhlwact ac ma pahtpaht. Nga fahkwack luhlahlfongi ke ma inge ke inen Mwet Lahngo wolacna lasr, Jisus Kraist, amen.

Mostrar referencias

    Mwe kahsruh

  1.  

    1. Boyd K. Packer, “The Atonement,” Ensign kuh Liahona, Nohfuhmpuh 2012, 77.

  2.  

    2. Liye Jacob 2:3, 7, 35.

  3.  

    3. Liye Jacob 3:1–2.

  4.  

    4. Liye Mosiah 23:21–22.

  5.  

    5. Liye Doctrine and Covenants 82:10.

  6.  

    6. Liye Russell M. Nelson, “Divine Love,” Ensign, Fepweri 2003, 20–25; Liahona, Feb. 2003, 12–17..