Kete Mokut!

Seni Elaine S. Dalton

Presetenin ekkewe Fopun Unus


 
Elaine S. Dalton
Uta non pochokun. Kopwe nukuchar. “Uta faniten ennet me wenechar.” Kopwe emon chon pwarata. Kopwe eu nenien appiru ngeni fonufan. Kopwe uta non neni mi pin.

Ua uta ikei non ei pwinin non neni mi pin, ikewe soufos, chon osini, chon pwarata pwan noun Kot kewe nengin. Iei eu auchean fansoun ne nom non ei fonufan pwe kich fopun. Oua kefinita pwe ami noun Semach won Nang kewe nengin. Ua anean pwe oua sinei napanapemi pwe oua achengicheng ngeni Semach won Nang. Kot mi tongei kemi, ua pwan tongei kemi.

Won ai we chepen non ai we ofes, mi wor nei niosin emnn nengein itan Kristina mi minen bronze. Nge wesewesen niosin Kristina a uta won eu oror non Copenhagen, Denmark, a kun ngeni ewe sat mi feino ngen Zion. A finata epwe choni Mwichefen epwe nikitano imwan ese mecheres, ina kopwe kuna pwe engiengin asepwan mi ungiti mesen. Mi nukuchar, non an fori mettoch a weires pokiten a sinei pwe mi pung. Mwrimwirin kewe ir ra isseta niosin we pwe epwe eu achechemenian Kristina mi pwarano an pworocho non an finifin ina ena atun mi wor auchean ngeni ir kei mi memarita.

Niosin Kristina ei a tupuni emon me emon ami. Usun Kristina, ka uta akkota me fori sokopatin finifin mi auchea kopwe finata non ran me ran, ekkoch mi weires, nge esap chok anapanapa om manau mwach kan nge pwan nenian mwirimwirum kewe. Nge ka pwan fen akota met kopwe fori pwe ka sinei met mi pung met mi mwaken,eriafou, chourekin riafou, nimengawen ach foffor. Nge iei ka fen awenechareta pwan manaueni ewe kapas allim nupwen eriaffou ren osuksukan non ach aterangas. Usun Kristina, ka emwen seni ewe Ngun mi Fel. Ka finata met kewe mi pung. En ka nikitu, en kan tekia.

Use tongeni ekieki met a auchea seni Semach Won Nang mi uren tong pwe An we chok kirokiroch ngeni ami ika oua “uta … non neni mi pin, me ousap mokut.”1 A apasa: Uta non pochokun. Achochono.2 “Pochokun ngeni met mi ellet me pung.”3 Uta pwe emon chon pwarata.4 Esisin ngeni chon fonufan. Uta non neni mi pin. Iei ai ei poraus ngeni kemi-“: Ousap mwokutukut.

Aewin, kosap mokutukut non om finata mi pung. Non ekkei fansoun soponon, ese wor finifin mi kukun. Ekkewe finifin kopwe finata iei mi fokun aforea pwan auchea. Pwisin finata, are om tufichin finata, ina an Kot nifang ngeni Noun kewe semerit. Mi kinikinin ewe kokkotun pwapwa en me ngang sia fini pwan tumun non ewe neni mwen ei fonufan. Manaueni manauemi ren ami oupwe ausening pwan rongorong ewe Ngun mi Fel, iwe epwe anisuk pwe kopwe finioch. Ewer, epwe aiti ngeni kemi “mettoch meinisin minne oupwe fori.”5

Non ekkewe wik ano ua niwinno ren ai we high school a fansoun nangatam. Ua feino fiti mwichenapen steik e kan fis non ewe nenien chufengen. Nge nupwen ua fetanetiu, ua kan chechemeni met kewe ua mefi nupwen ua fiti ei sukun atun ua chok emon fopun—ai kan chek tipitipingaw fetan use fen sinei met. Iwe ua tonong non ewe nenien chufengen. Ua pwan chemeni sefan chommong mettoch. Ua esinna meinisin met a fis non ewe nenien chufengen. Eu chok met a siwinno—ngang.

Ewe fansoun ua uta on ewe stage usun met ua kan fori nupwen ai high school fan chommong ua emon minap non sukun. Ua pwan kuna fitemon chienei kewe chon sukun—ekkoch chiechi kewe at! Nge iei use chuen ateten non mwich, ua kafinita—non ai ei nenien chufengen non sukun—upwe “uta pwe emon chon pwarata”6 ai kapasen pwarata fanitan ach Chon Amanau, Jises Kraist.

Ami kana fopun tumunuoch pwe ami chiechi ngeni emon epwe och pwe ete mwirin faik ier seni ikenai ousap sau. Esap wor noninen, esap or akatonong, esap or itefou epwe namwot seni ekiek fengen. Foffor ochum epwe anisi ekkewe anuon repwe unusan nimenimoch non ar pochokunan pristut, ren pwonen non tempel me angangen misineri. Iwe ina epwe faik ier seni iei, ina epwe wor emon epwe feito reom, non om nenien chufengen non sukun, kinisou ngonuk ren om aninis ngeni pwe a chuen nimenimoch ne fori wisan non pristut pwe epwe emon misineri. Ina epwe fen wor noum toropwe seni punuer kewe, pwan ar kinisou ngonuk ren fofforum mi animano punuer kewe pwan ar famini. Met ka finata mi namwot. Met ka finata iei esap chok reom, nge pwan ren ekkoch. Ir mi auchea fochofoch. Kosap mokut!

Oruan, kosap mokut non ekiekin netipom kopwe unusan nimenimoch. Tumunufichi om nimenimoch. Met ka fori non manauom ina met mi watte pochokunan. Nupwen ka feito fanufan ka angei eu feioch mi murino inis. Inisum ina met sia aea ren ekiek pwan monmonen ewe nifang pwe sipwe pwisin finata. Setan a amam ei nifang, a pwan emweni ekkewe mi ninin inisum. A mochen kopwe nimengaw, namwotongaw, pwan turunufosei inisum. Ufoufen nikatuputup, katon sassing me kachiton aramas mi seneno, tattu, minan afeiengawen inis, ese nifinifin met sokun ka umwesin fori a aumesino ei nifang—inisum—mi murino are ataino om kosap tufichin fori om pwisin finata. Paul a kapas eis, “Ami mi sinei pwe ami an Kot we imwenipin, iwe Ngunun Kot a nonnom non netipemi!”7

Inisum eu tempel. Pwata? Pwe mi wor kunukunin non ewe imw esap chek ren ngunum feinfeino nge pwan ngun mi feifieno ren ekkoch ir ekkewe mi feito won fonufan mi pach ngeni om famini fochofoch. Elter Dallin H. Oaks a aiti kich “Ewe pochokunan forata ngasangasen manau ina pochokunan Kot.”8 Om angang epwe feinfeinno chok. Kot a ngonuk manamanen nuku! Oua ammonata pwe oupwe inen ekkewe rese mo uputiw. Kopwe unusan nimenimoch pwe kopwe tongeni tumunu “met mi auchea seni meinisin”—om pwisin nimenimoch.9 An Semach won Nang aurour ngeni kemi, Noun kewe nengin mi kefinita, ina pwe oupwe “fetan … non ekkewe anen nimenimoch.”10

Nimenimoch mi murino ngeni tempel. Iwe, aunugatin, Kosap mokut seni om nimenimoch tufich apwonueta pwon mi pin. Om pwonen paptais epwe enuku en ngeni ewe anen nimenimoch me pwapwa nupwen ka asofosefanni ena pwon iteitan wik nupwen ka angei sakrament. Nupwen ka apwonueta om pwonin papatais, epwe sokofesin napanapom, ufom, me om foffor seni chon fonufan. Apwonuetan om pwon epwe anisuk pwe Ngun mi Fel epwe emwenuk. Uta non neni mi pin, kosap feino ngeni ekkewe neni are kon are tv mi tongeni asueno ewe Ngun mi Fel.11 Nupwen ka apwonueta om kewe pwon mi pin, Kopwe nimenimoch me monota ne tonong non tempel.

Saigonon, kosap mokut non om etiwa an Ach chon Amanau we Achasefan. Ewe Achasefan a fanitom pwan fanitei. Epwe aninis pwan apochokunan angasa. Ika kose mefi nimenimoch ne uta non neni mi pin, kosap sopweno ne mefi iei usun. Non ei manau, sipwe fori tipis. Chemeni pwe Chon Amanau mi tongoek I a angasokono pwe kopwe siwinno pwan aier ika ka fori tipis. Setan ese mochen kopwe ekiekin siwinno.12 Epwe pesei ngonuk pwe meinisin mi nus mwanino. A chofona. Ka tongeni niwin. Ka tongeni aier. Ka tongeni nimenimoch pokitan An ewe Chon Amanau we Achasefan.

Iei upwe osopwano ren ei porousan tong. Ina kopwe ais, “Met ei itenapen tong epwe for ngeni uta non neni mi pin?” Mi namwot ngeni uta non neni mi pin. Ei tutunapen emon fopun itan Rebekah.13

Iei porousan ei tutunap, Abraham a annuku noun we chon angang pwe epwe kutta emon fefin nimenimoch pwe punuwan noun we at Isaac. Epwe emon mi pwaracho ngeni pwonen apupunu—ennetin wesen nimenimoch. Iwe a tinano noun we chon angang epwe sai ngeni ewe neni mi afeiengaw itan Haran. Wewen an feino ngeni ikkewe pwe mi fat—pwe mwan mi pin ra mochen fefin mi pin repwe uta unukur. Nupwen ewe chon angang a feino ngeni ewe neni Nahor, a kouno ren ewe ito pwe epwe aunu konik ngeni noun kewe Camel a pwan iotek pwe epwe churi ewe fefin nge epwe esinna ika a ngeni unuman konik pwan unuman noun kewe 10 Camel. Iwe, ua fen fiti Camel, me ua sinei pwe—ra kan un watte konik!

Non Genesis sia anneani pwe Rebekah ese chok feitiu ren ewe ito pwe epwe utut konik, nge a “muttir”14 are atepwanepwan pwe epwe apwonueta an kewe angang. Iwe ewe chon angang a iseta gold won poun Rebekah pwan chuwan iwe a eisini are mi tongeni nom non imwan seman we. Sia anea non nouch paipel, “Iwe ewe fopun a ssano ren imwen inan we o a aporausa ngenir mettoch meinisin minne a fis.”15 Rebekah a men muttir ne sa!

Ewe chon angang a ereni an Rebekah famini popun an we sai iwe Rebekah a tipeu ngeni pwe epwe punueni Isaac. Ewe chon angang a mochen niwin, nge epwe uwei Rebekah, nge an famini ra tungor epwe nom rer non pwan 10 ran. Iwe ra eisini Rebekah met epwe fori, iwe a poneni “upwe fiti.”16 Met ouse sinei pwan chommong mi wenechar ra apasa “upwe feinno, upwe fori”17 nupwen nouch soufos, Preseten Thomas S. Monson, a afata pwe anuon me fopun ra tongeni fori angangen misineri nekukkunur?

Iei usun nesoponon ei tutunapen tong. Rebekah ammonata an epwe nimenimoch pwe epwe fori me apwonueta an pwon pwe epwe pwonen punueni Isaac. Esap pwan witiwit are ammonata I. Seni an sai seni an famini a efeioch me kapasen amemef ngeni ei, a fen pwon pwe epwe “emon inenapen ngeruwan.”18 Amwararen ei tutunap nupwen Rebekah akaewin kuna Isaac pwan Isaac akaewin an kuna Rebekah. Ua chok ekieki nge ina epwe tongen ar chok kuna fengenir. “Tongen nimenimoch mi nimonimoch; saram epwe sarameno.”19 Nupwen Isaac a tou epwe churi ewe mwichen aramas, Rebekah “a totiw mw won wan we camel.”20 Me a mak pwe “Isaac mi tongei”21 Iei kewe ua sani!

Ren Kristina me Rebekah, ra uta non neni mi pin ese mecheres. Achochono ese mecheres. Ewe asepwan a usi, ewe konik seni ewe ito mi chou, pwan su seni nenier pwan siwinino manauer mi fokun weires. Nge ra finata met kewe mi pung. Ewe Ngun mi Fel a emwenir. Ra nimenimoch, me ra pwan ammonata ar repwe apwonueta ar kewe pwon. Ewe Chon Amanau a feito seni tetenin mwirimwirin Rebecca. Met emi sinei pwe epwe fis ei? Ap! Met ka finata iei mi namwot? Uu!

Fopun kana, ekkewe ra mamarita ra anongonong won om nimenimoch, om aneasochis, pwan nimenimochun manauom. Ousap mokut. Mi wor neniom mi napanap. Iei ami fanosun! Ua elletin nuku pwe emon fopun mi nimenimoch epwe emwen seni Nngun mi Fel, epwe tongeni siwinino fonufan!

Ua pwarata ewe Chon Amanau mi manau! Epwe nonom reom. Epwe anisuk. Noun kewe chon Nang repwe nom reom pwe repwe ekiketa non om kewe fansounn osukosuk.22 Fanitan Jises Kraist, amen.

Show References

    Esinesin

  1.  

    1.  Nengeni Doctrine and Covenants 87:8.

  2.  

    2. Nengeni Mosaia 5:15.

  3.  

    3. Young Women motto, non Young Women Personal Progress (booklet, 2009), 2.

  4.  

    4. Nengnei Mosaia 18:9.

  5.  

    5. 2 Nephi 32:5.

  6.  

    6. Nengeni Mosaia 18:9.

  7.  

    7. 1 Corinthians 3:16.

  8.  

    8. Dallin H. Oaks, “The Great Plan of Happiness,” Ensign, Nov. 1993, 74.

  9.  

    9. Moronai 9:9.

  10.  

    10. Nengeni Doctrine and Covenants 25:2.

  11.  

    11. Nengeni 1 Corinth 6:9; 1 Thessalonia 5:22; 2 Timothy 2:22; Doctrine and Covenants 9:13.

  12.  

    12. Nengeni Ren Pochokunen Serafo (kukun puk, 2011), 28–29.

  13.  

    13. Nengeni Genesis 24.

  14.  

    14. Genesis 24:20.

  15.  

    15. Genesis 24:28.

  16.  

    16. Genesis 24:58.

  17.  

    17. Nengeni 1 Nephi 3:7.

  18.  

    18. Genesis 24:60.

  19.  

    19. NengeniDoctrine and Covenants 88:40.

  20.  

    20. Genesis 24:64.

  21.  

    21. Genesis 24:67.

  22.  

    22. NengeniDoctrine and Covenants 84:88.