Tiac Lwelah in Mokleyuck

Sel Elaine S. Dalton

Prestuhn Luhlahp luhn Muhtwacn Fuhsr


 
Elaine S. Dalton
Tu na kuh. Tiac Mukwikwi. “Tu ke ma pwacye ac suwohswohs.” Tu oacna sie mwet lohoh. Kowos in sie ma wo nuh fin facluh. Tu ke acn muhtahl uh.

Ofong nga tu ke sie acn muhtahl ke nga tu inse ke ye muhtuhn mwet pahluh, mwet liyactwen, ac fahkwack uh ac tuhlihk muhtwacn fuhlwact nuhtin God. Sie pacl na wowo pa inge in oasr fin facluh ac in sie muhtwacn fuhsr. Kowos pa tuhlihk muhtwacn suleyucklac nuhtin Pahpah tuhmasr Inkuhsrao. Nga finsrak kowos in etuh ohiyowos ac kulohiyowos sin Pahpah tuhmasr Inkuhsrao. El luhngse kais sie suwos, ac nga oruh pac.

Fin tepuh ke ohfohs luhk ah, oasr pac atac ke sie ma srolwaclah bronze luhk ke sie muhtwacn fuhsr suc inel pa Kristina. Ma srolwaclah na pwacye ac fal kacl Kristina ah tu fin sie tak luhlahp fin acn Copenhagen, Denmark, tulac oruh elan ngwetlah fin kof uh lac nuh Zion. Sulaclah lal in welah Alu uh ac som liki lohm sel uh tiacna sulaclah fihsrwacsr se, ac kowos kuh in liye lah eng tuhyak uh ukuhl na upac laenuhl. El tu na kuh, oruh ma na upac se tuhsruhk sie ma el etuh muh pwacye. Usru lal uh fihliyac ma srolwaclah se inge we fin tak luhlahp sacn oacna sie mwe sang nuh sel Kristina, tuh sulaclah lal ke lwen sacn orwaclah ma yohk srihpac ma pahtpaht ke fihl pucspucs.

Nuh sihk, ma srolwaclah se kacl Kristina inge ahol kais sie suwos. Oacna Kristina, kowos sun sulaclah yohk srihpac pucspucs ac orwaclah sulaclah lwen nuh kwewa, kuhtuh sin sulaclah an upac, ma ingacn fah tiac orwaclah na pacl fahsruh lom uh tuhsruhk oacyacpac fuhfahsryucsr luhn usru lowos an. Kowos oacyacpac sun ma upac ke eng upac ke lainyuck, ma upac, pahtokyuck luhn mwet, ac ma in ahkfohkfohkye moul uh. Tuhsruhk kowos tu na kuh ac moulkihn wosasuc ke pacl puhlakihn ma upac pacl nuh kwewa inge ke u lasr uh. Oacna Kristina, kowos kolyuck sin Nguhn Muhtahl. Kowos orwaclah sulaclah pwacye uh. Kowos pwacyena ac kowos fuhlwact.

Wacngihn kahs in kahsruh yohk srihpac nga kuh in nuhnkuh sin sie Pahpah luhngse Inkuhsrao likina kaiyuck Lal nuh sin kais sie suwos in “tu … ke acn muhtahl, ac tiac mukwikwi.”1 El fahk: Tu na kuh. Tiac mukwikwi.2 “Tu ke ma pwacye ac suwohswohs.”3 Tu oacna sie mwet lohoh.4 Orwaclah sie ma yohk srihpac nuh facluh. Tu ke acn muhtahl uh. Na pweng luhk nuh sin kais sie suwos uh pa ma na fihsrwacsr se: Tiac lwelah in mokleyuck.

Ma se met, tiac lwelah in mokleyuck ke sulaclah ma pwacye. Ke lwen-sahflah inge, wacngihn sulaclah srihsrihk uh. Sulaclah kom orwaclah ingena uh yohk srihpac na pwacye. Sulaclah, kuh kuh in sulaclah, pa sie sin mwe sang yohk emet luhn God nuh sin tuhlihk Nahtuhl. Pa ip ke plwacn in engan ma kom ac nga sulaclah ac lain ke oasr luhn moul in nguhn lasr uh. Moulkihn moul lowos an ke sie inkacnek ma kowos kuh in lohng ac porongo Nguhn Muhtahl, ac El fah kahsrwe kowos orwaclah sulaclah pwacye uh. Pwacyena, El fah fahk nuh suwos nohfohn “ma kowos enenuh in oruh uh.”5

Wik ekahsr somlah ah, nga fohlohklac nuh ke high school mah se luhk ah ke pacl se emet ke yac uh. Nga muhtwacta nuh ke sie toeni luhn stek ma orek lun acn in toeni luhlahp se luhn lutlut ah. Ke nga fahsryak ke nien fahsr loeloes uh, sie un mwe acsmakihn muhtwacwacack in utyak nuh ke nuhnak luhk uh. Nga puhlakihn na pwacye ohiyac ma nga oruh ke nga wi oacna sie muhtwacn fuhsr ah—inse srihsrihk, tiac etuh keik sifacna, na arlac, kena upac in fal nuh kac. Nga utyak nuh lun acn toeni luhlahp sac. Sifilpac sie un mwe acsmakihn tuhkuh nuh insifuck. Nga etuh nohfohn ma nuh kwewa ke acn toeni luhlahp sacn. Ma se muhkwena ma eklac an pa—nga.

Lwen sacn nga eis pacl wowo luhk in tu fin acn emet an oacna nga oruh ke high school pacl puhkantwen oacna sie mwet kol ke tuhlihk lutlut an. Nga liye pac kuhtuh sin tuhlihk lutlut mah an ke un mwet ah—kuhtuh nga wi muhtwacta! Tuhsruhk pacl se inge, sahyacn in kol sie u, nga eis pacl wowo luhk—we ke acn toeni luhlahp luhn high school se luhk an—in “tu oacna sie mwet lohoh”6 ac fahkwack luhlahlfongi luhk ke Mwet Lahngo lasr, Jisus Kraist.

Muhtwacn fuhsr, oruh in pwacye kuhpahsr lowos yurin mwet sahyac an in fah srwackna wo tukun yac angaul, kom ac fah tiac mwekihn. Wacngihn luhpan pahtokyuck luhn mwet, tiac wi, tiac eye ac tiac fal in ekuhllah masap lowos an. Mokleyuck lowos nuh sin mukul fuhsr uh fah kahsrwelos in suwohs na ke kuh luhn pristut lalos, ke olwelah ke tempuhl an, ac ke in kuhlwacnsap sie misineri. Ac suc etuh? Yac 40 nuh ingena, kowos kuh in finne sang sie selos in fahsryak yurum, we lun acn toeni luhlahp luhn high school lom an, ac kuloh ke kowos kahsrwelos na in suwohs in ahkfalye kunohkohn ke pristut lal in kuhlwacnsapuh sie misin suwohs. Ac suc etuh? Sahp kowos kuh in eis sie lwacta sin sie muhtwacn kiyacn sie mukul fuhsr, kuloh nuh suwos ke mokleyuck kowos oruh nuh sin mukul tuhmwacl an ac sucu lalos pacl fahsruh an, fohlohklac ne ke pacl in high school lowos ah. Sulaclah lowos an yohk srihpac. Sulaclah lowos ingena uh tiacna kahsruh kowos sifacna, tuhsruhk elos kahsruh pac mwet sahyac uh. Elos ma yohk srihpac ma pahtpaht. Tiac lwelah in mokleyuck!

Ahkluo, tiac lwelah in mokleyuck ke kena lom ac olwelah in suwohswohs na ac nwacsnwacs ke fahsrweni luhn mahno. Luhngkihn suwohswohs. Nwacsnwacs lowos sifacna pa sie sin kahsruh yohk lowos emet ke kuh uh. Ke kowos tuhkuh nuh facluh ah, utuckot mwe sang ke sie mahno. Monuwos pa sapkihnyuck ke nuhnak lowos ac sie mwe sang wolacna ma kowos ahkyohkye sulaclah lowos. Pa inge mwe sang ma Setuhn el lahfuh uh, ac pwacye el kol apkuhran in ma nuh kwewa ke acnwuck lal nuh ke monuwos. El kena kowos in wohtwoht, ahkkolukye, ac ahkngalye monum. Nuknuk suhfal, petsac koluk, moul fohkfohk, srihsrihng ac pat insroac, ono koluk, ac pahlah ke ma nuh kwewa uh pa kuhiyac nuh kwewa in eis mwe sang sacohk inge ac in orwaclah kuh nuh suwos in ahkyohkye sulaclah lowos an. Paul el siyuck, “Yac kowos tiac etuh lah kowos pa tempuhl luhn God, ac lah Nguhn luhn God oasr in kowos?”7

Monuwos pa sie tempuhl. Efuh? Ke srihpen oasr kuh la in sruokyac tiac nguhna ma pahtpaht lowos an kwewa tuhsruhk oacyacpac nguhna ma pahtpaht luhn mwet sahyac suc fah tuhkuh nuh facluh oacna ip ke sucu ma pahtpaht lowos an. Elder Dallin H. Oaks el luti, “Kuh in orwaclah moul in mahno el [sie] kuh fuhlwactlacna8.”8 Kunohkohn lowos pa sie kunohkohn fuhlwactlacna. God El usot nuh suwos sie luhlahlfongi muhtahl! Kowos ahkolah in ninac pacl fahsruh uh ke fihl se fahsruh uh. Oruh kowos in sifacna nwacsnwacs ac suwohswohs, ac liyacacng ma ma sacohk emet ac yohk srihpac liki nuh kwewa uh—suwohswohs ac nwacsnwacs lowos an.9 Kahs in kahsruh lahlmwetmwet Lal nuh suwos sifacna, tuhlihk muhtwacn sollac Nahtuhl, pa in fahsr… inkacnek nwacsnwacs.”10

Nwacsnwacs pa ma yohk srihpac emet nuh tempuhl an. Na, ahktolu, tiac lwelah in mokleyuck in suwohswohs ke kowos orwaclah ac liyacacng olwelah muhtahl uh. Olwelah kowos orwaclah ke pacptais ah fah karihngihn kowos nuh ke inkacnek nwacsnwacs ac engan ke kowos ahksasucye olwelah ingacn kais sie wik ke ipeis kuhfa luhn Leum. Ke kowos liyacacng olwelah ke pacptais lowos an, kowos fah ngwetngwet siena, nuknuk siena, ac mukwikwi siena liki facluh. Liyacacng olwelah inge fah oruh kuh kowos in kolyuck sin Nguhn Muhtahl. Tu ke acn muhtahl uh, ac tiacna som fototo nuh ke kain acn ingacn kuh on, media, kuh wi ma ac oruh kowos in eslah wi luhn Nguhn Muhtahl uh.11 Ac ke kowos liyacacng olwelah lowos an, kowos fah suwohswohs ac ahkolah na in utyak nuh ke tempuhl muhtahl.

Sahflah, tiac lwelah in mokleyuck ke lwelah lowos ke Iwaclah luhn Mwet Lahngo. Iwaclah sac ma nuh suwos ac nuh sihk. El sie kuh in ahkfahsryelah ac molwelah. Kowos fin tiac puhla suwohswohs in tu ke acn muhtahl uh, tiac us ma koluk toasr paht liki lwen se. Ke moul in mano uh, kuht fah orwaclah tahfonglac uh. Etuh lah Mwet Lahngo El luhngse kowos yohk oruh El orwaclah kuh nuh suwos eklac ac in auliyak kowos fin orwaclah tahfonglac se. Setuhn el tiacna luhngse kom in nuhnkuh lah kom kuh in eklac.12 El fah srihke in oruh kom in nuhnkuh lah wacngihn finsrak. Ma kikiacp se pa ngacn. Kowos kuh in fohlohk. Kowos kuh in auliyak. Kowos kuh in nwacsnwacs ac muhtahl ke srihpen Iwaclah wacngihn sahflahiyac luhn Mwet Lahngo.

Ingena lwelah ngan ahksahfyelah ke soko sramsram wowo emet ke luhngse sruhmuhnyuck uh. Kowos ac kuh in siyuck, “Meac soko sramsram ke luhngse ac tuh oruh ke tu ke acn muhtahl uh?” Ma ingacn nuh kwewa ma ke in tu ke acn muhtahl uh. Pa inge soko sramsram ke sie muhtwacn fuhsr pahngpahng Rebekah.13

Oacna ke sramsram soko inge sruhmuhnyuck uh, Abraham el moli mwet kuhlwacnsap se lal in sokwack sie muhtwacn fuhsr suwohs in muhtwacn kiyacl Isaac nahtuhl ah. El enenuh in pa mwet se fal nuh ke sie olwelah ke pahyuck—suwohswohs ac nwacsnwacs ac fal. Na oruh Abraham el suhpwaclah mwet kuhlwacnsap se lal ke sie fuhfahsryucsr loeloes ac sensen nuh ke sie acn pahngpahng Haran. Srihpac se oruh el enenuh in som nuh we uh kahlwem—mukul muhtahl uh enenuh muhtwacn muhtahl uh in ahkkweyaclos. Ke mwet kuhlwacnsap sac sun city luhn acn lal Nahor, el tui ke sie luhf in kof in kihte kof nuh sin camel nahtuhl an ac el pruhe tuh elan kolyucklac nuh sin muhtwacn fuhsr pwacye sacn lah el kuh in akihlacnuhl ke kihtacl kof ac camel 10 nahtuhl an. Ingena, nga wi tari camel uh, ac pa inge ma nga etuh—camel uh nihm kof yohk na upac!

Ke Genesis kuht riti lah Rebekah el tiac som muhkwena nuh ke luhf in kof uh ac ut kof, tuhsruhk el “silahklahk,”14 kuh salka, in ahksahfyelah orekma inge. Mwet kuhlwacnsap sac tari na fihliyac lohlpo ac mwe yucn uh kacl Rebekah ac siyuck fin oasr infuckihl lun lohm sin pahpah tuhmwacl ah nuh sel in muhta we. Nga muh lah mwe yucn ingacn orekma! Ma suhmuhslah uh ritiyuck, “Muhtwacn fuhsr sac kahsruhsr nuh lohm sin ninac kiyacl ac sruhmuhn ma inge nuh kwewa nuh sel.”15 Kahmlah Rebekah el mwet na muhi se!

Mwet kuhlwacnsap sac fahk nuh sin sucu lal Rebekah ah srihpen fahsr loeloes se lal an, ac Rebekah el insese in muhtwacn kiyacl Isaac lac. Mwet kuhlwacnsap sac kena in som lwen se na tohkoh ah weluhl Rebekah, tuhsruhk sucu lal ah kena elan muhta yohrohlos sun lwen 10(singucul) ma. Na elos siyuck sel Rebekah ma el kena in oruh uh, ac top lal an fihsrwacsr “Nga fah som.”16 Yac top sacn oacpacna nuh ke top luhn mwet tausin suc topuk arlac kuh, “Nga fah som; nga fah oruh”17 ke mwet pahluh lasr, Prestuhn Thomas S. Monson, el ahkkahlwemye pacl wowo nuh sin mukul fuhsr ac muhtwacn fuhsr uh kuh in kuhlwacnsapuh misin uh ke sie matwac fuhsr?

Ingena suwohs ac sahflahiyacn sramsram ke luhngse soko inge: Rebekah el ahkolah ac nwacsnwacs in orwaclah ac liyacacng olwelah muhtahl uh ac in eklac sie muhtwacn olwelah kiyacl Isaac. El tiac enenuh in sano ac ahkoellah sifacna. Yohk srihpac nuh ke ai lal liki sucu lal an, ituckyang nuh sel sie mwe insewowo, ac kahs uh mokleyuck nuh sihk, tuh el olwelah lah el fah eklac “ninac kiyacn tausin sin miliacn.”18 Tuhsruhk ip wo se emet ke sramsram ke luhngse se inge pa ke Rebekah el tuhfahna liyaclwack Isaac ac Isaac el liyaclwack pacl se emet ah. Tiacna fahk ma inge ke Pwacpuhl uh, tuhsruhk nga nuhnkuh muh ma ingacn pa luhngse ke pacl se emet! Ke srihpen “suwohs luhngse suwohs ac kahlwem suk kahlwem.”19 Ke Isaac el som in ohsun nuh sin un mwet fahsr loeloes uh, Rebekah el “srolah liki kosro kacmel [ukwacl].”20 Na fahk muh, “Ac el luhngse el.”21 Pa inge acn se ma nga mongi ah!

Nuh sel kwewana Rebekah ac Kristina, tu ke acn muhtahl uh tiacna fihsrwacsr. In tu na kuh tiacna fihsrwacsr. Eng uh uk arlac upac, kof ke luhf uh toasr, ac som liki lohm selos ac moul mah lalos uh tiacna fihsrwacsr. Tuhsruhk elos orwaclah sulaclah pwacye uh. Elos kolyuck sin Nguhn Muhtahl. Elos nwacsnwacs, ac elos ahkoeloslac sifacna in orwaclah ac liyacacng olwelah muhtahl uh. Mwet Lahngo el ma ke tahk in sucu lal Rebekah ah. Kuh el etuh pacl sacn lah ma inge ac sikyak? Moh! Kuh sulaclah lowos ingena an yohk srihpac? Ahok!

Muhtwacn fuhsr, pa inge pacl wowo lowos. Oasr fuhfahsryucsr na wowo se met liki kowos. Usru uh tuhpan na nwacsnwacs lowos, ahkostwen lowos, ac moul suwohswohs lowos uh. Nga luhlahlfongi na pwacye lah sie muhtwacn fuhsr suwohswohs, kolyuck sin Nguhn, kuh in ekuhllah facluh!

Nga fahkwack luhlahlfongi lah Mwet Lahngo El moul! El fah wi kowos. El fah kahsrwe kowos. “Lihpufacn Lal fah rauni kowoslac, in ahkkweyowos.”22 Ke inen Jisus Kraist, amen.

Mostrar las referencias

    Mwe kahsruh an

  1.  

    1. Liye Doctrine and Covenants 87:8.

  2.  

    2. Liye Mosiah 5:15.

  3.  

    3. Liye pohloh kahs luhn Muhtwacn Fuhsr, ke Young Women Personal Progress (booklet, 2009), 2.

  4.  

    4. Liye Mosiah 18:9.

  5.  

    5. Liye 2 Nephi 32:5.

  6.  

    6. Liye Mosiah 18:9.

  7.  

    7. 1 Met Korint 3:16.

  8.  

    8. Dallin H. Oaks, “The Great Plan of Happiness,” Ensign, Nohfuhmpuh 1993, 74.

  9.  

    9. Liye Moroni 9:9.

  10.  

    10. LiyeDoctrine and Covenants 25:2.

  11.  

    11. Liye 1 Met Korint 6:9; 1 Thessalonica 5:22; 2 Timothy 2:22; Doctrine and Covenants 9:13.

  12.  

    12. Liye In Ahkkweye Mwet Fuhsr (booklet, 2011), 28–29.

  13.  

    13. Liye Genesis 24.

  14.  

    14. Genesis 24:20.

  15.  

    15. Genesis 24:28.

  16.  

    16. Genesis 24:58.

  17.  

    17. Liye 1 Nephi 3:7.

  18.  

    18. Genesis 24:60.

  19.  

    19. LiyeDoctrine and Covenants 88:40.

  20.  

    20. Genesis 24:64.

  21.  

    21. Genesis 24:67.

  22.  

    22. LiyeDoctrine and Covenants 84:88.