Nupwen Ka Amanaua emon Nengin, Ka Amanaua Ekkoch Tappin Aramas

Seni Mary N. Cook

Aewin Chon Aninis non ewe Presetensi an Ekkewe Fopun Unusan


 
Mary N. Cook
Manuemi mi pin repwe efeiochu ami kewe neuo, ami famini iei, me chon famini non fansoun mwach.

Ua pwapwa ne poraus ngenikemi ekkewe fopun chon ewe Mwichefen. Aua kuna pwe oua sufoniti ami pwon non manauemi, me aua sinei pwe manauemi mi nimenimoch epwe efeiochu ami kewe neuo, ami famini iei, me chon famini non fansoun mwach, usun Preseten Gordon B. Hinckley a apasa, “Nupwen ka amanaua emon nengin, ka amanaua ekkoch tappin aramas.” 1

Manauom manauen pwon a poputa nupwen ka papatais me angei ewe niffangen ewe Ngun mi Fel. A sopweno iteitan wik non mwichen sakrament, eu neni mi pin minne ka asofosefanni om pwonen papatais. Iei ewe fansoun kopwe ammonata ne fori pwonen tempel. Ekkewe “feioch me pwon mi pin seni tempel mi pin a atufichi ngeni [kich] ne niwinsefan fan mesen Kot me fan iten [ach] famini ne chufengen ren fansoun ese much.” 2

Kopwe uta non neni mi pin fan iten om kewe neuo. “Aramas meinisin ra feito fonufan mi mwirmwirin semer me iner. A wor pwisin ach mochen ne chufengen me ach kewe neuo.” 3 Nupwen ka fori uruon famini me angangen tempel, ka chufengen me ren manauen om kewe neuo me ren om awora efeiochun amanau fan iter.

Kopwe uta non neni mi pin fan itom pwisin me chon om famini. Om nenien appriun fofforoch epwe eu popunapen pwapwa napanap, ese nifinifin nonnomun om famini. Finiom mi och epwe atufichi ngonuk ne fori me anneasochisi pwon mi pin minne epwe ochufengeni om famini ren fansoun ese much.

Kopwe uta non neni mi pin fan iten om famini non fansoun mwom. Kopwe finata ne riri ngeni punuom me ren ewe pristut non ewe tempel nupwen oua poputani eu famini ese much. Noum kewe semirit repwe feioch me ren ennet nupwen ka achocho pwe om nenien appiru me kapasen pwarata epwe winiti eu kinikinin manauer me ka pwarata ngenir ewe anen pwon.

Ua kuna ekkei nongonong ra pwar non ewe International Art Competition fan iten Serafo. Megan Warner Taylor a fori puken sasing a fichi, me ren an achocho ne awewe an Kraist kapas monomon usun ekkewe engon fopun.4 Ua churi Megan, me a poraus usun awewen ewe engon fopun, minne a awewe pwe emon fopunen nimenimoch me nuku mi monnota ne fori me anneasochisi pwon mi pin non tempel. Usun meinisin ekkewe fopun mi mirit, an pwisin ammonata a fis nupwen a anono noun we nam, echii me echii, me ren manau wenewen. Ua esinna mokuran. Megan a awewe pwe ewe fires non mokuran a tupuni manauen ei fopun manauen nimenimoch. Efoch kinikinin mokuran a awewe fires an tong me sufon fan iten an kewe neuo, ewe pwan efoch awewen nenien appiru ngeni an famini iei, me ewe aunungatin, ewe fires manauan mi monnota non manauen mwirimwirin.

Ua churi pwan emon fopun minne an ammonata non pekin ngun a efisi eu manauen wenechar non chommong tappin aramas.

Fan eu neanowasen September, am me punuwei aua nom non ewe tempel me aua witi ewe tufichin fiti efeiochun tempel mi pin. Chris, emon chienach, a tonong non ewe rumw. Mi apwapwa ne kuna ei mwan, minne a keran niwin seni an misin ngeni Russia.

Nupwen epwe poputa ewe mwich, emon fopun a mommot arap ngeniei. A saramaram, a emenimen, me a uren saram. Ua mochen sinei i, iwe ua kapwong ngeni i. A apasa pwe itan, Kate, me ua esinna iten an famini pwe ra nonnom non Michigan ikkewe ia ai famini aua nonnom ia me nom. Kate nour we fopun, minne fan nimu wik me mwen a niwin seni an misin ngeni Germany.

Non ewe mwich ua chok ekieki, “Kopwe esineifengeni Kate me Chris.” Ua nikitano ei memmef me ua ekieki, “Inet, iaon, ifa usun?” Nupwen aua ammonata ne suno, Chris a feito rem ne pwan kapwong ngenikem me ua aea ena tufich. Ua angei Kate me ua apasa, “Ami ruemon aramas mi nimenimoch minne a och pwe oupwe sinei fengenikemi.” Ua su seni ewe tempel me ua pwapwa pwe ua anneasochisi ai memmef.

Won am niwin ngeni imwem, am me punuwei aua poraus usun ekkewe osukosuk a tori an Kate we famini. Seni ena fansoun ua sineiochu Kate, me a anisiei ne weweiti ekkewe popun an nikinikinin apwapwa ua kuna non ewe tempel non ena ran.

Kate a achocho ne fiti ewe anen pwon me ren an kutta neni mi pin. A mamarita non eu imw minne ar fori pwinin famini, iotek fengen, me kaeo ekkewe pukfel a epinano ewe imw. Nupwen a emon semirit, a kaeo usun ewe tempel, me ewe kon “I Love to See the Temple” mi eu kon ra sani fan iten pwinin famini.5 Nupwen a emon semirit, a katon seman me inan ra fori eu nenien appirun kutta eu neni mi pin nupwen ra feino ngeni ewe tempel won ammon nap seni ar repwe feino katon kachito are feino mongo.

A ennetin tongei seman we, me a aea an mwumwutan pristut ne anisi an epwe fori an pwonen papatais. Mwirin a isetta poun won mokuran me a angei ewe Ngun mi Fel. Kate a apasa, “Ua fakkun meseik ne angei ewe Ngun mi Fel, me ua sinei pwe epwe anisiei ne nom won ewe an ngeni manau ese much.”

Manauen Kate a sopweno non feioch me napanapen pwapwa. Nupwen a 14 ierin, a poputa high sukun me a tongei seminary, pwan eu neni mi pin ne kaeo ewe kapas allim. Fan eu ran an sense a poraus usun weires me a apasa pwe mi ennet kich meinisin sipwe weri sossot. A pwisin apasa, “Use mochen sossot; use mochen rong ei.”

Ekkoch wik mwirin seman we a neno fan Raninfel won Easter nge a fakkun samau. Kate a apasa: “A fakkun pochokun inisin semei; a emon chon kitir. Inei a fakkun noninen usun an semwen iwe ra feino piuing. Ukukun 36 awa mwirin a semwenin stroke minne a kuu chippu epwe fen unusan inisin. A tongeni echikichiki mesan, nge nusun inisin ese pwak. Ua chechemeni ai kuna me ua ekieki, “Mwa met, a fis. Mi pung ren ai we sensen seminary. Ua weri osukosuk iei.’” Fitu ran mwirin seman Kate a mano.

Kate a sopweno, a apasa: “A fakkun weires. Kose fakkun mochen pwe emon ka wesen ingeiti epwe mano. Ua sinei pwe ei fansoun epwe winiti fansoun fefeita are fansoun eppet. Use mochen pwe epwe atai manauei pokiten ua chok 14 ieri. Ua achocho upwe fakkun arap ngeni ewe Samon. Ua akkanneani nei kewe pukfel. Alma sopun 40 a anisiei ne sinei pwe ewe manausefan mi ennet me ua tongeni nom ren semei we fan eu me ren an Kraist we Achasefan. Ua ikkiotek. Ua makkei non nei we puken achechem fan chommong. Ua makketiw ai kapasen pwarata. Ua fiti fan me Ekkewe Fopun iteitan wik. Chienei kewe mi chiechioch. Ua arap ngeni chon ai famini me wesen inei ei, minne i ewe anko non am famini. Ua tingorei efeiochun pristut seni tettenin semei we me pwan ekkoch chon pristut.”

Ekkei mettoch a fini, usun chok finien ewe fopun mi mirit, a ninaong no non an Kate nam. A angei pochokun seni an mochen nonnom ren seman we sefan. Kate a sinei pwe seman we a sinei met a fini me ese mochen pwe epwe netipechou ren. A mochen repwe famini ese much, me a weweiti an fiti ewe anen pwon epwe mutata.

Iwe nge, ekkewe weires rese wesino. Nupwen Kate a 21 ierin me a ammonata taropwen misin, inan we a semwenin cancer. Kate epwe finata och mettoch mi auchea. Epwe nonnom me anisi inan we are epwe feino angangen misineri? Inan we a angei efeiochun pristut ren ewe pwon pwe epwe manau tori wesinon an semwen. Ren pochokunen ewe feioch, Kate a feino fan an nuku me a sopweno an kokkoten fori angangen misineri.

Kate a apasa: “Ua ipweipeno non kiroch, nge non ai misin, ewe saram a toriei me ua rongorong poraus pwe efeiochun inei we a pwonueta. Ua fakkun pwapwa use nikitano ai angang ngeni ewe Samon. Nupwen mettoch mi weires ra feito, ua nuku pwe a mecheres ach sisap fefeita me sise mochen fefeita, nge ika ewe Samon a akkomw, ekkewe osukosuk mi tongeni emwen ngeni feioch chapur. Ka tongeni kuna Poun we me kuna minen manaman.” Kate a mefi ennetin kapasen Preseten Thomas S. Monson: “Tufich mi napanap epwe fis non fansoun weires.” 6

A wor an Kate nuku pokiten a weweiti ewe kokkotuen manau ese much. A sinei pwe sia manau me mwen, fonufan mi fansoun sossot, me sipwe manausefan. A wor an nuku pwe inan we epwe feioch, nge seni met a fis ren seman we, a sinei pwe ika inan we epwene mano, epwe chuen feioch. A apasa: “Use chok manau seni manon semei wei; a winiti eu kinikinin manauei, me ika inei we epwe mano, epwe pwan usun chok. Epwe fen efisata kapasen pwarata mi napanap non manauei.”7

Kate a kutta eu neni mi pin ena pwinin ua churi me non ewe tempel. A tapweno an seman me inan we nenien appirun feino tempel, me a mochen efisata chiechian fansoun ese much minne a fis me ren angangen tempel.

Ese wor chommong a fis pwinin Kate a churi Chris, nge non an kutta pwan eu neni mi pin won Raninfel, Kate a kuna Chris nein fitu puku aramas non eu mwichen kaeo pukfel. Ra kaeo fengen ussur me ikkewe. Ekkoch wik mwirin, Chris a tingorei an epwe katon mwichenapen mwichefen ren i. Ra sopweno ne kukutta neni mi etiwa ewe Ngun mi Fel non ar chiechi fengen me mwirin fitu fansoun ra riri fengen non ewe tempel, ewe neni mi pin minne ra chufengen me akkomw. Ir me ruemon ra apwonueta ewe wisen sam me in, ra efisata ar kapasen pwaratan ewe kokkotun manau ese much non manauen unumon kukkun at, me ra pwarata ewe anen ewe pwon ngenir.

“Nupwen ka amanaua emon nengin, ka amanaua ekkoch tappin aramas.” Finien Kate nupwen a 14 ierin ne nom won ewe an, a anono noun we nam, me uta non neni mi pin a amanaua me epwe amanaua tappin aramas. An kutta an kewe neuo me angang non tempel a turuni netiper. An fiti uruon famini me angangen tempel epwe pwan riri fengeni netipemi me awora ewe tufichin manau ese much ngeni om kewe neuo.

Om manaueni ewe kapas allim non imwom epwe pwan anono noum we nam me efisata pochokunen ngun non imwom iei me efeiochu om famini non chommong napanap. Pwan, usun Elter Robert D. Hales a apasa, “Ika an semach me inach nenien appiru ese och, ina wisach ne ekkesiwini … me aiti napanapoch me oreni mi och fan iten mwirimwirich.”8

Oupwe finata iei ne fori mettoch meinisin mi tufich ne anono noumi kewe nam, pwe ami kapasen pwarata me nenien appiru epwe riri non manauen chommong tappin aramas, me nom, iei, me non fansoun mwach. Ua pwarata pwe manauemi mi nimenimoch esap chok amanaua tappin aramas, nge epwe pwan amanaua manauemi rese much, pun ina chok ewe anen niwinsefan ngeni Semach won Nang me weri ennetin pwapwa iei me fansoun ese much. Non iten Jises Kraist, amen.

Show References

    Esinesin

  1.  

    1. Gordon B. Hinckley, “Standing Strong and Immovable,” Worldwide Leadership Training Meeting, Jan. 10, 2004, 20; nengeni pwan Gordon B. Hinckley, “Our Responsibility to Our Young Women,” Ensign, Sept. 1988, 10.

  2.  

    2. “An Ewe Famini: Esinesin ngeni ei Fonufan,” Ensign ika Liahona, Nov. 2010, 129.

  3.  

    3. Russell M. Nelson, “Generations Linked in Love,” Ensign ika Liahona, May 2010, 92.

  4.  

    4. Nengeni Matthew 25:1–13.

  5.  

    5. Nengeni “I Love to See the Temple,” Children’s Songbook, 95.

  6.  

    6. Thomas S. Monson, “Meeting Your Goliath,” New Era, June 2008, 7.

  7.  

    7. Interfiu ren ewe chon mak, 2013;

  8.  

    8. Robert D. Hales, “How Will Our Children Remember Us?” Ensign, Nov. 1993, 10.