Acn Muhtahl Lowos

Sel Ann M. Dibb

Mwet in Kahsruh Ahkluo ke Prestuhnsi Luhlahp luhn Muhtwacn Fuhsr


 
Ann M. Dibb
Finne [acn muhtahl lowos] uh oasr ke acn kuh pacl uh, elos kwewana muhtahl ac oasr kuh in ahkkweye wowo kac.

Sifac ke Sie sin Sie lasr ke (yac tausin luo singucul tolu) 2013 tuhkuh ke ip ahk (alngucul itkohsr) 87 ke Doctrine and Covenants. Mwe ahkuhtweyac se inge sukokyak ke ip tolu; kahlwemlah kahs se yohk srihpac. El ahkuhtweyac ohiyac kuht kuh in eis karihngihnyuck, kuh ac mihslac ke pacl upac. Mwe ahkuhtweyac mokleyuck se pa in “tu ke acn muhtahl, ac in tiac mukwikwi.1

Ke nga motko ke sifac se inge, nga kwacfe in siyuck sihk sifacna “Meac ‘acn muhtahl’ ma Pahpah Lucng sramsram kac uh?” Prestuhn Ezra Taft Benson el ahkuhtweyac, “Acn muhtahl uh wi tempuhl lasr, lohm alu lasr, lohm sesr, ac stek luhn Sion lasr uh, suc pa, …‘nuh ke sie mwe loango, ac nuh ke sie monglac.’”2 In weacng ma inge, nga luhlahlfongi lah kuht kuh in konwacack acn pucspucs sahyac. Kuht kuh in ma se met nuhnkuh kahs se acn in oruh inkucl kuh sie luhman acn. Tuhsruhktuh acn se kuh in “ohiyac se, pahng se, kuht nuhnak se.”3 Kalmac pa acn muhtahl uh kuh pac in wi ip ke pacl—pacl ma ke Nguhn Muhtahl fahkwack nuh sesr, pacl ma ke kuht puhla luhngse luhn Pahpah Lucng, kuht pacl ma ke kuht eis top nuh ke pruhe lasr. Yohk liki kalmac sacn, nga luhlahlfongi kuhtwena pacl oasr kuh lowos in tu ke ma pwacye, yohk nuh ke pacl ma wacngihn mwet sahyac luhngse oruh oacna, kowos orwaclah acn muhtahl.

Lusen pacl ke moul fototo tuhsruhk wolacna lal Joseph Smith, pwacye lah el “tu ke acn muhtahl” ac tiac mukwikwi kac. Ke el tuh mukul fuhsr se ah, el puhla toasr ke mwe fohs luhn alu ke mura lal ac el kena etuh lah suc kac sin alu ngwe pwacye uh. Un sahk sisken lohm sel ah orwaclah sie acn muhtahl ke el sikuck muhtuhn te ac sang pruhe ke puhsra luhlahp se emet lal. Pruhe lal topukyucklac, ac mihsenge Mwet Luhlahlfongi ke Lwen-sahflah pahngon un sahk inge Insack Muhtahl.

Muhtwacn fuhsr facluh nohfohn tu ke acn muhtahl lihkihnum ke kamp luhn Muhtwacn Fuhsr. Sie mwet kol akacsruhi ke sramsram soko ke ma sikyak nuh sin sie muhtwacn fuhsr . Tuhlihk muhtwacn se inge suhkwac alu ac tiac arlac ke wi mukwikwi luhn nguhn ke un sahk uh. Tukun lwen se met, el fahkwacng nuh sin mwet kol sac, “Nga pwacrkihn ma nuh kwewa, tuhsruhktuh kuht kuh in tilokihnyac sramsram kwewa ke Nguhn uh? Nga tuhkuh in kamp, liye acn uh, wi kawuck uh, ac oruh ma pwacr uh!” Tuhsruhktuh, ke miting in kaliyac ke fahkwack luhn luhlahlfongi, tuhlihk muhtwacn sacpacna inge emtuhng in fahkwack, “Nga sruhnga som nuh lohm ah. Nga kuh eis ma nga puhla ingena uh fuhkah, Nguhn se inge, in wiyuc pacl nuh kwewa?” El konwacack acn muhtahl se.

Sie acn muhtahl sahyac ke moul lal Joseph Smith ah pa ke infuckihl in mutul lal sifacna. Sahp ma inge upac in luhlahlfongiyuck ke srihpen, oacna puhsiyowos, el akacsruhi ke infuckihl lal nuh sin tuhlihk wiyacl.Infuchkihl sac orwaclah acn muhtahl se ke el pruhe se ke luhlahlfongi kuh yohk, inse puhsisacl, ac enenuh. El ahkuhtweyac lah tukun el som mutullac ah, el muhtwacack in pruhe ac siyuck sin God Fuhlwactlacna ke nuhnak muhnahs ke ma koluk ac tahfonglac nuh kwewa lal.4 Yac tolu suc ma somlah ke pacl se Joseph el aruhrruhma ke Insack Muhtahl sac ke tiac fihsracsr. Joseph suc matwac yac singucul itkohsr el muhtweng isrucnyuck, ahngonkahs, ac ahkkolukyeyuck. Tuhsruhktuh ke fong sac lun infuckihl sel ah, lihpufacn Moroni el sikyang in topuk pruhe lal. Joseph el eis etuh ac ahkwoye.Fohng sac, infuckihl se lal ah orwaclah acn muhtahl.

Ke nga liye petsac se ke Pweng luhn Mormon nuh sin Mwet Fuhsr, nga lohoh ke sie pac infuckihl ma orwaclah sie acn muhtahl. Petsac se ahkkahlwemyacl Ingrid Delgado, muhtwacn fuhsr se fin acn El Salvador, el akacsruhi ke puhla lal ke tempuhl. El fahk, “Ma wo se in etuh lah kuht kuh in som nuh kac liki ma luhn facluh ac eis akwuck muhtahl ac kahsruh mwet suc tiac eis ma inge ke moul lalos.” Ke el sramsram ah, petsac sac ahkkahlwemyacl Ingrid ke el riti ma suhmuhslah lal, rauniyuckyak ke mwe sulkackihnyuck luhn Mormon, pohloh fahk luhn alu, sie Puk in Kapkapwack luhn Kais Sie, petsac ke sucu lal ac tempuhl, ac ahok, tuhlihk sahk kosro se el luhngse emet.5 Sahp el tiac akihlen lah, el orwaclah acn muhtahl se lal sifacna liki ma luhn facluh. Nga motko lah pacl ekahsr Ingrid el riti ma suhmuhslah nahtuhl ah, puhla Nguhn, ac eis top ke pruhe lal ke acn muhtahl lal.

Na oasr sie acn muhtahl sahyac ke moul lal Joseph Smith pa Liberty Jail. Elder Jeffrey R. Holland el fahk, “Wacngihn pacl toasr liki na sahyac ke moul lal Joseph Smith oacna pacl upac, lain masap, ac tiac enenweyuck ke kaclpous.” Elder Holland el tahfwelah in fahk lah Liberty Jail pahngpahng “tempuhl se luhn kaclpous” ke srihpen ma puhlweyuck muhtahl yohrohl Mwet Pahluh Joseph Smith we ah.6

Kuhtuh suwos muhtwacn an kuh inpuhlakihn Liberty Jail la sifacna, acn se kowos puhla ahktonong, acn se kowos tiac puhla luhngseyuck, acn se kowos isrucnyuck, orek fuhnmwetyeyuck, kuh finne acnwuckyak. Nuh suwos muhtwacn fuhsr an, nga fahk kahs lal Elder Holland; “Kowos kuh in eis puhlakihn wowo muhtahl, fwackyuck, ac wolacna sin Leum ke pacl upac emet ke puhlakihn luhn moul lowos an … ke kowos kweoklac in muhtweng uh, ke kowos sun ma upac ac ma lainyuck ma atacn upac in kuhtangyucklac.”7 Ke kahs sahyac, ma oacna kahs lal Mwet Pahluh Joseph Smith, kowos kuh in orwaclahac tu ke acn muhtahl finne ke pacl upac emet ma kowos soenna puhlakihn.

Muhtwacn fuhsr mahtuh an, Kirsten, el akacsruhi nuh sihk ke ngallac lal. High school oruh Liberty Jail lal. Wolac ohiyac,—infuckihn in sritacl kuhfwen on ah kahsrwel. El fahk: “Ke nga utyak nuh ke infuckihl se inge, oacna in muh nga utyak nuh ke sie acn wowo. Wacngihn kahs in isrucnyuck ac ahkkoluk, wacngihn kahskahs koluk. Sahyacna, kuht lohng pa kahs in kahsruh ac luhngse. Kuht ahkpahkihn ohiyac kuhlwacng. Acn in engan se. Infuckihl in sritacl mwe on se sesseslah ke Nguhn ke kuht pracktis ac sritacl on uh. Infuckihl sac oacna inge yohkna ke srihpen mwet luti ke on uh. El mukul Kristen wo se. Nga esam lah high school pa acn se nga tohflah wo we. Upac, tuhsruhktuh nga lotwelah in topuk in wo ma koluk. Nga fah sruikihn ma pahtpaht ke acn in monglac luhk, acn muhtahl luhk, infuckihl in acn in sritacl on.”8

Ofong, yac kowos na nuhnkuh ke acn muhtahl lowos uh? Nga siyuck sin muhtwacn pucspucs in akacsruhi ke acn muhtahl lalos nuh sihk. Lah elospa acn oreklac wo se kuh ma na ke kihtin pacl, acn ingacn oacna sie muhtahliyac ac oasr kuh luhn ahkkweye wo la. Pa inge yuc sin top emtuhng lalos uh:

  1. Sie: “Nga muhta lohm ono ah, sruok ahwowo sasuc se wiyuck.”
  2. Luo: “Kais sie pacl nga riti mwe insewowo luhn patriarch luhk, nga puhla nga etweyuck ac luhngseyuck sin Pahpah tuhmuhk Inkuhsrao.”
  3. Tolu: “Lwen se nga yac singucul luo ah, muhtwacn fuhsr ke ward uh nahwelah sruhnguhl se luhk ah ke at pwepuh.9 Nga puhla luhngseyuck, inseseiyuck, ac engan!”
  4. Ahkosr: “Ke nga riti ma suhmuhslah luhk sie lwen ah, pohloh kahs se ‘tuhkuh.’ Nga sokwack top se ke pruhe luhk uh.”
  5. Limekosr: “Nga utyak nuh ke sie ahkfuhlwactye ac oasr mwet suc nihmnihm. Nguhn fahk nuh sihk in forlah ac fohlohk nuh lohm ah. Nga oruh, ac ahok, oasr ma sikyak ma e sun ohiyac uh. Tuhsruhktuh, in pacl sac use puhla kuh nga enenuh in etuh lah nga kuh in moulkihn wosasuc.”
  6. Ohnkohsr: “Ke pacl luhn kuhfa luhn Leum, nga motko ke Iwaclah sac. nga akihlen nga enenuh in nuhnak muhnahs nuh sin mwet se nga kasrkuhsrak se. Sulaclah luhk in nuhnak muhnahs pa mukwikwi suwohs ma kuh in use Iwaclah nuh ke moul luhk lwen nuh kwewa.”
  7. Itkohsr: “Tukun nga wi ninac kiyuck ke New Beginnings, el ngokyucwi ke lihkihn tuhpuhk ac fahk nuh sihk lah el luhngse nga. Pa inge pacl se emet nga kuh in esam el oruh ma se inge.”
  8. Alkosr: “Ke luhlahlfongi lal pisap, nga etuh lah olwelah lun ma suhmuhslah uh pwacye: ‘Ma koluk lom ne sruhsrah, elos e fasrfasr oacna sno.’10 Nga puhla finsrak ac etuh lah nga kuh in sramtweack oruh loeloes luhn auliyak.”
  9. Ma sahflah: “Sie ekuh ah, nga eis puhlaik in akacsruhi ke puhla luhk ke wosasuc ac Puk luhn Mormon nuh sin kawuck fokoko se luhk. Tohkoh, pacl wo se luhk pa in wi pacptais lal. Ingena kuh tuhkweni wi alu.”

Nga kuh in akacsruhi nuh suwos ke sie sin acn muhtahl luhk uh? Sie pacl ah, nga puhla toasr, sahngweng, ac muhkuhlac. Nga mihslacna in pruhe “Pahpah Lucng, nga tiac etuh lah fuhkah oreyacn ma se inge. Nuhnak muhnahs, nuhnak muhnahs, kahsrweyuc!” Tiac paht, mwet se tuhkuh nuh yuruk, fihliyac pahol fin pihsuck, ac fahk kahs in kahsruh nuh sihk. Ke pacl sac, nga puhla mihslac. Nga puhla etweyuck. Ma nuh kwewa eklac. Kahs lal Prestuhn Spencer W. Kimball tuhkuh nuh ke nuhnak luhk uh: “God El liye kuht, ac El karihngihn kuht. Tuhsruhktuh inkaiyacn pacl uh sin mwet se sahyac pa lac ahkfalye mwe enenuh lasr uh.”11 Nuh sihk, in pacl sac, acn sac, ahkmuhtahliyucklac.

Pain kowos muhtwacn fuhsr wolacna, oasr acn muhtahl puhkantwen nga ke kuht in akacsruhi kac sie sin sie. Ke kowos fohlohk nuh lohm ah ofong uh, nga ahkkweye kowos in suhmuhslah lun mwe sihm lowos an ma kowos akihlen ac esam an. Kahlwem nuh sihk lah tausin suwos tu ke acn muhtahl. Acn inge e usot nuh suwos loangweyuck, kuh, ac mihslac ke pacl tiac akwucki. Fahkwack luhlahlfongi lowos an fokokoi ke srihpen kowos ahollah ma pwacye ac ohiyac suwohswohs ke ohiyac wolacna uh.

Kowos, mwet fuhsr pwengpweng luhn Alu uh, pa mwet kuhtanglah luhk. Nga luhngse kowos. Nga puhla luhngse wolacna luhn Pahpah Lucng nuh suwos, ac nga fahkwack luhlahlfongi luhk lah wosasuc luhn Jisus Kraist pwacye. El soano, ahkolah in tahpuhk kowos ke kowos “tu … ke acn muhtahl, ac in tiac mukwikwi.” Nga luhngse ac ahkkweyacl Prestuhn Thomas S. Monson, mwet pahluh pwacye ac ahkkweye lasr. Nga fahk ma inge ke inen Jisus Kraist, amen.

Mostrar las referencias

    Mwe Kahsruh

  1.  

    1. Liye Doctrine and Covenants 87:8; liye pac Doctrine and Covenants 45:32; 101:22.

  2.  

    2. Ezra Taft Benson, “Prepare Yourself for the Great Day of the Lord,” New Era, Mei 1982, 50; liye pac Doctrine and Covenants 115:6.

  3.  

    3. Merriam-Webster Online, “place,” merriam-webster.com/dictionary/place.

  4.  

    4. Liye Joseph Smith—History 1:29.

  5.  

    5. Liye “Practice, Celebration, Dedication: Temple Blessings in El Salvador,” lds.org/youth/video.

  6.  

    6. Jeffrey R. Holland, “Lessons from Liberty Jail,” Ensign, Septempuh 2009, 26.

  7.  

    7. Jeffrey R. Holland, “Lessons from Liberty Jail,” 28.

  8.  

    8. Sramsram la sifacna yurin mwet sihm.

  9.  

    9. Kuhtuh pacl uh fwackyuck fin acn United States muh “mihsen at.”

  10.  

    10. Isaiah 1:18.

  11.  

    11. Spencer W. Kimball, “The Abundant Life,” Ensign, Julahe 1978, 4; Tambuli, Jun 1979, 3.