Tu i le Vao Paia

Elder Marlin K. Jensen

O Le Fitugafulu

Faigalotu a le OAE mo Talavou Matutua • 6 Me 6, 2012 • Sacramento, Kalefonia


Elder Marlin K. Jensen

Malo le soifua, uso e ma tuafafine. Ou te matua faafetai ae matua lotomaulalo foi i le tuuina mai o lenei tofiga faapitoa e le Au Peresitene Sili ou te lauga atu ai ia te outou i le po nei. Ina ia amata, ou te manao ia outou iloa sa le’i maanuminumi o’u [foliga], sa uliuli pato’i le lauulu, ma malaulau e pei foi o outou—o se vaega o le mea ua ta’ua i tusitusiga paia o “tupulaga faia’e.” Ou te le mautinoa po o le a le faafeagai sao o le faia’e—atonu o le “magoto” po o le “fai ifo”—ae po o le a lava, ua faamatala ai le tulaga o le olaga ua ou i ai nei, ma e faalelogomalie tele ia te au!

E ui ina ou talanoa atu mai se faletapuai matagofie e lata i le Malumalu o Sacramento Kalefonia, ae e mafai ona ou vaai faalemafaufau i le fia sefulu o afe o outou—toeitiiti 40 gagana eseese e tautatala ai—o e ua faapotopoto i le salafa o le lalolagi. Ua faamanuiaina au e asiasi i le tele o outou atunuu, e faalogo o outou tautatala ma tuuina mai molimau i a outou lava gagana moni, ma molimauina moni lo outou faatuatua ma le tuuto i le Alii. Ou te alofa ma faamalo atu ia te outou mo lo outou amiotonu. Ua ou iloa o le olaga i le taimi nei e luitauina, ma ua ou iloa e i ai nisi o taimi tatou te sese ai ma e manaomia ai ona salamo. Ae ou te faafetai atu ma le lotofaamaoni ia te outou mo le saili e tumau mausali i lo outou faatuatua ia Keriso ma Lana talalelei toefuataiina. O ou moomooga moni ia faamanuiaina au ia ou talanoa atu e ala i le mana o le Agaga Paia ma faapea ai ona ou saofaga i le faateleina o lo outou faatuatua.

Nofoaga Paia

E i ai nofoaga i lenei lalolagi ua paia ona o mea sa tutupu ai iina. E tusa ai ma le Feagaiga Tuai, o se tasi o ia nofoaga o Sinai, Orepa, po o “le mauga o le Atua” (Esoto 3:1, 12; 34:2); tagai foi i le Esoto 3:12; 34:2), lea sa faaali mai ai le Alii ia Mose i le afi mumu i le laau talatala. A o agai atu Mose i le laau talatala, sa fetalai atu le Alii ia te ia, “Aua e te faalatalata mai iinei: ina to ese ia ou seevae i ou vae, aua ua sa lava le eleele o loo e tu ai nei” (Esoto 3:5).

Sa i ai se taimi sa faamanuiaina ai i matou ma lo’u aiga e nonofo i se nofoaga paia. I le 1993—i le fa o tausaga talu ona maea le valaauina o au o se Fitugafulu—sa faatonuina ai i matou e auauna atu mo le lua tausaga i le Misiona a le Ekalesia i Niu Ioka Rochester. O le misiona lena e aofia ai le aai o Palamaira (lea sa nonofo ai Iosefa Samita ma lona aiga i le tele o le taimi o le vaitau o le 1820) ma Faiete (lea sa faavaeina ai le Ekalesia ia Aperila 1830). E tusa ma le 110 maila i saute o Palamaira i le setete o Penisilevania, e i ai le nofoaga o Haremoni (lea sa fetaui ai Iosefa Samita ma Ema Hale ma lea sa la nonofo ai o se ulugalii faatoa faaipoipo a o faaliliuina ai se vaega tele o le Tusi a Mamona i le faaiuga o le vaitau o le 1820). O le eria atoa lenei e ta’u o le “Afuaga o le Toefuataiga,” ona o i lea sa fanau ae ai le Ekalesia. O se laueleele mataina e tumu i mauga folasi; ma vaomatua, vaituloto ma auvai manino; ma tagata agalelei ma fiafia. O se nofoaga foi e paia ona o mea sa tutupu ai iina.

O Le Vao Paia

I se vaomatua o beeches, garava, meipo, ma isi laau uumi, e tusa ma le tasi le kuata maila i sisifo o le fale o le aiga o Iosefa ma Lusi Maki Samita e lata i Palamaira, sa vaai ai i se faaaliga le taulealea e 14 tausaga o Iosefa Samita i le Atua le Tama ma Lona Alo o Iesu Keriso, i le tautotogo o le 1820. O lenei faaaliga paia, o le tali i le tatalo a Iosefa i le fia iloa o le mea moni e uiga i mea tau lotu ma le ala e mafai ona maua ai le faamagaloga o ana agasala, na amata ai le Toefuataiga o le talalelei i lenei tisipenisione mulimuli. Na avea ai foi lena togavao o se nofoaga paia i le talafaasolopito o la tatou Ekalesia—o se nofoaga tatou te faamamaluina i le igoa o le: “Vao Paia.”

A o avea au ma se peresitene o le misiona, sa matou fiafia ai ma lo’u aiga i lena vao o laau ma lagona ai le paia. Sa masani ona matou o i ai. O masina taitasi e taunuu mai ai faifeautalai fou ma i latou o le a toe foi pe a mae’a a latou misiona, matou te aveina i latou iina. O la matou masani, matou te faatasitasi i le faitotoa o le togavao, ma a maea ona usu le viiga lea na tatou amata ai ananei,—“O Le Tatalo Muamua a Iosefa Samita” 1—matou te valaaulia ia alii ma tamaitai faifeautalai e o e sue se nofoaga paganoa i le vao e mafai ona latou talanoa ai ma le Atua i le tatalo ma fai ma lipoti atu ia te Ia e uiga i mea na ausia e le tagata lava ia. O nei asiasiga i le Vao Paia sa avea ma e tumau pea ona avea o ni aafiaga taua mo i latou uma o e sa faamanuiaina ia maua.

Ae peitai, ou te iloa, e na o se vaega toaitiiti o outou o le a mafai ona asiasi atu i le Vao Paia. Ona o lenei mafuaaga, i lenei tautotogo o le 2012—i le 192 o tausaga talu ona mavae le Uluai Faaaliga i a Iosefa Samita—ou te manao ia faapei o loo tatou o i le Vao Paia. Tatou tutu ai iina, a o ou faasoa atu nisi o vaaiga o le vao, ma le mafuaaga o lo’u faamemelo i lena nofoaga paia, ma lesona taua o le olaga e mafai ona aoao mai e se tagata iina.

Ou te faafetai ia Uso Robert Parrott, o lē e pulea le vaomatua ma le siosiomaga, sa faafaigaluegaina e le Ekalesia, ma e nofo i Palamaira, mo le ta’uina mai ia te a’u o nisi o vaaiga manino i le Vao Paia lea o le a ou faasoa atu. E ui e le’i avea o ia ma se tasi o la tatou ekalesia, ae e faaaloalo tele ia Uso Parrott i le Vao Paia ma na te tausia faalelei ma le faapelepele.

Tala Faatusipaia e Aofia ai Laau

A ou savali ma le faaaloalo i le Vao Paia pe saofai foi ma mafaufau i luga o nofoa uumi o loo i ai, e masani ona ou tomanatu i le tele o tala faatusipaia e aofia ai laau, lala, aa, fatu, fua, ma le vaomatua. E le taumateina na maua e Atamu ma Eva, o tatou uluai matua, le lesona muamua i le tausiga o laau. Ua faasoa mai e le perofeta o Iakopo, i le siiina mai o aoaoga a Senosa i le Tusi a Mamona, se faataoto po o le tala e faigata ona malamalama i ai i laau olive toto ma olive vao, a o ia aoao mai e uiga i le faataapeapeina ma le faapotopotoina o Isaraelu (tagai i le Iakopo 5). O ai se tasi o i tatou, e le’i faitaua, toe faitaua, ma mafaufau ma le agaga tatalo i le fatu o le faatuatua lea o loo valaaulia i tatou e Alema e toto, lea a tausia ma le onosai ma faafailele faalelei o le a avea ma “se laau e puna ae i le ola tumau faavavau”? (Alema 32:41; tagai i le fuaiupu 27--43)

E faapena foi la le Vao Paia. O se tagata e matauina ma le totoa le natura—ae maise pe a o faatasi ma se tagata e suesueina le siosiomaga e i ai tomai e pei o Uso Robert Parrott—e mafai ona aoaoina ni lesona taua mai taualumaga efaasino i meaola ma o latou siosiomaga lea e i ai iina. Ou te fia faasoa puupuu atu ni nai lesona se fa ia te outou:

Lesona o le Olaga mai le Vao Paia

Lesona numera- 1: O laau o taimi uma lava e tutupu ma ola agai i le susulu o le la [malamalama].

O le tasi o mea moni matagofie ia matauina i le Vao Paia, o laau o loo ola i le matāvao o le uluai togavao, faapea ma laau o loo tutu i le tele o auala savali i totonu. E tutupu agai i fafo ina ia aloese mai le maluia i uluulu o laau e i luga ae o i latou, ma tutupu i luga ia maua ai le tele o le susulu o le la e mafai ona maua. O o latou ogalaau ma lala pipio ua gata le tutupu e faatusatusa atu i laau tuaoi o loo ola toetoe lava a sasa’o lelei. O laau, e pei lava o le tele o mea ola uma, e manaomia le la ina ia ola ma manuia ai. Latou te faia mea uma latou te mafaia e mitiia ai le susulu o le la e fesoasoani ai i le gaosiga o meaai a le laau—o le faagasologa lea e faaliliu ai le malosiaga mai le la i le malosiaga tau vailaau, po o le “malosiaga” e faaaogaina e toetoe lava o mea ola uma.

Ou te mautinoa ua uma ona iloa e o outou mafaufau talavou ma atamamai le mea ua avatu i ai e lenei faatusatusaga mai le Vao Paia i tatou! O le malamalama o se mea e sili atu foi le taua i le itu faaleagaga nai lo le natura. E mafua ona o le malamalama e alagatatau mo lo tatou tuputupu ae faaleagaga ma le iloaina o o tatou gafatia atoa i le avea ai o ni atalii ma ni afafine o le Atua.

O le pogisa o le faafeagai o le malamalama ma e faatusa i malosiaga o le lalolagi lea e taumafai e vavae ese i tatou mai le Atua ma ia faalavefau i Lana fuafuaga paia mo o tatou olaga. E masani lava o le po, po o nofoaga pogisa e faaaoga ai e au a le tiapolo a latou faatosinaga e sili ona malolosi. I le matutua ua i ai o outou olaga, o le solia o le tulafono o le ola mama, o faatinoga o le gaoi, taaloga faitupe, soli o le Upu o le Poto, ma isi amioga ua faasaina e lo tatou Tama Faalelagi e masani lava ona faia faalilolilo i le pogisa. E tusa pe tatou te filifili e fai mea sese i le matilatila o le ao—mo se faataitaiga, o le kopi i se suega, kopi i le tusiga o pepa o meaaoga, faitatala faalealofa e uiga i se tasi, faaaogaina o upu masoa ma le mataga, po o le pepelo—e leai se isi mea ae ua na o lagona pogisa.

O le mea e lelei ai, o le Agaga o Keriso “na te tuuina mai le malamalama i tagata taitoatasi e sau i le lalolagi; ma o le Agaga e faamalamalamaina tagata taitoatasi i le lalolagi atoa, o e e faalogo i le siufofoga o le Agaga.

“Ma o tagata uma taitoatasi o e e faalogo i le siufofoga o le Agaga, e o mai i le Atua, le Tama lava” (MF&F 84:46--47).

O lenei fuaitau mai le Mataupu Faavae ma Feagaiga ua faamatalaina matagofie ai le agai atu i luga o le tagata, le natura masani ua tuuina mai e le Atua lea tatou te mauaina uma—pe afai tatou te le taomiaina—e agai atu ai i le malamalama ma o le faia o lea mea, e agai atu ai i le Atua ma Lona Alo ma avea atili ai e pei o i Laua. Na fetalai Keriso e uiga ia te Ia lava, “O a’u nei o le malamalama o le lalolagi: o lē mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12).

I le malamalama i se mau, e tele ni mea e te iloa e uiga i se upu e ala i isi upu e masani ona le mamao ane ai. I au suesuega o tusitusiga paia, matau pe faafia ona maua ia upu malamalama, Agaga, upumoni, ma Iesu Keriso e felata’i lava. E toeitiiti lava a tutusa, ma latou te faalatalata uma ai i tatou i luga i se olaga e sili atu ona paia.

Ou te uunaia outou ma lo’u loto atoa ia [outou] aloese mai le pogisa o le agasala i ona ituaiga amioleaga uma ae ia faatumuina o outou olaga i le Agaga, upumoni, ma le malamalama o lo tatou Faaola, o Iesu Keriso. E mafai ona outou faia lenei mea i le sailia o ni uo tauagafau, musika ma faatufugaga musuia, poto mai tusi e sili ona lelei (ae maise lava o tusitusiga paia), taimi o tatalo faamaoni, taimi paganoa i mea o le natura, talanoaga ma gaoioiga lelei, ma se olaga e faaogatotonu ia Keriso ma Ana aoaoga o le alofa ma le auauna atu. Ia manatua pea, ma faapitoa o le sailia o se soa e faavavau, na fetalai mai ai le Alii e faapea “o le upu moni e fusia le upu moni; o le amiomama e fiafia i le amiomama; o le malamalama e pipii i le malamalama” (MF&F 88:40). O lenei mataupu faavae—o le lelei e tosina i le lelei—e tuuina mai ai le faamoemoe e faapea, afai tatou te ola i se olaga i le malamalama o le talalelei, o le a iu lava ina tatou maua se soa e uia se ala tutusa o le amiotonu. Ou te iloa o le tele lava o lo tatou taumafai e faatumu o tatou lava olaga i le malamalama, o le laitiiti foi lea o le avanoa mo le pogisa ae o le latalata foi lea o le a iu ina tatou avea ai faapei o Keriso, le Malamalama o le Lalolagi.

Ona o le faamanuiaga faapitoa ua a a’u i lenei afiafi, o le talanoa atu lea ia te outou o le autalavou sili ona lelei o le Au Paia o Aso e Gata Ai, ua ou manao ai e tuu atu se leo o le lapataiga ae o se leo foi o le faamalosiauga ma le faamoemoe e uiga i le pogisa lea o le a mautinoa lava le osofaia ai o lou olaga pe afai e te aafia i ponokalafi. O le faaaogaina o mea faaponokalafi i soo se auala e tiga ai le Atua ma soli ai Lana poloaiga o le aua le mulilua “pe e te faia soo se mea faapena” (MF&F 59:6). O le faaaogaina o ponokalafi e toetoe lava o taimi uma e oo atu ai i isi soliga o le tulafono o le ola mama. O le vaai faafia i mea faaponokalafi ma le auai i ituaiga o agasala o feusuaiga lea e masani lava ona sosoo mai ai, e mafai ona fatuina ai se vaisu e ao lava ona tagofia ma taulimaina i le faaeteetega lava lea e tasi e pei ona tuuina atu i vaisu o alakaholo po o fualaau faasaina.

Afai ua pisia i ponokalafi lou olaga, ma o se faafitauli faifai pea ua tupu soo, ou te aioi atu ia te oe ia saili le fesoasoani faale-ekalesia ma faapolofesa. Faamolemole ia outou iloa, o se vaisu o ponokalafi e le na o “sina tamai faafitauli” lea e mafai ona e foia faalilolilo i le tatalo, suesueina o tusitusiga paia, ma le faateleina o le amio pulea.

Ona o le vaisu o ponokalafi e mafai ona faaitiitia ai lou naunautaiga malosi e filifili le lelei nai lo le leaga, o le a e manaomia ai le agamalu ma le lotomaulalo e taliaina ai le Togiola a Iesu Keriso ma faamanuiaina ai i le mana gafatia o le Togiola. O le uiga o lenei mea i se faaupuga moni, o le, afai e te faaaogaina a oe lava taumafaiga e sili ona lelei—lea e aofia ai le uia o se faagasologa o le salamo faatasi ai ma le fesoasoani a lou epikopo po o le peresitene o le paranesi ina ia maua le faamagaloga o agasala ma le uia o se faagasologa o le toe faaleleia e aofia ai fautuaga faapolofesa ma atonu foi ma ni vaega lagolago ina ia foia ai lau vaisu—o le mana gafatia o le Togiola (lea e faamatalaina e le Lomifefiloi o le Tusi Paia o se fesoasoani po o se malosiaga faalelagi2), o le a fesoasoani ia te oe e foia ai le malosi o se vaisu o ponokalafi ma i le aluga o taimi, ia malolo ai mai ona taunuuga matautia. E ala i le mana o le Togiola, e maua ai le faamagaloga o agasala ma le toe faaleleia mai vaisu ma o ni mea matagofie uma ia.

Faamolemole, ia tetee atu i le pogisa, ma e pei foi o laau, ia saili e le aunoa ia ola agai atu i le malamalama.

Lesona numera 2: E manaomia e laau mea faafeagai ina ia ausia ai le fuataga na foafoa ai.

O ni manatu faaalia eseese e uiga i le puleaina o le vaomatua na sosoo mai ai i le aluga o tausaga i le vaavaaiga o le Vao Paia. Sa i ai se taimi sa filifilia ai se fasi laueleele faataitai, ma faagaoioia ai se faiga sa ta’ua o le “faavalavala le ola [o laau]”. Sa faapenei lona faiga: Sa faailoa e i latou e vaaia le vaomatua ia laau iti na latou manatu sa sili ona lapopoa ma malolosi i le fasi laueleele faataitai, ona latou tatuuina lea ma tetele ia laau e faaleola lelei ma pupuvao sa fealumi faatasi ai. O le talitonuga sa i ai e faapea, o le aveeseina o le tele o le tauvaga mo le suavai, susulu o le la, ma meaai mai le eleele, o laau na filifilia o le a “saoloto” e ola ma tutupu i ni auala sili ona maoae.

Ina ua mavae ni nai tausaga sa manino mai e ese le mea na tupu. O le taimi lava e saoloto ai mai le tauvaga, o laau filifilia ua amata ona le popole. Nai lo le tutupu i luga i le malamalama, e tuai lava lo latou tutupu agai i luga, e tulioso mai lala maualalo o le a i’u ina leai se aoga pe a maluia, ma oo ai ina lapopoa. Ae o le taimi lea, o laau sa aveeseina e toe tatupu ae o ni pupulaau e tele ni ogalaau ia o le a le avea ma ni laau e ola lelei ae faaauau pea ona faaaogaina le vai ma niutereni. O nei laau pei o ni pupulaau e faaauau ona fealumi ma laau filifilia, ae e le o se auala o le a aumaia ai se ola lelei i se tasi o nei laau. O le taunuuga, e leai se laau o le fasi laueleele faataitai e faatusalia le tetelē po o le malolosi i laau na tuu e ola i le faiga masani ma na tatau ona tauva ma manumalo i mea faafeagai ina ia ola ma manuia ai.

E pei ona outou iloa, o le tasi o aoaoga faavae autu o le Tusi a Mamona o le, e ao ona i ai le faafeagai o mea uma. O se lalolagi e i ai mea faafeagai e tuuina mai ai ni filifiliga i le va o le lelei ma le leaga, ina ia mafai ona faagaoioi ai le faitalia. Ae peitai, e tutusa lava foi le taua, o le mataupu faavae e faapea, e ao lava ona i ai le faafeagai ina ia tupu ai le tuputupu ae faaleagaga—po o le, e pei ona ta’ua e tamā Liae, mo le “paia” ina ia i ai (2 Nifae 2:11). Ou te fia faamamafa atu o le malamalama i lenei mataupu faavae—e faapea o le tuputupu ae faaleagaga e manaomia ai mea faafeagai ma faigata—ma o le taliaina foi o lenei mataupu faavae i lo outou matutua [i le taimi nei] o se vaega taua lea i le taliaina ma le fiafia i le olaga. E taua foi i aafiaga o le tuputupu ae ma le atiina ae patino faaletagata lava ia.

E i ai se taimi, o le a tatou oo uma ai i mea faafeagai ma faigata. O nisi o le a oo mai ona o se taunuuga o le i ai iinei i le olaga faitino i se lalolagi agasala. O le vaega masani o tagata ola uma. O na ituaiga faafeagai e tele ni ona tulaga. E ono aofia ai malosiaga o le natura. E ono aofia ai gasegase ma faama’i. (E foliga mai ou te maua lava i le fulū e tusa pe ua uma ona fai o’u tui e puipui mai ai!) E ono oo mai i tulaga o faaosoosoga. Mo nisi o lona uiga o faanaunauga e le taulau. (E fia oo lava lo’u umi i le 6 futu 5 inisi, ae ua ou aoaoina ia ou fiafia i le 5 futu 9  inisi sa tuuina mai ia te a’u—ma le masani o le tuutuu i lalo o le pulelaa i soo se taimi e fai ai sa’u lauga.) E ono oo mai i le tulaga o le tuua toatasi, po o le le atoatoa ma faaletonu faaletino pe faalemafaufau—e toetoe lava a leai se mutaaga o le lisi o malosiaga faafeagai, e faapena foi i faamanuiaga. Ou te mafanafana tele i fetalaiga a le Alii ia Iosefa Samita i le Falepuipui o Liperate i se taimi sa toetoe lava a le mafai ai e Iosefa ona tauaveina ana avega: “Ia e iloa, lo’u atalii e, o nei mea uma e te maua ai le poto masani, ma o le a avea mo ou lelei” (MF&F 122:7).

O nisi taimi e oo mai ai mea faafeagai ma faigata ona o a tatou lava filifiliga e le taialaina. O le le lelei o le ola maloloina po o se manuaga e ono tulai mai i se olaga soonafai, o le ita ma le faanoanoa lea e oo mai mai le solia o tulafono a le Atua, o le faanoanoa lea tatou te lagonaina mulimuli ane pe a tatou le faaaogaina le taimi ma taleni ua tuuina mai ia i tatou—o mea uma e faalagolago i a tatou lava amioga. O se agaga faafetai tele e tatau ona avatu i lo tatou Faaola, e ana le Togiola lea ua saunia ai se ala mo i tatou e faaleleia ai mea uma ua masofasofa.

Ua ou matauina a tatou feagai ma mea faafeagai e masani ona tatou fesili “aisea”—Aisea ua tupu ai ia te au? Aisea ua tupu ai i lenei taimi? Aisea ua tupu ai lenei mea?—i le taimi e tatau ai ona fesili “o le a” le mea e sili atu ona taua. Sa i ai se taimi sa ou auina atu ai se tusi faamafanafana i se ulugalii sa pagatia ona ua tigaina le tamaloa i se gasegase na leai se fofo. O la laua tali sa lotomaualalo: sa laua faitauina faamanuiaga na tuuina mai e le Atua ia i laua i le tele o tausaga o le la mafutaga, ona la mafaufau ai lea ma le faatuatua pe “o le a” le mea sa taumafai le Atua e aoao mai ia i laua i lenei aoaoga faaiu.

E i ai laau i le Vao Paia e ta’u e Uso Parrott o “laau o uiga faaalia.”O laau nei ua faaalia o le faafeagai e mafai ona aoga mo lo tatou manuia ma i lo tatou tulaga aupito maualuga e masani lava ona tele ni mea e tatau ona maua mai ai. O nei laau na tatau ona tali atu ma masani i, ma o nisi taimi e toe manuia mai ituaiga eseese o mea faafeagai po o faigata—le emo o se uila, o se savili malosi oso faafuasei, o se faaputuga mamafa o le kiona po o le aisa, o le solivale ma le faatautala o tagata faatamala, ma o nisi foi taimi o le osofaiga a se laau tuaoi! Mai nei tulaga le manuia ua tutupu mai ai nisi o laau o le togavao e sili ona malolosi ma sili ona mananaia i le vaai. O mea atonu latou te le maua i le matagofie o le tutupu faasasao, ua sili mamao atu ai le mausali ma le moomia.

Mai o’u lava aafiaga o le olaga e mafai ona ou molimau atu o mea faafeagai, faafitauli, ma faigata e fua mai ai uiga lelei ma le tuputupu ae. O nisi o aafiaga e sili ona luitauina ma faigata o lo’u olaga—o lagona o le faatauvaa ma manatu o le tagata ia te ia lava i le taimi o le avea ai o au ma se tagata matua, o la’u misiona i Siamani a o ou talavou, ma le aoaoina o le gagana Siamani, o le mauaina o se tikeri faaloia ma le pasia o le suega i le laulau o loia, o a’u taumafaiga ia avea ma se tane ma se tamā ma ia tuuina atu mea e manaomia faaleagaga ma faaletino mo lo matou aiga o se fanau e toavalu, o le maliliu o o’u matua ma isi o e pele, e oo lava i le natura faalauaitele ma masani ona pisi o la’u auaunaga o se Pulega Aoao (e aofia ai le saunia ma le tuuina atu o lenei tautalaga ia te outou i lenei afiafi)—o nei mea uma ma isi mea e tele, e ui ina luitauina ma faigata, ae ua ou maua ai le poto masani ma sa mo lo’u lava lelei!

Ou te iloa e le o se mea faigofie le ta’u atu ia te outou tagata talavou e faapea, e aoga mo oe sina tiga itiiti, ae o le mea moni lava e aoga. Afai o le a tatou le mauaina “uma mea o loo [i le] Tama” (MF&F 84:38), o le a le tupu pe a le tuuina atu uma i ai mea ua tatou maua. E finagalo lo tatou Tama Faalelagi i atalii ma afafine tautupu e pei ona aoao mai e Liae, e na o faigata ma tofotofoga e mafai ona oo mai ai le paia. O tagata, e pei foi o laau, e manaomia mea faafeagai e ausia ai le fuataga o lo latou foafoaga.

Lesona numera 3: O laau e sili atu le totō i vaomatua, ae le o le ola toatasi.

A e mafaufau i ai, i le natura, o se mea e matua ese lava le vaaia o se laau e tūtū na o ia. Toetoe o taimi uma e faaputuputu ai i togalaau, ma i le aluga o taimi, e avea ai togalaau ma ni vaomatua. Ae peitai, o le Vao Paia, e sili atu nai lo na o se vaega o laau. O se siosiomaga maaleale e aofia ai le tele o ituaiga o laauiti ma meaola. E i ai se fesootaiga manino i ituaiga eseese uma o fugalaau e tutupu a’e lava latou ia, pupuvao, pupulaau, laau, pulouaitu, limu, manufelelei, isumu, lapiti, oti, ma isi lava foafoaga o i ai iina. O nei vaega e galulue faatasi ma faalagolago le tasi i le isi mo meaai, mea e nonofo ai, ma se siosiomaga e galulue faatasi ma fegalegaleai ai lea latou te mafai ai uma ona oo i le taamilosaga o o latou olaga.

O le fuafuaga a le Atua mo o tatou olaga ua matauina ai foi se fesootaiga ma se fegalegaleaiga faapena mo i tatou. E tatau ona tatou galulue faatasi mo o tatou faaolataga, ae le o le fai toatasi. Ua fausia e le Ekalesia ia faletapuai, ae le o ni lua o paa. Ua faatonuina i tatou e auai i se uarota po o se paranesi patino—ae le o le ilo ma filifili a tatou aulotu e pei o nisi o tapuaiga. O lenei aiaiga faavae atamai e manaomia ai lo tatou aoao e galulue faatasi ma le tasi ma le isi ma ia tali atu i lo tatou epikopo po o le peresitene o le paranesi mo a tatou amioga, ae le o le momo’e e lafi pe a tulai mai faafitauli! Ua poloaiina i tatou ia alolofa atu i o tatou tuaoi (lea e aofia ai tagata o o tatou aiga), ma o le aoao e alofa atu ia i latou e sili ona latalata mai ia i tatou e masani ona sili atu le faigata nai lo le alofa mamao atu i le “lalolagi atoa.” Mai le amataga o le Toefuataiga, o le poloaiga lava mo le Au Paia ia “o mai i Siona” ma ia faapotopoto i eria lea e mafai ai ona tatou ola fiafia ma lagolago faatasi ai e le tasi le isi e ala i le faamamaluina o a tatou feagaiga o le papatisoga “ina ia tauave avega a le tasi … e faanoanoa faatasi ma e e faanoanoa … ma faamafanafana atu ia te i latou o e e manaomia le faamafanafanaga” (Mosaea 18:8–9). I le avea ai ma fanau a le Atua, tatou te le toe manuia na o i tatou e pei o se laau e tūtū na o ia. O laau malolosi e manaomia se siosiomaga; o tagata malolosi e manaomia e le tasi le isi.

O le mea e faafetai ai, o i tatou uma lava tatou te faamemelo mo fegalegaleaiga, mo mafutaga, mo uo faatuatuaina. I le avea ai ma nisi o le aiga e faavavau o le Atua, tatou te momoo uma mo le faamalieina ma le saogalemu lea e tuuina mai e mafutaga vavalalata ma tumau. O le a e iloa o le fatuina o mafutaga faapena e alu ai le taimi, taumafaiga, ma se alofa faateleina. E pei ona ta’u mai e Mamona, “o le alofa mama … e le sailia e ia ana lava mea” (Moronae 7:45)—e le o ana lava fuafuaga; e le o ana lava mea e fiafia i ai; ma e mautinoa lava e le o ana lava mea e malie i ai. E ui o le Initoneti ma upega o agafesootai e le masalomia lava le aumaia ai o se ituaiga o fegalegaleaiga, ae e le suitulaga na mea i fesootaiga faamaoni, e le taofiofia, ma faafesaga’i lea e tatau ona tupu ina ia mafai ona faavaeina ai ni mafutaga moni ma tumau.

E moni o le falesu’esu’e muamua ma sili ona lelei mo le aoaoina, o le galulue faatasi ma isi o le aiga. O le aiga tatou te aoao ai lesona o le auauna atu, lē manatu faapito, faamagalo atu, ma le onosai lea e taua i le fausiaina o matufaga tumau ma isi. Ou te manatu ona o le mafuaaga lenei, o se vaega o le avea ma se [tagata] “agavaa mo le malumalu” o se tulaga manaomia ia tatou nonofo i le alofa ma le lotogatasi ma tagata o o tatou aiga.

O le mea e lelei ai, o le faatulagaina musuia o le Ekalesia ua tuuina mai ai foi avanoa ma tulaga e mafai ona tatou alualu ai i luma faaleagafesootai. Mai tausaga a o tatou laiti seia oo ina tatou matutua, tatou te auai i se uarota po o se paranesi ma i ai i tulaga e mafai ona tupu lauolaola ae ai mafutaga ma isi ma le faaagafesootai. I valaauga, fonotaga, vasega, korama, aufono, gaoioiga a le Ekalesia, ma le tele o isi avanoa mo fegalegaleaiga, tatou te atiina ae ai uiga faaalia ma tomai faaagafesootai lea e fesoasoani e saunia ai i tatou mo faatulagaga masani o le a i ai i le lagi. E faatatau i lenei faatulagaga maualuga atu, na fetalai mai ai le Alii e ala mai ia Iosefa Samita e faapea: “Ma o lea lava mafutaga ua i ai ia te i tatou iinei o le a i ai ia te i tatou iina, ae o le a na ona faatasia ma le mamalu e faavavau, o se mamalu e le o ia i tatou i le taimi nei” (MF&F 130:2).

Afai tatou te faamoemoe e olioli i fegalegaleaiga i le lagi ma lona mamalu e i ai faatasi i le olaga a sau, e tatau ona faaauau pea ona faatagata matua a tatou fegalegaleaiga faapea ma le faaleagaga a o tatou i ai iinei i le lalolagi. O tagata, e pei foi o laau, e sili atu ona tuputupu ae i vaega o tagata ae le o le ola taitoatasi na o ia.

Lesona numera 4: O laau e maua mai o latou malosiaga mai niuterene na fatufatuina e tupulaga o laau na muamua atu.

Sa i ai se vaitaimi i le vaaiga o le Vao Paia sa tonu ai ia i latou sa vaaia e tatau ona faia se teuteuga lelei o foliga o le togavao. O galuega faatino mo le autalavou ma faifeautalai sa faatulagaina i nisi o taimi e aveese laau na pauu, ma ogalaau, pupuvao, faapea foi i ogalaau ma laulaau mamago. O lenei faiga, sa le’i umi ae amata ona mouese ai le lauusiusi o le togavao. Sa tuai le tutupu o laau, laiti ni laau fou na tatupu ae, sa amata ona leai nisi o ituaiga o fugalaau ma laauiti e le tau totoina, ma sa faaitiitia le numera o meaola taaloa ma manufelelei.

Ina ua sui Uso Parrott i le vaaiga o le togavao i nai tausaga ua mavae, sa ia fautuaina ai e tuu ai pea le togavao i lona tulaga faalenatura i le mafai e gata ai. Sa tuu ai lava laau ma lalalaau na pauu e pala ai ma fafagaina ai le eleele. Sa tuu ai lava laulaau i le mea na toulu ai. Sa talosagaina tagata asiasi ia tumau i auala sa faailogaina ina ia faaitiitia ai le faalavelaveina o le togavao ma faaitiitia ai le solia o le eleele i totonu o le togavao. Sa na o ni nai tausaga lava, ae amata ona toe foi ma toe faafou e le togavao ia lava i se auala mataina. O le taimi nei ua lauolaola ma lauusiusi i se tulaga e toetoe lava a atoatoa, o ona laauiti lanulauava ma le anoano o meaola ma laauiti o le natura.

O le lesona e ao ona aoaoina mai lenei aafiaga i le puleaina o le vaomatua e pele tele i lo’u loto. Mo le fitu lenei o tausaga o avea pea ma o’u faamanuiaga le galue o se tusitalafaasolopito ma tusitalafaamaumau o le Ekalesia. O se tofiga lenei sa fatuina e le Perofeta o Iosefa Samita e tali atu ai i le faatonuga a le Alii ia te ia i le aso na faavaeina ai le Ekalesia: “Faauta, ia i ai se tala faamaumau e tausia i totonu o outou” (MF&F 21:1). Mai lena aso—na amataina i le tofia o Oliva Kaotui e fai ma uluai tusitalafaasolopito ma tusitalafaamaumau a le Ekalesia ma faaauau mai ai lava seia oo mai i le taimi nei—o tausia ai se faamaumauga matagofie o le talafaasolopito o la tatou Ekalesia. Na suitulaga Ioane Uitimera ia Oliva Kaotui, ma sa faatonuina e le Alii e tausia “se talafaasolopito o mea taua uma … o le a avea mo le lelei o le ekalesia, mo tupulaga faia’e o le a tutupu mai i luga o le laueleele o Siona” (MF&F 69:3, 8).

Aisea e taua ai le tausia o faamaumauga ma le aoina mai, faasaosaoina, ma le faasoaina atu o talafaasolopito o le Ekalesia a Iesu Keriso? Aisea e taua ai ia te oe o se vaega o le “tupulaga faia’e” ina ia magafagafa ma faamalolosia mai tupulaga ua mavae?

O le tali, ou te fautuaina e le mafai ona [tatou] ola atoatoa i le taimi nei—e sili atu foi le itiiti o le fuafua mo o tatou taunuuga i le lumanai—e aunoa ma le faavae o le taimi ua tuanai. O lenei upumoni sa tuu faamalosi mai i lo’u mafaufau i ni masina ua mavae i le feiloai ai ma se ulugalii lelei o e sa oo i se tofotofoga na sili ona ese lea o le a ou faasoaina atu ina ua la faatagaina mai. I le mavae ai o ni nai tausaga talu ona faaipoipo ma le fananau mai o nisi o le fanau, sa aafia ai le faletua i se faalavelave tuga. Sa nofo ai i le falemai mo ni nai vaiaso i se tulaga sa ia le iloaina se tagata. Ina ua te’i mai, sa mafatia o ia i le leai atoa o se mea na ia toe manatuaina! O le taunuuga sa leai sona talaaga. O le aunoa ma se mea e manatua mai lona olaga ua te’a, sa leai ai se tagata na te iloaina. Na te le’i iloa lona toalua, lana fanau, po o ona matua! A o faamatala mai e le tamaloa le tala lenei ia te a’u, sa ia faailoa mai o na masina popofou o le tuanai ai o le faalavelave, sa popole o ia ina ne’i savali solo lona toalua pe a tuu na o ia. Sa popole foi o ia ina nei le toe alofa lona toalua ia te ia. I le vaitaimi o lana aumoega, sa avea o ia ma se alii talavou umī ma tino lelei ma se ulu na tumu i lauulu. O le taimi nei, ua faamatuātagata, ua fai si lapoa, ma ua matua tau leai ni ona lauulu!

O le mea na laki ai i latou uma na aafia ai, o le mea sili, sa i ai se vaega o faamaumauga sa tausia. Sa teuina e le tamaloa ia tusi sa tusia e lona toalua a o le’i alu ma i le taimi o lana misiona. O nei mea sa maua ai le faamaoniga e moni lava sa alofa faamama’i le tasi i le isi. Sa ia tausia foi se api o talaaga sa i ai ni tusiga sa fesoasoani foi. I le aluga o ni tausaga, sa faifaimalie lava le toefuatai mai o le olaga ua mavae o le tina e ala i le faasoaina atu o lena talafaasolopito na tausia e e pele ia te ia.

O lenei mea tulaga ese ma faamomoiloto ua faaalia lelei ai le taua o le fesootaiga o le taimi ua tuanai ma le taimi lenei ma le lumanai. E fesoasoani tatou te atili talisapaia atoatoa ai le faauigaga a le Alii o le upumoni e pei ona faaalia ia Iosefa Samita: “O le upumoni o le iloa lea o mea e pei ona i ai, ma e pei ona sa i ai, ma e pei ona o le a oo mai” (MF&F 93:24). O le iloa ua tatou maua e uiga i lo tatou olaga i aso ua tuanai ona o faamaumauga sa tausia ma e uiga i lo tatou lumanai ona o tusitusiga paia ma aoaoga faaperofeta a perofeta soifua e tuuina mai ai ia i tatou le anotusi lea e mafai ai ona faaaoga o tatou faitalia i lo tatou olaga i le taimi nei. O le taunuuga, o lenei iloa e aumaia ai ia i tatou se vaaiga manino tele faaleatua ina ia tatou latalata atili atu ai i Lona gafatia ia i ai “mea uma … i luma o [Ona] fofoga” (MF&F 38:2).

I le avea ai ma tagata o le Ekalesia i le tele o atunuu, e tutusa lava le talafaasolopito o le Ekalesia anamua ua tatou maua. E taua mo i tatou uma ona iloa lelei le talafaasolopito o la tatou Ekalesia, ae maise lava o le mea o le a ou ta’ua o ona “tala faavae.” O nei tala—Uluai Faaaliga a Iosefa Samita, o le oo mai o le Tusi a Mamona, asiasiga faaagelu a Ioane le Papatiso, Peteru, Iakopo ma Ioane, Elia, Elaia, ma isi—o loo i ai upumoni autu lea e faavae ai le Toefuataiga o le talalelei.

O le mea e faanoanoa ai, i lenei tupulaga o tekinolosi lea ua anoanoa’i ai faamatalaga—o nisi o ia faamatalaga e faitioina ai mea na tutupu ma tagata i le talafaasolopito o le Ekalesia—o nisi Au Paia o Aso e Gata Ai ua maluelue o latou faatuatua ma amata ai ona fesiligia talitonuga ua loa ona i ai. I na tagata le mautonu, e faailoa atu lo’u alofa ma le agaga malamalama ma le faamautinoa afai latou te tumau pea i mataupu faavae o le talalelei ma faaauau ma le agaga tatalo a latou suesuega o talafaasolopito o le Ekalesia—ia matuai suesue ina ia maua ai se malamalamaaga tele nai lo na o se fasi malamalama po o le malamalama e le atoatoa—o le a faamautu e le Agaga Paia o latou faatuatua i mea taua na tutupu i le talafaasolopito o le Ekalesia e ala i le musuia atu o le filemu i o latou mafaufau. O lenei auala e mafai ai ona latou maua le to’a i a latou tautinoga e uiga i le talafaasolopito o le Ekalesia toefuataiina ma lē toe “feaveaiina i matagi uma lava o mataupu” (Efeso 4:14). Ua ou faavaeina le ala o lo’u olaga atoa i na ituaiga lagona o le toafilemu e uiga i le Uluai Faaaliga i a Iosefa Samita ma isi mea na tutupu e faatatau i le talalelei toefuataiina, e pei foi ona faia e le toatele o outou, ma ou te iloa o le a tatou le faanoanoa lava.

O le talafaasolopito i lona tulaga e sili ona faigofie, o se faamaumauga o tagata ma o latou olaga ma mai na olaga e maua mai ai tala ma lesona e mafai ona lagolagoina ai mea ua tatou talitonu i ai, mea tatou te tutu atu ai, ma mea e tatau ona tatou faia pe a fetaiai ma le fili. E le o tala uma ua maua ai lo tatou talafaasolopito e iloga o latou natura e pei o le Uluai Faaaliga i a Iosefa Samita po o le misiona a Uilifoti Uitilafi i Egelani. O le mea moni, o nisi o tala mataina moni e maua mai olaga o tagata e sili ona le taualoa o le Au Paia o Aso e Gata Ai, lea e i ai le toatele o tatou. E faapitoa lava le pele ma e aoga ia i tatou pe a o ia tala e aafia ai o tatou lava tuaa.

Mo se faataitaiga, i le vaitau o le 1920 o lo’u tamamatua ma tinamatua Jensen—e ui ina sa galulue i le tele o itula—sa faamalosi e toe faafoi atu i le tagata na faatauina atu se faatoaga sa laua faatauina ma sa nonofo ai foi i le setete o Idaho. Sa la mananao e toe foi atu ma le la fanau laiti i lo latou nuu moni i Iuta ae sa le mafai ona la tuua Idaho seiiloga e uma ona totogi le aitalafu e $350. E foliga mai o se aofaiga laitiiti lea i lenei vaitau, ae sa o se aofaiga telē naua i na aso. Sa taumafai tamamatua e nono mai ni tupe mai tagata sa i ai a latou tupe, ae sa le’i faamanuiaina. Sa le mafai foi ona nono mai i le faletupe ona o lo la tulaga pagatia. Sa tatalo i laua ma Tinamatua i aso uma mo se fesoasoani. I le taeao o se tasi o Aso Sa i le sauniga perisitua, sa alu atu ai se tagata sa le masani lelei i ai Tamamatua ma fai atu ia te ia sa faalogo i ona faafitauli ma o le a ia nono atu ia Tamamatua le $350 ma le faamoemoe a taunuu atu Tamamatua i Iuta, o le a ia toe totogiina mai le tupe a le tamaloa i se vave na te mafaia. Sa faamaeaina le la maliega i le lululima ma sa tausisia lava e Tamamatua lana folafolaga.

O lenei tala faatauvaa sa tusia e lo’u tinamatua Jensen, o se oa faaleaiga. E musuia ai a’u i uiga faaalia o le galue malosi, faamaoni, faatoilaloina o faigata, lotogatasi faaleaiga, ma le mea e sili ona taua, ua faaalia ai le aao o le Atua i olaga o o’u matua matutua faamaoni. Ou te maua ai le malosi tele ma faamalosiauga mai a laua faataitaiga ma mai faataitaiga a isi, o tagata iloga ma tagata le taualoa, o augatupulaga ua mavae.

Atonu tou te maua ni tala faapena i o outou lava atunuu ma totonu o o outou lava aiga. Afai o i ai, ou te uunaia outou e ao mai na tala, ia faasaosao, ma ia faasoa atu na tala. Ia nofouta e tuufaasolo atu mai lea augatupulaga i le isi. O la’u fanau (ma o le taimi nei ua matele lava o fanau a la’u fanau) e fiafia lava i taimi uma ou te faamatala ai ia i latou ni tala e uiga “i aso a o o’u laitiiti”! Ua ou faalogo o faapea, o se nuu e le mafai ona maoae atu nai lo o ona tala, ma ou te talitonu foi e tutusa lava le moni i aiga. O tala lelei—pe a fai e moni—e avea o ni talafaasolopito lelei. Ia manatua, o tagata, e pei foi o laau, e maua mai le malosiaga mai niuterene na fatufatuina e augatupulaga na muamua atu.

Faaiuga

O lea la, o le faaiuga, ou te manao tatou te toe foi atu i le Vao Paia ma tatou tutu faatasi ai iina i talaane o se tasi o laau ua ta’ua o “laau molimau.” O laau nei sa ola i le togavao i le 192 tausaga ua mavae i le taimi o le Uluai Faaaliga i a Iosefa Samita. E tolu ia laau o loo ola pea i le togalaau ma laau molimau e tolu ua pepē o loo tutu pea e ala i le taumafaiga atamai a Uso Parrott e faasao ai.

A o ma faamisiona e latalata i Palamaira, sa i ai taimi sa masani ai ona ou alu na o a’u i le Vao Paia ma ou tu ai ma le migao i talaane o le laau molimau e sili ona ou fiafia i ai. Sa masani ona ou vaai faalemafaufau e faapea, ana mafai ona tautala lena laau, na te tauina mai ia te au le mea sa ia molimauina i lena aso o le tautotogo i le 1820. Ae sa tau le manaomia lava ona ta’u mai e lena laau ia te a’u—ua uma ona ou iloa. E ala i aafiaga ma lagona faaleagaga mai lava i lo’u talavou seia oo mai i lenei taimi, ua ou iloa, e tutoatasi lava mai se isi tagata, o loo soifua le Atua, lo tatou Tama. Ua ou iloa foi, o Lona Alo o Iesu Keriso o le Faaola ma le Togiola o tagata uma. Ua ou iloa o nei Tamalii faamamaluina e toalua sa faaali mai ia Iosefa Samita i le Vao Paia i le tautotogo o le 1820. Sa Laua faatuina ae Iosefa o le uluai perofeta o lenei, tisipenisione faaiu o le talalelei. O le galue ai i lalo o la Laua taitaiga faalelagi, sa faaliliuina ai e Iosefa le Tusi a Mamona, maua mai ki ma le pule o le perisitua, ma toe faavaeina le Ekalesia a Keriso i nei aso e gata ai. Ua matuai faamanuiaina i tatou e ola i lenei taimi ma avea ma tagata o le Ekalesia a Keriso.

O nei upumoni matagofie, ua ou molimau atu ai, na amata mai i le Vao Paia. A o faafoliga ona tatou tutu faatasi i le Vao Paia i le po nei, ia outou tutu i taimi uma i o outou mafaufau ma i o outou loto i lena nofoaga paia ma ola faamaoni i upumoni na amata faaali mai e le Atua iina.

Ia manatua foi ia lesona o le olaga ua aoao mai e le Vao Paia:

  1. 1.

    A taumafai le mana o le pogisa e faataumaoi oe—e pei ona latou taumafai ai foi i le taulealea fiailoa o Iosefa Samita, ia tu i le Vao Paia ma manatua le malamalama faaniutu, “ua sili atu le pupula i le la” (tagai i le Iosefa Samita—Talafaasolopito 1:15--17).

  2. 2.

    A osofaia e mea faafeagai ma le fili lou ala ma tau leai ai sou faamoemoe, ia tu i le Vao Paia ma manatua “o nei mea uma e te maua ai le poto masani, ma o le a avea mo ou lelei” (MF&F 122:7).

  3. 3.

    Afai o lau vaega le tuuatoatasi ma le faaesea, ma e tauivi e faatuina ni mafutaga faamalieina ma tagata, tu i le vao ma tagata o le Au Paia o Aso e Gata Ai o e ua osifeagaiga e fesoasoani e tauave au avega ma faamafanafana oe pe a e manaomia.

  4. 4.

    Ma pe a luitauina lou faatuatua e aafiaga po o tagata po o upumoni feteenai ma afua ai le masalosalo e uiga i le Toefuataiga o le talalelei a Iesu Keriso, ia tu i le Vao Paia ma ia maua mai le malosiaga ma faamalosiauga mai augatupulaga o le Au Paia o Aso e Gata Ai faamaoni o e na tutu mausali iina, na muamua atu ia te oe.

O la’u tatalo lenei mo outou, au uo talavou e, ma ou te faia ai ma le alofa ma i le suafa o Iesu Keriso, amene.

© 2012 Puletaofia e le Intellectual Reserve, Inc. Ua taofia aia tatau uma. Faamaonia le faa-Peretania: 5/12. Faamaonia le faaliliuga: 5/12. Faaliliuga o le Stand in the Sacred Grove.Samoan. PD50039048 890

Show References

    Faamatalaga

  1.  

    1.  Viiga, nu. 26.

  2.  

    2. Tagai i le Bibke Dictionary, “Atonement”; tagai foi i le Taiala i Tusitusiga Paia, “Togiolaina, Togiola,” scripture.lds.org.