Wōn Kwe, Kōm̧m̧ane Ilo Jejjet, Ijo Kuņaam: Jab Kōņak Māj ko Me ej Ņooj Kadkad eo Ami

Quentin L. Cook

Jen Doulul eo an Jon̄oulruo Rijilōk ro

Nokon in Jota an CES n̄an Rūm̧m̧an Ded ro • M̧aaj 4, 2012 • Brigham Young University–Idaho


Quentin L. Cook

Ij lem̧ōņōņō ilo iien in em̧m̧an n̄an kōnono n̄an kom rūm̧m̧an ded ro. Ij bōk waj n̄an kom̧ iakwe im naan in iak iakwe ko jān Būreejtōnji eo Kein Kajuon im Doulul eo an Jon̄oulruo eo. Eļap an kaitoktok limo n̄an pād ijin ilo BYU–Idaho jikin kweilo̧k in eļap. Imaron̄ pijaik ļo̧k kom̧ ilo elōn̄ jikin ko aolepen laļ in.

Ke Iaar dettami wōt, Būreejtōn David  O. McKay eaar rikanaan eo. Būreejtōn McKay eaar jerbal āinwōt Būreejtōn eo an Kabun̄ in jān 1951 m̧ae 1970 eo, eaar iiō eo Iaar tōpar 30. Iien otemjej ewōr juon men eo ekanooj aorōk kōn rikanaan eo me ej jerbal n̄e kom̧ij juon rūm̧m̧an ded. Iaar iakwe im nōbar Būreejtōn McKay. Ekkein kwaļo̧k juon bwebwenato em̧ool me eaar waļo̧k ke eaar juon mijenede jerbal ilo Scotland. Eaar en̄jake an oon̄ ālkin an kar pād ilo mijen eo ium̧win juon iien eo ekadu im kar joļo̧k jet awa ko waate mejān ilo juon em̧ ļapļap epaak. Ke e im eo m̧ōttan raar ro̧o̧l jān aer loļo̧k Em̧ ļapļap eo, raar eļļā jān juon em̧ ijo me eaar wōr juon dekā ilōn̄ in kōjām eo kar je naan ko an juon kout ekkā kar kile an Shapespeare eo ej riit: Wōn Kwe, Kōm̧m̧ane Ilo Jejjet Ijo Kuņam̧.

Keememej en̄jake in ilo juon kōnono waļo̧k ilo 1957, Būreejtōn McKay eaar kōmeļeļeik: “Iaar ba n̄an n̄a make ak Jetōb eo ilowaaō, ‘Kom̧ij juon membōr an Kabun̄ eo an Jisōs Kraist im Armej ro Rekwojarjar ilo Raan–ko Āliktata. Eļap ļo̧k jen menin, kom̧ij pād ijin āinwōt juon ripenejjenkwan Irooj Jisōs Kraist. Kwaar errā kōn eddo in āinwōt juon ripenejjenkwan an Kabun̄ in.’ Innām Iaar ļōmņak [kōn] ta eo jaar kōm̧m̧an menin joten eo juon. Jaar alooje jikin ko rem̧m̧an, bōk kōmeļeļe im meļeļe ko jen bwebwenato, menin em̧ool, im eaar lokjenaō kake. … Mekarta, menin ekar jab jerbal in mijenede. … Iaar errā kōn ennaan eo letok n̄an eō ioon dōkā eo, im jān iien eo kōm̧ ar kajjieon̄ kōm̧m̧ane ijo koņaam̧ āinwōt mijenede ro ilo Scotland.”1

Ennaan in Wōn Kwe, Kōm̧m̧ane ilo Jejjet Ijo Kuņam̧—eaar lukkuun aorōk im eaar ļap kilaan ioon Elder McKay jon̄an eaar kōjerbal e n̄an im̧we ilo aolepen mour eo an. Eaar kālet bwe jabdewōt eddo eo ippān, enaaj kar kōm̧m̧ane kōn ijo em̧m̧an tata ippān.

Ke Elder David  B. Haight eaar juon mijen būreejtōn ilo Scotland, eaar pukōt naan ko ilo dekā eo jino in tata im kar kōm̧m̧ane kape in, eo ej rainin ilo jikin kaminene eo an mijenede ilo Provo, Utah. Elōn̄ iaami em̧ōj an lo kout eo im kar kejōkļo̧kjeņ kōn aorōk eo an ennaan eo. Elder Russell  M. Nelson eaar bar kapen ļo̧k ennaan in ejjab to ilo 50th iiō rūtto in Jikin Kaminene eo an Mijenede ilo Provo.

Ilo aō kejōkļo̧kjeņ kōn wōn kom̧, en̄jake eo eaar itok ioō bwe kom̧ maron̄ jab lukkuun kam̧oolol kōn aorōk eo an epepen eo ami. Jukjuk in pād ilo tudepakpak in eaar letok jon̄ak ko n̄an elōn̄ epepen ko me rej mour rainin. Eo erūtto tata ilubwilijid ilo United States im laļ ko jet em̧ōj kar kōkaļļeik “Epepen eo Eļap tata” kōnke ta eo raar dipuki ilo An̄an Ean̄ Eo Eļap an laļ in ilo 1930 ko innām tōprak eo ilo Pata eo an Laļ in  II im tōprak eo ilo kalōk juon laļ em̧m̧an ļo̧k. Jet iaan Ritōl ro eto aer pād an Kabun̄ in raar bōk kuņaer ilo m̧akūtkūt kein. Būreejtōn Thomas S. Monson eaar pād ilo United States Navy; Būreejtōn Boyd K. Packer eaar jerbal ilo United States Air Force eo; Elder L. Tom Perry eaar juon United States Marine. Inaaj kwaļo̧k ippāmi tok ālik jet iaan en̄jake ko ewōr ippāer im katak ko raar katak im katakin.

Epepen eo ami, kar ļotak ilo 1980 ko im ilo jino in n̄an lukōļpān 1990 ko, ej kiiō kōnono kake āinwōt “Epepen an Meļenniem̧.” Jet rikōm̧m̧an bwebwenato rej pere kōn ta eo epepen eo ami enaaj kadedeļo̧k. Ij tōmak ewōr ippāmi jeļā eo im pedped eo n̄an erom epepen eo em̧m̧an tata, eļap tata ilo koonm̧aanļo̧k karōk eo an Jemed ilo Lan̄.

Etke Ij ba menin ? Epepen eo ami eļapļo̧k aer tokje katak eo an jemenere im institute jān epepen ko im̧aan ļo̧k, im ewōr ippāmi kaminene eo em̧m̧an tata jān jabdewōt epepen jān Būraimere, priesthood im Doulul eo an Jiron̄ ro. Ilo kakobaba, epaake ļo̧k 375,000 iaami em̧ōj an kar jerbal ak rej jerbal āinwōt mijenede ro. Kom̧j jutak ilo etan elōn̄ ļo̧k juon m̧ōttan jilu in aolep mijenede ro me raar jerbal ilo epepen in. Samuel Smith, mijenede eo jino in tata ilo epepen in, kar kapiti juon elder im kōjeno̧lo̧k e āinwōt juon mijenede ilo Eprōļ 6, 1830, raan eo Kabun̄ in eaar ejaak. N̄e kom̧ij kalimjōkļo̧k aolep mijenede ro me raar jerbal jān jino in, ekabwilōn̄lōn̄ bwe juon m̧ōttan jilu eaar pād ilo iiō ko ami. Kōn keidi, 76,000 wōt mijenede ro, ak dik ļo̧k jān 8 bōjāān, raar jerbal ilo 12 iiō ko ke Iaar 18 n̄an 30 iiō detta. N̄an kom̧ ro me rejjan̄in bōk iien eo em̧m̧an n̄an jerbale juon mijen, ijo kuņami, mekarta, maron̄ in aorōk. Enan̄in jimettan Būreejtōnji eo Kein Kajuon im Jon̄oulruo eo kar jab wōr aer iien em̧m̧an n̄an jerbale juon mijen.

Joļo̧k Anōk Piktok in Kōn Kōņak Juon Māj

Ļōmņak kōn maron̄ ko rellōn̄ n̄an em̧m̧an eo me ewōr ippāmi, ta n̄ūrbōktak ko aō kōn tok ālik eo ami? Ta kapilōk eo Ij lewaj n̄an kom̧? M̧oktata, enaaj wōr juon kajoor eļap ilo kom̧ kajjojo n̄an anōk piktok in—em̧ool kōņak juon māj—im erom juon eo me ejjab lukkuun kejōkļo̧kjeņ kōn wōn kom̧ ak wōn eo kokōņaan erom.

Jōm̧m̧ar eo ļo̧k Elder L.  Tom Perry im n̄a, ippam̧ tok Michael Otterson,2 ilo jerbal ko am ilo public affairs, kar kweilo̧k ippān Abraham Foxman ilo opiij eo an ilo New York. Mr. Foxman ej juon national director an Anit-Defamation League. Jibadbad eo an ej kabōjrak kakkure armej in Riju ro. Em̧ōj de an bōk kuņaan ilo jerbal in enan̄in de 40 iiō. Bwebwenato in mour eo an me eaar tōl e n̄an jerbal in elukkuun in kaitoktok limo. Eaar ļotak ilo jino in Pata eo an Laļ in  II. Ro jinen im jemen, Joseph im Helen Foxman, kar jujel m̧ae kean̄ eo ņae Riju ro, kar bōkļo̧k Abraham n̄an juon Ripolish juon leddik rijerbal in Catholic m̧okta wōt aer kar deļo̧n̄ e juon ghetto an Riju ilo Vilna, Lithuania, ilo Jeptōm̧ba, 1941. Abraham eaar 13 allōn̄ rūtto̧o̧n. Ro jinen im jemen raar deeor ilo pata eo im Holocaust eo bōtaab raar jab bar koba ippān Abraham m̧ae iien eo eaar emen iiō dettan. Kar ļōmņake bwe 1.5 milieņ ajri in Riju ro raar jorrāān ilo kijeek eo ilo Nazi. Abraham kar kejparok e jān leddik in Catholic eo, eo eaar bōk e n̄an jar aolep Jabōt im ņooj ke ej Riju.3 Ejjab menin bwilōn̄ bwe Abraham Foxman eaar wujlepļo̧k mour eo an n̄an tariņaeik anit-Semitism, matōrtōr, dike kōn kūl, im kalijōkļo̧k.

Em̧ōj aō kar jerbal ippān Mr. Foxman elōn̄ kōttan m̧okta ļo̧k im nōbar peran im kije eo an. Ilo kweilo̧k eo am ippān ilo New York, Iaar kajjitōk ippān ta kapilōk eo ekōņaan ba n̄a kōm ekkeijel ļo̧k ippān eddo ko am ilo public affairs n̄an Kabun̄ in. Eaar kejōkļo̧kjeņ ium̧win jidik iien innām eaar kōmeļeļeik aorōk eo an kōketak armej n̄an jab kōjakilkōle er. Eaar kōmeļeļeik kōn Ku Klux Klan. Eaar juon doulul me eaar lukkuun in kajoor im bwe an kaamijak n̄an elōn̄ Riamedka ro ilo m̧ōttan eo im̧aan an epeppen eo ļo̧k. kōn to ko reier wōt juon im māj ko me kar kōm̧m̧an bwe en ped kile ro rej bōk kuņaer, raar tūli debwāāl ko ilo ujooj ko an ro rej jibadōk er im kile er make āinwōt ba rijum̧ae nana. Ilubwilijin ro raar jibadōk er ekkā wōt Rikilmej ro, bōtaab Catholic ro, Riju ro, im rilikin ro barāinwōt. Ro eļap ļo̧k aer rikakkure iaer raar bōk kuņaer ilo den̄den̄, kakkure ilo ānbwiin, im aaet m̧ōrō. Mr. Foxman eaar kalikkar bwe ro eiet uwaer an Ku Klux Klan maron̄ in kar brown-shirted rikowadon̄ ro ilo tōl eo ilo 1930 ko lo Europe bōtaab ro elōn̄ uwaer, kōn ejjeļo̧k māj ko, raar armej ro ekoba ripejnej ro im rijar ro. Eaar kakememej bwe ņooj kadkadier im kōņake juon māj ekōmaron̄ er n̄an bōk kuņaer ilo m̧akūtkūt ko me remaron̄ in kar kabōjraki.4 M̧wilier eļap an nana ilo jukjuk in pād an Riamedka.

Kapilōk eo an Mr. Foxman eaar n̄an kalikkar aorōk in an armej kabōjrak kōjerbal māj ko me ej ņooj lukkuun kadkadier.

Ilo bwebwenato eo ad an Kabun̄ in m̧oktata, Rikanaan Joseph, Emma, im bo ro nejier 11 aer allōn̄ Joseph im Julia raar pād ilo Hiram, Ohio, ilo Jikin Kallib eo an Johnson. Ajri ro jim̧or raar en̄taan jān mijeļ ko. Joseph im ļaddik eo edik nejin raar kiki ioon juon peed ewōr neen iturin kōjām eo im̧aan.

Būratōr Mark L. Staker eaar kememej ta eo eaar waļo̧k:

Ilo bon̄ juon kumi in em̧m̧aan ro em̧ōj uno kilmeje turin mejāer raar rupe kōjām eo im iper nam̧ōj ļo̧k Rikanaan eo ijo raar m̧an e im ir kilin im Sidney Rigdon kōn tar.

“Ke Emma eaar lo aer kar m̧ane Joseph im ir kilin kon tar, eaar m̧ōjņo. …

“…  Men̄e Rikanaan eo eaar tūm̧ juon n̄iin, kanooj jorrāān ikōjaan, tūm koļan bōrān, im wōr kinjen bwil in nitric acid, eaar kwaļo̧k juon katak ilo iien kabun̄-jar eo ilo Jabōt āinwōt m̧okta ļo̧k. Ilubwilijin Armej ro Rekwojarjar raar koba ļo̧k eaar wōr emen uwaan mob ro.”5

M̧ōttan eo enana tata an jorrāān eo eaar Joseph eo edik eaar ioon kōto bon̄ōn eo ke jemen kar iper nam̧ōj ļo̧k im kar lukkuun nan̄inmej im āinwōt juon tōprak eaar mej jet raan to ālik.

Ebarāinwōt kalimolimo bwe ro me raar bōk kuņaer ilo m̧an Rikanaan Joseph im eo jein Hyrum kar unoik turin mājer ilo juon jerbal eo n̄an katilekek e lukkuun kadkadier.6 Ro me raar ņooj kadkad eo aer kōn ekkōņak mej im deļo̧n̄e jerbal ko renana retiņņo rej jān n̄ūrbōk jab in. Jej katak ilo Bok in Mormon bwe Lucifer, “pukōj ro nejin armej n̄an kōnājnej ittino ko in uror im jerbal ko rettino an marok” (2 Nipai 9:9; bar lale 3 Nipai 6:27–30).

Kiiō, Ijjab ba bwe jabdewōt iaami en koba ļo̧k ilo kain m̧akūtkūt rōt kein renana Iaar baj kōmeļeļeik. Ij tōmak, ilo tōre in ad, n̄e jab kwaļo̧k etan epidodo ļo̧k jān m̧okta, bwe ewōr pedped ko raorōk koba ļo̧k ie ilo jab kōņaki juon māj im “m̧ool n̄an tōmak eo … me rien̄taan ro raar jako ļo̧k ie.”7

Juon iaan kattōrak ko rem̧m̧an tata ņae kōm̧m̧ani jokālet ko renana ej n̄an jab likūt jabdewōt māj an kattino. Eļan̄n̄e kwoj lo am make kōņaan kōm̧m̧an āindein, jouj im jeļā ej juon kōkaļļe enana an kauwōtata im juon iaan kein jerbal ko an rijum̧ae eo n̄an kōm̧m̧an bwe kwon kōm̧m̧ane juon men kwojjab aikuj in kar kōm̧m̧ane. Juon iaan un ko jej rōjan̄ mijenede ro n̄an kōkarbōb aer nuknuk im elder ro n̄an reja ej bwe enaaj ejjeļo̧k kajjitōk āinwōt won er im ekōjkan aer aikuj m̧akūtkūt. Jet renaaj kajjitōk: Ej ke baj itulik in wōt? Ijjab ļōmņak āindein. Ļōmņak kōn ekōjkan an nuknuk im kainōknōk kar kōmeļeļeik ilo Bok in Mormon jān rikanaan Moronai, eo eaar keidi utiej bōro ippān kōņak “nuknuk ko rekanooj karbōb.” Eaar kobaik utiej bōro ej waļok kōn kōņak “nuknuk ko rekanooj karbōb” kōn “ iakwāālel ko, kōmmetak, im matōrtōr ko, im aolep wāween nana otemjeļo̧k” (Mormon 8:36). Eļap tata aō n̄ūrbōktak bwe ilo tōre in ad wāween ad nuknuk im kainōknōk maron̄ juon kōkaļļe in jum̧ae ak jabwe wujlepļo̧k n̄an jon̄ak ko an mour, im kakkure ilo nana jon̄ak ko an mour in an ro jet.

Jerbal Ekkar n̄an Tōmak ko Am̧ Rem̧ool

Kapilōk eo kein karuo Ij lewaj ej: Jerbal ekkar n̄an tōmak ko am̧ rem̧ool kōn joļo̧k ami iien ilo men ko me renaaj kalōk im kōļapļo̧k piktok eo ami im jipan̄ kom̧ erom ļo̧k āinwōt Kraist. Ij kōjatdikdik ejjeļo̧k iami ej lo mour āinwōt eaorōk tata “limo im ikkure ko bōtaab ijello̧kināinwōt juon iien “n̄an m̧aanjabpopo n̄an ioon Anij” (Alma 34:32).

Juon waanjon̄ak em̧m̧an kōn jerbale ijo kuņam̧ im kōjerbal iien eo ilo jejjet kar kwaļo̧k jān juon iien ilo mour eo an Elder L.  Tom Perry ke eaar, āinwōt juon Marine, eaar m̧ōttan ilo an kar United States kiel ilo Japan ilo jem̧ļo̧k in Pata eo an Laļ in  II. Elder Perry eaar kwaļo̧k bwebwenato in ke eaar rekoote kam̧ool eo an ejeno̧lo̧k kōn Rilo̧mo̧o̧r eo, me ej waļo̧k ilo visitor’s center ko:

Bwebwenato eo an Elder Perry

“Ewōr juon en̄jake ilo mour e aō me ekkar an kar kakememej eō kōn lan̄lōn̄ eo ej itok jān kajjitōk kajjitōk eo ‘Ta eo Rilo̧mo̧o̧r eo enaaj kar kōm̧m̧ane ilo jekjek in?’

“Iaar ilubwilijin Marine ro im̧aan tata n̄an etal n̄an m̧aļo in Japan ālkin jaini peba in koņ in aenōm̧m̧an eo ālkin Pata eo an Laļ in Kein II. Ke kōm kar deļo̧n̄ e ļo̧k jikin kweilo̧k eo an Nagasaki ejorrāān, eaar juon iaan en̄jake ko rōkabūrom̧ōjm̧ōj an mour eo a.Juon m̧ōttan eo eļap an jikin kweilo̧k eo eaar lukkuun in jorrāān. Jet iaan mej rimej ro raar jan̄in kar kalbwin er. Āinwōt jerbal an ritariņae ro, kōm̧ kar kajutak headquarter ko im ilo̧k in jerbal.

“Jekjek eo eaar lukkuun in nana, im jet iaam kar kōņaan leļok eļapļo̧k. Kōm kar ilo̧k n̄an rūkaki eo am ilo ra ko am im kajjitōk mālim n̄an jipan̄ bar kalōk im̧ōn jar ko an Rikūrijin ro. Kōnke kōn mo ko an kien ilo tōre in pata eo, kabun̄ kein raar nan̄in jako aer jerbal. M̧ōko aer raar lukkuun jorrāān. Juon am kumi in baļintier n̄an kōkāāl im bar kōmetali im̧ōn jar kein ilo tōre ko kōmij jab jerbal bwe ren maron̄ in peļļo̧k n̄an kōm̧m̧ani iien jar ko an Rikūrijin ro.

“Kōm kar jab jeļā kajin eo. Men eo de eo kōm maron̄ kōtōprake eaar jerbal in kōkāāl m̧ōko. Kōm kar lo rikwaļo̧k ro me rejjab maron̄ jerbal ilo iiō in pata eo im kar kōketak er n̄an bar ro̧o̧l n̄an lokatok ko. Eaar wōr am iien em̧m̧an ippān armej rein ilo aer bar juon alen en̄jake anemkwoj n̄an kōjerbal tōmak ko aer ilo Kraist.

“Juon iien eaar waļo̧k ilo am kar em̧m̧akūt jān Nagasaki n̄an jepļaaktok n̄an ijo jikūm me Inaaj iien otemjej kememej. Kōm kar iuwe ļok ilo tūrein eo me enaaj kar bōk ļo̧k kōm n̄an tim̧a ko waam n̄an jepļaaktok n̄an jikūm, kōm kar kōm̧man kōj kōn kōm jān elōn̄ Marine ro jet. Eaar pād ippāer leddik ro jeraer rej iak-iakweik doon. Raar ettōn̄ kōn kōm im kwaļo̧k bwe kōm kar likjab jān m̧ōņōņō eo ilo Japan. Kōm kar jerwane iien eo am ilo am jerbal im kōmetali wo̧o̧ļ ko.

“Ilo aet itok limoier ilo kōjak ko aer, iturin ļo̧k jikin tūrein eo kar itok enan̄in 200 Kūrijin in Ri-Japan ro rem̧m̧an jān kabun̄ ko kōm kar kōkāāli, al ‘Onward, Chirstian Soldiers.’ Raar itok im letok am menin letok. Innām raar aolep ļain itōrerein iaļ in tūrein eo. Im ke tūrein eo eaar em̧m̧akūt ļo̧k, kōm kar alimōmō nam̧ōjļo̧k im jibwe add in peier ke kōmij em̧m̧akūt. Kōm kar jab maron̄ ekōnono; en̄jake ko am raar kanooj kajoor. Bōtaab kōm kar kam̧oolol bwe kōm maron̄ kar jipan̄ ilo jet wāween reddik ilo bar kajutak Kūrijin ilo juon laļ ālkin pata eo.

“Ijeļā bwe Anij emour. Ijeļā bwe jej aolep ajri ro nejin im E ej iakwe kōj. Ijeļā bwe E eaar jilkintok Nejin n̄an laļ in n̄an en̄taan kōn aolep armej. Im ro me rej kaorōk ko̧jpeļ eo An im ļoor E naaj lem̧ōņōņō kōn mour indeeo, menin letok eo eļap tata an Anij. Ijeļā bwe E eaar tōl Jepļaaktok eo an ko̧jpeļ eo bar juon alen ioon laļ in kōn jerbal in kwaļo̧k eo an Rikanaan Joseph Smith. Ijeļā bwe lan̄lōn̄ im m̧ōņōņō eo eto kitien jenaaj loe ilo mour in enaaj itok kōn ļoor Rilo̧mo̧o̧r eo, pokake kakien eo An, im kejparok kien ko An. Ej mour. En̄in ej kam̧ool eo aō ilo Etan ekwojarjar, em̧ool Jisōs Kraist, amen.” 8

Ļōmņak kōn aorōk ko an jet iaan ritariņae ro raar loļo̧k iien eo aer n̄an bar kajutak im̧ōn jar ko an Rikirijin ro keidi n̄an ritariņae ro jet raar bōk kuņaer ilo ikkure nana ko, rebwebwe, ak m̧akūtkūt ko renana. Jouj im kejōkļo̧kjeņ im mejmejkaruo ilo kālet ekōjkan ami kōjerbal iien eo ami

Alooje pija in ekakememej eō kōn juon iaan ememļo̧k ko aō raorōk tata, ke eaar ļalem aō iiō. Stake būreejtōn eo am eaar jemen Elder Perry. Ilo jem̧ļo̧k in ļo̧k Pata eo an Laļ in Kein Kajuro, eaar kōm̧m̧an bwe aolep ritariņae ro raar ro̧ol tok kar jijet im̧aan ilo jikin jar eo ilo juon iien kweilo̧k in kwojkwoj. Raar itok ilo kar kōņak tok nuknuk in tariņae ko aer em̧m̧an tata, im kajjojo kar kwaļo̧k juon naan in kam̧ool ekadu. Būreejtōn Perry eaar jan̄ ke ļaddik ro ruo nejin, Elder Perry im ļaddik eo jatin Ted, raar kwaļo̧k naan in kam̧ool ko aer. Āinwōt juon ļaddik jidikdik, eaar lukkuun im̧we im kabwilōn̄lōn̄ n̄an eō. Ijjab kememej ta eo eaar ba, bōtaab Ij kememej ekōjkan aō kar en̄jake.

Āinwōt ami maron̄ lo jān waanjon̄ak eo an Elder Perry ilo pija in, Ijjab kōnono kōn kōņak kabun̄ eo ami ilo aitok pā eo ami ak kalikkar ami tiljek itulik. Menin emaron̄ kajookok n̄an kom̧ im Kabun̄ in. Ij kōnono kōn ami erom ta eo kom̧ij aikuj in erom. Ke kōm kar jerbale unin tōl eo an mijenedePreach My Gospel, kōm kar en̄jake bwe emaron̄ in kar juon unin tōl ejipan̄ ilo aolepen mour n̄an mijinede ro im membōr ro ad, eļaptata jepta 6, “Kōļapļo̧k M̧wil ko an Kraist.?” Ilo ami kajieon̄ jerbale m̧ōttan eo ami im kūli m̧wil ko kom̧j kōņaan kōļapļo̧k, kom̧ naaj kōņaan “kōllaajrak im ekkatak … eoon ko an jeje ko rekwojarjar me rej katakin kōn m̧wil [ko],” “kōm̧m̧ani menin kōttōpar ko im kōm̧m̧ani karōk ko n̄an kōjerbal m̧wil [ko] ilo mour eo ami,” im “jar n̄an Irooj n̄an jipan̄ kom̧ kōļapļo̧k m̧wil [ko].”9 Ilo kōm̧m̧ane menin kom̧ij aikuj jab kōņak juon māj im ņooj kadkad eo em̧ool ami.

Jet iaami emaron̄ ejake juon iminene me etōr jān jon̄an baj limo im ikkure ko. Ro rej koba ļo̧k ilo pija ko renana ak jabdewōt jekjek in jerawiwi rej anōk juon jerbal eo eoktak jān ta eo rej lukkuun kōņaan erom ak aikuj in erom. Ekaitoktok limo bwe enan̄in aolep ro me rej koba ļo̧k ilo pija nana rej bōk juon kadkad ebōd im ņooj an bōk kuņaan. Rej ņooj m̧akūtkūt eo aer me rejeļā ebōd im kakkure n̄an aolep ro rej kea kake. Pija nana ej juon nan̄inmej me ej kōmettak wōt n̄an m̧wil eo an ippān Anij, ak ej barāinwōt maron̄ kakkure m̧are ko im baam̧le ko im ewōr an im̧we enana ilo jukjuk in pād. An̄ūr lep intōrnet im pija nana rej jim̧or kakkure m̧are ko.10 Ilo ami em̧m̧akūt m̧aan ļo̧k n̄an m̧are, kom̧ij aikuj jab kōņak jabdewōt māj ko me rej ņooj m̧akūtkūt ejjab jejjet me enaaj kakkure kom̧ ak m̧are eo ami.

N̄an ro em̧ōj aer kar wōtlo̧k n̄an m̧wil in kakkure in, jouj im kanooj lale bwe kom̧ maron̄ ukweļo̧k, im kom̧ maron̄ mour. Ukweļo̧k enaaj aikuj bōktok kemour eo. Kemour emaron̄ in juon jekjek eaitok. Bisop eo ami emaron̄ kapilōk kom̧ kōn ekōjkan ami maron̄ bōk jipan̄ eo kom̧ij aikuj n̄an mour. Em̧ōj am kar kajjitōk ippān bisop ro n̄an leļo̧k kom̧ n̄an ro me remaron̄ em̧m̧an ļo̧k aer jipan̄ kom̧.

Pija nana im jerawiwi an m̧ōm an kanniōk, make ļo̧k, ebar wōt m̧wil ko rekauwōtata me ej baijini jukjuk in pād eo im kōm̧ōjņo̧ik ļo̧k aorōk eo an mour erreo. Ej juon men iminene kake rainin n̄an ņooj kadkad in juon n̄e je juon naan enana, ekōmetak, ettūņo ilo online. Jet rej kōnono kake āinwōt kijeek. Jet jikin ko rej kajieon̄ julo̧k ennaan ko. N̄an waanjon̄ak, New York Times ejjab jutak ņae ennaan ko me rej “n̄an kōnanaik juon, kajjōjō, lāj, kanejnej, … riab, jalikkar, im LAM̧ŌJ.  …

The Times rej barāinwōt kōketak n̄an kōjerbal m̧ool in āt ko kōnke, ‘Kōm kar lo bwe armej ro me rej kōjerbal etaer rej bōk ippāer eļapļo̧k bōk kuņaer, kautiej ilo bwbwenato ko.’”11

Rijilōk Paul eaar je:

“Kom̧ij jab bōd, “Kōm̧m̧ao ko re nana rej kakōt m̧anit ko rem̧m̧an.

“Kom̧win ruj n̄an wānōk, im jab jero̧wiwi; bwe ejjeļo̧k jeļā Anij ippān jet(1 Korint 15:33–34).

Ealikkar bwe kōm̧m̧ao ko renana rejjab wōt juon jekjek nana, ak eļan̄n̄e kōjerbali jān ro me rej Armej ro Rekwojarjar ilo Raan-ko Āliktata, remaron̄ in kakkure ro me ejjeļo̧k aer jeļā kōn Anij ak wōr juon naan in kam̧ool kōn Rilo̧mo̧o̧r eo.

Jabdewōt kōjerbal Intōrnet n̄an kōjepepļo̧k, ej kakkure m̧wil, ak likūt juon armej ilo juon jon̄ak eo enana ej ņa ruwōn. Ta eo jej loe ilo jukjuk in pād ej bwe n̄e armej ej kōņak māj eo an ittūņo, eļap ļo̧k aer bōk kuņaer ilo kain m̧akūtkūt rōt in me ekanooj in kakkure kōm̧m̧ao an ippān doon. Ej barāinwōt kakkure pedped ko raorōk Rilo̧mo̧o̧r eo eaar katakin.

Juon iaan ennaan ko raorōk an ko̧jpeļ eo an Jisōs Kraist me kom̧ kar katak jān ke kom̧ kar jodikdik ej “Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo(Jon 3:16; bar lale D&C 34:3). Rilo̧mo̧o̧r eo eaar kōmeļeļeik bwe Eaar jab itok n̄an kakkure laļ, ak n̄an lo̧mo̧o̧ren laļ. Innām Ej kōmeļeļe bwe kakkure meļeļe in:

Meram e moottok n̄an laļ, im armej rej yokwe marok eļap jān meram, bwe jerbal ko aer re nana.

“Bwe jabdewōt eo ej kōm̧anm̧an nana ej kōjdate meram, im e jab itok n̄an meram n̄e ab kauwe jerbal ko re nana.

“A eo ej kōm̧anm̧an m̧ool, ej itok n̄an meram, bwe en alikkar jerbal ko an, bwe ar kōm̧m̧ani ilo Anij.”16(John 3:19–21; lale eoon 17–21).

Aikuj eo ejim̧we ejjab kōņak māj ko n̄an ņooj kadkad eo aer. Ij iakwe bwebwenato in em̧ool jān mour eo an Būreejtōn Thomas S. Monson. Eaar jab tōpar 18 iiō dettan m̧ae iien epaake jem̧ļo̧k in ļo̧k Pata eo an Laļ in kein II. Ilo m̧ool, tariņae eo ilo Europe eaar jem̧ļo̧k, bōtaab tariņae ilo Pacific eaar wōnm̧aanļo̧k wōt.

Eaar deļo̧n̄ ļo̧k ilo United States Navy eo im kar jilkinļo̧k n̄an San Diego, California. Kom naaj kememej bwebwenato in an ilo kweilo̧k eo eļap ej jem̧ļo̧k ļo̧k. Ilo Jabōt eo an kein kajuon segeant eo ej kōm̧m̧ani kaminene ko eaar ļaini er n̄an aer etal n̄an jar. Eaar jilkinļo̧k Catholic ro ilo juon jikin, Riju ro n̄an bar juon jikin, im kar kajieon̄ jilkinļo̧k aolepen jar ko n̄an juon kweilo̧k an Protestant. Būreejtōn Monson eaar ba eaar j uon Catholic, Ju, ak Protestant; eaar juon Mormon. Eaar peran n̄an jutak ilo jikin im kar m̧ōņōņō n̄an lo bwe eaar bar wōt jet membōr ro retiljek raar jutak itulikin. Enaaj kar pidodo n̄an ilo̧k ippān kumi eo eļap uwaan n̄an kweilo̧k eo an Protestant. Eaar kije n̄an kile āinwōt wōn kar e im jerbal ijo kuņaan ekkar n̄an.12

Kōm̧m̧ani Menin Kōttōpar ko Rejejjet

Kapilōk eo aō kein kajilu ej iookļo̧k jet iaan menin kōttōpar ko kom̧ij aikuj ļōmņak kaki. Ilo enan̄in ļo̧k wōt ejja iien eo me Elder Perry eaar pād ilo Japan ippān Marine ro, Būreejtōn Boyd K. Packer eaar jerbal ilo Japan ilo Air Force ilo jem̧ļo̧k in ļo̧k Pata eo an Laļ in kein II.

Ilo ennaan eo an ilo kememe e 100th iiō dettan jemenere ilo Jānwōde 22nd in iiō in, eaar kōmeļeļeik bwe menin eaar juon lukkuun iien jokālet ilo mour eo an.13 Ilo 2004, Iaar ilo̧k ippān ļo̧k Būreejtōn Packer im ro jet n̄an Japan. Eaar wōr an iien em̧m̧an n̄an bar etali jet iaan bun̄tōn ko an im kejōļo̧kjeņ kōn jet iaan en̄jake ko im jokālet ko eaar kōm̧m̧ani ilo tōre jab eo. Eaar bar riiti jet iaer ilo kōnono eo an ilo jemenere eo. Kōn mālim eo an, Ij kwaļo̧k ippāmi ļōmņak im en̄jake ko jet.

Būreejtōn Packer eaar kōmeļeļeik en̄jake ko me raar waļo̧k ioon juon āne in lom̧aļo in Okinawa. Ej watōk menin āinwōt jikin eo an ilo āne jem̧aden. Kōppopo eo an make im kweilo̧k ippān member ro jet eaar kam̧wilaļ ļo̧k tōmak eo an ilo katak ko an ko̧jpeļ eo. Ta eo eaar jako ippān eaar kapene eo—jeļāļo̧kjeņ eo em̧ool kōn ta me em̧ōj kadede an kar jeļā eaar m̧ool.

Innām rijeje bwebwenato eo an Būreejtōn Packer ej lo ta eo eaar waļo̧k: “Ioon aenōm̧m̧an eo kōn kapene eo eaar pukōt e, eaar jujelm̧ae nana an tariņae eo ņae ro ejjeļo̧k ruwier. Pukōt make ļo̧k im iien eo n̄an ļōmņak, eaar tallōn̄, juon raan, n̄an walōn̄ļo̧k jān lojet. Ijo eaar lo m̧ōttan juon em̧ aj im̧ōn rikallib eo, kar kowaan e juon jikin in kallib piteto-tōn̄al epaake. Im okjakļo̧k ioļapļap ej juon menin eddōk emej eaar lo depdep ko an juon m̧am̧a im ajri ro ruo nejin kar kakkure er. Ijo eaar kobrak e kōn juon būrom̧ōj em̧wilaļ eaar kobaik e make ippān en̄jake ko an iakwe n̄an baam̧le eo an make im n̄an aolep baam̧le ko.”14

Tok ālik eaar ilo̧k n̄an lowaan juon im̧ōn katilekeek ijo eaar ļōmņak, kejōkļo̧kjeņ, im jar. Būreejtōn Packer, ilo reilik ļo̧k ilo iien in, kar kōmeļeļeik ta eo Iaar ņa etan juon en̄jake in kapen ilo jetōb. Eaar en̄jake im̧we n̄an ta eo ej aikuj in kar kōm̧m̧ane kōn mour eo an. E, aaet, eaar ejjeļo̧k an jeļā bwe enaaj kar kūr n̄an kūr eo eutiej im kwojarjar eo kiiō me ej kabwijere. Ettōņak eo an eaar bwe eaar kōņaan erom juon rūkaki, ālij katak ko an Rilo̧mo̧o̧r eo. Eaar jōk ilo ļōmņak eo an bwe enaaj kar mour juon mour ejim̧we.

Eaar meļeļe in ilo juon wāween eaorōk bwe enaaj kar aikuj in pukōt juon pāleen kōrā ejim̧we im bwe erreo jim̧or renaaj kar karūttoļo̧k juon baam̧le eļap. Ritariņae in edik eaar kile bwe jerbal eo an kar kālet e enaaj kar kake jon̄an wōņāan mour eo em̧m̧an im eo m̧ōttan ejitōnbōro enaaj kar aikuj in kwaļo̧k ejjab aorōk ko wōt im naaj kar kōņaan mour ilo an ejjeļo̧k jet iaan m̧weiuk ko an laļ in. N̄an kom̧ ro me raar jeļā kajien Sister Donna Packer, eaar im ej, n̄an Būreejtōn Packer, juon m̧ōttan eo ejejjet. Eaar jab kanooj bwe jāān, bōtaab raar jab en̄jake jerata. Raar karūttoļo̧k 10 ajri ro, im karmejete eaar menin aikuj. Ewōr kiiō 60 jibwier im 79 nejin jibwierro.

Imaron̄ kememej en̄jake ko rem̧m̧an eaar wōr ippa ke Iaar katak bwe eaar bwilōn̄ āinwōt juon kar Rutiej an Kabun̄ in ekāāl n̄an ilo̧k ippān juon Rijilōk eo n̄an juon kweilo̧k an ritōl ro an Kabun̄ in kōnke eaar jab bwe an jōōt mouj n̄an ekkōņak.

Ij kwaļo̧k bwbwenato in em̧ool ippāmi kōnke emakijkij an menin kōttōpar ko ad rej pedped ioon ta ko laļ in ej kaorōki. Pedped ko raorōk rej lukkuun bwe aer pidodo n̄an member ro me raar bōk kain̄i in lo̧mo̧o̧r ko. Jim̧we. Kalōk juon baam̧ļe. Pukōt juon wāween ejejjet n̄an kake. Jerbal n̄e kūr. Kōppopo n̄an ioon Anij.

Rilo̧mo̧o̧r eo eaar katakin bwe “ an armej mour ej jab kōn an lōn̄ men ko an” (Luk 12:15). Innām Eaar kōjerbal juon bōrabōļ:

“Jikin kallib ko an juon armej e m̧weiie elōn̄ aer jebar leen:

“Im ej pepe ilo būruon im ba, Ta eo I naaj kōm̧m̧ane, bwe ejjeļo̧k jikin ijo ij aini leen ko aō?

“Im e ba, I naaj kōm̧m̧an men in, I naaj jeļate m̧o ko im̧ōnekkan eo aō, im kalōk ko jet reļapļo̧k; im ilo er I naaj aini aō grain im m̧weiō otemjej.

“Im I naaj ba n̄an aō, Aō, elōn̄ m̧weiuk ko m̧weiōm̧ em̧ōj pojak n̄an elōn̄ iiō; kwōn kakkije, m̧ōn̄ā, idaak im lan̄lōn̄.

“A Anij e ba n̄an e, Kwō bwebwe, bon̄in in naaj kajjitōk ippam̧kōn am̧; innām enaaj an wōn men ko kwaar kōpooji?

“Āindein eo ej likūt m̧weien n̄an e wōt, im e jab m̧weiie n̄an Anij” (Luk 12:16–21).

Kalōk Laļ eo Ami im Jukjuk in pād eo Ami Ijo Kom̧ij Mour Ie

Ilo kakobaba n̄an m̧wiļ ko, em̧m̧an ko, im jokālet ko an juon make, eļan̄n̄e kom̧ij kōņaan erom epepen eo kom̧ij aikuj in erom, kom̧ naaj kalōk laļ eo ami im jukjuk in pād eo ami ijo kom̧ij mour ie. Epepen eo ami, āinwōt Epepen eo Em̧m̧an Tata, naaj aikuj in kejparok jim̧we im anemkwoj in kabun̄ eo. Jolet in Judeo-Christian eo jaar joļet e ejjab aorōk wōt ak ej barāinwōt aorōk ilo karōk eo an Jemedwōj ilo Lan̄. Jej aikuj in kejparok e n̄an epepen ko tok ālik. Jej aikuj koba ippān armej em̧m̧an, ekoba ro jān aolep tōmak ko—eļaptata ro rej lokjak n̄an Anij kōn m̧anit eo aer. Armej rein me rej meļeļe etke jej kōnono jotein in kōn “wōn kwe, kōm̧m̧ane ilo jejjet ijo kuņaam̧.” Aorōk ko im anemkwoj in kabun̄ eo em̧m̧an an Judeo-Christian naaj kōkaļļeik epepen eo ami āinwōt epepen eo em̧m̧an ej aikuj in erom.

Kōn apan̄ ko me rej waļo̧k ilo laļ in rainin, Būreejtōnji eo Kein Kajuon im Doulul eo an Jon̄oulruo Rijilōk ro eļaptata aer ņūrbōktak bwe kom̧ij bōk kuņami ilo jejjet ilo jekjek in boļatik ilo laļ eo me kom̧ij mour ie. Kabun̄ in ej jab bōk kuņaan ilo iien jie in boļatik ko im ejjab rejtake juon rijibadōk ak kumi. Kōmij kōtmene, mekarta, bwe membōr ro ad renaaj lukkuun bōk kuņaer ilo rejtake rijipadōk ro im kumi ko an kālet eo aer pedped ioon pedped ko me renaaj kejparok kien em̧m̧an. Katak eo ad ealikkar: ro me rej m̧ool, im meletlet rej aikuj pukōt kōn niknik (lale D&C 98:10). . N̄e nana ej kien armej rej būrom̧ōj (lale D&C 98:9). Meļeļe in bwe jabdewōt ej aikuj en̄jake eddo eo n̄an bout.

Ilo States ko me ilo United States me ewōr caucuse ko ie, kom̧ij aikuj jeļā kōn unin kōnono ko im rijipadōk ro im lukkuun bōk kuņami. N̄an waanjon̄ak, caususe ko ilo bade ko roktak ilo Utah im Idaho renaaj kōm̧m̧an ijjino in im ajeded m̧ae likuwōļpen-Eprōļ. Eļan̄n̄e kom̧ij pād, kom̧ naaj kōtļo̧k bwe kom̧in bōk kuņami. Kōmij kōjatdikdik bwe kom̧ naaj etale iien causus eo n̄an bade eo ej ami kālet innām en̄jake eddo in n̄an ami pād ie. Kōmij kōjatdikdik bwe menin enaaj m̧ool n̄an aolep armej ro, membōr ro im ro rejjab membōr barāinwōt, ilo aolep bukwōn ko im aolep laļ ko ijo ekeleel eo enaaj kōm̧m̧an ie barāinwōt. Wōņāān eo an anemkwoj eaar lukkuun ļap, im kaje ko an ro rejjab bōk kuņaer eļap aer eļļap n̄an jabdewōt armej ro n̄an en̄jake bwe remaron̄ kowaan eddo eo aer.

Jouj im jeļā bwe eļap am lōke eļap ilo kom̧. Ritōl ro an Kabun̄ in lukkuun m̧ool rej tōmak bwe kom̧ maron̄ kalōk aelōn̄ in kiin̄ eo āinwōt epepen eo m̧okta ļo̧k. Ejjab wōr wōt iakwe eo ami im lōke eo ak barāinwōt jar ko im kōjeram̧m̧an ko am. Kōm jeļā bwe wejepedik eo an epepen eo ami ej aorōk n̄an wōnm̧aanļo̧k wōt ilo ejaake eo an Kabun̄ in im eddōk eo an aelōn̄ in kiin̄ eo. Kōmij jar bwe kom̧ naaj jerbale m̧ōttan eo ami ilo jejjet: ilo ami jab kōņak māj eo, jerbal ekkar n̄an kadkad eo ami em̧ool, kōm̧m̧ani menin kōttōpar ko rejejjet, im kalōk laļ eo im jukjuk in pād eo kom̧ij mour ie.

Ij kili kōn kam̧ool eo aō make kōn Jepļaaktok eo an ko̧jpeļ eo kōn Rikanaan Joseph Smith. Joseph Smith eaar lo Anij Jemen im Jisōs Kraist. Jemedwōj ilo Lan̄ ej juon Jemed eo ej iakwe kōn juon karōk me ej kōjeram̧m̧an kajjojo ajri ro Nejin. Jisōs Kraist ej ad Rilo̧mo̧o̧r, im Pinmuur eo an ej iien eo aorōk tata ilo aolep bwebwenato. Jetōb Kwojarjar ej kwaļo̧k n̄an kōj im kam̧ool kōn Jemen im Nejin. Kōn men kein Ij kam̧ool āinwōt juon iaan rikam̧ool eo an Rilo̧mo̧o̧r eo, ilo etan Jisōs Kraist, amen.

© 2012 by Intellectual Reserve, Inc. All rights reserved. English approval: 2/12. Translation approval: 2/12. Translation of What E’er Thou Art, Act Well Thy Part: Avoid Wearing Masks That Hide Identity. Language. PD50040904 xxx

Show References

    Kakememej ko

  1.  

    1. David O. McKay, in Francis M. Gibbons, David O. McKay: Apostle to the World, Prophet of God (1986), 45; bar lale “Pres. McKay Speaks to Pioneer Stake Youth,” Church News, Sept. 21, 1957, 4.

  2.  

    2. Michael Otterson is the managing director eo an Church’s Public Affairs Department eo.

  3.  

    3. Lale Joseph Foxman, In the Shadow of Death (2011), 10.

  4.  

    4. Kweilo̧k ippān Abraham Foxman ilo opiij eo an ilo New York City, New York, ilo Juun 14, 2011

  5.  

    5. Mark L. Staker, “Remembering Hiram, Ohio,” Ensign, Okt. 2002.

  6.  

    6. Lale Teachings of Presidents of the Church: Joseph Smith (2007), 24.

  7.  

    7. “True to the Faith,” Hymns, no. 254.

  8.  

    8. L. Tom Perry, ennaan eo jān Special Witnesses of Christ (DVD, 2003).

  9.  

    9.  Preach My Gospel: A Guide to Missionary Service [2004], 123; lale peij 115–26

  10.  

    10. Lale Elizabeth Stuart, “Internet Addiction Harming Marriage,” Deseret News, Juļae 20, 2011, http://www.deseretnews.com/article/700164510/Internet-addiction-harming-marriage.html.

  11.  

    11. Mark Brent, in “The Public Forum,” The Salt Lake Tribune, Juļae 27, 2011, A16.

  12.  

    12. Lale Thomas S. Monson, “Dare to Stand Alone,” Ensign, Nob. 2011, 61–62; see also Heidi Swinton, To the Rescue: The Biography of Thomas S. Monson (2010), 96–97.

  13.  

    13. Lale Boyd K. Packer, “How to Survive in Enemy Territory,” Kememe e 100 Iiō an Jemenere kadiwōjļo̧k eo, Jān. 22, 2012, http://seminary.lds.org/history/centennial/eng/how-to-survive-in-enemy-territory/.

  14.  

    14. Lucile C. Tate, Boyd K. Packer: A Watchman on the Tower (1995), 58–59.