Si Jesus ang Kristo—Atong Prinsipe sa Kalinaw

Minahal nga kaigsoonan, kanindot niini nga kasinatian. Ang musika makapadasig ug ang mensahe makapatandog sa kasingkasing. Ang diwa sa Pasko nagdasig sa atong kalag!

Mga panumduman sa Pasko mahinumduman bahin sa pamilya, gasa, ug pagserbisyo sa uban. Gikan kini sa tinuod nga rason sa Pasko, ang makadasig nga gasa sa atong Langitnong Amahan. “Kay gihigugma gayud sa Dios ang kalibutan, nga tungod niana gihatag niya ang iyang bugtong Anak, aron ang tanan nga mosalig kaniya dili malaglag kon dili may kinabuhing dayon.”¹

Ang pag-focus diha sa Ginoo ug sa walay katapusang kinabuhi makatabang nato dili lamang sa Pasko, apan sa tanang hagit sa pagka-mortal. Ang dili hingpit nga mga tawo nagpuyo sa yuta uban sa lain pang mga dili hingpit. Ang atong napukan nga kalibutan puno sa sobrang utang, gubat, kalamidad, sakit, ug kamatayon.

Ang personal nga hagit moabut. Usa ka amahan tingali nawad-an og trabaho. Usa ka inahan tingali nahibalo bahin sa grabe nga sakit. Usa ka anak tingali nahisalaag. Bisan unsa pay gikabalak-an, matag usa nato nangandoy nga makabaton og kalinaw.

Ang akong mensahe karon kalabut sa bugtong tinubdan sa tinuod ug malungtarong kalinaw, si Jesus ang Kristo—atong Prinsipe sa Kalinaw.² Kining titulo Iyang gidala agig dugang sa uban diin Siya gi-orden nang daan.

Gipili Siya sa Iyang Amahan nga mahimong Manluluwas sa kalibutan. Kining duha ka titulo—ang Mesiyas ug ang Kristo—nagtakda sa Iyang responsibilidad isip usa nga dinihogan³

Ubos sa direksyon sa Iyang Amahan, si Jesus mao ang Tiglalang niini ug sa laing kalibutan.⁴ Si Jesus ang atong Manlalaban ngadto sa Amahan.⁵ Si Jesus ang gisaad nga Immanuel,⁶ ang Mao Ako ug si Jehova sa Daang Tugon.⁷

Gipadala Siya sa Iyang Amahan aron tumanon ang Pag-ula, ang labing importanting buhat sa tibuok kasaysayan. Tungod sa Iyang Pag-ula, ang pagka-imortal masinati sa tanan, ug ang kinabuhing dayon nahimong posible niadtong mosunod Kaniya.⁸ Kining mga tumong mao ang buhat ug himaya sa Makagagahum nga Dios.⁹

Isip atong Ehemplo, si Jesus mitudlo nato unsaon pagpakabuhi, paghigugma, ug pagkat-on. Siya mitudlo nato unsaon pag-ampo, pagpasaylo, ug paglahutay sa katapusan.¹⁰

Siya mitudlo nato unsaon pag-amuma sa uban kay sa atong kaugalingon. Siya mitudlo nato bahin sa kalooy ug kaayo—mihimo og tinuod nga kausaban sa atong kinabuhi pinaagi sa Iyang gahum. Siya mitudlo nato unsaon pagbaton og kalinaw sa kasingkasing ug hunahuna. Usa ka adlaw, mobarug kita sa Iyang atubangan isip atong Maghuhukom ug maloloy-ong Manluluwas.¹¹

Kining sagradong mga responsibilidad sa Ginoo ang hinungdan nga kita angayng motahud Niya isip atong personal ug kanunay nga Prinsipe sa Kalinaw. Kita nagpasalamat Niya sa atong pribilehiyo isip ginikanan, apohan, ug magtutudlo sa atong mga anak.

Ang panahon sa Pasko usa ka malipayong panahon sa pamilya. Ang panahon sa pamilya sagrado nga panahon. Makatabang kita sa atong mga anak nga modangup sa Manluluwas. Ang musika makatabang nato. Ang atong mga anak ganahang mokanta sa “I’m Trying to Be like Jesus [Maninguha Kong Mahimong Mahisama Kang Jesus].”¹²

Si Jesus miingon, “Paduola kanako ang gagmayng kabataan, ug ayaw ninyo sila pagpugngi: kay ang gingharian sa langit ila sa mga sama kanila.”¹³

Makahatag siya og kalinaw sa kinabuhi niadtong naapektuhan sa gubat. Ang mga pamilya nga nabalda sa katungdanan sa militar dunay handumanan sa gubat, nga nasilsil sa hunahuna atol sa Korean War.

Ang mga gubat sa atong panahon mas moderno apan nakapalisud gihapon sa pamilya. Kadtong nag-antus sa ingon makadangup sa Ginoo. Iyang mensahe mao ang mensahe sa kalinaw sa kalibutan ug panagdait sa katawhan.¹⁴

Ang kalinaw moabut niadtong mibati og kasakit. Ang ubang lawas samdan. Ang uban espirituhanong nasakit tungod sa nawala nga minahal o ubang emosyonal nga trauma. Mga kaigsoonan, ang kalinaw mahimong moabut sa inyong kalag samtang nag-ugmad kamo og pagtuo sa Prinsipe sa Kalinaw.

“Aduna ba kamo dihay mga masakiton? Dad-a sila ngari. Aduna ba kamo dihay mga bakol, o mga buta, o mga pungkol, o mga angol, … o kadto nga gitakbuyan sa tanan nga mga matang sa sakit? Dad-a sila ngari ug Ako moayo kanila.”¹⁵

“Ako nakakita nga ang inyong hugot nga pagtuo igo nga Ako moayo kaninyo.”¹⁶

Ang kalinaw mahimong moabut niadtong nag-antus sa kasubo. Nagagikan man ang kasubo sa sayop o sala, ang gikinahanglan lamang sa Ginoo mao ang tinuod nga paghinulsol. Ang kasulatan naghangyo nato nga “molikay [gikan] sa mga pangibog nga iya sa kabatan-on; … [ug] simba sa Ginoo uban sa putli nga kasingkasing.”¹⁷ Dayon ang Iyang “balsamo sa Galaad” makaayo sa masakiton nga kalag.¹⁸

Hunahunaa ang kausaban ni John Newton, natawo sa London niadtong 1725. Naghinulsol siya sa makasasala nga kinabuhi isip tigbaligya og ulipon aron mahimong Anglican clergyman. Nianang dakong kausaban sa kasingkasing, si John misulat sa mga pulong sa himno nga “Amazing Grace [Kahibulongan nga Grasya].”

“May labi pang kalipay unya didto sa langit tungod sa usa ka makasasala nga magahinulsol.”²⁰

Ang kalinaw mahimong moabut niadtong nabug-atan:

“Umari kanako, kamong tanan nga nabudlay ug nabug-atan, ug papahulayon ko kamo.

“Isangon ninyo ang akong yugo diha kaninyo, ug pagtuon kamo gikan kanako; kay ako maaghup ug mapaubsanon sa kasingkasing: ug makakaplag kamog pahulay alang sa inyong mga kalag.

“Kay masayon ang akong yugo, ug magaan ang akong luwan.”²¹

Ang kalinaw mahimong moabut niadtong nagbangutan. Ang Ginoo miingon, “Bulahan ang mga nagamasulub-on: kay sila pagalipayon.”²² Samtang nag-antus kita sa pagkamatay sa usa ka minahal, mapuno kita sa kalinaw sa Ginoo pinaagi sa mga paghunghong sa Espiritu.

“Kadtong namatay tungod kanako dili makatilaw og kamatayon, kay kini matam-is ngadto kanila.”²³

“Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini, dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw.”²⁴

“Ako mao ang pagkabanhaw, ug ang kinabuhi: ang mosalig kanako, bisan siya mamatay, mabuhi siya:

“Ug ang tanan nga buhi ug nagasalig kanako dili na gayud mamatay.”²⁵

Ang kalinaw mahimong moabut sa tanang nagtinguha sa Prinsipe sa Kalinaw. Iyang mensahe mao ang mensahe nga malumo ug makaluwas nga gidala sa atong mga misyonaryo sa tibuok kalibutan. Nagsangyaw sila sa ebanghelyo ni Jesukristo nga gipahiuli Niya pinaagi kang Propeta Joseph Smith.²⁶ Ang mga misyonaryo nagtudlo niining makapausab sa kinabuhi nga mga pulong sa Ginoo: “Kon nahigugma kamo kanako, inyong pagatumanon ang akong mga sugo.”²⁷

Ang kalinaw mahimong moabut sa tanan nga naglakaw sa pamaagi sa Manluluwas. Ang iyang imbitasyon gipahayag sa mahigugmaong mga pulong: “Umari ka, ug sumunod kanako.”²⁸

Atong daygon sa awit ang Prinsipe sa Kalinaw,²⁹ kay Siya moanhi pag-usab. Dayon “ang himaya sa Ginoo igapadayag, ug ang tanan nga unod sa tingub makakita niini.”³⁰ Isip Mesiyas, Siya mohari isip Hari sa kaharian ug Ginoo sa kaginoohan.³¹

Samtang kita mosunod ni Jesukristo, mangulo Siya nato sa pagpuyo uban Niya ug sa atong Langitnong Amahan, uban sa atong pamilya. Sa atong daghang hagit sa pagkamortal, kon magpabilin kitang matinud-anon sa mga pakigsaad, kon kita molahutay sa katapusan, sarang kita nianang labing mahinungdanon sa tanang gasa sa Dios, ang kinabuhing dayon.³² Sa Iyang balaang presensya, ang atong pamilya magkauban sa kahangturan.

Ang Dios mopanalangin kaninyo, minahal nga kaigsoonan. Hinaut ang matag usa kaninyo dunay malipayon kaayong Pasko! Ug hinaut matagamtam ninyo ang tanang panalangin sa Ginoo—ang atong Prinsipe sa Kalinaw—ako nag-ampo sa pangalan ni Jesukristo, amen.