Mga Debosyonal sa Pasko
Unsay Sunod nga Nahitabo?


Unsay Sunod nga Nahitabo?

Malipayong Pasko!

Mao kini ang Kapaskohan, ug ang mga bata modapit sa magic sa Pasko sulod sa atong kasingkasing. Dunay mawala nato kon dili nato makita ang Pasko diha sa mata sa mga bata, kay sila makakita man sa kahayag, makabati sa musika, ug makasimhot sa kahumot sa mga Christmas tree ug mga candy cane uban sa tinuorayng kahinam. Atong makita ang ilang pula-pula nga aping ug ilong nga idaitol nila sa bildo sa mga tindahan samtang nagpaabut sila sa buntag sa Pasko, ug ang gagmay nilang mga tudlo nag-ihap sa mga adlaw hangtud sa Disyembre 25. Ang mga ginikanan usab nag-ihap hangtud sa Disyembre 25. Nangandoy nga maandam nila ang mga regalo sa ilang mga anak alang sa buntag sa Pasko samtang sila magplano ug maghimo og mga surprisa alang sa ilang mga anak.

Sa gamay pa ko, kasagaran magtahi ang akong mama og regalo sa Pasko para nako ug sa akong kaluha. Iyang ipahimutang ang makina sa iyang kwarto ug magsugod sa pagtahi usa ka bulan una mag-pasko, mag-amping nga sirado kanunay ang pultahan samtang nagtrabaho. Kon duol na ang Adlaw sa Pasko magabhian na siya og maayo sa pagtahi. Kon hapit na kini mahuman—gawas sa pagsukod niini kanamo ug pagmarka sa pil-anan—paninguhaon niya nga dili mabisto ang regalo. Mao nga iyang tabunan ang among mata. Banus-banuson niya pagtabon ang among mata, dad-on mi sa iyang kwarto, ug isukod kini kanamo, magmatngon nga ang tabon sa mata dili matangtang. Nagsilbi gyud kini … gawas lang dihang mibagting ang telepono sa laing kwarto.

Gipasidan-an mi niya, “Mobalik dayon ko, ug ayaw gyud pagli-li.” Makapangutana ka, “Unsay sunod nga nahitabo?”

Sultihan ta mo: usa kadto ka pula nga jumper.

Mosulti ko sa unsang paagi ang pangutana nga, “Unsay sunod nga nahitabo?” nahitabo ang tinuod nga kahulugan sa Pasko.

Nahitabo kini sa tunga-tunga sa Disyembre dihang si Amy Johnston, Cub Scout den leader sa Gilbert, Arizona, mitudlo sa lagsik nga mga tag-otso anyos nga mga bata bahin sa pagkatawo ni Jesus. Nadasig siya nga dili idayon ang giplano niyang Scout activity ug maghisgot lang una sa iyang mga Cub Scout bahin sa unang Pasko. Gipundok niya ang mga bata palibut niya didto sa iyang sala ug nagbasa og mga kasulatan samtang migamit og mga litrato alang sa pag-asoy sa sagradong sugilanon ni Maria ug ni Jose, sa mga magbalantay sa karnero, sa bitoon, ug sa pagkatawo sa batang si Jesus sa pasungan sa Bethlehem.

Mibasa siya:

“Ug si Jose usab gikan sa Galilea, sa lungsod sa Nazaret, mitungas sa Judea sa lungsod ni David, nga ginganlan og Bethlehem; …

“Aron sa pagpalista uban kang Maria, ang iyang pangasaw-unon nga nagsabak. …

“Ug iyang gianak ang iyang panganay nga usa ka lalaki, ug kini iyang giputos sa mga bakbak ug gipahigda sa pasungan; kay wala na may luna alang kanila sa balay nga abutanan.

“Ug niadtong dapita may mga magbalantay sa mga karnero didto sa sibsibanan, nga nanagtukaw sa kagabhion sa pagbantay sa ilang mga hayop.

“Ug, mitungha kanila ang usa ka manolunda sa Ginoo, ug ang himaya sa Ginoo misidlak libut kanila: ug sila giabut og dakong kalisang.

“Apan ang manolunda miingon kanila, Ayaw na kamo kalisang: kay tan-awa, gidad-an ko kamog maayong balita sa dakong kalipay, nga magaabut sa tanang tawo.

“Kay alang kaninyo natawo karon sa lungsod ni David ang Manluluwas, nga mao ang Kristo nga Ginoo.”1

Samtang naghisgot siya bahin sa pagkatawo ni Jesus, namatikdan niya nga ang tanan wala kaayo maminaw, apan ang usa, si John, maghulat gayud unsay sunod. Si John lihukan, kinsa dili gayud mahimutang, apan dihang si Amy nag-asoy sa sugilanon, naminaw gyud siya ug nangutana,, “Unya, unsay sunod nga nahitabo?”

Mao nga mipadayon siya sa pag-asoy bahin sa pagkabata ni Jesus. Miingon siya, “Si Jesus usa ka bata, sama ninyo. Ganahan siyang modagan ug magdula. Apan nagtubo usab siya nga ‘nahimong kusgan.’”2 Miingon si Amy nga dihang si Jesus 12 anyos, mibiyahe siya kuyog sa iyang pamilya ngadto sa Jerusalem. Si Maria ug Jose padulong pauli dihang ilang namatngunan nga wala ang ilang anak. Mibalik dayon sila sa Jerusalem ug nakita si Jesus sulod sa templo nakigsulti sa mga eskolar ug mga magtutudlo nga nangutana Kaniya, ug ang kasulatan nag-ingon nga ang tanang nakadungog Kaniya “nahitingala sa iyang pagpanabut ug sa iyang mga pagpanubag.”3

“Unsay sunod nga nahitabo?” nangutana si Juan. Giistoryahan ni Amy ang mga bata sa pangalagad ni Kristo, sa unsang paagi nga puno Siya sa Espiritu sa Ginoo. Atong mabasa sa Biblia nga nagtudlo Siya sa ebanghelyo ngadto sa kabus, mihimo Siya og mga milagro, miayo Siya sa buta ug masakiton, ug tinuoray Siya mibuhi og mga tawo nga patay na. Gitudlo Niya nga, “Higugmaa ninyo ang inyong mga kaaway, [ug] buhati ninyog maayo ang mga managdumot kaninyo.”4

Si John mibati gayud sa mga gipangsulti ug gusto pang masayud. Nangutana na sab siya, “Unya unsay sunod nga nahitabo?” Miingon si Amy nga ang uban misalikway ni Jesus ug wala makagusto Kaniya. Gani giplano nila nga patyon Siya. Giingnan ni Amy ang gagmayng Cub Scout bahin sa Katapusang Panihapon, sa tanaman sa Gethsemani, ug sa unsang paagi gilansang ug nabanhaw si Jesus. Nakita ni Amy nga ang tanang giistorya bag-o pa alang ni John, kinsa ganahan pa nga mahibalo og daghan.

Dayon nadasig siya sa paghunong, ginganlan ang matag bata, ug miingon, “si Jesukristo nagpakamatay alang ninyo.” Si John naminaw gayud dihang si Amy nakigsulti sa matag bata. Dayon si Amy mitan-aw niya ug miingon, “John, si Jesukristo nagpakamatay alang nimo.” Gitan-aw siya ni John ug sa katingala nangutana, “Kana Iyang gihimo alang nako?”

Miingon si Amy, “Kusog kaayo ang Espiritu didto sa among sala adtong adlawa samtang ang usa ka bata mibati sa Espiritu Santo tingali sa unang higayon.” Miingon siya, “Wala ko kahibalo unsay kaugmaon ni John, kansang pamilya namalhin sukad niadto. Apan nag-ampo ko nga ang liso nga gitisok atol sa usa ka miting sa Cub Scout duha ka semana sa wala pa ang Pasko motubo ug mohatag kaniya sa tibuok nga kahayag sa ebanghelyo ugma damlag.”

Pagkahuman sa Pasko, wala na ang mga Christmas light, ang kahumot sa mga kahoy mawala na, ug wala nay itugtog nga musika sa Pasko, sama ni John, makapangutana, “Unsay sunod nga mahitabo?”

Ang kaanindot ug katahum sa Pasko usa lang ka sinugdanan. Ang Pasko nagpahinumdom nato nga ang bata nga natawo sa Bethlehem naghatag nato og katuyoan sa pagpakabuhi, ug ang sunod nga mahitabo mag-agad kon giunsa nato paghangop ug pagsunod ang atong Manluluwas, si Jesukristo. Matag adlaw atong gidapit ang Iyang Espiritu sa atong kinabuhi. Atong makita ang kahayag diha sa uban; atong mabati ang tingog sa mga bata nga nagdala og paglaum ug sa unsay umaabut. Mangita kitag paagi nga magkapundok, nga malakip, makaserbisyo, ug makabayaw, samtang nagkat-on ta sa importansya nga makaila kita sa atong Manluluwas, si Jesukristo. Nag-ihap kita sa mga adlaw hangtud sa pag-abut sa panahon nga bation gyud nato ang Iyang impluwensya—sama pananglit, ang pagkatawo sa bata, bunyag sa bata, misyonaryo nga molarga, kasal sulod sa templo, ug pag-ambit sa sakrament matag semana. Pinaagi sa pagtuo ngs sama kang Kristo ug sama sa bata kita mangita Kaniya ug mobati sa Iyang impluwensya.

“Gawas kon … mangahimo kamong sama sa gagmayng mga bata, dili gayud kamo makasulod sa gingharian sa langit.”5

Matahum kini nga plano, plano nga gihimo sa atong Amahan nga pinaagi sa Iyang Anak, atong Manluluwas si Jesukristo, kita makabalik ug magpuyo uban Kaniya ug motagamtam sa tanan nga naa sa Amahan, kay kana man ang tubag sa pangutana “Unsay sunod nga mahitabo?” Miingon ang Manluluwas, “Siya nga modawat kanako modawat sa akong Amahan; ug siya nga modawat sa akong Amahan makadawat sa gingharian sa akong Amahan; busa ang tanan nga iya sa akong Amahan ihatag ngadto kaniya.”6

Ang kaandam sa pagdawat Kaniya naghatag og bag-ong kahulugan nga maandam alang sa Disyembre 25.

John, bisan asa ka man, ang buhing mga Apostoles nag-ingon: “Kami ligdong nga mopamatuod nga ang kinabuhi [sa atong Manluluwas], diin mao ang mahinungdanon sa tibuok kasaysayan sa tawo, nagsugod dili lamang sa Betlehem ni matapos sa Kalbaryo. Siya mao ang Unang Natawo sa Amahan, ang Bugtong Anak diha sa unod, ang Manunubos sa kalibutan.”7

John, ang Iyang gasa kanato mao ang unsay sunod nga mahitabo.

Tinuod kini, ug kini Iyang gibuhat alang nimo. Niana nga kamatuoran ako mopamatuod sa Iyang ngalan, si Jesukristo, amen.