Tōmak ilo Pinmuur eo an Jisōs Kraist eaar ke Jeje ilo Būruwōd?

Jen Linda K. Burton

Būreejtōn eo Eutiej an Doulul eo an Kōrā


Linda K. Burton
Kōm̧m̧an, kōjparok, lan̄lōn̄ ilo bujen ko ad naaj menin kam̧ool bwe Pinmuur eo an Jisōs Kraist ej lukkuun jeje ilo buruwōd.

Sister ro aō rejitōnbōro, kom̧ ļak kar pād ilo ļōmņak e aō im ilo būruwō ium̧win allōn̄ ko ke iaar kōļmenļo̧kjeņ kōn eddo in epen. Men̄e ijjab karbab n̄an eddo in likūt ioō, ijeļā bwe kūr in eaar itok jān Irooj kōn rikanaan eo An kar kālete, im kiiō, ebwe. Jeje ko rekwojarjar rej katakin bwe men̄e jān aenikien Irooj ak jān aenikien Rikarrejaran, ej juon wōt.”1

Juon iaan menin letok ko rem̧m̧an kōn kūr in ej jeļā eo bwe Jemedwōj Ilan̄ ej iakwe aolep leddik ro Nejin. Em̧ōj aō en̄jake iakwe eo An n̄an kōj kajjojo!

Āinwōt kom̧, ij iakwe jeje ko rekwojarjar! Ilo bok in Jeremaia jej lo juon eoon me elukkuun kabun̄ būruwō. Jeremaia eaar mour ilo juon tōre im jikin epen, ak Irooj eaar kōtļo̧k bwe en lo “juon tōre in kōjatdikdik ilo raan-ko āliktata ilo jepļaaktok an Israel”2—tōre in ad. Jeremaia eaar kanaan kake:

“Lo, raan ko rej itok, Jeova ej ba, Inaaj likūt kien eo Aō ilo er, Inaaj je e ioon būrueir; im Inaaj Anij eo aer, im renaaj armej ro doō. …

“… Renaaj jeļā Jeova, jān eo e diktata n̄an eo eļaptata, Jeova ej ba. Bwe Iar joļo̧k nana ko aer, im I ban bar keememej jero̧wiwi ko aer.”3

Jej armej ro Jeremaia eaar lo. Jaar ke karuwaineneik tok Irooj n̄an je kien eo, ak katak eo, ilo būruwōd? Jej ke tōmak bwe jeo̧rļo̧k bōd ej maron̄ kōm̧m̧an wōt kōn Pinmuur eo me Jeremaia eaar letok n̄an kōj make?

Jet iiō ko rem̧ootļo̧k Elder Jeffrey R. Holland eaar kwaļo̧k an en̄jake kōn m̧wilaļ in tōmak eo an paineer ro me raar etal n̄an Salt Lake Valley men̄e ālkin mej an ajri ro nejier. Eaar ba, “Raar jab kōm̧m̧ane kōn juon burookram̧, raar jab kōm̧m̧ane n̄an juon m̧akūtkūt in ippān doon, raar kōm̧m̧ane kōnke tōmak eo aer ilo ko̧jpeļ eo an Jisōs Kraist ilo er, eaar pād ilo ņoņoņmeej in diier.”

Eaar kwaļo̧k, kōn en̄jake in em̧m̧an:

“Wāween eo de in me rein jined remaron̄ kar kaļļipin [nin̄nin̄ ko nejier] ilo juon bo̧k in pilawā im wōnm̧aanļo̧k wōt, raar ba, ‘Ānen kallim̧ur eo epād ijōņ juon jikin. Jenaaj tōprakļo̧k valley en.’

Remaron̄ kar ba kōnke bujen ko im katak im tōmak im revelesōn im jetōb.”

Eaar kōjem̧ļo̧k kōn enaan kein: “Eļan̄n̄e jenaaj dāpiji m̧wiļ in ilo baam̧le ko ad im ilo Kabun̄ in, bōlen elōn̄ men ko jet rejiņo bōk jikier make. Bōlen men ko jet rejjab aorōk n̄an kōj. Imaron̄ kar ba raar lukkuun kajoor ilo dāpiji wa ko. Āinwōt rūtto ro ad remaron̄ kar kālet ta eo ren bōke, bōlen kein 21epepen enaaj kōm̧m̧an bwe jen kālet, ‘Ta eo jemaron̄ likūt ioon wa in?’ Ta eo eaorōk ej jetōb eo ad, ej jim̧we ke ilo ņōņōmāāj in diid.”4 Ak, ilo bar juon wāween, ej ke ta eo eaar jeje ilo būruwōd!

Āinwōt juon būreejtōnji ekāāl an Doulul eo an Kōrā, kōm̧ ar lukkuun pukot Irooj n̄an jeļā ta men ko raorōk me Enaaj kōņaan bwe jen likūti ilo ankaat in an Doulul eo an Kōrā n̄an wōnm̧aanļo̧k wōt kōn jerbal in An. Kōm̧ ar en̄jake bwe Jemedwōj Ilan̄ enaaj kar mo̧kta kōņaan bwe kōm̧ in jipan̄ jiron̄ ro Nejin rejitenbōro meļeļe katak eo kōn Pinmuur eo an Jisōs Kraist. Ilo ad meļeļe katak eo kōn Pinmuur eo an Jisōs Kraist, jejeļā ad tōmak enaaj ļapļo̧k, āinwōt ad kōņaan mour jim̧we. Ruo, ilo ad ļōmņak kōn aikuj eo eļap n̄an kōkajoorļo̧k baam̧le ko im im̧ōko, jaar en̄jake bwe Irooj ekōņaan bwe jen rōjan̄ jiron̄ ro Nejin rejitenbōro n̄an dim wōt ilo bujen ko aer. N̄e bujen ko rej kōjparoki, baam̧le ko rej kajoorļo̧k. Āliktata jej en̄jake bwe Enaaj kar kōm̧m̧an bwe jen jerbal ippān doon im jerbal ippān radik ko im ritōl ro ad ilo priesthood, kajieon̄ in pukot im jipan̄ ro rej pād ilo iaļen aikuj. En̄in ej jar eo am̧ in bwe kajjojo iaad naaj kōpeļļo̧k būruwōn im kōm̧m̧an bwe Irooj enaaj ļōme ilo er katak ko kōn Pinmuur eo, bujen ko, im ippān doon.

Ekōjkan ad ļōmņak in kōkajoorļo̧k baam̧le ko ak jipan̄ ro jet m̧ae em̧ōj ad jeik m̧okta ilo būruwōd make juon tōmak em̧wilaļ im niknik ilo Jisōs Kraist im Pinmuur eo An ejjeļo̧k jem̧ļo̧k in? Jotenin inaaj kwaļo̧k jilu pedped ko an Pinmuur eo, n̄e eaar jeje ilo būruwōd, enaaj kōļapļo̧k ad tōmak ilo Jisōs Kraist. Ej aō kōjatdikdik bwe meļeļe pedped kein renaaj kōjeram̧m̧an kōj, kajjojo men̄e jekāāl tok n̄an Kabun̄ in ak eto ad membōr.

Pedped 1: “Aolep ro rej bōd ilo mour in maron̄ kajim̧we kōn Pinmuur eo an Jisōs Kraist.”5

Kōm̧, koba kom̧, rej kwaļo̧k naan in kam̧ool kōn Pinmuur eo an ad Rilo̧mo̧o̧r, Jisōs Kraist. Naan in kam̧ool ko am̧, āinwōt kom̧, kar jei ilo būruwōd kōnke jej ioon elōn̄ apan̄ ko reoktak im kapo ko me rejelet kōj n̄an eddōkļo̧k eo ad ilo jetōb. Ilo ejjeļo̧k meļeļe kōn karōk in m̧ōņōņō eo ewāppen an Jemedwōj Ilan̄ im Pinmuur eo an Rilo̧mo̧o̧r āinwōt io̧lapen karōk in, apan̄ kein remaron̄ in jab kar ekkar. Jej aolep kwaļo̧k apan̄ ko an mour in ippān doon. Ak bōro ko retiljek em̧ōj kar jei. “Aolep ro rej bōd ilo mour in maron̄ in lo kajim̧we kōn Pinmuur eo an Kraist.”

Etke Irooj ej kōtļo̧k en̄taan im kapo bwe ren itok n̄an kōj ilo mour in? Kar kwaļo̧k, ej m̧ōttan karōk eo n̄an ad eddōkļo̧k! Jaar “lam̧ōj kōn lan̄lōn̄6 ke jaar jeļā ke enaaj kar wōr iien em̧m̧an n̄an itok n̄an laļ in n̄an jeļā kōn mour wabanban in. Elder Dallin H. Oaks eaar kwaļo̧k, “Oktak eo me jej aolep aikuji n̄an ioone ilo mour ko ad emakijkij an pidodo an itok kōn en̄taan im apan̄ jān kaenōm̧m̧an im inem̧m̧an.”7

Waanjon̄ak eo an juon sister paineer etiljek ej kōmeļeļeik m̧ool in. Mary Lois Walker eaar m̧are ke 17 iiō dettan n̄an John T. Morris ilo St. Louis, Missouri. Raar kijoon meļaaj ko ippān Rikwojarjar ro ilo 1853, deļo̧n̄ ļo̧k ilo Salt Lake Valley ālkin anniversary eo aer kein kajuon. Ilo iaļ eo aer ļo̧k, raar ioon en̄taan ippān Rikwojarjar ro. Ak en̄taan ko im kapo ko aer raar jab jem̧ļo̧k ke raar tōkāākļo̧k ilo Salt Lake Valley. Ilo iiō eo tok juon Mary, 19 iiō dettan, eaar je: “Juon nejūm̧ ļaddik eaar lo̧tak. … Juon jota ke eaar ruo ak jilu allōn̄ rūtton … juon men eaar unoojdikdik tok n̄an eō, ‘Kwonaaj luuji ajri eo edik nejūm̧.’”

Ilo iien m̧ōlo̧ eo, ājmour eo an nin̄nin̄ eo eaar dikļo̧k. “Kōm̧ ar kōm̧m̧ane jon̄an eo kōm̧ maron̄ e, … ak eaar nanaļo̧k an nin̄nin̄ eo rūttļo̧k. … Ilo Pāpwōde ruo raan eaar mej … im Iaar idaak kap eo emeo jān kanniekū im bōtōktōkū make.” Ak mālijjon̄ ko an raar jab jem̧ļo̧k. Ļeo ippān Mary eaar barāinwōt nan̄inmej, im jilu wiik ālkin mej eo an nin̄nin̄ eo nejier, eaar mej.

Mary eaar je: “Kōn menin iaar ke, ke kar pād wōt ilo iiō jodikdik eo aō, atajinemjen ilo 20 raan ko rekkadu, an ļeo pāleeō im ajri eo emake nejū, ilo juon āne ekāāl buki m̧ail ko jān ro nukū im kōn elōn̄ apan̄ ko im̧aaō … im iaar kōņaan menin barāinwōt, maron̄ mej im koba ippān ro rejitōnbōro.”

Mary ej wōnm̧aanļo̧k wōt: “Juon joten Jabōt iaar etetal laļ ippān eo m̧ōtta. … Iaar kememej jako eo an [ļeo ippa] im aō ajimakeke im Iaar jan̄ in limō iaar maron̄ lo, āinwōt n̄e en kar juon ettōņak ilo kōļmānļo̧kjeņ eo aō, apan̄ ko reļļap an mour in imaron̄ in kar en̄jake im en̄jake lukkuun m̧ool kōn kajoor eo eļap. Juon burom̧ōj eļap eaar io̧ktok eō, bwe rikōjdāt eo ejeļā ia eo n̄an luko̧rko̧re kōj, ak [Rilo̧mo̧o̧r, Jisōs Kraist] emaron̄ in lo̧mo̧ren. Kōn … jipan̄ eo letok jān Jemed, Iaar maron̄ in jeļm̧ae aolep kajoor me rej jelm̧ae ņae eō ilo iien in.8

Mary eaar katak ilo tōre eo ej 19 an iiō bwe Pinmuur eo ej letok n̄an kōj bwe aolep ro rej bōd ilo mour in maron̄ in lo kajim̧we―jekdo̧o̧n burom̧ōj ko reļļap.

Pedped 2: Ewōr kajoor ilo Pinmuur eo letok n̄an kōj n̄an anjo̧ ioon lukkuun pikitokin armej ak kōrā im erom rikaļoor ro rem̧ool an Jisōs Kraist.9

Ewōr juon iaļ n̄an jipan̄ kōj jeļā n̄āāt eo jaar katak juon katak ak pedped an ko̧jpeļ eo. Ej n̄e jej maron̄ in katakin katak eo ak pedped eo ilo juon wāween me juon ajri emaron̄ in meļeļe. Juon kein jipan̄ eo eaorōk n̄an katakin ajri ro n̄an meļeļe Pinmuur eo ej juon men āinwōt loe ilo juon katak an Būraimere. Bōlen menin emaron̄ in jipan̄ kōj ilo ad katakin ajri ro nejid make, ajri ro jibūd, ak ro m̧ōttad jen kabun̄ ko jet ro rekōņaan meļeļe aorōk in katak in.

“Juon [kōrā] eaar etetal itererein juon iaļ im wōtļo̧k ilo juon ron̄ em̧wilaļ [e] ejjab maron̄ in tallōn̄. Jekdo̧o̧n ta eo [liin] eaar kōm̧m̧ane, [liin] ejjab maron̄ in tallōn̄ kōn [e make]. [Kōrā] eo eaar kūr n̄an jipan̄ im kar m̧ōņōņō ke juon eo ejouj eaar ron̄ [e] im lelaļļo̧k juon jikin uwe ilo ron̄ eo. Menin eaar kōm̧m̧an bwe [liin] en diwōj jen ron̄ eo im bar bōk anemkwoj eo [an].

“Jej āinwōt [kōrā] eo ilo ron̄ eo, Jerawiwi ej āinwōt wōtļo̧k ilo juon ron̄, jejjab maron̄ in diwōj jān e kōn kōj make. Ejja āinwōt eo ejouj kar ron̄ an [kōrā] eo lam̧ōj n̄an jipan̄, Jemedwōj Ilan̄ eaar jilkintok Nejin Emake Wōt n̄an kōm̧m̧ane juon wāween n̄an deeor. Pinmuur eo an Jisōs Kraist emaron̄ in keidi n̄an lelaļļo̧k jidik jikin uwe eo; ej kōm̧m̧an bwe jen wanlōn̄tak jene.”10Ak Riļo̧mo̧o̧r eaar do̧o̧rlaļļo̧k jikin uwe eo, Eaar, wōlaļļo̧k ilo ron̄ eo im kōm̧m̧ane ijo em̧m̧an tata n̄an kōj n̄an kōjerabal jikin uwe eo.”11 Ejja āinwōt [kōrā] eo ilo ron̄ eo eaar aikuj tallōn̄ lōn̄tak ilo jikin uwe eo, jej aikuj in ukweļo̧k jen jerawiwi ko ad im pokake pedped ko an ko̧jpeļ eo im kain̄i ko n̄an tallōn̄ lōn̄tak im kōm̧m̧an bwe Pinmuur eo en jerbal ilo mour ko ad. Kōn menin, ālkin ijo jemaron̄ kōm̧m̧ane, Pinmuur eo ej kōm̧m̧an bwe jen erom erreo n̄an ro̧o̧l n̄an im̧aan mājen Jemedwōj Ilan̄.”12

Raan ko ļo̧k iaar jeram̧m̧an n̄an ioon juon paineer in raan kein, juon jiron̄ ejitōnbōro nejin Anij im ej kab oktak n̄an Kabun̄ in ilo Chile. Liin ej juon m̧am̧a eo emake iaan kōn ruo nejin ļaddik. Kōn kajoor in Pinmmur eo, liin eaar maron̄ likūt mour eo an m̧okta im ej kiiō m̧ool ilo kajieon̄ erom juon rikaļoor em̧ool an Jisōs Kraist. Ilo aō ļōmņak kake e, juon pedped kar katakin jān Elder David A. Bednar ejiktok ilo ļōmņak eo aō: “Ej juon men n̄an jeļā bwe Jisōs Kraist eaar itok n̄an laļ in n̄an mej kōn kōj—bwe ej aorōk im pedped eo n̄an katak eo an Kraist. Ak jej barāinwōt aikuj kam̧oolol bwe ikdelel eo an Irooj, kōn Pinmuur eo An im kōn kajoor eo an Jetōb Kwojarjar, n̄an mourilo kōj—ejjab n̄an tōl wōt kōj ak barāinwōt n̄an kōmaron̄ kōj.”13

Ke sister in Chile in im n̄a kar ekōnono kōn ekōjkan pād wōt ilo iaļ eo ej tōl n̄an mour indeeo, eaar m̧ōņōņō ilo kam̧ool n̄an n̄a bwe eaar kālet n̄an wōnm̧aanļo̧k wōt ilo iaļ eo. Eaar jejļo̧k jān iaļ eo enan̄in aolepān mour eo an, im eaar kwaļo̧k bwe eaar ejjeļo̧k “ijōkaņe” jejļo̧k jān iaļ eo me eaar kōņaan n̄an bar bōk ilo mour eo an. Kajoor in kōmaron̄ eo an Pinmmur eo ej mour itulowaan. Em̧ōj an jeje ilo būruwōn.

Kajoor jab in ejjab wōt n̄an kōmaron̄ kōj n̄an tallōn̄ jān ron̄ eo ak ej barāinwōt letok n̄an kōj kajoor eo n̄an wōnm̧aanļo̧k wōt ilo iaļ eo eaidin̄ im aidik ej tōl ļo̧k n̄an im̧aan mejān Jemedwōj Ilan̄.

Pedped 3: Pinmuur eo ej kein kam̧ool eo eļaptata ewōr ippād kōn iakwe eo an Jemād n̄an ajri ro Nejin.

Enaaj kar em̧m̧an n̄an kōj n̄an ļōmņak kōn ļōmņak in jān Elder Oaks: “Ļōmņak kōn būrom̧ōj eo an Jemedwōj Ilan̄ n̄an jilkintok Nejin Em̧m̧aan n̄an en̄taan kōn jerawiwi ko ad. En̄in ej kam̧ool eo eļap kōn iakwe eo An n̄an kōj kajjojo.!”14

M̧akūtkūt in iakwe eo eļap aikuj in jilkinļo̧k kōj kajjojo n̄an bukieed ilo jar ettā n̄an kam̧oolol Jemedwōj Ilan̄ kōn iakwe kōj bwe En kar jilkintok Nejin Emake Wōt im Nejin ewāppen n̄an en̄taan kōn jerawiwi ko ad, rūb bōro ko ad, im aolep men ko rejjab jejjet ilo mour ko ad kajjojo.

Kememej ke kōrā eo Būreejtōn Uchtdorf eaar kōnono kake jem̧aanļo̧k? Eaar ba: “Juon kōrā ke eaar ioon apan̄ im būrom̧ōj ilo aolepen mour eo an eaar dānin kōm̧jalaļ, ‘Iaar kile bwe Iaar āinwōt 20 dala eo em̧ōr―eno̧kno̧kjōkjōk, po̧tak, eto̧o̧non, im m̧ōr. Ak Ij āinwōt juon 20–dala. Eaorōk ippān jet men. Men̄e Ijjab lukkuun in āinwōt im men̄e kar kōtmetak eō im kar kōjerbal eō, Ij aorōk in wōt likieo in 20 dala in.’’’15

Kōrā in ejeļā bwe ej juon jiron̄ ejitenbōro nejin Jemedwōj Ilan̄ im bwe eaar aorōk n̄an E n̄an jilkintok Nejin n̄an pinmuur kōn e, make. Aolep sister ilo Kabun̄ in rej aikuj jeļā bwe kōrā in ejeļā―bwe ej juon jiron̄ ejitenbōro nejin Anij. Ekōjkan jeļā aorōk eo ad n̄an E ukōt ekōjkan ad kōjparok bujen ko ad? Ekōjkan jeļā aorōk eo ad n̄an E jelet ikdelel eo ad n̄an kwaļo̧k n̄an ro jet? Ekōjkan jeļā aorōk eo ad n̄an E kōļapļo̧k ikirelel eo ad n̄an jipan̄ ro rej aikuj meļeļe Pinmuur eo āinwōt ad jeļā—itu jo em̧wilaļ? N̄e kajjojo iaad ewōr ippān katak eo an Pinmuur eo je itum̧wilaļ in būruwōn, innām jenaaj jino erom kain armej ro eo Irooj ekōņaan bwe jān erom n̄e Ej bar itok. Enaaj kile kōj āinwōt rikaļoor ro an rem̧ool.

Kōm̧m̧an bwe Pinmuur eo an Jisōs Kraist en juon “oktak ekajoor” en pād ilo būruwōd.16 Ilo ad ruj n̄an katak in, kar kwaļo̧k jen enjeļ ro an Anij n̄an “lan̄lōn̄ eļap,”17 Ij kalim̧m̧ur bwe jenaaj en̄jake āinwōt an armej ro an Kiin̄ Benjamin kar en̄jake. Ālkin aer kar jar ekajoor bwe Pinmuur eo en jerbal ilo mour ko aer, raar obrak kōn lan̄lōn̄”18 im “raar m̧ōņōņō n̄an deļōn̄ļo̧k ilo juon bujen ippān … Anij n̄an kōm̧m̧an ankilaan, im pokake kien ko an ilo aolep men otemjej.”19 Kōm̧m̧an, kejparok, im m̧ōņōņō ilo bujen ko ad naaj menin kam̧ool bwe Pinmuur eo an Jisōs Kraist ej lukkuun jeje ilo būruwōd. Jouj im kememej pedped kein jilu, sister ran:

  1. 1.

    “Aolep ro rej bōd ilo mour in maron̄ in lo kajim̧we ilo Pinmuur eo an Kraist.20

  2. 2.

    Ewōr kajoor ilo Pinmuur eo letok n̄an kōj n̄an anjo̧ ioon lukkuun pikitokin armej ak kōrā im erom rikaļoor ro rem̧ool an Jisōs Kraist.21

  3. 3.

    Pinmuur eo ej kein kam̧ool eo eļap tata ewōr ippād kōn iakwe eo an Jemen n̄an ro Nejin.22

“Ālkin raan kein, Jeova ej ba, Inaaj likūt kien eo Aō ilo er, im je e ilo būruweir; im Inaaj Anij eo aer, im renaaj armej ro doō.”23 Ij kūr kōj wōj kajjojo n̄an kajjjitōk ippān Irooj n̄an je pedped ko an Pinmuur eo ilo būruwōd. Ij kam̧ool bwe rej lukkuun m̧ool. Ilo etan Jisōs Kraist, amen.

Show References

    Kakeememej ko

  1.  

    1.  Doctrine and Covenants 1:38.

  2.  

    2.  Kallim̧ur M̧okta: Gospel Doctrine Teacher’s Manual (2001), 198.

  3.  

    3.  Jeremaia 31:33–34; kakobaba.

  4.  

    4. Jeffrey R. Holland, “Roundtable Discussion,” Kweilo̧k eo an Ritōl Peļakin Laļ in, Pāb. 9, 2008, 28.

  5.  

    5.  Preach My Gospel : A Guide to Missionary Service (2004), 52.

  6.  

    6.  Job 38:7.

  7.  

    7. Dallin H. Oaks, “The Challenge to Become,” Liahona, Jān. 2001, 42; Ensign, Nob. 2000, 33.

  8.  

    8. Autobiography of Mary Lois Walker Morris (copy in possession of Linda Kjar Burton).

  9.  

    9. Lale David A. Bednar, “Pinmuur eo im Iaļen Mour Wabanban in,” Liaona, Epr. 2012, 12–19; Ensign, Epr. 2012, 40–47.

  10.  

    10.  Primary 7: New Testament (1997), 104.

  11.  

    11. Joseph Fielding Smith, Doctrines of Salvation, comp. Bruce R. McConkie, 3 vols. (1954–56), 1:123.

  12.  

    12.  Primary 7 , 104.

  13.  

    13. David A. Bednar, Liahona, Epr. 2012, 14; Ensign, Epr. 2012, 42.

  14.  

    14. Dallin H. Oaks, “Love and Law,” Liahona im Ensign, Nob. 2009, 26.

  15.  

    15. Dieter F. Uchtdorf, “Kom̧wij Pā ko Peiū,” Liaona im Ensign, Māe 2010, 69.

  16.  

    16. Lale Alma 5:12–14.

  17.  

    17.  Mosaia 3:3.

  18.  

    18. Lale Mosaia 4:1–3.

  19.  

    19. Lale Mosaia 5:2–5.

  20.  

    20.  Preach My Gospel, 52.

  21.  

    21. Lale David A. Bednar, Liaona, Epr. 2012, 12–19; Ensign, Epr. 2012, 40–47.

  22.  

    22. Lale Dallin H. Oaks, Liaona im Ensign, Nob. 2009, 26.

  23.  

    23.  Jeremaia 31:33; kakobaba.