Cha’an Nibe Pi’ e Ayuw

Rok President Henry B. Eyring

Bin Somm’on e Counselor u lane Bin Somm’on e Presidency


Henry B. Eyring
Ra gel gelngim ma gara nang e pi n’en ni ngam rrin’ ni ngam pigpig.

Gub falfalen’ ngay ni gubay romed ko biney e balayal’. Pi ppin ko Fare Galasia rok Yesus Kristus e ke yan nga m’on nike mang e pi walageg ni ppin ni rogon ni ke weliy e chitingin Joseph Smith, i Lucy Mack Smith, nike weliy ni aray rogon: “Ngad ayuweged gadad, matangiy gadad, fal’eg lanin’uy nge kanawo’ ni ngeyog, ni ngeyog ni ngad pired nga but’ u ta’abang u tharmiy.”1

Bay dalip yang ko re buguthin nem ni rib falel’ ko pin’en ni ngan muruwliy u lane tigil e falfalaen’ rok Got. Bin somm’on e ngan tu’ufegey. Bin migid e ngad filed ngodad ma gadad fil. Ma bin dalip e ngan paer u ta’abang rok Got.

Fag e biney e balayal’ e ngug ayuweg gimed ni ngam thamiyed gelngin nib falfalen’ ma be pining Got e magar ko pin’en ni kam mu’ gaed i rrin’ ni gimed be ayuweg gimed ni ngam thap gaed ko re gol nem. Ma, bin migid, e ngug weliy boech ban’en ni bay buch ko muruwel ni gimed be rrin’ u ta’abang.

Boed fapi ppin ni kafram, kam rrin’ed e n’en nike pining med Got ni ngam mared ngam ayuweged boech e gidii’. U lane 1856, me yoeg profet Brigham Young ngak fapi pigirdi’en Got ni ngar ranoed ngar pi’yed e ayuw ngak e picha’an ni yaed be girngiy e cart roraed u fithik e snow u fithik e burey. Ke ga’ar ko ngiyal’ nem ni ke tu’uf e ayuw ko pi member u lane e conference: “Mich romed, taliw, nge mich rom ko taliw, e ri dabi ayuweg e ya’el romed u lane Celestial Kingdom rok Got, nge taw ko ngiyal’ ni gara’ rrin’ e tin nib mataw’ ni rogon ni gube fil ngomed e chiney. Maroed ngam feked e pi gidii’ nem u dakean e, ma gimed uned ngam rrin’ed e tinem e ban’en nima mus, … fa’anra danga’ ma mich romed e dani mangil.”2

Bukun e ppin u Utah e ra mithmith gaed. Mus ni yaed ba gafgow miyaed suguy e wagon roraed ko urngin ban’en ni rayog ni ngar pi’yed nge gubin ni rayog ni ngar kunuyed rokboech e gidii’ ni ngan ayuweg e picha’an ni kar magawon gaed. Reb ko pi ppin’ nem nib gel e yol ni ga’ar, “Dariy bangliyal’ ni ke fal’ u wun’ug ma, gura yoeg ni, demtrug e muruwel ni gube rrin’ u fithik e falfalen’ u lane yafas rog, ni bachan ni yib ta’areb ko re thomthom nem.”3

Napan ni kan mu’ ko ayuw make raenraen e snow, ma ku fare ppin e yoloey ba duwer u lane gumircha’en nib michmich ni ga’ar: “Mang e bin migid ni rayog ni picha’an ni yaed ba’ adag ni ngar pi’yed e ayuw ni ngar rrin’ed?”4}

Rran rodaed, ma ulung i ppin nib gel u dakean e fayleng e kar ted e mich roraed ko muruwel u lan bukun e nam. Ma yaed ma fith u lane gumircha’raed nge meybil roraed e ta’ab duwer ni mornga’agen e muruwel roraed u lane yafas roraed.

Ra bagmed ma bay e birok e magawon nib thil u lane kanawo’ rom iyan ko yafas nib manechubog. Boech e bukun ban’en ni manang u lan bukun e duw, ma boech e kafin ni tabab gow ko ayuw u lane yafas rok. Ra bea’ mab thil u lane rran’ rok nge magawon rok. Machane gimed gubin ma gimed e walag ni ppin nge ppin ni faak e Chitamangdad nu Tharmiy, ni ir e manang ma be yaliy med ni gimed gubin.

N’en ni kam rrin’ed u ta’abang ni falel’ e ngan ayuweg, yaliy, man ayuwegey. Gaag e kuguy e n’en nike buch ni dalip yang nike yan in e rran napan ni kuguy e ayuw romed ngak reb e ppin. Ya bachane gaag e chitamangin, ma gube pining e magar ngomed ma guba adag ni ngug pining e magar ngak Got, ni be gagyeg nag e cha’ nima yani nang salpen bee’.

Elizabeth ni faak mow, nima paer u lan reb e nam nge taym ni rib thil ngaray, e bay u tabinaew ni yow e bulyol rok ni dalip e duw rok. Reb e bitir rok e ke yaen dalip e wik nibe un ko gredstart. Nel’ e pul nib diyan Elizabeth ma bea athapeg e bin dalip e bitir ni nge gargeleg, ni ke yoeg e pi togta ni kureb e bulyol. Pumo’on rok, Joshua, e bay ko muruwel.

Napan nike guy nibe yib e racha’ ma be alamrin ni be yib, me kol nag e pumo’on rok u telefon. Me yoeg e pumo’on rok ngak ni nge kol nag e ambulance ma bay ri mada’ gow u aspital, ni 20 e ment ko tabinaew rok. Um’on ni ban ni nge col, me rung’ag bea’ nibe tutguy e maab rok.

U langan fare maab me gin’ nike guy e cha’ ni yow nga biyang ko visiting teaching ko Relief Society. Dariy e gin ni ngar ranow ngay e binem e kadbul. Cha’ ni yow e ke thamiy rok ninge yib nge guy.

I ayuweg Elizabeth nga lane karo rok. Mar taw gow nga aspital um’on ni taw Joshua u lan in e ment ko muruwel rok. Me yoeg e togta ni lan raliw’ e ment ma ngan fek fare bitir ni ngan sey ni ngan ayuweg Elizabeth nge faak. Boechi modway ni rib achig e yib nga fayileng, nibe yoer nib ga’ luman, nib m’on ko ragag nge laal e wik ni kan leam nag ni ra yib. Ta’areb e pound rok, ragag nge ta’areb e ounces (765 g). Machane ba fos, ma ku arogon i Elizabeth.

Thin rok Lucy Mack Smith e ke buch e ra rran nem. Ba member nib yul’yul’ ko Relief Society e mithmith rok fare Kan ni Thothup, ke yaliy, ayuweg, me pi’ e gapas ngak e walagen u lan gilulungun Got. Ir nge bukun biyu’ boech e picha’an ni kar pi’yed e ayuw ngak e gidii’ e gathi kemus nibay e magar rok e picha’an ni kar pi’yed e ayuw ngoraed nge picha’an ni tu’uf roraed machane kurok Somoel.

Mu tafneymed ko thin Rok ko falfalen’ ngak e picha’an ni gathi ri yi manang e tu’ufeg roraed: “Machane fare Pilung e ra fulweg ngoraed me ga’ar ngoraed, Gube ga’ar ngomed, Rogon ni kam rrin’ed ngak bee’ ni pi walageg, ma kam rrin’ed ngog.”5

Machane n’en ni ke buch ko reb e ppin ko Relief Society nike taw ni fal’ e taym riy ni nge ayuw e ke ga’ nag gelngin ni ta’areb e ppin. Ba’aray bang ko fare mulwol nike pi e bisof rok Elizabeth ngak Elizabeth nge Joshua u lane aspital u lan bukun e awa napan nikan gargeleg fare modway: “President ko Relief Society e ke fal’eg rogon gubin ban’en. Gamad be ngongliy ba tunom ni ngan ayuweg fare gal bulyol rom u tabinaew ya ngeyog ni nge sul sul Elizabeth nga aspital napan ni kubay fachi modway u rom ni daworni tunguy fithngan. Ku rrin’ed ngak boech e gidii’ ni ta’ab ban’en, nike n’uw napan, ma gidii’ [rodaed] e yaed ba adag ni ngar ayuw gaed.

Me ulul busof nibe non, nibe non rok nge ward: “Ku bad nga hospital mag gamad paer fare gal bitir u lane senggil nima fafal e bitir riy fa’anra dabun e pi chitingngiy ni nge tay raed nga biyang.”

Me arame: “Dabgu talegned e tunom romad ni daworum taleg, arogon. Kemus ni ngan noeg ngom ni dam wori nag e pin’en ni rayog [ma ra rrin’] ni ngug rrin’ed.”

N’en ni kar rrin’ed ko fakag e ke yag rok ni nge paer rok fare madwoy ni faak, napan ni kafini dabey, bulyol ni faak ni rib achig.

Me aram me ning ko fare mulwol nima pi’ e pi ppin ngoraed ko thin roraed u dakean e fayleng ni ngar ayuweged giyad ni fan ngak fare Masta: “Mu cha’ariy fare mich.”

Gubin e pin’en nib thilthil romed ko pi magawon nge pin’en nike buch ni kafram, ma rayog ni nggog ngomed ban’en ni mornga’agen e n’en ni bay nga m’on romed. Napan ni gimed ra cha’ariy fare mich ma gara pir’egem nike piningem Somoel ni bukun yay ni ngam ayuweg bee’ nike tu’uf e ayuw rok napan ni dar mu’g nib tu’uf. Ra m’ug ni ba muruwel nib mugnin ma sana dabyog. Napan ni ra yib e n’en ni ngam rrin’, ma dabi m’ug ni sana ba tu’uf e ayuw rom fa kubea’ e rayog ni nge pi’ e ayuw nib moem rogon.

Tafineyem riy ni napan ni ra pag dad Somoel ni ngan guy bee’ nike magawon, ma gadad be tay fan fare Samaritan ni mangil ko n’en ni dani rrin’ nib alamrin ko n’en nike rrin’. Dani yaen u barba’ demtrug ni facha’ nibe chuur u kanawo’ ni dani nang ko mini’ ma sana bee’ ni dubun dakean. Ke rrin’ rogon ni rayog rok me tay nga pa’ boech e gidii’ ni ngar rrin’ed boech. Ke rrin’ e binem ya manang fan ni ayuw e n’en ni rayog ni nge rrin’ bee’.

Pin’en ni ngan fil ko binem e yaat e rayog ni nge gagyeg nag med ko demtrug ban’en ni ra buch rom nga m’on. Tinem e n’en ni ngan fil e bay rom napan ni ka gab bitir nge tin ni ke buch rom e chiney.

Ta’abiyay, sana gubin yay, ma kam gin’ gaed napan ni kam guyed bee’ nib tu’uf e ayuw rok. Rayog ni bee’ ni bay e bitir rok, labthir, walag nib ppin, fa bitir nike m’ar fa ba m’ar. Tu’ufeg rom e ba alamrin ko tin ni ba adag e gidii’ ko yafas ni dariy e magawon riy. Ere mag tabab i pi’ e ayuw.

Boed facha’ nibe chuur u lan fare yaat u lane chep nib thothup ni mornga’agen fare Samaritan ni mangil, boed ni ayuw nib tu’uf e ke mang e ayuw ni dabyog ni ngam pi’ ni go’gur. Fare Samaritan e ke tu’uf rok ni nge pi’ facha’ nibe chuur ngak bee’ nibay e milaey’ rok ni nge ayuweg. Muruwel u ta’abang ni ngan ayuweg boech e gidii’ nib tu’uf e ayuw roraed e bang ko tunom rok Somoel.

Gubin ngiyal’ ma pi bisof e ma pining e chonggin e tabinaew ningan ayuwegney napan nike tu’uf e ayuw. Bukun fan ko binem e n’en ni yibe rrin’. Bin tha’abi ga’fan e ngan pi’ ngak e gidii’ e tawa’ath ko tu’ufeg nima yib ni yibe ayuwegney.

Kam guy ma kam thamiyed e binem e tawa’ath. Napan ni gara tu’ufeg bee’ ni demtrug ni dani n’uw napan ma kam thamiy e tu’ufeg rom ngak e cha’an nikam ayuweg. Napan ni yibe pi’ e ayuw nike n’uw napan, ma thomthom ko tu’ufeg e be ga’.

Gadad e gadad ba gidii’, ma binem e tu’ufeg e ra yib e chachalbey nge magawon riy nga fithik. Iraram reb fan ni ma pag dad Somoel ni ngad ayuweged e picha’an ni gadad bay u ta’abang nge mada’ ko picha’an nib tu’uf e ayuw roraed. Iraram fan nike sunmiy Somoel e ulung ni ma pi’ e ayuw.

Boech e wik nga tomur ma kan piningeg ni gag reb e ppin ni rugod ni ngan teg u loeg u lane mo’olung ko sacrament ni nggu mang e cha’ ni nge ayuw ko visiting teaching, reb e murwell ni dagnang ni bay. Gube tafineay nag fa’anra manang rogon e falfalen’ rok Somoel ni ke pining ko binem e muruwel. Ba bitir ko fare ppin e ke chalban ni yibe debey, ere ke yan um’on ni rayog ni nggog ngak gelngin ni ba adag ma ba falfalen’ Somoel ngak ko ayuw rok, mich rok, nge miligach rok ni fan ngak boech e gidii’ ni fan Ngak.

Tu’ufeg e picha’an nib tu’uf e ayuw roraed e ba tu’uf ni ngan rrin’ u ta’abang, u ta’abang u fithik e tu’ufeg. Iraram e n’en nibe ngongliy Somoel u fithik med. Demtrug rogon ni gabe rrin’ ma gimed ba tu’uf Rok.

Iraram fan ni gimed ma yoer nag bee’ nike yim’ ni kum ayuweged nike n’uw napan. Ayuw ni damur pi’ ngoraed e rayog ni ngan thamiy ni boed nike chuw ban’en rom ni rib tu’uf rom ko ban’en nima mus. Ku rung’ag ko ba ppin—ni kug nang nike n’uw napan—ni dani n’uw napan, wik nike yim’ e pumo’on rok, ni yoeg e mich rok u fithik e falfalen’ nike yag ni nge ayuweg nge taw ko tomuren e yafas rok. Yilu’ rok e dar magagyal machane tingi’ rok e rib magagyal.

Demtrug ni ayuw ni gabe pi’ ngak e gidii’ e ba falel’ e tawa’ath riy, ma kam filed ni ban’en nima amith, kirbaen’, nge salpiy ni mutrug urngin ko n’en ni rayog. Cha’an nibe pi’ e ayuw nike n’uw napan e rayog ni nge mang e cha’an nike tu’uf e ayuw rok. Ma fa’anra buch e binem ma cha’an ni gabe ayuweg e ra yo’or e tin ninge tu’uf rok.

Somoel, ni ir e fare Masta ko gidii’ nib tu’uf e ayuw roraed, e ke yoeg e pi thin ney ngak e picha’an nima pi’ e ayuw nikan yoloey nga lane fare Babiyor ku Mormon nike pi’ King Benjamin: “Fan ko nge yog ni m’ay machaan e pi denen romed… Gu ba’adag ni thingar mu pii’ed boech ban’en romed ngk’ e pi’in gafgow, ni gubin e gidii’ nra bee’ ma be yaen u rogon e chu’uw ni bay rok’, ni boed rogon ni ngan pii’ gane pi’in be yim’ ko mak’iy, ngan pii’ e mad ko pi’in ni dariy e mad roraed, ngan nang salapen e pi’in nib m’ar min pii’ ngoraed e tin nib t’uf roraed, ni fan ko ya’el nge fan ko dagur, ni boed rogon ni yaed ba’adag.”6

Machane me arame ga’ar ngak e picha’an ni darma rrin’ e muruwel nib n’uw napan u fithik e tu’ufeg: “Mi gimed guy rogon ni pinn’ey e ngan rin’ u fithik’ e gonop nge yaram; ya det’uf ni nge miil bee’ nib mo’on [fa cha’ nibe pi’ e ayuw] nib machreg nga rogon gelngingin. Nge ku bayay, rib t’uf ni thingari gonop, ni gomanga yog riy ni fek puluwon; ere, gubin ban’en ma thingar nrin’ nib yaram.”7

Binem e thin e rayog nib momaw’ ni ngan rrin’ napan ni ngam mel’eg rogon e n’en ni ga ba adag ni ngam rrin’ ni ngam ayuweg boech e gidii’ nge tirom ban’en ni ngam rrin’ ya ngeyog ni rayog ni ngam pi’ e ayuw. Rayog ni kam guyed e picha’an ni be magagawon ko pin’en ninge rrin’. Reb e kanawo’ e rogon ni ngam ayuweg bee’ nibe chugur ko tomuren e yafas rok fa lane tabinaew rom napan ni kam chugur ni ngam magar riy.

N’en ni gamanang ni mornga’agen fare wo’en e thap e rayog ni nge gagiyeg nigem ko pin’en ni ngam rrin’ nib momaw’. Binem e reb fan nike yoeg Lucy Mack Smith ni pi ppin e “ngeyog e kanawo’” ngoraed.

Ba mangil ni nge mich u wun’uy nib alamrin ni Somoel e ke pi’ fan ko gubin e bitir ni faak Got napan ni yaed be yaen u fithik e magawon u lane yafas. Ke fil e gonop nib ga’fan ko fare wo’en e thap ngak fare Profet Joseph ko biney e kanawo’ napan nibe magawon ni nge nang fan me yaen u fithik e gafgow ni boed ni dar m’ay: Ke yoeg Somoel ni fa’anra athamgil nib mangil rogon, ma ra pi’ Got e tawa’ath rok u tharmiy.8

Cha’an nibe yaen u fithik e magawon nib alamrin e ma ayuweg dad ni ngad guyed fadad. N’en ni kan dugliyed e ra mang ni: “Mang skul e thingar gu leak nib fal’ ngog ni ngug ayuweg e gidii’ nib tu’uf rog mug ayuweg ni nge ‘athamgiliy nib mangil rogon’?” Fan ngodaed ni ngad rrin’ed ni ngeyog ni ngar gel nag e mich rok ngak Kristus, me paer e athap ko yafas nib manechubog roraed, mar gayed rogon e tu’ufeg, fare adag rok’ Kristus nib manechubog, nge taw ko tomuren e yafas roraed.

Kuguy e pi ppin u lan fare gilulunguy nima rrin’ e binem nib mangil rogon, ko biyay ngo biyay. Mu leam niged e ngiyal’ ni kam mared nga lane senggil ko gin ni bay e Relief Society fa Primary fa young women ko mada’. Mu sap ko pi sasing, fapi thin ko chep nib thothup u dakean e board, nge yilu’ u owchen ba ppin nike thimur.

Sasing ko Tathapeg fa thin Rok e rayog ni dabi magagyal, machane gamnang ni bay bee’ nike thamiy napan e ra awa nem nib riyul’ mab ga’fan e Bayul Rok ni rogon ko re balayal’ ney. Rayog ni dariy e sasing ko temple nib thothup fa thin ni “Tabinaew e Rayog ni Nge Manemus,” machane rayog ni ngam guy e athap ko pi tingi’ ko pi ppin nge pifaak raed.

Ma kam guyed, rogon gag, ba cha’ nima yani nang salpen bee’ ayuweg ba ppin nibe magawon ni ayuw rok ngak bee’, demtrug rogon ni daryog rok, e ba tu’uf mab ga’ fan. Pi president ko Relief Society nib mangil e kar pir’eged e pi kanawo’ ni ngan pag e picha’an nib tu’uf e ayuw roraed ni ngar ayuweged boech e gidii’. Yaed ma sunmeg e kanawo’ ko ppin ni ngar athamgileyed e pi magawon napan ni yaed be ayuwegiyad u fithik e adag rok Kristus nib manechubog. Binem e rayog nib mu’un e athamgil ko cha’an nike magar ninge togfan man ayuweg.

Fapi ppin e ri n’anggined ngeyog ni yibe sag’al i kii’eg ban’en ngay u wun’uy ngak e picha’an ni yaed be yaen u fithik e gafgow. Oren e gidii’ e be fek bukun e magawon ma yaed be tabab nag ni dakur leam niged giyad nge tin ni yaed ba mangil ngay. Gadad ma ba’uth nag e magawon roraed napan ni gadad ba sag’al ko pi mo’waer roraed man falfalen’ ko pin’en nib mangil ni gadad be guy roraed man pi’ e ayuw ngoraed. Somoel e ma rrin’ e binem. Ma rayog ni ngad laked e kanawo’ Rok—Ir e cha’ ni tha’abi cheg nag i pi’ e ayuw ngak gubin e gidii’.

Baga’ ni gadad be weliy gelngin e ulung ko ppin u lane Galasia rok Yesus Kristus. Ngarin filed rogon ni ngad poyed ni fare Tathapeg e gubin ngiyal’ ma bay u lan fare ulung napan ni gadad ra Pining.

Bukun ni bukun, ma gadad ra guy e pifaak Got ni yaed be pining e pi ppin nga lan fare ulung. Napan ni ra yib fapi ppin nga lan fare ulung mar gayed e gin ni ngar pired ngay nga but, ma yaed ra rung’ag luman bee’ nibe non nib munguy, “Wenig, moey ngam paer aray nga to’obeg.”

Gadad ra rung’ag e pi thin nem nga m’on napan ni guy Lucy Mack Smith fapi ppin ni yaed ra “paer u ta’abang u tharmiy.” Dabyog ni ngad fal’eg rogdad ko ra rran nem nib machrag. Ra yib u fithik bukun e rran nge bukun e duw ni yibe ayuwegney ma yibe fek fapi thin ko yafas nib manechubog nga lan gumircha’dad.

Meybil rog e ngeyog ni gadad gubin ma gadad bay u ta’abang u lan fare rran nga m’on rodad nib falel’. Gube yoeg e mich rog ngomed ni athap romed ko pi rran nem e ra ta’aborogon. I Somoel Yesus Kristus u dakean fare Bayul Rok nib manemus e ke n’anggin ke yag ngomed. Chitmangdad nu Tharmiy e ma rung’ag ma ma fulweg e meybil romed u fithik e mich ni fan ko kanawo’ nge ayuw ni ngam athamgiliyed e muruwel romed Ngak.

Fare Kan ni Thothup e kan pi’ ngomed nge picha’an nib tu’uf romed nifan. Ra gel gelingmed ma gimed ra nang rogon nge gelngin ni rayog ni ngam ayuw. Fare Kan Thothup e ra pi’ e gapas ngomed napan ni sana gimed be tafney ni, “Ku rrin’ gelngin ni rayog rog?”

Gube micheg ni ra paer Somoel romed me ngongliy me dag e kanawo’ ngomed napan ni gimed be pi’ e ayuw napan nike tu’uf e ayuw make magawon e picha’an nib tu’uf Rok. U dakean fithngan Yesus Kristus, amen.

Show References

    Notes

  1.  

    1. Lucy Mack Smith, u Daughters in My Kingdom: The History and Work of Relief Society (2011), 25.

  2.  

    2. Brigham Young, u Daughters in My Kingdom, ,36.

  3.  

    3. Lucy Meserve Smith, u Daughters in My Kingdom,37.

  4.  

    4. Lucy Meserve Smith, u Daughters in My Kingdom,37.

  5.  

    5.  Matthew 25:40; .

  6.  

    6.  Mosiah 4:26.

  7.  

    7.  Mosiah 4:27.

  8.  

    8. Muguy ko Doctrine and Covenants 121:8.