Ke Kowos Loangwelah Tuhlihk Muhtwacn se uh, Kowos Loangwelah We uh

Sel Mary N. Cook

Mwet in Kahsruh Se Met ke Prestuhnsi Luhlahp luhn Muhtwacn Fuhsr


Mary N. Cook
Nwacsnwacs lowos fah ahkinsewowoye mwet mahtuh lowos, sucu lowos ingena, ac mwet ke sucu ma sonna tuhkuh uh.

Pacl wo se luhk in sramsram nuh sin muhtwacn fuhsr luhlahlfongi kuh ke Alu uh. Kuht liye kowos ahkfuhlwactye olweacng lowos ke kowos kapkapwack ke moul uh, ac kuht etuh moul nwacsnwacs lowos fah ahkinsewowoye mwet mahtuh lowos uh, sucu lowos ingena uh, ac mwet ke sucu lowos tok uh, oacna ke Prestuhn Gordon B. Hinckley el fahk ah, “Ke kowos loangwelah tuhlihk muhtwacn se uh, kowos loangwelah we uh.”1

Moul lowos in oacna sie mwet ma oruh olweacng uh muhtwacwacack ke pacl se kowos pacptaislac ac eis mwe sang luhn Nguhn Muhtahl. Tuhtahflah na ke wik nuh kwewa ke toeni ke kuhfa luhn Leum, acn muhtahl se ma kowos ahksasucye olweacng luhn pacptais lowos an we. Ingena pacl lowos in ahkolah in oruh olweacng luhn tempuhl uh. “Akwuck muhtahl ac olwelah uh kuh in orek ke tempuhl muhtahl uh ac oruh [kuht] in kuh in fohlohk nuh yurin God ac nuh sin sucu [lasr] uh in tuhkweni nwe tok.”2

Tu ke acn muhtahl uh nuh sin mwet mahtuh lowos an. “Mwet nuh kwewa suc tuhkuh nuh facluh se inge uh oreklac ke we luhn pahpah ninac uh. Oasr kena se in kuht in kuhpahsr nuh sin mwet mahtuh lasr uh.”3 Ke kowos wi oruh sramsram mahtuh luhn sucu uh ac orekma luhn tempuhl, kowos muhsahi akuhpahsri fototo nuh ke moul luhn mwet mahtuh lowos uh in sang akwuck in molwelah nuh selos.

Tu ke acn muhtahl uh nuh suwos sifacna ac sucu fototo lowos an. Mwe srihkasrak suwohswohs lowos an fah oruh ohiyac se ma sang engan wowo, finne ke ohiyacn sikyak luhn sucu lowos an. Sulaclah suwohswohs lowos an fah oruh kowos in fal in oruh ac karihngihn olweacng ma fah orwacni sucu lowos an nuh sie ma pahtpaht.

Tu ke acn muhtahl uh nuh sin sucu fahsruh lowos an. Otwelah in siliyucki nuh sin mukul tomowos an sin pristut muhtahl lun tempuhl ke kowos sramtweack sie u in sucu ma pahtpaht. Tuhlihk nuhtuwos an fah ahkinsewowoyeyuck ke ma pwacye ke kowos orwaclah mwe srihkasrak luhn moul nwacsnwacs ac fahkwack luhlahlfongi fokoko in oruh ip luhn moul lalos ac ahkkahlwemye nuh selos ohiyac ke inkacnek luhn olweacng.

Nga liyacack ip yohk kawihl inge srihpsrihpyak ke International Art Competition tuhfahna orek luhn Mwet Fuhsr. Megan Warner Taylor el orwacni petsac lun computer, oruh sie ohiyac in pacl inge ke puhpuhlyuck luhn Kraist ke muhtwacn fuhsr singucul.4 Nga sonuhl Megan, ac el ahkuhtweyac mwe akucl ke muhtwacn fuhsr ahksingucul ah, suc el ahkuhtweyac oacna sie muhtwacn fuhsr suc nwacsnwacs ac luhlahlfongi kuh, ahkolah in oruh ac karihngihn olweacng muhtahl uh ke tempuhl. Oacna ke muhtwacn fuhsr lahlmwetmwet nuh kwewa, ahkolah lal sifacna tuhkuh ke el sang oacl nuh ke lahm lal, kais sie tul, in moul suwohswohs na. Nga lohacng nuh ke pihrak kahto se ke sifacl ah. Megan el ahkuhtweyac lah pihrak sac ahollah irak ke moul nwacsnwacs luhn muhtwacn fuhsr se inge nuh ke we puhkantwen. Koa soko ahollah irak luhn luhngseac ahkfuhlwact lal nuh sin mwet mahtuh lal ah, ahklukwac ah soko irak luhn ohiyac suwohswohs lal nuh sin sucu lal inge uh, ac koa ahktolkwe ah soko irak ke moul ahkoeyucklac lal nuh ke moul luhn we tok uh.

Nga sun pac sie muhtwacn fuhsr suc ahkoo lal ke ip luhn nguhn met ah irakeacng sie moul in suwohswohs nuh ke we pucspucs.

Ke sie tahfuhn lwen tok kahto ke Septempuh, nga ac mukul tuhmuhk ah tuh muhta lun tempuhl soano pacl wowo in wi ke akwuck luhn tempuhl uh. Chris, kawuck se lasr, utyak nuh infuhkihl sac. Wolacna in liye mukul fuhsr se inge, suc tuhfahna fohlohk liki misin lal ke acn Russia.

Ke tuhkweni sac e muhtwacwacack ah, muhtwacn fuhsr kahto se muhta siskuck. El pihkapak, isracsr srihsrihk, ac sesseslah ke kahlwem. Nga ke etwacl, oruh nga kahkahsrihk ahkkahlwemyeyuc nuh sel. El mahmah fahk inel, Kate, ac nga akihlen inen sucu lal oacna sie sucu ma tuh muhta Michigan acn ma sucu luhk ah tuh muhta we met ah. Kate pa tuhlihk mahtuh se nahtuhltahl ah, suc wik limekosr met ah el fohlohk liki misin lal ke acn Germany.

Ke tuhkweni sac nuhnak se tiac tui in ilyak nuh in mwe nuhnak luhk uh: “Ahkkahlwemyacl Kate nuh sel Chris.” Nga fihliyac pihrihkyuck se inge nuh sahyac, nuhnkuh lah, “Ngac, oyac, fuhkah?” Ke kuht ahkolah in tifoki ah, Chris el tuhkuh in wihlkacs nuh sesr ac nga sruokwacni pacl wowo sac. Nga oluhlma Kate ac mahmah, “Kowos mwet fuhsr moul nwacsnwacs luo suc enenuh in aetuhi.” Nga som liki tempuhl luhngse lah nga oruh mukwilac ke pihrihkyuck luhk.

Kahsruhsr som nuh lohm ah, nga ac mukul tuhmuhk ah sramsramkihn esam lasr ke ma upac ma sun sucu lal Kate ah. Nga etwacllah wo Kate, ac el kahsrweyuc etuh srihpen ngwetngwet engan nga liye lun tempuhl ke lwen sacn.

Kate el srihke pacl nuh kwewa in muhta na ke inkacnek luhn olweacng in suk ke acn muhtahl. El tuhfweyucklac lun lohm se ma oruh ekuh luhn sucu, tuhkweni pruhe, ac lutlutkihn ma suhmuhslah uh oruh lohm sel in acn muhtahl. Ke el srihk ah, el etwaclah ke tempuhl, ac on soko ah “I Love to See the Temple” pa pahiyacn ekuh luhn sucu.5 Ke el tuhlihk muhtwacn fuhsr se ah, el tuni pahpah ninac kiyacl akiyac mwe srihkasrak se in suk acn muhtahl ke elos som nuh in tempuhl sie ekuh in kapihn wik sahyacn som liyeyuck petsac kuh mongo in ekuh.

El luhngse yohk pahpah tuhmwacl ah, ac el orekmakihn kuh luhn pristut lal in kahsrwel oruh olweacng se emet lal ke pacptais. Tohkoh paho fihliyucki fin sifacl ac el eis Nguhn Muhtahl. Kate el fahk, “Nga engankihn in eis Nguhn Muhtahl, ac nga etuh lah e kahsrweyuc in muhta ke inkacnek nuh ke moul ma pahtpaht.”

Moul lal Kate tuhtahflah ke sie ohiyac arlac ahkinsewowoyeyuck ac engan. Ke el yac 14, el muhtwacwacack high school ac luhngse seminary, sie acn muhtahl in lutlut ke wosasuc. Sie lwen ah mwet luti se lal ah muhtwacwacack in sramsram ke ma upac uh ac fahk na pwacye lah kuht nohfohn e fah sun. El fahk nuh sel sifacna, “nga sruhnga ma upac; nga sruhnga lohng ma se inge.”

Wik na ekahsr tohkoh ma pahpah tuhmwacl ah tuhkahkwek ke Sacnri in Istuh se mas na pwacye. Kate el fahk: “Pahpah el mwet na fokoko se; el mwet kahsruhsr loeloes se. Ninac kiyuck ah elyah na pwacye ke masiyacl oruh el usacllah nuh lohm ono ah. Ke ao (tolngoul ohnkohsr) 36 stroke na upac se sonuhl ma oruh inkaiyacn mahnol koflah mukwikwi. El kuh in sahrsahr, tuhsruhk mahnol nohfohn tiac orekma. Nga esam in liyacl ac nuhnkuh, ‘we moh, sikyak. Mwet luti seminary se luhk ah pwacye. Nga sun ma upac,’” Lwen ekahsr tohkoh pahpah tuhmwacl Kate ah misac.

Tahfwelahna, Kate el fahk: “Upac na pwacye. Kowos tiac luhngse in wacngihnlac mwet kowos luhlahlfongi in moul lowos. Nga etuh lah nga kuh in lwelah in kahsrweyuc in kapwack kuh lwelah in ikol moul luhk uh. Nga tiac luhngse sang in kuhnahoslah moul luhk uh, ke srihpen nga tuh matwac yac na 14. Nga srihke in fototo nuh sin Leum. Nga riti ma suhmuhslah nuhtihk uh yohk. Alma sapta 40 ahksuwohsye nuh sihk lah sifil moulyak sac pwacye ac ke Iwaclah luhn Kraist, nga kuh in sifil muhta yurin pahpah tuhmuhk. Nga pruhe pacl puhkantwen. Nga suhmuhslah ke mwe sihmihs luhk pacl puhs. Nga karihngihn wo fahkwack luhlahlfongi luhk in sihmihs. Nga som wi alu ac wi Muhtwacn Fuhsr ke wik nuh kwewa. Nga rauniyucyak sifacna ke kawuck wo luhk. Nga muhta fototo nuh sin sucu wowo luhk ac yohkna nuh sin ninac kiyuck, suc mwe ahkkweye se in sucu lasr ah. Nga suk ke mwe insewowo luhn pristut sin pahpah mahtuh ac kuhtuh mwet sruok pristut sahyac.”

Sulaclah orekna inge, oacna ma luhn muhtwacn fuhsr lahlmwetmwet ah, sang oacl nuh ke lahm lal Kate ah. El mokleyuck ke kena lal in sifil wi pahpah tuhmwacl ah. Kate el etuh lah pahpah tuhmwacl ah etuh ke sulaclah lal ah, ac el tiac luhngse ahktoasryacl. El luhngse sie kuhpahsr ma pahtpaht nuh sel, ac el etuh lah in muhtana ke ikacnek luhn olweacng lal kuh in karihngihn moul lal in otwotyang in kuh nuh sel.

Ma upac uh tiac sahflah, tuhsruhktuh. Ke Kate el yac 21 ac sang pwepuh in misin lal ah, ninac kiyacl ah maskihn kacnsucr. Kate el enenuh in oruh sie sulaclah na yohk srihpac ke moul lal. Kuh el ac enenuh in muhta ac kahsruh ninac kiyacl ah kuh som nuh ke misin lal? Ninac kiyacl ah ituck sie mwe insewowo luhn pristut nuh sel ma olwelah lah el ac wolac liki mas lal. Luhlahlfongi ke mwe insewowo se inge, Kate el ahkwot nuh met ke luhlahlfongi kuh ac tahfwelahna plwacn lal in oruh misin lal.

Kate el fahk: “Nga oaclah ke luhlahlfongi kuh ke tiac etuh na pwacye lah meac kuh in sikyak, tuhsruhk ke nga oasr ke misin luhk, ip luhn nguhn lohsrlohsr luhk wacngihnlac ke nga eis nus ma mwe insewowo se luhn ninac kiyuck ah akihlenyuck. Nga srui na pwacye lah nga tiac kotwaclah kuhlwacnsap luhn Leum. Ke ma upac tuhkuh, nga nuhnkuh muh fihsracsr in tui ke kapkapwack uh ac tiac arlac ke kihluck nuh met, tuhsruhk kowos fin fihliyac Leum in pa emet, ma upac uh kuh in kol nuh ke mwe insewowo kahto. kowos kuh in liye Pahol ac lohoh ke ma usrnguck uh.” Kate el puhlakihn pwacyeiyacn kahs lal Prestuhn Thomas S. Monson: “Pacl wowo yohk srihpac lasr emet uh fah sukokyak ke pacl luhn ma upaclac uh.”6

Oasr lal Kate kain luhlahlfongi kuh se ke srihpen el kahlwem ke plwacn in molwelah. El etuh lah kuht moul met, lah facluh pa pacl in srihkeyuck se, ac lah kuht ac sifil moul. Oasr luhlahlfongi kuh lal lah ninac kiyacl ah e ahkinsewowoyeyuck, tuhsruhk ke puhla lal ke pahpah tuhmwacl, el etuh lah fin ninac kiyacl ah misac, e wo na. El fahk: “Nga tiac pain moullac muhkwena ke misac luhn pahpah tuhmuhk ah; oruh ip se moul luhk nwe tok, ac ninac kiyuck ah fin itucklac pac, e luhkuhn oruh oacpacna. E luhkuhn otwotyang sie fahkwack luhlahlfongi yohk nuh in moul luhk.”7

Kate el suk ke sie acn muhtahl ke fong se nga sonuhl lun tempuhl ah. Kena in iraki in kuh kuhpahsr ma pahtpaht ma tuhkuh ke kuhlwacnsap luhn tempuhl, el ukwe atac se ma oreklac sin pahpah ninac kiyacl ah ke wi tempuhl pacl nuh kwewa.

Tiac yohk ma sikyak ke fong se nga ahkkahlwemyacl Kate nuh sel Chris ah, tuhsruhk ke sukyacn acn muhtahl sahyac ke Sacnri se tohkoh ah, Kate el liyaclwack Chris inmahsrlon mwet fuhsr lolacp foko ke sie sramsram luhn institute. Insac pa elos etwaclah yohk ke sie sin sie. Wik ekahsr tohkoh, Chris el solwacl lacn weluhl liye toeni luhlahp se. Elos tahfwelahna in suk acn ma suli Nguhn ke ahkahko lalos ac fahsr ne siliyucki lun tempuhl, acn muhtahl se ma elos ahkuhtweyucki we ah. Elos kwewa ingena ahkfalye kunohkohn muhtahl luhn ohiyacn pahpah ninac, pihraki luhlahlfongi lalos ke plwacn in molwelah nuh ke moul luhn tuhlihk mukul tolu, ahkahlwemye nuh selos ohiyac se ke inkacnek luhn olweacng.

“Ke kowos loangwelah tuhlihk muhtwacn se uh, kowos loangwelah we uh.” Sulaclah lal Kate ke el matwac yac 14 in muhta ke inkacnek, in sang na oacl nuh ke lahm lal, ac in tu ke acn muhtahl uh oruh ac fah molwelah we uh. Suk ke mwet mahtuh lal ah ac kuhlwacnsap ke tempuhl uh otwelah insiyacl nuh ke insiyaclos. Wi ke sramsram mahtuh luhn sucu ac orekma luhn tempuhl fah oacpacna otwe insiyowos ac sang mwet mahtuh lowos pacl wowo ke moul ma pahtpaht.

Moulkihn wosasuc in lohm suwos uh fah sang pac oacl nuh ke lahm lowos ac otwe kuh ke ip luhn nguhn nuh in lohm suwos ingena ac ahkinsewowoye sucu lowos ke pacl tok ke ohiyac pucspucs. Ac yohkna, oacna ke Elder Robert D. Hales el fahk lah, “Fin mwe srihkasrak kuht eis sin pahpah ninac kiyacsr uh tiac wo, ma kunacsr in ekuhllah …ac luti facsin pwacye nuh sin we tohkohyang uh.”8

Sulaclah ingena in oruh ma nuh kwewa kowos kuh in oruh in nwek lahm lowos an, lah fahkwack luhlahlfongi fokoko ac mwe srihkasrak lowos an kuh in otwotlac nuh ke moul luhn we pucspucs—ma somlah, ingena, ac ma tok uh. Nga fahkwack lah moul nwacsnwacs lowos an fah tiac molwelah muhkwena we uh, tuhsruhk e fah molwelah pac moul ma pahtpaht lowos an, tuh pa inkacnek sefanna in fohlohk nuh yurin Pahpah tuhmasr Inkuhsrao ac sokwack engan pwacye ingena ac nwe tok ma pahtpaht. Ke inen Jisus Kraist, amen.

Show References

    Mwe Kahsruh

  1.  

    1. Gordon B. Hinckley, “Standing Strong and Immovable,” Worldwide Leadership Training Meeting, Jacnweri 10, 2004, 20; liye pac Gordon B. Hinckley, “Our Responsibility to Our Young Women,” Ensign, Septempuh 1988, 10.

  2.  

    2. “Sucu: Sie Mwe Fahkwack nuh fin Facluh,” Ensignor Liahona, Nohfohnpuh 2010, 129.

  3.  

    3. Russell M. Nelson, “Generations Linked in Love,” EnsignkuhLiahona, Mei 2010, 92.

  4.  

    4. Liye Mattu 25:1–13.

  5.  

    5. Liye “I Love to See the Temple,” Children’s Songbook, 95.

  6.  

    6. Thomas S. Monson, “Meeting Your Goliath,” New Era, Jun 2008, 7.

  7.  

    7. Lohlngohk la sifacna yurin mwet suhmuhslah puk, 2013.

  8.  

    8. Robert D. Hales, “How Will Our Children Remember Us?” Ensign, Nohfohmpuh 1993, 10.