Fuhfahsryucsr Wolacna Lom nuh Lohm ah

Sel Prestuhn Dieter F. Uchtdorf

Mwet Kahsruh Ahkluo ke Prestuhnsi Se Met


Dieter F. Uchtdorf
Ke kom engan in orekmakihn macp Pahpah luhngse tomom an usot nuh ke fuhfahsryucsr lom, ac fah kol kom nuh ke acn muhtahl ac kom fah kapwack nuh ke kuh wolacna lom.

Kuht suhsahkihn ke ekuh se inge in weluhl Prestuhn Thomas S. Monson, mwet pahluh sacohk lasr. Prestuhn, kuht luhngse kom pacl nuh kwewa.

Tahmtahel sacohk wiyuck, kuloh ke on ac sramsram mihsenge. Ma nuh kwewa arulacna moklweyuck ac wo na pwacye ke Easter, pacl muhtahl kuht ahkfuhlwactye ke wik se inge.

Sie mwe engan in oasr inge yuruwos tahmtahel sacohk fuhsr an, tuhkweni yurin ninac kiyowos ac mwet kol wolacna lowos uh. Oasr nguhn sahromrom ac isrwacsr wo lowos. Pwacye na Leum El nuhnkwe kowos ac liye kowos ke luhgnse inkuhsrao me.

Nga mahtuhlah fin acn Zwickau, ke acn Kuhtuhlacp Germany ke pacl met ah. Ke nga matwac yac 11, pahpah tuhmuhk el muhta ye tuniyuck yohk oacna sie mwet lain government, ac ninac ac pahpah puhla tuh sulaclah sefanna ma sef nuh sin sucu lasr uh pa in kahinglac nuh Rohtoh Germany. Suleyucklac lah plwacn se ma sef emet uh pa in som ke kain in pacl ac ukwe kain in inkacnek nuh Rohtoh, likiyac na nohfohn ma lasr.

Ke pahpah tuhmuhk uh pa elyah yohk emet uh, el eis inkacnek se ma sa emet ah, ut sahslah Berlin. Tamuhlwel mahtuh luhk ah som nuh acir, ac kais sie sifacna sokwack inkacnek lal nuh kuhtuhlacp. Tahmtahel se luhk—suc ke pacl sac sahp matwac lowos ma oasr misenge inge—tuhkweni weluhl Helga Fassmann, mwet luti se lal ke Muhtwacn Fuhsr, ac kuhtuh pac sahyac elos wi train ma ahluhkwelah kuhtuhsrihsrihk Rohtoh Germany. Elos moli nuh sin sie mwet topangi sruhnguhl ah in ikacslah sie sruhnguhl ah nuh selos, ac tukun train ah pahselah inmahsrol Rohtoh Germany, elos ahtulac liki train kahsruhsr soko ah nuh ke sukohsohklah. Fuhkah yuckihnyen tuhlihk muhtwacn se wiyuck ah ke puhlaik lal

Nga pa srihk emet ah, ac ninac el sulaclah tuh nga ac el in fahsr tuhpallah sie finohl ma srwaclihk acn luo inge. Nga esam lah el us sie ap in mongo oacna fin kuht ac som forfor kuh picnic ke finohl ah.

Kuht eis sie train ma som loeslac wiwi na ke ac kuh in lwelah nuh sesr na kuht fahsr ke lusen ao pucspucs, in fototoyang na nuh inmahsrlol Rohtoh Germany. Imahsrol ah topangiyuck upac, tuhsruhk oasr sie map sesr ac kuht etuh ke sie pacl ac acn ma ac sef kuht in pahselah. Nga puhlakihn fosrngah lal ninac. El lihksreni lohacng nuh ke acn sac in liye fin ukweyuck kuht. Ke kais sie falkacl, oacna in muh niyacl muhnahslah. Nga kahsruh us pack toasr se lal ma nwacnwaclah ke mongo, pwepuh sacohk, ac petsac luhn sucu uh ke kuht fanuck inging sahflah, ac loes se. Pwacye na, el nuhnkuh, muh kuht ahluhkwelah inmahsrol ah tari. Ke kuht puhlakihn muh kuht sef, kuht muhta nuh ten ac muhtwacwacack mongo. Ke pacl se emet ke lwen sac, nga muh pwacye, lah el mongi.

In pacl sac na kuht liyacack akucl in inmahsrol uh. Srackna loesuhllah an met liki kuht! Kuht suhtuhelac picnic ke lacfahl se sahyac ke inmahsrol uh. Kuht srackna oasr Kuhtuhlacp Germany!

Mwet topangi inmahsrol uh kuh in tuhkuh ke oacna sie pacl!

Ninac el silahklahk na packwelah mongo nwacsr ah, ac kuht sihlahklahk fanyak ke sisken inging uh. Ke pacl se inge kuht tiacna tui ne ke na kuht etuh na pwacye lah kuht sun lwacyacn sahyac fin acn Rohtoh Germany.

Finne kais sie mwet ke sucu lasr uh eis kain in inkackek ac puhlakihn kain in ma upac ke fuhfahsryucsr uh, in pacl kuht nohfohn oraclah wo ohiyac. Kuht sifilpac fahsrweni oacna sie sucu. Fuhkah wolacna luhn lwen sac!

Sramsram ke Fuhfahsryucsr

Ma nga tuhfahna in fahk nuh suwos an pa sie ma puhlakihnyuck ke sie fuhfahsryucsr na sacohk nuh sihk. Nga kuh in ingena ngwetlah liye ke moul luhk ac akihlen kais kuhtuh “fuhfahsryucsr” ma nga eis pacl loeloes. Tiac nohfohn eis ke fanuck tuhpal finohl kuh inmahsrol in acn luhn government; kuhtuh oruh yohk na nuh ke kuhtangyucklac luhn ma upac ac kapkapwack ke ma luhn nguhn. Tuhsruhk ma nuhkwewa inge pa fuhfahsryucsr. Nga luhlahlfongi lah moul nuhkwewa pa sie “sramsram ke fuhfahsryucsr” puhkantwen luhn kais sie mwet.

Nga etuh lah kowos akihlen lah facsin nuhkwewa kahsruhp ke sramsram ke fuhfahsryucsr. In mwe srihkasrak, sahp kom etuh fuhfahsryucsr lal Dorothy ac kosro soko nahtuhl, Toto, ke The Wizard of Oz . Dorothy ac Toto ukuklac ke sie eng for ac utucklac nuh ke Acn lal Oz. Dorothy el sokwack inkacnek simacn rangrang fihsrwacsr soko ma akucliyac inkacnek nuh ke sie fuhfahsryucsr ma ac kohlohllah nuh lohm sel ah.

Na Ebenezer Scrooge, sel Charles Dickens, suc fuhfahsryucsr lal usacl tiac nuh ke acn nuh ke acn tuhsruhk ke pacl nuh ke pacl. Fuhfahsryucsr se inge oasr lun insiacl ma kahsrwel in kahlwem kac lah efuh el eklac oacna ohiyacl inge ac in liye meac e sikyak nuh sel fin el fahfahlac na ke inkacnek luhn srohwohsr ac tiac inse kuloh.1

Sie sin puk mahtuh in sihm emet luhn mwet China pa Journey to the West. Sihmlac ke lusen yac inmahsrlon 1500 nuh ke 1599, sruhmuhn kahto ke sramsram ke ma sikyak ac fuhfahsryucsr muhtahl luhn sie monk suc, ke kahsruh luhn mwet kuhlwacng ahkosr, el fuhfahsryucsr nuh ke etwacack luhn nguhn.

Ac na Biblo Baggins, mwet srihsrihk inse puhsisacl suc luhngse na muhta lohm sel ac mongo sup. Tuhsruhk tukun tongtong sruhnguhl lal ah, el kena sokwack ke acn ma el soenna etuh kac ac tufoklac nuh facluh, tuhkweni wi sie mwet orek mwenmwen ac sie un fuhfuhsr in oraclah sie misin na sensen tuhsruhk arulacna yohk srihpac.2

Sie Sramsram Luhlahp

Yac kuht tiac luhngse sramsram ke fuhfahsryucsr inge ke srihpen kuht kuh in puhlakihn ke ma sikyak nuh sin mwet fuhfahsryucsr uh? Kuhtanglah ac kuf lalos kuh in kahsrwe kuht in sokwack inkacnek lasr sifacna ke moul uh. Petsac kuht tuhfahna liye oacyacpac fahk mwe sramsram kahto ke fuhfahsryucsr an. Sahp sramsram inge oacyacpac ahkacsmakihnye kuht ke ke fuhfahsryucsr ma kuht nuhkwewa enenuh in etuh—soko sramsram ke fuhfahsryucsr ma kais sie sesr oruh ip yohk srihpac kunacsr kac.

Sramsram se inge muhtwacwacack sie pacl loeloes somlah, loes met liki na ke facluh muhtwacwacack in for raun, met liki ke faht uh muhtwacwacack nuh ke ohu ke yen engyeng uh, met liki na ma orahkrahk yohk ac srihk uh puhseni fin facl lasr uh. Ke muhtwacwacyen sramsram soko inge, kom tuh muhta ke sie acn loesuhllah, ac kahto.

Kuht tiac etuh ma pucspucs ke moul se met liki moul se inge, tuhsruhk kuht etuh kuhtuh. Pahpah tuhmasr Inkuhsrao El ahkkahlwemye nuh sesr suc El uh, suc kuht uh, ac suc kuht kuh in eklac oacna.

Fohlohk nuh ke moul se met ingacn, kom etuh na pwacye lah God El oasr ke srihpen kom liyacl ac lohnguhl. Kom etwacl Jisus Kraist, suc ac muh Lahm luhn God. Kom luhlahlfongel. Ac kom etuh lah acn kom ke som nuh we an tiac pa in muhta acn wolacna ke lohm ke moul kawihl sum. Finne kom luhngse acn ma pahtpaht sacn, kom etuh lah kom kena ac enenuh in som nuh ke sie fuhfahsryucsr. Kom ac som liki poun Pahpah tomom, pahselah mwe lihsrlihsr in muhlkuhnlah, eis sie mahno, ac luti ac puhlakihn ma suc finsrak in kahsre kom in kapwack ac eklac oacna Pahpah Inkuhsrao ac fohlohk nuh Yohrohl.

Ke acn muhtahl se ingacn, rauniyucklac sin mwet kom etuh ac luhngse, kihsen siyuck yohk se ma kom nuhnkuh ah sahp pa “Yac nga ac fohlohk wo na nuh lohm sihk inkuhsrao?”

Arulacna puhslac ma kom tiac kuh kac. Moul suhkawihl uh arulacna upac ke kuhtuh pacl uh, sesseslah ke kain in mwe puhlakihnyuck: mas, inse muhsahl, ongaiyac, fohs.

Wacngihn esam lom ke moul se met ah—tiac esam lah kom tuh fahsr wi Pahpah tomom Inkuhsrao—yac kom srackna kuh in akihlen puhsrwacl inmahsrlon wohwohn ac wakreyuck luhn moul suhkawihl?

Fuhfahsryucsr uh oacna in arulacna loeslac ac tiac kahlwem—arulacna sesseslah ke sensen.

Ac tiac fihsrwacsr, tuhsruhk kom etuh lah oasr srihpen kuh nuh kwewa kac an.

Na, ke muhtwacwacackiyacn fuhfahsryucsr ma pahtpaht lom, ngwetlah tuhpan nuh ke engan ac finsrak—ac, nga kuh nuhnkuh, oacyacpac puhlakihn ke elyah ac sahngweng.

Ke sahflahiyac ah, kom etuh tuh God El ac suwohs—lah wolacna Lal ac kuhtanglah. Kom tuh wi miting luhlahp inkuhsrao ac etuh lah Mwet Lahngo lom El ac usot sie inkacnek nuh sum in ahknwacsnwacsyeyucklac liki ma koluk ac moliyucklac liki misac luhn mahno. Kom luhlahlfongi lah, ke pacl sahflah, kom ac engan ac wowoyak ke sie on inkuhsrao in kaksakihn ine muhtahl Lal.

Ac na, kom mongyak in yohk …

Ac sis falkom nuh met …

Ac kom oasr inge!

Kom, kais sie suwos, som ke fuhfahsryucsr wolacna lom sifacna in fohlohk nuh ke lohm sum inkuhsrao!

Macp Lom

Inge kom oasr fin facluh, sahp ac ma lahlmwetmwet se kom in siyuck sum sifacna lah fuhkah fahsr luhn fuhfahsryucsr lom an. Yac kom oasr ke inkacnek pwacye? Yac kom eklac oacna mwet se suc kom luhmweyuck in oacna ac kena in oacna? Yac kom oruh sulaclah ma ac fah kahsre kom in fohlohk nuh yurun Pahpah tomom Inkuhsrao?

El tiacna suhpwe komlac ke fuhfahsryucsr se inge in muhkwena forfor ke wacngihn. El kena tuh kom in tuhkuh nuh lohm ah nuh Yohrohl. El usot nuh sum ninac ac pahpah sacohk ac mwet kol oaru luhn Alu uh, weacng pac sie macp ma ahkuhtweyac atacn acn uh ac ahkkahlwemye mwe sensenkackihnyuck; macp sacn ahkkahlwemye nuh sum lah mislac ac engan uh kuh in sukokyak oyac ac ma inge ac fah kahsre kom in plwacnelah inkacnek lom in fohlohk nuh lohm ah.

Ingena, kom kuh in sokwack oyac macp se inge?

  1. Ke ma suhmuhslah muhtahl.
  2. Ke kahs luhn mwet pahluh ac mwet sap uh.
  3. Ac ke mwe ahkkahlwemyeyuck luhn kais sie mwet sin Nguhn Muhtahl.

Macp se inge pa wosasuc luhn Jisus Kraist, pweng wolacna ac ohiyac engan luhn sie mwet tuhma lutlut luhn Kraist. Ma inge pa masap ac mwe srihkasrak ma utuckuh nuh sesr sin Mwet Iwe ac Mwet Luti lasr, suc etuh inkacnek uh ke srihpen El pa inkacnek uh.3

Ahok, in eis na sie macp el wacngihn srihpac fin kom tiac lutlutkihn—sahyen kom orekmakihn in pwen ke moul uh. Nga suli kom in orwaclah in pa yhk srihpac emet in lutlutkihn ac kapsra kahs luhn God. Ikacslah insiowos nuh ke Nguhn Muhtahl tuh El an kuh in kol kom ke fuhfahsryucsr lom ke moul uh.

Macp lom an sesseslah ke pweng in ahkkweye ac luti sin Pahpah tomom Inkuhsrao ac Wen Nahtuhl Jisus Krasit. Mihsenge nga kena akacsruhi nuh suwos ke tolu sin pweng ma ac fah kahsrwe kom in oraclah wo fuhfahsryucsr lom nuh lohm ah.

Pweng se emet: Kuht tiac enenuh in sahngweng, tuh Leum El wi kuht, ac fah tu siskacsr.”4

Kom tiac muhkwena ke fuhfahsryucsr se inge. Pahpah tomom Inkuhsrao El etwe kom. Finne wacngihn kuhtwena mwet sahyac lohng kom, El lohng kom. Ke kom engan ke suwohswohs, El wi kom engan. Ke kom toasrlacna ke mwe srihkeyuck, El wi kom ahsor.

Elyah luhn Pahpah Lucng keim tiacna wiwi kahsruhp kuh oaskuh kuh fokoko in mahno kuh lahlmwetmwet lom. El liye kom tiac oacna ke facluh liye kom; El liye lah suc kom an na pwacye. El liye insiom.5 Ac El luhngse kom 6 ke srihpen kom tuhlihk Nahtuhl.

Tahmtahel sacohk, oaru in sokol, ac kom fah sokolwack.7

Nga olwelah nuh sum, kom tiac muhkwena.

Inge, eis sie pacl an ingena ac liye mwet ma raunikomlac an. Kuhtuh sahp mwet kol lom, kawuck, kuh sucu. Kuhtuh kom soenna ohsun nuh se met. Ne ohinge, mwet nuhkwewa kom liye raunikomlac an—ke toeni se inge kuh ke kuhtwena acn sahyac, misenge, kuh ke kuhtwena pacl sahyac—ma puhlaik se ke facl kawihl. Mwet inse puhsisacl ac wo se—suc muhta siskom ingacn sahp pa sie sin mwet wo ma kom tuh luhngse ke facl luhn nguhn. Sahp kom sifacna sie mwet wo in srihkasrakkihnyuck!

Ke sie ma kom kuh in etuh kac: mwet nuhkwewa kom liye—wacngihn srihpac lah kom ma oyac, alu, luhlahlfongi lom ke government, pihsacn mahno, kuh ngwetngwet an—pa sucu. Muhtwacn fuhsr se ma kom ngwetwacng liye an Pahpah tuhmwacl Inkuhsrao pa pacna Pahpah tomom an, ac el som liki luhngse Lal oacna kom, rahrah in tuhkuh nuh facluh ac moul tuh elan kuh in sie pacl fohlohklac nuh Yohrohl.

Tuhsruhk, sahp el puhlakihn muh el muhkwena, oacna ke kuhtuh pacl uh kom puhlakihn. Sahp kuhtuh pacl uh el muhlkuhnlah srihpac luhn fuhfahsryucsr lal. Nuhnakmuhnahs ahkacsmakyacl, ke kahs lom ac ke mukwikwi lom, lah el tiacna muhkwena. Kuht oasr inge in akacsruhi.

Moul uh kuh in upac, ac kuh in ahkupacye insiacn mwet uh ne ke na pacl se ma sie mwet oacna in muh tiac kuh in lutiyuck. Kuhtuh sahp sesseslah ke kasrkuhsrak. Mwet sahyac sahp isruhn ac ahngon elos suc luhlahlfongi ke sie God luhng. Tuhsruhk motko ma se inge: finne elos tiacna esam, ke sie pacl ah elos tuh oacyacpac kena in fohlohk nuh yurun Pahpah tuhmwaclos Inkuhsrao.

Tiac ma kunom in ekuhllah kuhtwena mwet. Ma se ingacn pa orekma luhn Nguhn Muhtahl. Ma kunom an pa in akacsruhi ke luhlahlfongi lom ac in tiac sahngweng. Kakawuck nuh sin mwet nuhkwewa, tuhsruhk nimet fuhlweack ohiyac wo lom an. Tu na kuh ke ip yohk srihpac ac luhlahlfongi lom an. Tu loes, ke srihpen kom acn nuhtin God, ac El wi kom tu!

Pweng se ahkluo: Luhngse sie sin sie, oacna ke Nga luhngse kom.”8

Yac kom nuh nuhnkuh lah kahs fuhkah kuht nuhkwewa tuh kahskahskihn ke kuht tuh muhta yurun God? Nga puhla muh kuh pacna in kahs German, tuhsruhk nga muh wacngihn mwet etuh na pwacye. Tuhsruhk nga tiac etuh ma se ingacn ke moul se lasr met ah, yurun Pahpah tuhmwacn nguhnasr, sie kahs orekmakihnyuck sin mwet nuhkwewa—sie ma oasr kuh la in kuhtanglah mwe kohsrkohsr luhn ma puhlakihnyuck, mahno, ac nguhn.

Kahs ingacn pa luhngse pwacye luhn Jisus Kraist.

Pa ingacn kahs ma fokoko emet fin facluh.

Luhngse luhn Kraist tiac luhngse kikiacp. Tiac luhngse ma an ke kaht in paing. Tiac kain luhngse se ma kaksakihnyuck ke on pwengpweng ac ke petsac mukwikwi.

Luhngse se inge use eklac na pwacye luhn ohiyac uh. Ma inge kuh in kuhtanglah ahngyahng ac tulokihnyac sok. Ma inge kuh in ahkkweyelah kasrkuhsrak ac kuhtanglah ma puhlakihnyuck ke fohs. Ma inge kuh in oraclah ma usrnguck.

Kuht eis mwe luti se emet lasr”9 ke kahs in luhngse se inge oacna nguhn ma muhta yurun God, ac inge fin facluh kuht eis pacl wo in oruh ac in etwaclah kahs uh. Kom kuh in etuh fin kom luti kahs in luhngse se inge ke kom nuhnkwaclah lah meac mokle nuhnak ac mukwikwi lom an.

Ke nuhnak yohk lom an lohacng na nuh kac lah ma uh ac ahkinsewowoye kom fuhkah, mwe mokle kom an sahp mwe srohwohsr ac srihk nuhnkuh. Tiac pa ingacn kahs ma kom kena in lotwelah an.

Tuhsruhk ke nuhnak yohk ac elah lom an lohacng na in kuhlwacnsuhpuh God ac mwet sahyac—ke kom kena na pwacye in ahkinsewowoye ac ahkpwacryeack mwet siskom an—na kuh luhn luhngse pwacye luhn Kraist kuh in orekma ke insiom ac moul lom an. Pa ingacn kahs se ma kom kena in lotwelah an.

Kom kom etwaclah kahs se inge ac orekmakihn ke sramsram lom nuh sin mwet sahyac, elos fah akihlen sie ma keim ma sahp ac okaswack sie ma puhlakihnyuck ma ukunyucklac ke sie lusen pacl loeloes in suk inkacnek pwacye ke fuhfahsryucsr in fohlohk nuh lohm selos inkuhsrao. Tukun ma inge nuhkwewa, kahs in luhngse se inge pa kahs na pwacye lalos an pac.

Mwe mokleyuck yohk srihpac ac ne tok inge pa sie kahs ma sahswacng na ne ke nguhnin mwet uh. Pa inge sie kahs in etatwen, sie kahs in kuhlwacnsap, ac sie kahs in ahkkweye ac ahkenganye ac ahkwoye.

Luti in orekmakihn kahs luhn mwet nuhkwewa ke luhngse luhn Kraist.

Ac pweng ahktolu: “Kuht enenuh in ahkkweye.”10

Kuhtuh pacl uh kuht semuhtwengyak ke acn kuht oasr we ke fuhfahsryucsr lasr, yac kuht tiac? Kom fin matwac yac 12, sahp kom ke yac 14. Ke yac 14, sahp kom ke yac 18. Ac ke yac 18, kuhtuh pacl uh sahp kom ke sifilpac yac 12 ac in sifilpac kuh in muhtwacwacack.

Kwacna oasr ma in tohrkahskahskihnyuck—ma ma oacna in tiacna fahlac oacna luhngse lom an. Kom kuh in muhta na suhpwacr, muhkwena, mwet uh tiac kahlwem sum, kuh tiac luhngkihnyuck. Tuhsruhk tiac pa ingacn fuhfahsryucsr se ma kom finsrakkihn an, ac tiac pa ingacn fuhfahsryucsr se ma Pahpah Lucng El suhpwe kom me in eis an. Esam, pwacye na lah kom acn nuhtin God!

Ke kom etuh ma se inge, nga suli kom in fahsr ahkkweye ac engan. Ahok, inkacnek uh luhfluhf ac kihrucruc ac oasr kuhtuh ma sensen. Tuhsruhk nimet lohacng nuh ke ma ingacn. Ngwet nuh ke engan ma Pahpah tomom Inkuhsrao El ahkolah nuh sum ke falkom nuhkwewa ke fuhfahsryucsr lom an. Engan pa acn se ma kom ac fahsr nuh we, tuhsruhk pa pacna inkacnek uh. Mislac fin facl se inge, ac moul ma pahtpaht oasr ke facl se ma ac tuhkuh pa ma El olwelah.11 Pa srihpac se oruh El sapkihn nuh sesr in ahkkweye.

Ke kom engan in orekmakihn macp ma Pahpah luhng El usot kom in orekmakihn ke fuhfahsryucsr lom, ac fah kol kom nuh ke acn muhtahl ac kom fah sun ohiyac wolacna lom. Kom fah kapkapwack in acn nuhtin God ma kom finsrak muh kom ac eklac oacna.

Tahmtahel sacohk, muhtwacn fuhsr sacohk ke Alu uh, kawuck fuhsr sacohk, oa sie Mwet Sap luhn Leum nga fihliyac nuh suwos sie mwe insewowo tuh kowos in sokwack inkacnek lowos ke fuhfahsryucsr se inge ac tuh kowos in mwe mokleyuck nuh sin mwet tuhlan fuhfahsryucsr lowos an. Oacyacpac olwelah ac pruhe luhk tuh ke kowos ahkfuhlwactye ac moul pwacye nuh ke wuhlweacng, ip yohk, ac ohiyac wo luhn wosasuc luhn Jisus Kraist, ke sahfahiyacn fuhfahsryucsr lowos Pahpah Lucng El fah oasr we. El fah apihskowosi, ac kowos fah etuh na pwacye lah kowos oraclah wo sun lohm ah. Ke inen Jisus Kraist, amen.

Show References

    Mwe kahsruh

  1.  

    1. Liye Charles Dicken, A Christmas Carol.

  2.  

    2. Liye J. R. R. Tolkien, The Hobbit.

  3.  

    3. Liye John 14:6.

  4.  

    4. Liye Doctrine and Covenants 68:6; liye pac Isaiah 41:10; Jon 14:18.

  5.  

    5. Liye 1 Samuel 16:7.

  6.  

    6. Liye 1 Peter 5:6–7.

  7.  

    7. Liye Jeremiah 29:13.

  8.  

    8. Jon 15:12; liye pac Jon 13:34; Moroni 7:45–48.

  9.  

    9. Liye Doctrine and Covenants 138:56.

  10.  

    10. Liye Doctrine and Covenants 78:18; liye pac Jon 16:33 ; 3 Nephi 1:13.

  11.  

    11. Liye Doctrine and Covenants 59:23.