Veivakavulici ena Lotu


Ena gauna au sa ciqoma kina na ilesilesi meu laki vosa ki na Lotu ena ulutaga ni veivakavulici, e luluvu na lomaqu kau a masulaka vagumatua na ilesilesi oqo. E voleka ni 70 na yabaki sa oti, au a dabe toka ena dua na dela ni barivatu ni dua na yanuyanu lailai ena Pasivika, e ciri volekata toka na yanuyanu o Okinawa. Se qai oti sara toka ga na ivalu kau sa bula mai kina. Kau sa mai vakasamataka toka na cava meu na cakava. Keimami a waraka tiko na neimami waqa me keimami sa gole kece yani ki na neimami vanua. Au a vakasamataka sara vakatitobu na cava meu na cakava ena noqu bula. Na cava au gadreva meu cakava? Meu na tamata vakacava? Au sa mani lewa meu sa na qasenivuli. Ia sai au oqo ni mai oti e 70 na yabaki, ka se tiko ga vei au na gagadre o ya, na kakavaki vata ga o ya, kau sa vuli vakavinaka sara, ia se levu sara talega na ka me vulici.

Na veika kece tale eso, ni ra sa mai vakadikevi vata, sa laki mua ga ki na veivakavulici. Ka da sa vuli meda veivakavulici. Era tu na ivakavuvuli e rawa ni da vulica meda vakadikeva ka, so vei ira, ka rairai na kena e dredre duadua meda vulica rawa, o ya mo na bula voli ka sega ni nuitaki iko duadua ga ka sega ni wilika e dua na lewe ni itukutuku, ia mo vakararavi ga ena Yalotabu.

Au diva me na dau tiko e dua na sala me yalataki kina vei kemuni ni kevaka mo na vuli vagumatua ka vakaidina ko ni na vinaka cake sara. Ko na sega ni mavoa kina. Ia ena sega ni ko vinaka sara, me vakataka na vinaka ena yaco kevaka mo na vakararavi vua na Turaga ka vakararavi vua na Yalotabu ka cakava sara. Oqori ena sega ni kemu idagodago wale tu, ia o iko dina sara ga, ka na yaco, mo vulica mo dau vakararavi vua na Yalotabu ni sa na tu e matamu. E vuqa na gauna niu dau tu ena itutu ni vunau ka vakasamataka na ka meu cauraka, ka sega ni matata vei au kau kila ni sa tiko e dua na itavi cecere, ia e dau basika ga mai. E yaco mai ni ko sa tekivuna. Ko na tekivuna ka toso sara, ka sa na sovaraki mai na ivakatakila. Na kena isau sa dodonu me noda mai na cakacaka kece o ya sa takiveiyaga sara vei keda, baleta na Yalotabu e vakavurea mai na kaukauwa o ya.

Au sa mai kila kina ni da sa qasenivuli kecega. Ena Lotu eda dau tukuna me baleta na noda kacivi ki na dua na itutu ka vakatikori mo veivakavulici ena Wilivola ni Sigatabu se ena dua tale na mataisoqosoqo ni matabete. Ena so na gauna sa dau sakitaka na matabete na kaukauwa me veivakavulici. E sega sara ni volekata yani na kaukauwa e soli vua e dua na tina. Na veivakavulici cecere duadua ena Lotu era vakayacora na tina.

O koya gona vei kemuni ko ni veivakavulici tiko ena Lotu, se ko ni kenadau dina se dua tale na kena mataqali, mo ni kila tiko ni sa veivakavulici tabu ka vuqa vei ira e vakayacori ni oti na gauna ni kalasi, ena taudaku ni vakavakarau ena nomu wilika na lesoni, vulica, ka vakasamataka vakatitobu ena vuku ga ni malanivosa o ya ena ivolanikalou— “sa rogo tale mai ki yaloqu na domo ni Turaga.” Ena sega ni druka na “vosa” kevaka ko toso ki liu ka talairawarawa. Na talairawarawa vei ira na itabagone e vosa rarawataki toka. E sega ni rawa ni da tu ga ka talairawarawa mai. O ira na itubutubu, vakauasivi vei ira na tina era tuberi ira na gone lalai me ra dau talairawarawa. Sa noda itavi sara ga o keda oqori ni da sa qase ka so na gauna e dau lomatarotaro na lomada. E tiko e dua na vosa, o ya na veivutuni. Na cava beka na ibalebale ni “vei” ena veivutuni? Sa kena ibalebale mo veivutuni tale. Veivutuni tale—veivutuni. Ka mo na lesu tale ki na dua na vanua o a lakosese kina ka toso yani ki liu, galala mai na ibolebole ko a sotava mai. Sa veivakabulai cecere tiko na Veisorovaki—ni sa sorovaka na ivalavala ca. Ko ni sa raica tiko beka na kena vakasakiti ni sa rawa meda taura na Veisorovaki? E vakayacora na Turaga na Veisorovaki ena vukuda sara ga. Sa sega tale ni tiko e dua na ka mo sega ni veivutunitaka rawa ka sega ni rawa mo vakabulai mai kina kevaka ko sa na veivutuni ka yalodina mo vakatulewa kina. Ia, e rawarawa ga na noqu ivakasala. Vakatulewataka ga mo cakava vakadodonu, vakatulewa mo vinaka cake mai, vakatulewa mo vakararavi ki na ivolanikalou, ka ni ko vakayacora oqo, ko na tubu cake ka na vakayaco-ka vinaka vei iko na ibolebole o sotava.

Au sa mai vakavulici vakavinaka sara ena 70 na yabaki sa mai oti oqo. Se levu ga na ka meu na vulica. Au sega mada ni kila se na vakacava na balavu ni gauna meu na vuli kina, ia ni sa na mai cava au sa na gole yani ki na vuravura vou ka tekivu ena dua na koronivuli vou. Sa noqu ivakadinadina kina oqo vei kemuni ni sa bula tiko na Turaga, ni sa dina sara na Veivakalesuimai, ni sa mai tuvanaki ka vakadeitaki ena taudaku ni ilati ena vukuda. E bula tiko na Turaga. Au kila ni bula tiko na Turaga, kau kila na Turaga. Ena yaca i Jisu Karisito, emeni.