Galuega Faafaifeautalai i le Vaitau Faatekinolosi


Ou te faafetai i le faatasi ma outou i le asō. Matou te faamamaluina faifeautalai mai le Nofoaga Autu e Aoao ai Faifeautalai i Provo o loo faatasi mai i le asō. Silasila atu ia i latou. Pe le ofoofogia ea i latou? O nei faifeautalai fou faatoa valaauina o loo sauniaina i latou lava e talai atu le talalelei toefuataiina a Iesu Keriso i ituaiga, gagana, ma nuu uma.

Faatasi ai ma le faaitiitia o tausaga ua valaau ai ia faifeautalai, ua amatalia ai se vaitau fou o galuega faafaifeautalai i le Ekalesia. Ou te iloa mo le toatele o se mea ua suia ai le olaga. Matou te iloa na matua lofituina ai alii ma tamaitai talavou i lona aafiaga.

E mautinoa lava na tausia e le Alii faatasi ma outou matua se tupulaga faapitoa e auauna atu i lenei vaitau faapitoa i le taimi ua matua sili ai ona manaomia, atoa ai ma le avanoa e aoao atu ai le talalelei.

I ni nai aso o lumanai, o faifeautalai ia e nonofo atu i ou tua o le a auina atu i a outou uarota ma siteki. A o faaauau pea ona faateleina le aofai o faifeautalai, matou te fesili atu, “O le a le mea o le a faia e nei faifeautalai uma?” O la tatou tali, o le a latou faia lava le mea e tasi lea o loo faia pea i taimi uma e faifeautalai; o le a latou mulimuli i lo tatou Faaola o Iesu Keriso ma talai atu Lana talalelei toefuataiina.

E umia e peresitene o misiona ki e pulefaamalumalu ai ma taitai a latou misiona atofaina. E umia e le peresitene o le siteki ki mo le galuega faafaifeautalai i lana siteki. E umia e le epikopo ki e pulefaamalumalu ai i le misiona i lana uarota. E tatau ona latou faamaopoopoina ma galulue faatasi, ia lotogatasi e tulei i luma le galuega faafaifeautalai i lenei vaitau faatekinolosi. O le a faaaoga e le epikopo ana ki, faatasi ma le aufono a le uarota e faailoa ma aoao ai aiga e i ai tagata e le lolotu ma o latou aiga ma uo, ma tagata le toaaga ma o latou aiga ma uo.

O le savali o le a latou faasoaina---le Togiola a Keriso, o le Tusi a Mamona, ma perofeta soifua---o le savali lava lea e tasi na ou faasoaina atu a o avea au ma se faifeautalai talavou i le Misiona a Setete i Matu. Peitai, o nisi o auala ia na matou faasoaina atu ai le savali e matua ese lava mai le auala o le a outou faasoaina atu ai.

A o avea au ma se faifeautalai talavou, sa mafai ona matou talanoa ma tagata fesootai i luga o le alatele ma tuitui i faitotoa e faasoa atu le talalelei. Ua suia le lalolagi talu mai lena taimi.O le taimi nei, e toatele tagata ua aafia i le pisi tele o o latou olaga. Latou te faananati solo, ma e tele lava ina latou le naunau e faataga ni tagata ese e ulu atu i o latou fale, e le valaauliaina, e faasoa atu se savali o le talalelei toefuataiina. O la latou vaega autu lava e fesootai ai ma isi, e oo lava i uo mafana, ua tele lava i le Initoneti. O le mea lea, o le natura tonu lava o le galuega faafaifeautalai, e tatau ona suia pe afai e ao i le Alii ona ausia Lana galuega o le faapotopotoina o Isaraelu “mai i tulimanu e fa o le lalolagi” (2 Nifae 21:12). Ua faatagaina nei faifeautalai ona faaaogaina le Initoneti i a latou taumafaiga talai.

I taimi faalepisi o le aso---aemaise lava i taeao---o le a faaaoga ai e faifeautalai ia komepiuta i falelotu ma isi fale o le Ekalesia e faafesootai ai tagata sailiili ma tagata o le ekalesia, galulue ma taitai perisitua ma taitai misiona i le lotoifale, maua ma faafesootai ia tagata faasino mai, tulitatao ia tautinoga, faamautu ia taimi faatulagaina, ma aoao atu mataupu faavae mai le Talai La’u Talalelei e faaaoga ai le mormon.org, Facebook, blogs, imeli, ma feau tusitusia.

O le faaaogaina o le Initoneti e faifeautalai ma le faaaogaina o masini feaveai o le a faagaoioi i masina e sosoo ai ma le tausaga fou. O le a tatou fesootai pe a oo mai le taimi mo la outou misiona ma le eria e faaaoga ai nei meafaigaluega. Ae o le saogalemu e laualuga i lenei auala fou o le galuega faafaifeautalai, ma o le a mata’ituina e peresitene o Misiona le galuega a faifeautalai i luga o le initoneti e fesoasoani ai ia i latou ia tumau i le saogalemu i mea uma latou te faia.

E tasi se faitioga e masani ona matou mauaina mai ia i latou e fiafia i le Ekalesia e faapea latou te maua le lototele e afea ai se tasi o a tatou falelotu ae o atu o loo loka ma e leai se tasi o i ai. O lea, ua matou filifili ai foi e tatala a tatou falelotu mo ni maimoaga e taialaina. O le a i ai faifeautalai i falelotu e faafeiloai tagata e fiafia i le lotu ma faamaimoa i latou i o tatou fale tapuai, lea e mafai ona aoaoina ai i latou ma valaaulia i se nofoaga o loo i ai le uunaiga malosi a le Agaga.

A o ulufale atu faifeautalai i lenei vaitau fou lea o le a latou faaaogaina ai komepiuta i le galuega a le Alii, matou te valaaulia ē talavou ma matutua, tagata matutua, talavou matutua, le autalavou ma fanau i soo se mea ia auai faatasi ma i matou i lenei galuega fou ma le faafiafiaina e ala i le avea ma uo a faifeautalai i le Facebook i la outou eria i a outou lava komepiuta ma fefaasoaai le savali o le talalelei i luga o le initoneti, ma e ala i le faaauai o outou lava i le galuega faafaifeautalai.

E itiiti ifo ma le tasi tausaga talu ai na faia ai e Peresitene Monson le faasilasilaga faasolopito e faaitiitia le tausaga o auaunaga faamisiona. Talu mai lena taimi, e faitau afe ua usitaia le valaau a le perofeta, ma o loo faateleina pea isi o loo au faatasi ma i latou i vaiaso taitasi. E oo mai i le lua aso talu ai, o le aofaiga o faifeautalai o loo auauna atu e 70, 274. E lei i ai se taimi muamua ua matua toatele ai faifeautalai ua lilofia ai le lalolagi. Ae tatou te manaomia se mea e tuu uma i ai nei faifeautalai lelei, ma o lea na matou faatutuina ai ni misiona fou e 58 i lenei tausaga---ua atoa i ai le aofaiga o misiona e 405. I lenei tausaga na matou valaauina ai foi ni peresitene fou o misiona e 173, ua sili atu nai lo se isi lava taimi muamua.

Ua manino lava le tali atu o faifeautalai ma peresitene o misiona i le valaau a le Alii. O lenei la ua Ia valaauina i tatou, o ni tagata o le ekalesia, ia auauna atu faatasi ma i latou ma Ia i Lana galuega tele.

E pei lava ona tatau ai i faifeautalai ona fetuunai i se lalolagi ua suia, e faapena foi ona tatau i tagata ona suia le ala latou te mafaufau ai e uiga i le galuega faafaifeautalai. I le ta’ua ai o lenei mea, ou te fia faamanino atu e faapea, o le mea lea ua talosagaina i tatou o tagata o le ekalesia e fai, e le o suia lava; ae o le auala lea tatou te faataunuuina ai la tatou tiutetauave e faasoa atu le talalelei e tatau ona fetuunai i se lalolagi ua suia.

Ua 54 nei tausaga talu ona valaauina e Peresitene MaKei ia tagata uma ina ia avea ma se faifeautalai. Na valaauina foi i tatou e Peresitene Hinckley e faaaoga se ala sili atu e faatino ai le galuega faafaifeautalai. Ua le na o se talaiga tuitui i faitotoa. O loo i ai se ala sili atu. Na otooto mai e Peresitene Monson lea auala sili e ala i le galulue faatasi o tagata o le au paia ma faifeautalai e talai atu le talalelei i se taumafaiga felagolagomai.

O nei tautinoga ua na o se toe faaupuina o le mea na aoao mai e le Perofeta o Iosefa Samita lava ia: “I le uma ai o faamatalaga uma lava ua faia, o le tiute silisili ma matua taua o le talaiina o le Talalelei” (Aoaoga a Peresitene o le Ekalesia: Iosefa Samita [2007], 352).

E leai ma se mea i nei valaauga faaperofeta e faatino ua suia. O le tiutetauave silisili o soo se tasi o i tatou, po o le a lava lo tatou valaauga po o le tofiga i le Ekalesia, o le talai atu lea o le talalelei. E moni lava lea mea i aso nei e pei ona i ai i aso o Iosefa Samita, po o se isi lava tisipenisione o aso.

E mafai faapefea la ona tatou faataunuuina lenei valaauga mai le Alii e talai atu le talalelei? O se tasi ala mo i tatou e faia ai o lo tatou lotogatasi lea i le galuega faafaifeautalai.

O le tasi i le faamoemoega e sili atu nai lo le na o le mauaina o se sini autasi. Mo se faataitaiga, e toatele a tatou fanau e fiafia i le taaloga lauiloa lea o le soka. E vave ona latou aoaoina e faapea o le kikiina o le polo i le neti e maua ai le ai. O le taimi muamua latou te le malamalama ai i vaega autu o le taaloga. E i ai ia i latou le sini lava e tasi, ia maua se ai, ae e le o faatulagaina lelei i latou. Latou te taufai taulai faatasi uma i le polo.

I le galuega faafaifeautalai, e toatele i tatou o loo i ai i lenei vaega lava e tasi. Tatou te manatu ua tatou vaai ma malamalama i le sini maualuga, ae tatou te le vaaia lo tatou faamoemoega o i totonu; tatou te le iloa le tulaga, e pei ona taua, lea e ao ona tatou faatinoina. O lo tatou tulaga o le le lava o le malamalama, e le o le manao.

A fesili i soo se faifeautalai faamisiona o i ai iinei i le aso po o le a lo latou faamoemoega o le misiona, ma ou te mautinoa o le a tali mai uma ma le malosi: “O lo’u faamoemoega ia ‘valaaulia isi e o mai ia Keriso e ala i le fesoasoani atu ia i latou ia maua le talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, mauaina o le meaalofa o le Agaga Paia, ma tumau e oo i le iuga’” (Talai La’u Talalelei: O Se Tusitaiala mo le Galuega Faafaifeautalai [2004], 1).

Uso e ma tuafafine, afai o lo tatou tiute silisili ma aupito taua o le talai atu lea o le Talalelei, e pei ona ta’ua e le Perofeta o Iosefa Samita, ua manino mai la lo tatou faamoemoega: e tusa ai ma lo tatou auai ai i Lana Ekalesia, ua valaauina ai i tatou taitoatasi ma poloaiina e “valaau atu i isi ia o mai ia Keriso,” pe o i latou o tagata toaaga, tagata fou, tagata le toaaga, po o ni tagata le lolotu. Afai e i ai soo se tasi i o tatou tuaoi---tagata le lolotu po o tagata le toaaga o le Ekalesia---e lei mauaina le “talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, [ma le] mauaina o le meaalofa o le Agaga Paia,” tatou te valaaulia i latou ia mauaina.

O lenei tiutetauave e le patino atoa i faifeautalai.

E tusa ai ma lea malamalama sese, na saunoa ai Peresitene Gordon B. Hinckley e faapea: “E mafai ona tatou tuu atu i faifeautalai latou te taumafai e faia na o i latou le galuega, po o lo tatou fesoasoani foi i ai. Afai latou te faia na o i latou, o le a latou tuitui atu i faitotoa i lea aso ma lea aso, ma o le a utiuti foi le seleselega. Po o le avea ai o i tatou ma tagata o le ekalesia, e mafai ona tatou fesoasoani ia i latou e sue ma aoaoina tagata sailiili” (“Saili Tamai Mamoe, Fafaga Mamoe,” Liahona, Iulai 1999, 118).

O le taimi lenei mo i tatou e malamalama ai e faapea o i tatou---o tuaoi, uo, ma aiga o tagata le toaaga ma tagata le lolotu---o loo i ai i se tulaga tonu e tuu atu se valaaulia faatasi ma se alofa talafeagai ma le magafagafa lea e manaomia e le tagata o loo tatou valaauliaina. Tatou te faamoemoe o le a taliaina le valaaulia; ae a leai, e tatau pea ona faaauau ona faailoa atu lo tatou faiuo ma le alofa faaKeriso ina ia iloa ai e le tagata na tatou valaauliaina o le sootaga sa tatou faafaileleina ma atiaeina sa le na o se sootaga ina ia latou faia ai se mea, ae o se faigauo tumau ma moni.

E moni o le Ekalesia a le Alii o se ekalesia o le faatulaga tatau, ma o le a agai i luma lenei galuega i lalo o ki tatau. “I lalo o le taitaiga a le epikopo, e amatalia ai le galueaiina e le aufono a le uarota o se fuafuaga a le uarota mo le misiona. E tatau ona puupuu ma faigofie le fuafuaga. E tatau ona aofia ai ni sini ma gaoioiga patino e fesoasoani ai i sui auai o faalapotopotoga a le au perisitua ma ausilali a le uarota ia auai i le galuega faafaifeautalai a le au paia, faatumauina, ma le faatoagaina mai. O le aufono a le uarota e faamaopoopoina le fuafuaga a le uarota mo le misiona faatasi ai ma fuafuaga a faifeautalai faamisiona ua tofi atu i le uarota” (Tusitaulima 2: Taitaiina o le Ekalesia [2010], 5.1.8).

E taitaiina e le epikopo le galuega o le faaolataga i lana uarota e ala i le aufono a le uarota. E faailoa mai e le aufono a le uarota i latou o e mafai ona maua se valaaulia ina ia aoaoina i lesona a faifeautalai pe toe faatoagaina mai, ma fuafua po o ai i le uarota ua sili ona talafeagai e faia lena valaaulia ma le alofa talafeagai ma le faaaloalo.

O le peresitene o le korama a toeaina ma le taitai vaega o faitaulaga sili o sui ia o le aufono a le uarota. Ua ia i laua le tiutetauave o le faailoaina o o latou tagata le toaaga o korama ma galulue faatasi ma isi sui o le aufono a le uarota i le toe taitaiina mai o i latou ia toe toaaga atoa i le Ekalesia. O le faamanuiaga o le toe faafoi atu o le perisitua i o latou aiga o le a faamanuiaina ai ia aiga atoa mo augatupulaga.

Ona faailoa lea e le aufono a le uarota ia tagata le toaaga e mafai ona asia ma aoaoina e faifeautalai faamisiona. E galulue faatasi le taitai misiona a le uarota, o ia o se sui o le aufono a le uarota faatasi ma faifeautalai e faatumu ia fuafuaga a faifeautalai i igoa o i latou o le a sili atu ona faamanuiaina mai se asiasiga.

E ui o faifeautalai faamisiona e nafa ma le aoaoina o tagata sailiili, e mafai ma e tatau ona o faatasi ma sui o le aufono a le uarota, faifeautalai a le uarota, po o ni tagata o e o i ai ni fesootaiga patino ma tagata sailiili. E tatau i tagata o malaga faatasi ma faifeautalai ona molimau atu e uiga i mataupu faavae o loo aoaoina i lesona a faifeautalai ma faamalosia nei mataupu faavae i va o taimi faatulagaina a faifeautalai.

E mafai ona valaaulia e le aufono a le uarota ia faifeautalai faamisiona e fesoasoani i faifeautalai a le uarota e faiaoga o aiga pe faiaoga asiasi i tagata ua le toe toaaga mai pe aoao atu ni lesona mo tagata fou. Ua matou iloaina le toalaiti tele o o tatou tagata faatoa papatiso o loo mauaina ia lesona mo tagata fou.

Ua finagalo mai le Alii ina ia tatou “auai ma le naunautai i se faamoemoega lelei, ma fai mea e tele i lo [tatou] lava loto malie” (MF&F 58:27).

A o ou talanoa atu e uiga i le “auai ma le naunautai i se faamoemoega lelei,” ua toe faamanatu mai ai ia te au lau uo talavou o Scott. O Scott e i ai ni ona faafitauli e le atoatoa ai o ia i nisi o itu, ao se isi foi itu o ia o se tagata ofoofogia. Mo se faataitaiga, o lona lototoa o se faifeautalai e faatautava ai ma atalii o Mosaea. Ou te talitonu i le mafaufau o Scott e leai se mea e faapea, e leai se tagata e le auai i Le Ekalesia a Iesu Keriso o le Au Paia o Aso e Gata Ai ma e leai se tasi e lei faitauina le Tusi a Mamona ma e le o maua se molimau i lona moni.

A o malaga Scott i le vaalele na o ia mo le taimi muamua e feiloai i lona uso, sa faalogoina e se tasi na nofo latalata ane le talanoaga lenei.

“Talofa, o lou igoa Scott. O ai lou igoa?”

Na tau ane e le tagata na la nonofo faatasi lona igoa.

“O le a lau mea e fai?”

“O au o se enisinia.”

“Manaia. O fea e te nofo ai?”

“I Las Vegas.”

“E i ai le matou malumalu iina. E te iloa le mea e i ai le malumalu Mamona?”

“Ioe. O se fale matagofie.”

“O oe o se Mamona?”

“Leai.”

“Ia, e tatau ona e auai. O se tapuaiga maoae. Ua e faitau i le Tusi a Mamona?”

“Leai.”

“Ia e tatau ona e faitau i ai. O se tusi maoae.”

E leai se tasi na tofiaina Scott e talanoa i le pasese i ona autafa. Ou te leiloa pe sa ia mafaufau ma le totoa i lana feagaiga o le papatisoga e “tu [o se molimau] a le Atua i taimi uma ma i mea uma, ma i nofoaga uma atonu tou te i ai, seia oo lava i le oti” (Mosaea 18:9); ae o lana valaaulia ua faaali atu ai ma le mautinoa o lena feagaiga ua mauaa i totonu ia te ia.

E faapena foi, tatou te le manaomia se tofiga, pe tatau foi ona tatou faatalitali mo se tofiga ina ia valaaulia ai o tatou aiga le lolotu, uo, ma tuaoi ina ia auai mai i le lotu, faitau le Tusi a Mamona, pe feiloai i faifeautalai faamisiona. I le avea ai ma faiaoga o aiga ma faiaoga asiasi, e le manaomia lo tatou mauaina o se tofiga e valaaulia ai tagata le toaaga mai tatou te faiaoga o aiga ai pe faiaoga asiasi ai ina ia toe malolosi mai pe saunia e maua faamanuiaga o le malumalu. E faaopoopo atu i feagaiga o loo lisiina atu i luga, ua tatou osia foi se feagaiga paia ina ia “tauave avega a le tasi, ina ia mama; …ma … faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga” (Mosaea 18: 8–9).

O le faataunuuina o la tatou tiutetauave e faasoa atu le talalelei ma fesoasoani i a tatou uo ma tuaoi le toaaga ina ia toe malolosi mai, o a tatou taumafaiga o le a sili atu ona aoga pe a tatou saili atu i musumusuga ma faatino ona o le alofa---e mo le Faaola ma faapea foi mo le tagata o loo tatou auauna i ai. Mo se faataitaiga, mafaufau i le tatalo na faia e Alema a o latou sauniuni ma ana soa e aoao atu le au sa Sorama:

“Le Alii e, sei e tuu mai ia te i matou ia mafai ona matou maua le manuia i le toe aumai o i latou ia te oe, ia Keriso.

“Faauta, Le Alii e, ua pele lava o latou agaga, ma o le toatele o i latou o o matou uso; o lea, tuu mai ia te i matou, Le Alii e, le mana ma le poto ina ia mafai ona matou toe aumai i latou nei, o o matou uso, ia te oe” (Alema 31:34--35).

Na silafia lelei e Alema o tagata taitasi ia na auina atu i ai o ia e aoao o se fanau agaga a le Atua ma o sona lava uso po o se tuafafine, ma sa ia alofa ia i latou. Ina ua uma ona tatalo, na faatumulia Alema ma ana soa i le Agaga Paia ma na vave loa ona galulue.

I le faatatauina o le aafiaga ma le tatalo a Alema i lo tatou vaitaimi na saunoa ai Peresitene Gordon B. Hinckley e faapea: “Ia faatupuina le silafia i loto o tagata uma o le ekalesia, lona lava agavaa e aumaia isi i se malamalama o le upumoni. Ia galueaiina e ia. Ia tatalo o ia ma le naunautai mo lea tulaga. Ia taufai tatalo tagata o le ekalesia, e faapei o Alema o anamua” (“Saili Tamai Mamoe, Fafaga Mamoe,” 106).

O le a alualu i luma le galuega a le Alii pe a tatou malamalama ma faataunuu e i tatou taitoatasi o tatou faamoemoega. O le a faamalosia le perisitua, ma o le a tatou maua se faamanuiaga loloto i le galuega faafaifeautalai ma le toe faatoaagaina mai pe a tuufaatasia ia aufono a uarota, au paia, ma faifeautalai faamisiona i le faamoemoega o le Alii.

E moni e leai lava se isi taimi ua sili ona faagaeetia ia auai ai i le galuega a le Alii. I se lalolagi ua matuai faigofie ai lava ona tatou faasoa atu a tatou molimau, o le a mautinoa lava e salalau atu le malo o le Atua, e pei o le maa i le miti a Nepukanesa, seia oo ina faatumulia ai le lalolagi atoa (tagai Tanielu 2).

Tau ina ia tatou lotogatasi uma o ni tagata o le au paia ma faifeautalai, i le faataunuuina o la tatou faamoemoega faafaifeautalai ina ia fesoasoani atu i isi ia o mai ia Keriso. Ia avea i tatou ma malamalama ma se sulu i le lalolagi atoa, aemaise i fanau a le Atua o e o loo saili atu i faamanuiaga a le Alii. O lau tatalo lea, i le suafa o Iesu Keriso, amene.