Iyang Papahulayon ang Nag-antus

Ang Manluluwas miingon, “Umari kanako, kamong tanan nga nabudlay ug nabug-atan, ug papahulayon ko kamo” (Mateo 11:28).

Daghan ang nagpas-an og bug-at nga mga palas-anon. Ang uban nawad-an sa usa ka minahal tungod sa kamatayon o sa pag-amuma alang sa usa ka masakiton. Ang uban nasakitan tungod sa diborsyo. May lain nga nangandoy og mahangturong kaminyoon. Ang uban nabiktima sa maka-adik nga butang o mga bisyo sama sa bino, tabako, drugas, o pornograpiya. May lain nga nangabakol o may diperensya sa panghunahuna. Ang uban naghigwaos tungod sa pagkaibug sa isigka lalaki o isigka babaye. Ang uban may mapait nga pagbati sa pagka-ubos o wala kinahanglana. Sa laktud, daghan ang gibug-atan sa gipas-an.

Sa matag usa kanato ang atong Manluluwas mihatag niini nga mahigugmaong pagdapit:

“Umari kanako, kamong tanan nga nabudlay ug nabug-atan, ug papahulayon ko kamo.

“Isangon ang akong yugo sunda ninyo ako; kay malumo ako ug mapaubsanon sa espiritu, ug makapahulay kamo.

“Sayon ang yugo nga akong ihatag kaninyo” (Mateo 11:28–30).

Ang balaang kasulatan may daghang estorya sa Manluluwas nga nang-ayo sa mga nag-antus. Iyang gihimo ang buta nga makakita, ang bungol nga makadungog, ang paralitiko, ang nanguyos, o ang lulid nangaayo, ang mga sanlahon nangahinlo; ug ang mga dautang espiritu gipagawas. Kanunay atong mabasahan nga ang tawo nga namaayo niining mga pisikal nga sakit “hingpit nanga-ayo” (tan-awa sa Mateo 14:36; 15:28; Marcos 6:56; 10:52; Lucas 17:19; Juan 5:9).

Daghan ang gipang-ayo ni Jesus sa pisikal nga mga sakit, apan Siya wala mohikaw sa pag-ayo niadtong nangita nga “hingpit nga nanga-ayo” gikan sa ilang ubang mga balatian. Si Mateo nagsulat nga Siya nang-ayo sa tanang balatian ug tanang sakit sa mga tawo (tan-awa sa Mateo 4:23; 9:35). Daghang mga tawo mikuyog Kaniya, ug Iyang “giayo silang tanan” (Mateo 12:15). Sigurado nga kining pagpang-ayo naglakip niadtong mga balatian nga emosyonal, o sa hunahuna, o espirituhanon. Iyang gipang-ayo silang tanan.

Sa Iyang unang pagwali didto sa sinagoga, si Jesus kusog nga mibasa niining panagna sa Isaias: “Gidihogan ako niya aron sa pagsangyaw sa Maayong Balita ngadto sa mga kabos, gipadala ako niya aron pagsangyaw sa kagawasan ngadto sa mga binihag, ug pagpahiuli sa panan-aw sa mga buta, pagluwas sa mga dinaugdaog” (Lucas 4:18). Sa pagpahayag ni Jesus nga Siya miabut aron sa pagtuman sa panagna, Iyang gituyo pagpamatuod nga Siya moayo niadtong may pisikal nga balatian ug Iyang pagawason ang binihag, luwason ang dinaugdaog, ug paglipay sa masulob-on.

Ang Ebanghelyo ni Lucas may daghang mga ehemplo niadto nga pagpangalagad. Naghisgot kini niadtong panahon nga “daghang mga tawo nangadto sa pagpamati [Jesus], ug aron mamaayo Niya sa ilang mga balatian” (Lucas 5:15). Sa laing higayon nahisulat nga si Jesus “nag-ayo og daghan sa ilang mga balatian” (Lucas 7:21) ug nga Iyang “giayo sila nga nanagkinahanglang ayohon” (Lucas 9:11). Kini nagpasabut usab unsa ka bagang huot sa katawhan nga gikan sa Judea ug Jerusalem ug kabaybayonan sa Sidon nga nangadto sa patag “aron sa pagpatalinghug kaniya, ug aron ayohon” (Lucas 6:17).

Niadto nga ang Manluluwas mipakita ngadto sa mga matarung sa Bag-ong Kalibutan, Siya nanawag og mga tawo sa pagpaduol sa mga bakol o buta o may laing pisikal nga mga balatian. Siya usab miabi-abi og sama nga pagdapit niadtong “gitakbuyan sa tanan nga mga matang sa sakit” (3 Nephi 17:7). “Dad-a sila ngari,” Siya miingon, “ug Ako moayo kanila” (b. 7). Ang Basahon ni Mormon nag-istorya kon giunsa sa pundok sa katawhan pagpaduol sa “tanan kanila nga gitakbuyan sa tanan nga matang sa sakit” (b. 9). Kini naglakip gayud sa mga tawo nga may tanang matang nga pisikal o emosyonal o hunahuna nga kalisdanan ug ang balaang kasulatan nagpamatuod nga si Jesus “miayo kanila matag usa kanila” (b. 9).

Ang Manluluwas nagtudlo nga kita adunay kalisdanan dinhi sa kalibutan, apan kita angay “magmalipayon” tungod kay Iyang “gidaog ang kalibutan” (Juan 16:33). Ang Iyang Pag-ula milukop ug may igo nga gahum dili lang sa pagbayad nga bugti sa sala, apan pagsulbad sa tawhanong kalisdanan. Ang Basahon ni Mormon nagtudlo nga “Siya magpadayon, mag-antus sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan” (Alma 7:11; tan-awa usab sa 2 Nephi 9:21).

Siya nahibalo sa atong mga kasakit, ug Siya anaa alang kanato. Sama sa maayong Samaryanhon sa Iyang sambingay, dihang Iya kitang nakit-an nga samaran sa daplin sa dalan, Iyang gibugkosan ang atong mga samad ug kita giatiman (tan-awa sa Lucas 10:34). Mga kaigsoonan, ang makaayo nga gahum sa Iyang Pag-ula alang kaninyo, alang kanato, alang sa tanan.

Ang Iyang kinatibuk-ang gahum sa pag-ayo gihulagway niining mainampoong mga pulong sa atong himno “Master, the Tempest is Raging”:

Kita mahimong mangaayo pinaagi sa awtoridad sa Melchizedek nga Pagkapari [Melchizedek Priesthood]. Si Jesus mihatag og gahum sa Iyang mga Apostoles “sa pag-ayo sa tanang mga sakit ug balatian” (Mateo 10:1; tan-awa usab sa Marcos 3:15; Lucas 9:1–2), ug sila nanglakaw “nagsangyaw sa ebanghelyo, ug nangayo sa tanang dapit” (Lucas 9:6; tan-awa usab sa Marcos 6:13; Mga Buhat 5:16). Ang Seventy gipadala usab nga may gahum ug gimandoan sa pag-ayo sa masakiton (tan-awa sa Lucas 10:9; Mga Buhat 8:6–7).

Bisan og ang Manluluwas makaayo sa tanan nga buot Niya nga ayohon, dili kini tinuod ngadto sa tanan nga naghupot sa Iyang awtoridad sa priesthood. Ang paggamit sa tawo sa awtoridad nag-agad sa kabubut-on Kaniya nga tag-iya sa priesthood. Sa ingon man, kita giingnan nga ang uban nga gipanalanginan sa mga elder wala mamaayo tungod kay “panahon na nga mamatay” sila (D&P. 42:48). Sama usab, sa dihang si Apostol Pablo naninguha nga mamaayo gikan sa “sakit sa unod” nga naghasol kaniya (2 Mga Taga-Corinto 12:7), ang Ginoo nagdumili sa pag-ayo kaniya. Si Pablo mipadayon sa pagsulat nga ang Ginoo mipasabot, “Ang akong grasya igo kanimo, kay ang akong gahum nahimong malig-on sa imong kahuyang” (b. 9). Si Pablo masinugtanong mitubag nga, “gikalipay ko ang akong mga kakulian, nga ang gahum sa Ginoo naanaa kanako … kay kon huyang ko, nalig-on ako” (mga b. 9–10).

Ang mga panalangin sa pagkaayo moabut sa daghang mga paagi, ang kada usa ipahiangay sa atong matag usa nga mga panginahanglan, nga nahibaloan Niya kinsa nahigugma kaayo kanato. Usahay ang “pagkaayo” nagtambal sa atong mga sakit o nagtangtang sa atong palas-anon. Apan usahay kita “nangaayo” sa dihang gihatagan kita’g kalig-on o pagkamasinabuton o pagkamapailubon sa pagpas-an sa mga palas-anon nga gisangon kanato.

Ang katawhan nga mikuyog ni Alma naulipon sa madaug-daogon nga mga dautan. Sa dihang sila nag-ampo og kaluwasan, ang Ginoo miingon kanila nga moabot Siya moluwas kanila, apan niadtong higayona Siya mopagaan sa ilang mga alantuson “gani kamo dili mobati kanila diha sa inyong mga buko-buko, bisan anaa kamo sa pagkaulipon; ug kini ako mobuhat nga kamo mobarug ingon nga mga saksi … nga ako, ang Ginoong Dios, moduaw sa akong mga katawhan diha sa ilang mga kasakit” (Mosiah 24:14). Sa ingon nga paagi ang katawhan wala magkinahanglan nga ang ilang mga pag-antos tangtangon, apan ang Ginoo naglig-on kanila aron “ilang madaug ang mga alantuson uban sa kasayon, ug sila mitugyan sa maayo nga buot ug uban sa pailub ngadto sa tanan nga kabubut-on sa Ginoo.” (b. 15).

Pareho nga saad ug epekto sa mga inahan nga nangabiyuda o nagdiborsyo, ngadto kaninyo nga wala nangaminyo nga nag-inusara, ngadto kaninyo mga caregiver nga nag-antus, ngadto sa mga tawo nga nangaadik, ug ngadto natong tanan kon unsa man ang atong giantos. “Duol ngadto kang Kristo,” ang propeta nag-ingon, “ug paghingpit diha kaniya” (Moroni 10:32).

May mga higayon nga kita nahasol nga ang atong mga alantuson bug-at ra kaayo. Nga ingon sa may unos nga mihuros sa atong mga kinabuhi, nga bation nato nga kita gipasagdan ug misangpit sama sa mga disipulo taliwala sa unos, “Magtutudlo, wala ka ba magpakabana nga hapit na man kita malunod?” (Marcos 4:38). Sa maong mga higayon angay natong mahinumdoman ang Iyang tubag: “Nganong nalisang man kamo? wala ba kamo’y pagsalig?” (b. 40).

Ang gahum sa pag-ayo ni Ginoong Jesukristo—mahimong kini motangtang sa atong alantuson o mopalig-on kanato aron makalahutay ug makadawat kanila sama ni Apostol Pablo—anaa alang sa matag kalisdanan niining mortalidad.

Human sa akong paghatag sa kinatibuk-ang komperensya nga mensahe kabahin sa kadautan sa pornograpiya (tan-awa sa “Pornograpiya,” Liahona, Mayo 2005, 87–90), Ako nakadawat og daghang mga sulat gikan sa mga tawo nga nag-antus niining pagkaadik. Ang ubang mga sulat gikan sa mga lalaki nga nakahuman na pagbuntog sa pornograpiya. Usa ka lalaki misulat:

“Daghang mga leksyon nga akong nakat-onan gikan sa akong kasinatian sa pagkahaw-as gikan sa kangitngit niini nga sala nga gamhanan kaayo nga miulipon sa mga kinabuhi sa tawo nga nagumon niini: (1) Kini dako nga problema nga lisud katuhoan nga maundang. … (2) Ang labing importanting tinubdan sa tabang ug kalig-on sa paagi nga makahinulsol mao ang Manluluwas. … (3) Bug-os, kada adlaw nga pagtuon sa balaang kasulatan, kanunay nga pagsimba sa templo, ug matinud-anon, relihiyoso nga pag-apil sa sakrament kining tanan gikinahanglan nga bahin sa pamaagi sa paghinulsol. Kini akong gituohan, kay kining tanan nga kalihokan makatabang nga mopagamot ug mopalig-on sa inyong relasyon ngadto sa Manluluwas, sa inyong pagsabut sa Iyang makaluwas nga pagpasakit, ug sa inyong hugot nga pagtuo sa Iyang gahum sa pag-ayo” (sulat nga pinetsahan og Oktubre. 24, 2005).

“Duol ngari kanako,” ang Manluluwas miingon, “ug kamo makakaplag og kapahulayan ngadto sa inyong mga kalag” (Mateo 11:28–29). Kanang nabug-atan nga tawo miduol ngadto sa Manluluwas, ug ingon man usab sa matag usa kanato.

Usa ka babaye kinsang kaminyoon nahulga tungod sa pagka-adik sa bana sa pornograpiya misulat kon giunsa niya pagtabang niini sulod sa lima ka tuig nga puno sa kasakit hangtud, sama sa iyang giingon, “pinaagi sa gasa sa atong bililhong Manluluwas sa mahimayaong Pag-ula ug sa Iyang gitudlo kanako kabahin sa pagpasaylo, [ang akong bana] sa katapusan nahimong gawasnon—ug mao usab ako.” Isip usa nga wala magkinahanglan og paghugas sa sala, apan aron lamang pagpaninguha nga ang gihigugma makagawas gikan sa pagkabilanggo, siya misulat niini nga tambag:

“Pakigsuod sa Ginoo. … Siya ang imong labing suod nga higala! Siya nahibalo sa imong pag-antus tungod kay humana kini Niya giantus alang kanimo. Siya andam sa pagpas-an niana nga alantuson. Hatag og igong pagsalig Kaniya sa pagbutang niini diha sa Iyang tiilan ug tugoti Siya nga mopas-an alang kanimo. Unya ang imong kahasol mapulihan sa Iyang kalinaw, sa kinahiladman sa atong kalag” (sulat pinetsahan og Abr. 18, 2005).

Usa ka lalaki misulat sa General Authority mahitungod og giunsa sa gahum sa Pag-ula nga nakatabang sa iyang problema nga maibog sa isigka lalaki. Na-excommunicate siya sa seryoso nga mga sala nga nakalapas sa iyang mga pakigsaad sa templo ug sa iyang mga responsibilidad ngadto sa mga anak. Kinahanglang mopili siya kon mosulay ba siya sa pagkinabuhi sa ebanghelyo o kon mopadayon ba siya sa dalan nga mahisupak sa mga pagtulon-an.

“Ako nahibalo nga mahimong malisud,” siya misulat, “apan ako wala makakita kon unsa ang akong maaguman.” Ang iyang sulat naghulagway sa kahaw-ang ug kakulang ug ang dili katuhoang pag-antus nga iyang nasinati gikan sa kahiladman sa iyang kalag sa dihang siya naningkamot nga makabalik. Siya hugtanon nga nag-ampo nga mapasaylo, may mga higayon nga usahay moabut og daghang oras. Siya natabangan pinaagi sa pagbasa sa balaang kasulatan, pinaagi sa pag-agak sa mahigugmaong bishop, ug pinaagi sa mga panalangin sa priesthood. Apan kon unsa sa katapusan ang nakahimo sa kalainan mao ang pagtabang sa Manluluwas. Siya mipasabut:

“Kadto tungod lamang pinaagi Kaniya ug sa Iyang Pag-ula. … Ako mibati karon og dako kaayong pagpasalamat. Ang akong mga pag-antus ingon sa dili ko na maagwanta usahay, ug gani pagkagamay ra gayud niini kon itandi giunsa Niya pagpakasakit. Kon kaniadto diha may kangitngit, karon aduna nay gugma ug pagpasalamat.”

Siya mipadayon: “May uban nga nangangkon nga ang kausaban mahimo ug pagpatambal maoy bugtong sulbad. Sila mga maalamon kaayo niining mga butanga ug daghan kaayong ikatanyag ngadto niadtong nanlimbasug …, apan ako nabalaka nga sila nakalimot sa paglakip sa Langitnong Amahan sa pamaagi. Kon may kausaban nga mahitabo, kini mahitabo sigun sa pagbuot sa Dios. Ako usab nga gikasubo nga daghang mga tawo ang mitutok sa hinungdan sa [pagka-ibog sa isigka-lalaki o babaye]. … Wala kinahanglana ang tubag ngano nga ako ania [niini nga hagit]. Ako wala mahibalo kon diha na ba kini sa akong pagkahimugso, o kon ang butang nga naglibot nakapadasig ba niini. Ang tinuod niining pagkabutanga nga diha ako’y pagpakigbisog sa akong kinabuhi ug unsa ang akong buhaton niini gikan karong panahona ngadto sa umaabot maoy bililhon” (sulat gipetsahan og Mar. 25, 2006).

Ang mga tawo nga nagpadala niining mga sulat nahibalo nga ang Pag-ula ni Jesukristo ug ang pagkaayo nga gitanyag makatabang karon aron makabaton og kahigayonan sa paghinulsol gikan sa mga sala. Ang Pag-ula makahatag usab kanato og kalig-on nga makalahutay sa “mga sakit ug mga kasakit ug mga pagtintal sa matag matang,” kay ang atong Manluluwas midawat usab ngadto Kaniya “sa mga sakit ug mga balatian sa iyang mga katawhan” (Alma 7:11). Mga kaigsoonan, kon ang imong hugot nga pagtuo ug pag-ampo ug ang gahum sa priesthood dili makaayo sa usa kaninyo gikan sa usa ka balatian, ang gahum sa Pag-ula sigurado gayud nga makahatag kaninyo og kalig-on sa pagpas-an sa palas-anon.

“Umari kanako, kamong tanan nga gikapuyan ug gibug-atan sa inyong gipas-an,” ang Manluluwas miingon, “ug papahulayon ko… ang inyong mga kalag” (Mateo 11:28–29).

Sa atong pagpakigbisog sa mga hagit niining kinabuhia, ako nag-ampo alang sa matag usa kanato, sama sa propeta nga si Mormon nag-ampo alang sa iyang anak, nga si Moroni: “Hinaut unta nga si Kristo mobayaw kanimo, ug unta ang iyang mga pag-antus ug kamatayon, … ug ang iyang kalooy ug pagkamainantuson, ug ang paglaum sa iyang himaya ug kinabuhi nga dayon, moabut sa imong salabutan sa kahangturan” (Moroni 9:25).

Ako mosaksi ni Jesukristo, atong Manluluwas, kinsa nagdapit kanato sa pagduol ngadto Kaniya ug mahimong hingpit diha Kaniya. Siya mobugkos sa atong mga samad ug Iyang papahulayon ang mga nag-antus. Sa ngalan ni Jesukristo, amen.