A Farerei Faahou  Tatou

E to‘u mau taea‘e e tuahine here e, te farii poupou atu nei matou ia outou i te amuiraa rahi, o te faaroohia e te itehia na roto i te mau rave‘a haaparareraa huru rau na te ao atoa nei. Te faaite nei matou i to matou mauruuru i te mau taata atoa o te haa nei e te mau rave‘a fifi no teie ohipa rahi.

Mai te ava‘e eperera ra te taime hope‘a i farerei ai tatou, ua haere te ohipa a te Ekalesia i mua ma te tape‘a-ore-hia. Ua haamaitai au e maha na hiero apî. Ma te apeehia e to‘u na tauturu e te tahi atu Hui Mana Faatere, ua tere atu vau i Gila Valley, Arizona ; i Vancouver, British Columbia ; i te Oire no Cebu i te Fenua Philipino : e i Kiev, Ukraine. E mea nehenehe mau te mau hiero i roto i teie nei mau vahi. Te haamaitai nei teie mau hiero i te mau oraraa o to tatou mau melo e ua riro ei haamaitairaa i ni‘a i te mau taata e ere no to tatou faaroo.

I te pô na mua‘e i te oro‘a haamo‘araa no te mau hiero tata‘itahi, ua haamaitaihia matou i te mata‘ita‘iraa i te hoê ta‘urua no te peu tumu o te fenua, tei hautihia mai e to tatou feia apî e te tahi o to tatou feia paari. Ua tupu teie mau oro‘a i te mau tahua tu‘aro rarahi, e i Kiew ua tupu ïa te reira i roto i te hoê a‘orai nehenehe roa. E mea maitai ana‘e te mau ori, te mau himeneraa, te mau hautiraa upa e te mau faaiteiteraa. Te faaite nei au i to‘u haapoupouraa e to‘u here i te mau taata atoa tei hauti i roto i teie mau oro‘a.

Ua riro te haamo‘araa i te hiero tata‘itahi e oro‘a varua. Ua ite matou i te varua o te Fatu i roto i te mau oro‘a haamo‘araa atoa.

Teie ava‘e i mua e haamo‘a ïa matou i te hiero no Laie Hawaii, te hoê o ta tatou mau hiero tahito roa‘e, tei faaapîhia e rave rahi mau ava‘e i teie nei. Te tia‘i nei matou i taua oro‘a mo‘a ra.

E tamau noa matou i te patu i te mau hiero. I teie po‘ipo‘i, te oaoa nei au i te faaite atu e pae faahou hiero tei noaa te mau fenua e i roto i te ava‘e e mau matahiti i mua nei e patuhia ai teie mau hiero i te mau vahi i muri nei : Lisbonne i te fenua Potutara ; Indianapolis i te tuhaa fenua Indiana ; Urdaneta i te fenua Firipino ; Hartford i tuhaa fenua no Connecticut ; e i Tijuana i te fenua Mehiko.

E mea faufaa rahi te mau oro‘a e ravehia nei i roto i to tatou mau hiero no to tatou iho faaoraraa e no te faaoraraa o to tatou mau fetii tei pohe. Ia tamau noa tatou i te haere i te mau hiero tei patuhia tapiri atu e piri roa’tu i to tatou mau melo.

I teie nei, hou tatou e faaroo ai i to tatou feia a‘o i teie po‘ipo‘i, te hinaaro nei au e faahiti i te tahi mea faufaa rahi roa no‘u e te ti‘a ia tatou ia haapa‘o maitai. Te parau nei au no te ohipa misionare.

A tahi, i te feia apî no te Autahu‘araa a Aarona e outou te feia apî o te riro ra ei peresibutero, te parau faahou atu nei au i te mea ta te mau peropheta i haapii maoro – ia faaineine i te mau feia apî tane ti‘amâ atoa e te itoito ia tavini i te hoê misioni. Te taviniraa misionare e hoê hopoi‘a na te autahu‘araa – te hoê faaueraa ta te Fatu e titau ia tatou tei farii rahi. E te feia apî tane, te a‘o atu nei au ia outou ia faaineine no te tavini ei misionare. Ia vai mâ noa outou e te viivii-ore e parau-ti‘a no te ti‘a atu no te Fatu. Ia vai itoito e ia vai puai noa outou. A tuatapapa i te mau papa‘iraa mo‘a. Mai te mea e nehenehe, a haere i te Haapiiraa Evanelia aore râ te Haapiiraa Evanelia na te feia apî paari. A haamatau ia outou i te buka arata‘i misionare, A Poro Haere i Ta‘u nei Evanelia.

Te hoê parau ia outou te mau tuahine apî : Noa’tu e aita outou i farii i te hoê â hopoi‘a autahu‘araa mai te feia apî tane no te tavini ei mau misionare rave tamau, e nehenehe atoa ia outou ia riro ei mau misionare e te farii poupou nei matou i ta outou taviniraa.

E i teie nei ia outou te mau taea‘e e te mau tuahine paari : te hinaaro nei matou e rave rahi, e e rave rahi â mau tane e mau vahine faaipoipo paari. I te mau tane e mau vahine faaipoipo haapa‘o e tavini nei e aore râ tei tavini na, te haamauruuru nei matou ia outou no to outou faaroo e to outou itoito i te evanelia a Iesu Mesia. Te tavini nei outou ma te hinaaro mau e ma te maitai e te faatupu nei i te maitai rahi.

Ia outou aita â i tae atu ra i te taime no te oraraa e nehenehe ai ia outou e tavini i te hoê misioni ei tane e ei vahine faaipoipo, te faaitoito nei au ia outou ia faaineine i teie nei no te mahana e nehenehe ai ia outou e to outou hoa faaipoipo ia na reira. Ia nahonaho to outou oraraa, e ia noaa ia outou te faatufaaraa, e ia maitai to outou ea, a faaineine ia outou no te faaru‘e i te utuafare e no te rave i te taviniraa ei misionare rave tamau. E mea iti roa te mau taime i roto i to outou oraraa e oaoa ai outou i te varua marû e te oaoa rahi e tae mai na roto i te tavini-amui-raa i roto i te ohipa a te Fatu.

I teie nei, e to‘u mau taea‘e e mau tuahine, ia farii outou i te Varua o te Fatu a faaroo ai tatou i Ta’na ra mau tavini i roto i na mahana e piti i mua nei. Ia riro te reira ei haamaitairaa no tatou tata‘itahi, ta‘u ïa pure, i te i‘oa o Iesu Mesia, Amene.