Levei na Dai ni iValavala Ca

Ena dua na mataka ni siga totoka, au sureti Vicki, na makubuqu yalewa voleka ni yabaki walu, me keirau taubale vata volekata e dua na drano, sa ikoya e dua na ipamu ni wai ena neitou siti totoka.

Keirau taubale tu ena mamarau, vakarogoca tu na irorogo malumu ni drodro ni uciwai makare vinaka ka vakamuria tu na gaunisala. Era tuvani tu e bati ni gaunisala na vunikau drokadroka kei na senikau boi vinaka. Keirau rogoca rawa nodra lagasere na manumanu.

Au taroga na makubuqu yaloka ni mata karakarawa, mamarau, ka yalo galala se sa vakacava tiko nona vakavakarau me baleta na papitaiso.

A sauma mai ena dua na taro: “Tukaqu, na cava na ivalavala ca?”

Au masulaka lo na veivakauqeti kau tovolea meu sauma sara vakarawarawa: “Na ivalavala ca sa ikoya na nakiti ni talaidredre ki na ivunau ni Kalou. E vakararawataka na Tamada Vakalomalagi, ka kena isau na dredre kei na rarawa.”

Ena matata ni nona kauwaitaka, a tarogi au, “E qai tarai keda vakacava?”

Na taro e vakaraitaka taumada na savasava, ia e vakaraitaka tale ga e dua na kauwai me baleta na kena levei vakacava na coko ena ivalavala ca.

Me kila vakavinaka cake sara kina o koya, au vakayagataka na iyaya vakatamata e tu vakavolivoliti keda me dua na kena ivakatakilakila. Tomani sobu tikoga yani na neirau vakamuri sala, keirau raica ena yasa ni bai kaukamea e dua na duru vatu vakaitamera; e bibi toka na kena irairai ni salaga tu na senikau, veikau, kei na vunikau lalai era tubu wavokita. Oti ga e dua na gauna na veivunikau oqo era sa na levu cake sara mai na duru o ya.

Au vakananuma tiko ni vakalailai sobu ga yani e gaunisala, eda na kunea e dua tale na duru ka sa tubua cake tikoga vakalalai e veigauna, ka sa voleka sara me sa sega ni laurai rawa, mai na veikau draudrau era sa solega mai. Au a nanuma de na sega ni rawa me yaco ki na dua na duru na ka o ya, ni veitalia na kena kaukauwa, ena rawa ga me solegi ka vakarusai mai na veikau malumalumu lalai. E a vaka tu beka oqo na vakasama ni duru, “Sega na leqa. Au kaukauwa ka levu, ka na sega ni rawa me vakaleqai au na vunikau lalai oqo.”

Ia ni sa tubu cake me levu na vunikau ka toka volekata, ena sega beka ni na raica taumada na duru; ia ni oti sa na tekivu marautaka na duru na rurugu e vakarautaka na vunikau. Ia e tomana tikoga nona tubu na vunikau, ka vakavolivolita na duru ena rua na tabana ena kena imatai ni rairai malumalumu ia ena yaco na gauna me sa na solega wavoki sara na duru.

Ia na duru e sega tikoga ni vakila na cava e sa yaco tiko.

Sa yaco sara, ena neirau taubale tiko, me keirau yacova na duru ka vakaibalebaletaki tiko.A sa cavu laivi mai na qele.E rairai kurabui na makubuqu lailai yalewa qai tarogi au, “Tukaqu, sa ikoya oqo na vunikau ni ivalavala ca?”

Oti au sa qai vakamacalataka vua ni sa ikoya walega o ya e dua na ivakatakilakila, se e dua na ivakaraitaki, ni kena coriti keda na ivalavala ca.

Au sega ni kila se ena qai tarai koya vakacava na neirau veitalanoa, ia e vakavuna meu vakasamataka na levu ni irairai ni ivalavala ca kei na kena curu yani vakacava ena noda bula kevaka eda vakatara me yaco.

E dodonu meda qaqarauni tiko me baleta na digidigi lalai eda cakava ka rawa me uasivi sara na kena isau, me vaka sara ga na uasivi sara na kena isau na moce sara vakayakavi kei na yadra vakamataka lailai. Na Vunau kei na Veiyalayalati 88:124 e vakatavulici keda meda, “Dou yadra vakamataka lailai me makutu kina na yagomudou kei na yalomudou.” O ira era moce vakayakavi ka yadra vakamataka lailai, vata kei na makutu ni yagodra kei na yalodra era vakalougatataki mai vua na Kalou baleta na nodra talairawarawa.

Na ka e rairai me lailai na kena bibi, me vaka na sega ni moce vakayakavi, sega na masu ena dua na siga, levea na lolo, se voroka na Siga ni Vakacecegu—na lutu lalai vaka o ya—ena vakayalia vakalalai noda qaqarauni e veigauna, rawa kina meda vakayacora na veika ca.

Ena noqu a se yabaki tini vakacaca, na lawa baleti au me 10 na kaloko ena bogi meu sa tiko e vale. Nikua, o ya na gauna era lako kina eso me rawa kina na lasa. Ia eda kila ni levu sara na veika ca e dau qai yaco ena bogi. Sa ikoya ni sa buto era sa qai dau lako na itabagone ena veivanua ka sega ni veiganiti na kena ituvaki, na vanua ni ivakatagi kei na daunisere e sega ni vakatarai ira me ra veitokani vata kei na Yalo Tabu. Oti o ya, ena kena ituvaki oqo, era sa yaco me ra baca rawarawa ni ivalavala ca.

Vakawasoma, ena yaco meda baca ni ivalavala ca e tekivu mai na nona digitaka e dua me nona itokani e dua ka sega ni salavata tikoga kei na kosipeli na nodra itagede; vakakina na kena sagai na rogo se me da ciqomi mai vei ira na noda itokani, na tamata o ya me qai vakavunivuni voli ena ivakavuvuli kei na lawa ni kosipeli, ka lakova sobu e dua na gaunisala ka na kauta walega mai na mosi kei na rarawa kivua na tamata oqo kei ira na nona daulomani.

E dodonu meda qaqarauni tiko me kakua ni laivi me tubu wavoliti keda na ivalavala ca. Na vatuka ni ivalavala ca era sa tu e veivanua—me kena ivakaraitaki mada ga, ena komipiuta se talevoni veikauyaki. Na veitekinolaji oqo era yaga sara vakalevu ka rawa me kauta mai vei keda na veivuke uasivi. Ia na sega ni veiganiti ni kedra vakayagataki—me vaka na vakaitavi ena qito vakaoti-gauna, na parokaramu ni rawa me kauti iko ki na marau vakayago, se levu sara na veika ca me vaka na iyaloyalo vakasisila—sa ikoya e veivakarusai. Na iyaloyalo vakasisila e vakarusa na ivakarau ka cakava vei koya e vakayagataka me lutu dromu ena nukutotolo ni dukadukali, ka rawa walega me dro tani mai kina na tamata ena veivukei e vakaitamera.

Na manumanu rerevaki oqo e vakavuna na mosi kei na veivakararawataki kivei rau ruarua o koya e vakayagataka vata kei ira na luvena tawacala, watina, tamana, kei tinana. Na vua ni marau vakayago sa ikoya na lomaca kei na rarawa. Na vua ni talairawarawa kei na solibula sa ikoya na kamikamica kei na reki tawamudu.

Na vakatulewa me baleta na itagede me vakamuri e dodonu me caka taumada e liu, e sega ni gauna e basika kina na veivakatovolei. Na levu ni ka eda vakayacora e dodonu me:

• Au na cakava na ka oqo baleta ni dodonu, e lako mai vua na Turaga, ka na kauta mai vei au na marau.

• Au na sega ni cakava na ka oqo baleta ni na dreti au tani mai na dina, mai vua na Turaga, kei na mamarau tawamudu e yalataka o Koya kivei ira na yalodina ka talairawarawa.

Me vaka ni kila na Tamada ni da na cakava na digidigi cala, a vakarautaka kina o Koya, ena Nona ituvatuva vakasakiti ni loloma, e dua na i Vakabula kei vuravura me isoro me baleta na nodra ivalavala ca o ira kece era veivutuni; o koya e lako mai Vua me vakasaqara na veivuke, veivakaduavatataki, kei na veivosovosoti; kei ira era sa vinakata me ra sa taura na Yacana, o Jisu Karisito.

Kevaka eda ivalavala ca, e dodonu meda vakasaqara vakatotolo na veivuke baleta ni sega ni rawa meda dro yadudua mai na dai ni ivalavala ca, me vaka ga ni sega ni rawa me vagalalataki koya mai na bai ni vosa vakaibalebale. E dodonu me dua e vukei keda meda biuta tani na veitokoni ni mate.

E rawa me ra veivuke na itubutubu, kei na bisopi sa ikoya e kacivi mai vua na Kalou me vukei keda. Sa ikoya e dodonu kina meda lako ka dolava na lomada kivua.

Vunau kei na Veiyalayalati 58:42–43 e vakamacalataka:

“Raica ko koya sa veivutunitaka na nona ivalavala ca, ena vosoti, ia koi au na Turaga, au na sega ni nanuma tale na nona ivalavala ca.

“Raica oqo ga na sala dou na kila kina na tamata sa veivutuni vakaidina—ena tusanaka na nona ivalavala ca, ka biuta laivi sara vakadua.”

Ni oti e vica na vula neirau taubale volekata na drano, a lai vakatarogi na makubuqu yalewa mai vua nona bisopi—o tamana—me baleta na papitaiso. Ni oti na veivakatarogi au a tarogi koya se vakacava na kena ilakolako. A sauma, voleka ni cudruvi au, “Tukaqu, na veivakatarogi e ka vuni. O kila o ya.”

Kemuni na bisopi, au nuitaka ni o ni na taura vakabibi na kena isau o ya. E kena irairai vei au ni makubuqu yalewa a tubu cake vakalevu sara nona kila ena dua na gauna lekaleka.

Me vaka ga na vunikau au a vakamacalataka ni kauta mai na rarawa, mosi, veivakararawataki kei na veicoriti, e dua tale na vunikau e rawa me kauta mai na kena veibasai. E tukuni tiko ena 1 Nifai 8:10–12:

“Au sa raica kina e dua na vunikau, ia sa kamikamica na vuana me marau kina na tamata.

“Au sa lako yani ka kania na vuana, a sa kamikamica sara mai na veika kecega au sa tovolea oti. A sa vulavula na vuana ka sa uasivia na veika vulavula kecega au sa raica oti.

“Ia niu sa kania na vuanikau, sa vuabale na noqu marau.”

Kemuni na taciqu kei na ganequ lomani, ni vakaukauwa tiko ka cakava na digidigi vinaka me rawa kina vei kemuni mo ni kania na vua ni vunikau ni bula. Kevaka e dua na vuna, o ni sa lakosese se biuta na gaunisala, e dodo tu na ligai keimami ka keimami kaya kivei kemuni, “Ni lako mai. E tu na inuinui. Keimami lomani kemuni, ka keimami vinakata me keimami vukei kemuni mo ni marau.”

E lomani keda vakalevu sara na Tamada Vakalomalagi ka solia kina o Koya na Luvena e Duabau ga, o Jisu Karisito.

E lomani keda vakalevu sara o Jisu Karisito ka solia o Koya na Nona bula ena veisorovaki me baleta noda ivalavala ca!

A ka savasava cava e rawa meda solia me ka ciqoma kina na reki o ya?

Ena veidina oqo au wasea kina na noqu ivakadinadina ena yaca tabu i Jisu Karisito, emeni.