Ona o Lo Outou Faatuatua

Jeffrey R. Holland

Of the Quorum of the Twelve Apostles


Ou te faafetai atu ia te outou tagata ofoofogia o le Ekalesia … mo le faamaonia i o outou olaga i aso taitasi o le alofa mama o Keriso “e le uma.”
 

Peresitene Monson, ua auau faatasi tagata uma o lenei ekalesia i le lalolagi atoa i lena viiga faatasi ma lenei aufaipese matagofie, ma e matou te faapea atu, “Matou te viia oe, le Atua, mo se perofeta.” Faafetai atu mo lou soifua, mo lau faataitaiga, ma lena savali faafeiloai i se isi foi konafesi aoao a le Ekalesia. Matou te alolofa ia te oe, faamemelo ia te oe, ma lagolagoina oe. E moni lava, i le sauniga i le afiafi nei o le a tatou maua ai se avanoa e sili atu ona aloaia e sii ai o tatou lima i se palota lagolago, e le gata mo Peresitene Monson, ae faapea foi mo isi pulega aoao uma o le Ekalesia.Talu ai o le a i ai ma lo’u igoa i lena lisi, se’i ou tautala atu lava la ma le lototele mo i matou uma e faafetai atu ai ia te oe mo lena lagolago. E leai se tasi o i matou e mafai ona galue e aunoa ma au tatalo ma lau lagolago. E le lanu lou lotonuu ma lou alofa i a matou upu.

I le agaga lava lena, o la’u savali i le asō o le fai atu lea matou te lagolagoina oe, matou te toe faia mo oe na tatalo mai o matou loto ma faailoa atu ai foi lena lava alofa e tasi. Ua matou iloa uma lava o loo i ai ki faapitoa, feagaiga, ma tiutetauave ua tuuina mai i taitai pulefaamalumalu o le Ekalesia, ae ua matou iloaina foi e maua mai e le Ekalesia le malosi e le mafaatusalia, se malosiaga moni e tulaga ese, mai le faatuatua ma le tuuto o tagata uma o lenei Ekalesia, po o ai lava le tagata. Po o fea lava le atunuu e te nofo ai, po o le a lava lou laitiiti po o lou lagona e te le agavaa, po o le a foi lou matua po o le faatauvaa o lau vaai ia te oe lava, ou te molimau atu, e alofa le Atua ia te outou taitoatasi, o le fatu outou o le aano o Lana galuega, ma e talisapaia outou ma o loo talosia e taitai pulefaamalumalu o Lana Ekalesia. O le taua o le tagata lava ia, ma le ofoofogia paia o outou taitoatasi, o le mafuaaga tonu lava lea ua i ai se ata o le faaolataga ma le faaeaga. E ese mai le anaga o lenei vaitau faapea, o loo faatatau ia te oe. Leai, aua e te faliu atu i lou tuaoi. O lea ou te talanoa atu ia te oe!

Sa ou tauivi e su’e se auala talafeagai e ta’u atu ai le tele o le alofa o le Atua ia te outou, ma le agaga faafetai o i matou o i luga o le tulaga lenei mo outou. O loo ou taumafai e avea ma siufofoga o agelu moni o le lagi, e faafetai atu ai ia te outou mo mea lelei uma ua outou faia, mo upu agalelei uma sa outou faia, mo taulaga uma ua outou osia mo se tasi—soo se tasi—mo le matagofie ma faamanuiaga o le talalelei a Iesu Keriso.

Ou te faafetai lava mo taitai o Tamaitai Talavou e o i tolauapiga a teineiti, e leai ni fasimoli u’u ulu, leai ni taelega po o ni teuteu tino, a ua latou faaliliuina sauniga molimau e faia i tafatafa o afitafu namuasua, e avea o ni aafiaga faaleagaga e aupito sili ona mausali—o le a manatua pea e na teineiti—po o na taitai i o latou olaga. Ou te faafetai mo tamaitai uma o le Ekalesia o ē i lo’u lava olaga, e malolosi e pei o le Mauga o Sinai ma agaalofa e pei o le Mauga o le Lauga Faaamuia. O nisi taimi matou te talie ai i tala a o tatou tuafafine—ua outou silafia, o Jell-O lanumeamata, ie soosoo, ma le kuka o le sisi ma le pateta e masani ona tausasami ai pe a mae’a se maliu. Peitai o lo matou aiga sa talisapaia nei mea taitasi i se tasi taimi—ma sa i ai se aso na matou maua ai se ie soosoo ma le kuka o sisi ma pateta i le aso lava e tasi. E na o si tamai ie soosoo—laitiiti, ioe—ina ia mafanafana ma lagolelei ai le malaga a si o’u uso laitiiti e toe foi atu ai i lona aiga faalelagi, e pei ona mananao ai tuafafine o le Aualofa. O meaai na saunia mo lo matou aiga ina ua uma le falelauasiga, sa ofofua mai ae matou te lei talosagaina, sa matua taliaina ma le agaga faafetai. Soisoi, pe a e manao ai, i a tatou aga masani, ae o tamaitai i le Ekalesia o ē o le tele lava o taimi e le lava ona faafetai atu i ai, e i ai pea lava iina pe a i ai lima e tautau i lalo ma tulivae ua vaivai. 1 E foliga mai e otometi lava lo latou malamalama i le paia o le fetalaiga a Keriso: “Aua na faia e outou i le tasi o e aupito itiiti o o’u uso nei … , o a’u lea na outou faia i ai.” 2

Ma e faapena foi ona moni i le usoga a le au perisitua. Mo se faataitaiga, ou te manatu i taitai o o tatou alii talavou o ē, e faalagolago i le tau ma le konetineta, a lē o le savavali i le 50-maila po o le ‘eli’eli—ma taumafai moni e moe i—āna ‘aisa mo ni po malulu aupito uumi i le olaga. Ou te faafetai ona o le manatuaina o la’u vaega o faitaulaga sili i ni nai tausaga ua mavae, sa latou feauaua’i mo ni vaiaso e momoe ai i luga o se tamai nofoa faatalaleu i le potumoe o se tasi o le korama ua vaivai, i nai toe vaiaso o si ona ola, ina ia maua se moe a si ona toalua ua olomatua foi o ia. Ou te faafetai mo le aofaiga tele o faiaoga a le Ekalesia, taitai, faufautua ma failautusi, ae tainane foi i latou e setiina i aso uma laulau ma teu nofoa. Ou te faafetai mo peteriaka faauuina, le au faimusika, le au faitalafaasolopito o aiga, ma ulugalii toe a gaui ponaivi ma faigata, ae malaga lava i le malumalu i le 5:00 i le taeao, ma nai atopa’u toeitiiti a tetelē atu nai lo i latou. Ou te faafetai mo matua e lē manatu faapito—atonu o le olaga atoa—e tausia ai se tamaitiiti e le atoa le malosi, o nisi taimi e sili atu ma le tasi ni faaletonu, a o nisi foi taimi e sili atu ma le tasi tamaiti. Ou te faafetai mo tamaiti e galulue faatasi e toe tausia o latou matua ua matutua ma mama’i.

I le tuafafine olomatua ua lata ina atoatoa, sa toetoe lava a musumusu faatoese mai talu ai nei, “E lei avea lava a’u ma se taitai i se mea i le Ekalesia. Sa na o a’u lava o se fesoasoani,” ou te faapea atu, “Tuafafine pele, ia faamanuia atu le Atua ia te oe ma le au ‘fesoasoani’ uma o i ai i le malo.” O nisi o i tatou ua avea ma taitai, ua faamoemoe e i ai se aso o le a outou maua ai le tulaga i luma o le Atua lena ua outou ausia.

Ua tele taimi ou te le faaali atu ai le agaga faafetai mo le faatuatua ma le agalelei o nei tagata i lo’u olaga. Sa tulai Peresitene James E. Faust i lenei pulelaa i le 13 tausaga talu ai ma saunoa mai, “A o ou laitiiti … , ou te manatua lo’u tinamatua … o kukaina a matou meaai mananaia i se ogaumu tafu aasa. A uma le pusa fafie e i tafatafa o le ogaumu, ona alu gugu lea o Tinamatua … i fafo e toe faatumu mai i le faaputuga fafie e i fafo, ma aumai le pusa fafie mamafa i totonu o le fale. Sa ou matua lē magafagafa lava … [i] lo’u nofonofo ai iina ae tuu si o’u tinamatua pele e alu e faatumu mai [lena] pusa.” Ona, feto’i lea o lona leo ua ootia, ma sa ia faapea mai, “Ua ou maasiasi lava ma ua ou salamo i lo’u lē faia o lea mea i lo’u olaga atoa. Ou te faamoemoe e i ai se aso, ou te faatoga atu ai ia te ia mo lana faamagaloga.” 3

Afai e mafai e se tagata pei o Peresitene Faust, o sē ua ou manatu e toeitiiti lava atoatoa, ona faailoa mai le mea na faaletonu ai i lona talavou, ona mafai lea ona ou faia se lafoga faapena ma avatu la’u faamalo, lea ua leva ona tatau ona ou faia.

Ina ua tofia au e faamisiona i aso e le’i i ai ni taimi, e le’i i ai se faiga fuapau o le tupe e totogi e faifeautalai. E tatau ona totogi e le tagata le tau atoa o le misiona lea e auina atu i ai. O nisi misiona sa matua taugata lava, ma o la’u misiona o se tasi o na misiona.

E pei ona tatou fautuaina faifeautalai e fai, sa ou teuina se tupe ma sa ou faatauina atu a’u meatotino e totogi ai la’u misiona i le mea sili sa ou mafaia. Sa ou manatu, ua lava a’u tupe, ae ou te lei mautinoa pe lava mo le masina faaiu o la’u misiona. Ae ui o lea, na ou tuua lava lo’u aiga, ma lena fesili i lo’u mafaufau, mo le aafiaga aupito sili e mafai e se tagata ona naunau ia maua. Sa ou fiafia i la’u misiona aua sa ou talitonu e leai a se isi alii talavou na faapena lona fiafia i ai muamua, pe talu mai lena taimi.

Ona ou toe taliu mai lea i le taimi tonu lava ua valaauina ai o’u matua e o e faamisiona. O le a la la’u mea a fai nei? E faapefea nei ona ou totogia la’u aoga i le iunivesite? E mafai faapefea ona ou totogia se mea ou te nofo ai ma a’u meaai? Ae mafai foi faapefea ona ou ausia le miti a lo’u loto, o le faaipoipo lea i le tausala lalelei atoatoa o Patricia Terry? Ou te le mā e ta’u atu sa ou lotovaivai ma fefe.

Na ou alu ma le faalotolotolua i le faletupe ma fesili i le pule, o se uo a lo matou aiga, pe fia se tupe o i ai i la’u teugatupe. Sa te’i o ia ma faapea mai, “Aisea Jeff, o la e i ai uma i lau teugatupe. La te le’i ta’u atua? Sa mananao ou matua e fai le mea la te mafaia e te amata ai pe a e foi mai. La te lei talaina lava se sene i le taimi o lau misiona. Faapea lava a’u ua e iloa.”

Leai, ou te lei iloa. Ou te iloa o lo’u tama, na ia aoaoina o ia lava e avea o se “tausitusi” e pei ona ta’ua ai i si o matou taulaga laitiiti, na o ni nai tagata itiiti lava na te tautuaina, atonu na te lei ofuina lava se suti fou pe fai foi se pea seevae fou mo le lua tausaga, ina ia mafai ai e lona atalii ona maua na mea uma mo lana misiona. E le gata i lea, o le mea ou te lei iloa ae na oo lava ina ou iloa, o lo’u tina, o sē e lei faigaluega i lona olaga faaipoipo, ae na alu ma faigaluega i se faleoloa i lo matou nuu, ina ia mafai ai ona totogi mea sa manaomia i la’u misiona. Ae leai se upu e tasi e uiga i na mea na ta’u mai ia te au i la’u misiona. E matua augapiu ma se upu e uiga i lena mea. E toafia ni tamā o lenei Ekalesia na faia le mea lava lea e tasi na faia e lo’u tama? E toafia ni tina, i lenei taimi faigata o le tamaoaiga, o loo faia pea le mea na faia e lo’u tina?

Ua 34 tausaga talu ona maliu lo’u tama, o lea, e faapei foi o Peresitene Faust, o le a ou faatali e faafetai atoatoa atu ia te ia i le isi itu. Ae o si o’u tina faapelepele, lea e atoa i le vaiaso lea lona 95, o loo matamata mai ma le fiafia i le fale i le asō, i lenei faasalalauga, e lei tuai ona ou faafetai atu ia te ia. Ia te oulua, Tina ma Tama, ma i tina ma tamā uma ma aiga ma tagata faatuatua i soo se mea o i ai, ou te faafetai atu mo lo outou ositaulaga mo a outou fanau (ma fanau a isi tagata!), ona o lo outou mananao tele e tuuina atu ia i latou avanoa tou te lei mauaina, ma lo outou mananao tele e tuuina atu ia i latou se olaga e sili ona fiafia.

Ou te faafetai atu ia te outou tagata ofoofogia o le Ekalesia—ma le anoanoai o tagata lelei e le auai i la tatou tapuaiga—mo le faamaonia i o outou olaga i aso taitasi, o le alofa mama o Keriso “e le uma.” 4 E leai se tasi o outou e faatauvaa, i se isi itu, ona ua outou atiina ae le talalelei a Iesu Keriso i le mea ua i ai nei—o se faamanatu ola o Lona alofa tunoa ma le alofa mutimutivale, o se faailoaga patino ae mamana i nuu laiti ma aai tetele, o mea lelei sa Ia faia ma le soifua na Ia faaaluina e taumafai ai e aumaia le filemu ma le faaolataga i isi. E le mafaamatalaina lo matou faamamaluina ina ua faitaulia faatasi i matou ma outou i se galuega paia.

E pei ona fetalai atu Iesu ia Sa Nifae, ou te fai atu foi faapena ia te outou i le asō:

“Ona o lo outou faatuatua … , ua atoatoa lo’u olioli

Ina ua uma ona fetalai atu e ia i nei upu, sa tagi o ia.” 5

Uso e ma tuafafine, i lo’u vaai atu i a outou faataitaiga, ou te toe ta’utino atu ai lo’u naunautaiga ia ou lelei atili, ia faatuatua atili—agalelei ma tuuto atili, alofa atili ma ia faamaoni e faapei o lo tatou Tama i le Lagi ma le toatele o outou. Ou te tatalo atu ai i le suafa o lo tatou Faaa’oa’o Sili i mea uma—le suafa o le Alii o Iesu Keriso—amene.

Show References

  1.  

    1. Tagai Eperu 12:12.; Mataupu Faavae ma Feagaiga 81:5.

  2.  

    2.  Mataio 25:40.

  3.  

    3. James E. Faust, “The Weightier Matters of the Law: Judgment, Mercy, and Faith,” Ensign, Nov. 1997, 53.

  4.  

    4.  1 Korinito 13:8; tagai foi Moronae 7:46–47.

  5.  

    5.  3 Nifae 17:20–21.