2010–2019
Ena Vuku ni Nomu Vakabauta
Okotova 2010


Ena Vuku ni Nomu Vakabauta

Au sa vakavinavinaka vei kemuni taucoko sara na lewenilotu totoka ena Lotu … ena nomuni vakadinadinataka tiko ena nomuni bula ena veisiga ni loloma dina i Karisito ena “sega ni mudu.”

Peresitedi Monson, era sa mai duavata na lewenilotu taucoko ni lotu oqo e vuravura raraba ena sere-ni-vanua cecere o ya vata kei na matasere totoka oqo, ena neimami kaya, “Turaga keitou vuabale, parofita mai veivuke.” Vinaka vakalevu na nomuni bula, na nomuni ivakaraitaki, kei na nomuni vosa ni veikidavaki ki na dua tale na koniferedi raraba ni Lotu. Keimami lomani kemuni, ka qoroi kemuni, ka tokoni kemuni talega. Io, ena soqoni ena yakavi nikua, ena qai soli kina vei keda na madigi meda na qai laveta kina na ligada ena veitokoni, sega walega ni baleti Peresitedi Monson, ia baleti ira talega na vakailesilesi raraba kece ena Lotu. Baleta ni na tiko na yacaqu ena ituvatuva o ya, au sa na doudou meu na vosa me baleti keimami kece, meu na vakavinavinakataki kemuni rawa ena vuku ni nomuni lave liga. Sega ni dua vei keimami ena rawa ni veiqaravi kevaka me sega na nomuni veimasulaki kei na veitokoni. Na nomuni yalodina kei na loloma e vakaibalebale sara vakalevu vei keimami mai na ka keimami rawa ni kaya.

Ena yalo ga o ya nikua au via tukuna vei kemuni ni keimami tokoni kemuni ka vakasuka tale vei kemuni na veimasulaki vata ga o ya kei na ivakaraitaki vata ga ni loloma. Eda kila kece ni tiko na idola, na veiyalayalati, kei na itavi e soli vei ira era dabe vakatulewa ena Lotu, ia eda kila talega ni Lotu e dau rawata mai na kaukauwa, sa ikoya e dua na isema bula, mai na nodra vakabauta kei na yalodina na lewe ni Lotu yadua evei ga na vanua o ni bula tiko kina. Ena vanua cava ga o vakaitikotiko kina, kevaka mo sa rui gone sara se vakila ni o sega ni dau rawa ka, se o na raici iko beka ni o sa qase ka malumalumu, au vakadinadinataka vei kemuni, ni Kalou e lomani kemuni, ka o ni toka sara ga ena loma donu ni Nona cakacaka, ka o dau nanumi ka masulaki tiko mai vua na dau dabe ka vakatulewa ena Nona Lotu. Na kemu dredre, na kena sa rui bibi na nomuni bula yadua, sa ikoya sara ga e tiko kina na yavu ni veivakabulai kei na bula vakacerecerei. Me veisotari kei na ivosavosa nikua, oqo e baleti kemuni. Sega, kua ni vuki mo raici nomu itokani. Au vosa tiko vei iko!

Au sasaga meu kila se meu tukuna vakacava vei kemuni ni lomani kemuni na Kalou kei na neitou lomani kemuni na tucake tu yani eke. Au tovolea meu domodra na agilosi mai lagi, meu vakavinavinakataka vei kemuni na veika kece o ni sa cakava na veivosa ni loloma o ni sa cavuta, na solibula kece o ni sa vakayacora me baleta e dua—se o cei ga—na totoka kei na veivakalougatataki ni kosipeli i Jisu Karisito.

Au vakavinavinaka vei ira na iliuliu ni Goneyalewa ka ra dau lako ki na keba ni goneyalewa ka ra sega ni dau vakayagataka na sovu ni ulu, sili, se boro ni mata, ka vukica na iboi ni ivakadinadina ena yasanibuka ki na so na veika vivinaka vakayalo me ra sotava na goneyalewa—se o ira na iliuliu oqori—me ra sotava ena nodra bula taucoko. Au vakavinavinaka vei ira kece na yalewa ena Lotu ka ra sa dei tu vaka na Ulunivanua o Saineai ka yalololoma vaka na Ulunivanua ni iTuvatuva ni Veivakalougatataki (Mount of Beatitudes). Eda dau dredrevaka ena so na gauna na nodra italanoa na marama—o ni kila—na Jell-O drokadroka, na lacadrau, kei na pateta me laukana ena so-mate. Ia, na noqu matavuvale, sa dau vakavinavinakataka na neitou ciqoma na veika oqori, ena dua ga na gauna se dua tale—ena dua na gauna na lacadrau kei na pateta ni so-mate ena dua vata ga na siga. E lacadrau lailai toka ga—ka lailai sara ga—ka na rawa ni vakalogalogavinakataka na ilakolako lesu nei taciqu tagane ki na nona itikotiko mai lagi me vaka era a nanuma na iSoqosoqo ni Veivukei. Na kakana ka kau mai me baleta na neitou matavuvale ni sa oti na lotu, ka a vakarautaki ena yalololoma baleti keitou e a ciqomi ena yalo e vakavinavinaka. Dredre, kevaka o vinakata, baleta na noda itovo, ia na veika era dau cakava na marama ena lotu oqo ka sega ni dau vakawai, era na tu ga me ra dau laveta cake na liga sa wadamele kei na duru sa wamalai.1E vaka me ra sa taura matua sara ga na vakalou ni ka e a tukuna na Karisito: “Ni kemuni a cakava vua e dua sa lalai vei ira …, ni a cakava vei au.”2

Ko ni sega ni lailai na turaga lewe ni matabete. Au vakasamataka, me kena ivakaraitaki, o ira na iliuliu ni noda cauravou, o ira, ena vakatau mai na draki kei na vanua, me ra cakava e dua na taubale 50 na maile, (80 na kilomita) se me ra kelia—ka qai tovolea me ra moce e loma—ni qara uca cevata me yacova ni cava ena bogi balavu taudua beka e bula tiko kina na tamata e vuravura. Au vakavinavinaka vei ira na neitou ilawalawa ni bete levu ni vica na yabaki sa oti, me ra veivuke na veiyadravaki ena dua ga na idabedabe vakalakala ena rumu ni dua na lewe ni kuoramu sa voleka tu ni cavuka na nona icegu me rawa ni bau moce na marama watina ka sa qase sara talega, ena iotioti ni vica na macawa ni bula nei nona daulomani. Au vakavinavinaka vei ira na mataivalu ni qasenivuli ena Lotu, vakailesilesi, daunivakasala, kei na vunivola, vakakina o ira era dau tuva na teveli ka yatuna na idabedabe. Au vakavinavinakataki ira na peteriaki tabaki, na daunisere, na dautuvakawa ni matavuvale, na veiwatini vakaleqai tu na ituvaki ni yagodra ena nodra lako yani vakamataka lailai ena 5 na kaloko ki na valetabu, vata kei na nodra kato ka voleka ga ni tautauvata kei ira ena gauna oqo na kena lelevu. Au vakavinavinaka vei ira na itubutubu sega ni dau nanumi ira vakai ira—ena nodra bula taucoko beka—era susuga e dua na gone ka sotava na bolebole, so na gauna e levu sara na bolebole era sotava, ka so na gauna e sivia e dua na gone era qarava. Au vakavinavinaka vei ira na gone ka ra duavata me ra vukei ira na nodra itubutubu era sa tauvimate se ra sa qase cake sara mai.

Sa vakakina vua na marama vinaka duadua ka a voleka sara ni vakamamasu ena vakasolokakana, “Au se bera vakadua ni bau veiliutaki ena dua na ka ena Lotu. Au vakabauta niu dau veivuke tu beka ga,” au kaya, “Ganequ lomani, sa vakalougatataki iko na Kalou kei ira taucoko na ‘dauveivuke’ ena matanitu.” Eso vei keda na veiliutaki tiko eda sa na nuitaka ni dua na siga meda na tucake ena mata ni Kalou me vaka o ni sa cakava oti.

Dau vakawasoma sara na gauna au dau guilecava meu vakavinavinaka ena vuku ni nodra vakabauta kei na nodra vinaka na tamata vakaoqo ena noqu bula. O Peresitedi James E. Faust a tucake tu ena itutu ni vunau oqo ena tinikatolu na yabaki sa oti ka kaya, “Niu a se gonetagane lailai …, Au nanumi buqu …ni vakasaqara tiko na keitou kakana ena dua na sitovu buka. Ni sa lala ga na kato ni buka ena yasa ni sitovu, sa dau lako galugalu yani o Buqu … ka laki vakatawana mai tautuba, ka qai laveta mai na kato bibi ki loma ni vale. Au sega sara ga ni bau kauwai kina … [o ya] niu dabe toka ga e kea ka laivi buqu me laki vakasinaita mai na kato [o ya].” Sa qai vaka me oso na nona itilotilo ka kaya, “Au sa maduataki au sara ga kau rarawataka na ka au a sega ni cakava ena noqu bula taucoko. Au nuitaka ni dua na siga meu na qai kerea na nona veivosoti.”3

Kevaka me dua sa vinaka sara na nona bula me vaka na noqu kilai Peresitedi Faust me qai vakadinadinataka na nona malumalumu ena gauna e a se gone kina, nikua au sa na rawa talega ni vakayacora na ka vata o ya meu vakadinadinataka kina e dua na ka sa dede tu au sega ni cakava.

Ena gauna au a kacivi kina meu laki kaulotu ena vica vata na yabaki sa oti, e a sega tu na ivakatautauvata ni isau ni kaulotu. E a dui sauma sara ga na nona ilakolako ki kaulotu na daukaulotu yadua. Eso na vanua ni kaulotu e sau levu sara toka, ka dua vei ira na vanua o ya, au a laki kaulotu kina.

Me vaka ga na noda dau vakauqeti ira na daukaulotu me ra cakava, au sa maroroya eso na ilavo ka volitaka eso na noqu iyaya vakaitaukei me rawa niu sauma ga na noqu ilakolako ki kaulotu. Au nanuma ni sa veirauti na ilavo sa tiko vei au, ia au sega ni kila se na veirauti tiko na ilavo o ya me yacova na kena laki cava na kaulotu. Niu vakasamataka tiko na taro o ya au sa biuta tu na noqu matavuvale ena marau meu gole yani meu laki sotava na gauna totoka duadua e rawa ni nuitaka e dua me na sotava. Au taleitaka sara na noqu kaulotu kau kila ni vaka o ya vei ira kece na cauravou era sa kaulotu oti.

Niu lesu mai vale, sa donumaka na nodrau sa kacivi na noqu itubutubu, me rau sa lako ki kaulotu. Na cava meu cakava? Meu na sauma vakacava na laki vuli ki na koliji? Meu na sauma rawa vakacava na noqu kana kei na moce? Meu na qai sotava vakacava na tatadra ni yaloqu meu na vakamautaka na marama rairai totoka, o Patricia Terry? Au na sega ni madua meu kaya niu sa taqaya sara ga ka vakayalolailaitaki.

Au a lomalomarua ena noqu lako ki na baqe meu laki taroga na manidia, e dua na itokani ni matavuvale, se vica na ilavo e tiko ena noqu akaude. E kidroa ka kaya mai, “Baleta na cava, Jeff, sa tu taucoko ena nomu akaude. E sega ni rau tukuna vei iko? O rau na nomu itubutubu erau vinakata me rau cakava na veika lalai kece sara e rawa ni rau cakava me rawa ni o mai tekivu kina ni o sa yaco mai vale. Sega sara ga ni rau bau tara e duabulu na sede ena nomu kaulotu tu. Au nanuma ga ni o sa kila tiko.”

Au sega sara ga ni kila. Na ka ga au kila ni o tamaqu e dua ka vulica ga vakaikoya me daunifika, dua na “daunivola ni ilavo” (bookkeeper) ni ra dau kacivi ena yaca o ya ena neimami tauni lailai, ka ni lailai sara na tamata me ra na qaravi, e sega sara ga ni a daramaka e dua na sutu vou, se sote vou, se dua na pea ivava vou me rua na yabaki me rawa kina vei luvena me rawata na veika ena gadreva ena nona kaulotu. Ia na ka au a sega ni kila, kau sa qai mai kila tu oqo ni o tinaqu, ka a sega vakadua ni cakacaka ena taudaku ni matavuvale mai na gauna a vakawati kina, e a laki cakacaka ena dua na sitoa me rawa kina ni saumi taucoko na noqu iyaya ni kaulotu. Ka sa sega vakadua ni bau tukuni yani vei au ena gauna au kaulotu tu kina na itukutuku oqo. E sega sara ga ni bau duabulu na vosa me tukuni baleta na ka oqo. E vica na tama ena loma ni Lotu e sa cakava na ka e a cakava oqo o tamaqu? E vica na tina, ena gauna dredre ni bula vakailavo oqo, era se cakava sara tikoga oqo na ka e a cakava o tinaqu?

Sa 34 na yabaki na nona sa mai yali na tamaqu, ia me vakataki Peresitedi Faust, au sa na waraka meu na qai laki vakavinavinaka vua ena yasa ka dua. Ia na marama tinaqu yalololoma, ka sa na yabaki 95 tiko ena macawa mai oqo, e marau ni sarava tiko na kakaburaki oqo nikua ena nona vale e St. George ka sega kina ni rui bera meu na vakavinavinaka vua. Vei kemudrau, Na kei Ta, kei kemuni kece na Na kei na Ta kei kemuni kece na veimatavuvale, kei kemuni kece na tamata yalodina ena veivanua kece au vakavinavinaka vei kemuni ena nomuni solibula baleti ira na luvemuni (kei na luvedra o ira tale eso!), ena nomuni gadreva me ra vinaka cake mai vei kemuni, me rawa ni ko ni vakamarautaki ira me vaka na nomuni gagadre kei na ka o ni rawa ni cakava.

Na noqu vakavinavinaka vei kemuni kece na lewe ni Lotu vivinaka—kei kemuni na lewe vica vata na kemuni iwiliwili ni tamata vinaka o ni sega ni lotu vata kei keimami—ena nomuni rawata ena veisiga ni nomuni bula, ni sa vu mai vei Karisito na loloma sa uasivi sara ka “sa sega ni mudu.”4 E sega ni dua vei kemuni e sega ni dua na ka, baleta ni o kemuni sara ga na kosipeli i Jisu Karisito—ni o ni sa ivakadinadina bula ni nona loloma vakalou kei na loloma veivueti, na ivakaraitaki vakaitaukei ka kaukauwa ena veikoro lalai kei na veisiti lelevu ena vinaka a vakayacora o Koya kei na bula a solia o Koya me kauta mai na vakacegu kei na vakabulai vei ira tale eso. Keimami doka vakalevu ni rawa me keimami wili vata kei kemuni ena cakacaka bibi oqo.

Me vaka a kaya ko Jisu vei ira na Nifai, au kaya vakakina nikua:

“Dou sa kalougata ni dou sa vakabauta …, raica sa vuabale na noqu marau.

“Ia ni sa cavuta oti na vosa oqo, sa tagi.”5

Kemuni na taciqu kei na ganequ, niu raica na nomuni ivakaraitaki, au vakavouya na noqu yalataka, na noqu na tovolea meu yalodina—dauveinanumi ka soli au vakalevu cake, dauloloma vakalevu cake ka dau dina me vakataka na Tamada mai Lomalagi ka vakakina e levu sara vei kemuni. Sa noqu masu oqo ena yacai koya na Dauniivakaraitaki Cecere ena veika kece sara—io na Turaga o Jisu Karisito—emeni.

  1. Raica na Iperiu 12:12; Vunau kei na Veiyalayalati 81:5.

  2. Maciu 25:40.

  3. James E. Faust, “The Weightier Matters of the Law: Judgment, Mercy, and Faith,” Ensign, Nov. 1997, 59.

  4. 1 Korinica 13:8; raica talega na Moronai 7:46–47.

  5. 3 Nifai 17: 20–21.