Kakua ni Biuti Koya

E sega ni biuti keda duadua tu na Turaga ena noda sasaga me da lesu Vua. Vakarorogo ki na Nona vosa ni ivakasala ni qaqarauni me vakarautaki keda ki na veika rerevaki: “Dou qarauni … kemudou, dou vakatawa ka masu.”¹ “Dou qarauni kemudou … mo dou kakua ni vakaisini.”² “Dou qarauna matua.”³ “Dou vakaraici kemudou talega … dou na qai bale kina mai na nomudou tudei.”⁴

E sega ni dua ena vakuwai mai na veivakayarayarataki kei vuravura. Eda na qaqarauni tiko ni sa vakasalataki keda kina na Turaga.

Ko ni na nanuma lesu na veika a sotava o Jisu e Kapenaumi ena nodra a muria tiko na iVakabula na tisaipeli ka ra sega ni a ciqoma ni o Koya na luve ni Kalou. E tukuna na ivolanikalou, “A ka oqo era sa suka tani kina e le vuqa na nona tisaipeli … sa sega tale ni lako vata kaya.”⁵

A qai vuki o Jisu ka kaya vei iratou na le Tinikarua ka taroga, “Dou sa via lako tani talega koi kemudou?”⁶

Ena noqu vakasama, au dau sauma tiko kina vakalevu na taro o ya: “Sega sara ga! Sega ni o au! Au na sega ni biuti Koya! Au sa tu ga eke!” Au kila ko ni a sauma talega vakakina.

Ia na taro, “Dou sa via lako tani talega koi kemudou?” eda na vakasamataka kina na noda rawa ni rawai. Na bula oqo e sega ni pikiniki vakayalo. E votu lo mai ena dua tale na yasana ena noda vakasama na nodra vosa na iApositolo: “Noqu Turaga, koi au beka?”⁷

Eda sobu yani ki na wai ni papitaiso ena reki kei na nuidei. E sureti keda kina na Turaga “Lako mai vei au”⁸ eda qai muria, ka taura na Yacana. E sega ni dua vei keda e vinakata na ilakolako me ka ga ni veivagarogaroi lekaleka vakayalo, se me dua mada ga ka vakairogorogo qai laki cava botoilevu tu. Na gaunisala ni veivakatisaipelitaki e sega ni baleti ira era dau yalo malumalumu vakayalo. A kaya o Jisu, Mo lomani Jiova na nomu Kalou ena lomamu taucoko kei na yalomu taucoko kei na nomu nanuma kecega.⁹ “O koya yadua sa via muri au, me kakua ni muria na lomana, me colata ga na nona kauveilatai ka muri au.”¹⁰

Ena noda muria na iVakabula, e sega ni rawa ni sega ni na dau basika mai na veibolebole. Ni sotavi ena vakabauta, na veika oqo ena kauta mai ki yaloda e dua na veisau titobu me baleta na dina ni i Vakabula. Ni da sotava ena rai vakavuravura, na veika vata ga eda sotava oqo era na vakabuwawataka na noda rai ka vakamalumalumutaka na noda vakatulewa. Eso vei ira eda lomana era sa lutu mai na sala sa qiqo ka rabailailai, ka “sega tale ni lako vata kei koya.”

Eda na dina tikoga vakacava vua na i Vakabula, Nona kosipeli, kei na cakacaka vakalotu ni Nona matabete? Eda na toroya cake vakacava na noda vakabauta kei na kaukauwa meda kakua ni biuti Koya?

Sa kaya ko Jisu, “Kevaka dou sa sega ni saumaki mai, ka yaco me vaka na gonelailai, dou na sega sara ni curu ki na matanitu vakalomalagi.”¹¹ Eda gadreva na yalo dau vakabauta ni dua na gone.

Mai na kaukauwa ni Nona Veisorovaki, eda sa qai vakakina na “gone lailai, meda talairawarawa, yalomalua, yalomalumalumu, dauvosota, dauloloma, ka talairawarawa ki na veika kecega sa lewa vua na Turaga, me vaka na gone sa talairawarawa vua na tamana.” Sa uqeti kina na yalomudou mo dou veivutuni.¹² Oqo e dua na veisau levu ni yalo.¹³

Eda na raica eke na vuna sa dodonu kina me veisau na yalo. E rua na vosa e vakarota tiko na leqa sa tu mai liu: oqori na vakatarabetaki kei na madua.

O ira era taroga voli na nona vakalou na iVakabula, e taroga ko Jisu, “Sa vakatarabetaki kemudou na ka oqo?”¹⁴ Ena italanoa vakatautauvata ni dau kakaburaki, e veivakasalataki kina ko Jisu, “Sa tu dede … vakalailai ga: [ia] ni sa tubu na rarawa, se na veivakacacani ena vuku ni vosa, sa tarabe sara.”¹⁵

Na veivakatarabetaki e yaco mai ena kena veimataqali ka dau rawai sara na vakasama. Era vakararawataki keda o ira eda nuitaka. Eda sotava na dredre sega ni namaki. E sega ni lako vakavinaka sara na noda bula me vaka sara ga na ka eda namaka. Eda dau cala, yalolailai, ka lomaleqataka na noda vosoti. Eda vakataroga tiko na veika vakaivunau. Eda sa mai kila e dua na ka a tukuni mai na dua na itutu ni vunau ni dua na Lotu ena 150 na yabaki sa oti ka da sa mai lomaleqataka tiko. Era sa vakacacani na luveda. Eda sega ni kauwaitaki se sega ni bau nanumi. E rawa ni drau sara na ka, e tarai keda sara tu ga ena gauna oqori.¹⁶

Ni da malumalumu, e saga na meca me kauta tani na noda veiyalayalati vakayalo. Kevaka eda na sega ni qaqarauni, ena rawa ki na yaloda mavoa vagone me lesu ki na waqana, butobuto ni kena ituvaki batabata makawa, ka da biuta mai na rarama katakata ka veivakabulai ni iVakabula.

Ena gauna a vakalewai kina o Parley P. Pratt, ena 1835, ka a kauta mai na legalegata kei na madua vua kei na nona matavuvale, a vakasala kina na Parofita o Josefa Simici: “Parley, … buturaka sobu na ka oqori … [ka] na tiko vata kei iko na Kalou sa Cecere”¹⁷

Dua tale na kena ivakaraitaki: Ena 1830, a papitaiso kina o Frederick G. Williams, e dua na vuniwai kilai levu. A vakayagataka kina na nona taledi kei na iyau ena Lotu. A yaco me dua na iliuliu ni Lotu. A lolomataka na iyaya me tara kina na Valetabu e Kirtland. Ena 1837, a sotava na dredre ni bula ni gauna o ya, ka cakava kina o Frederick G. Williams eso na cala lelevu. A vakaraitaka kina na Turaga ena dua na ivakatakila ni “vuku ga ni nona cala sa mai cakava sa mai kau tani kina vua na itutu ni dua na veiliutaki ena Lotu.”¹⁸

Na lesoni totoka eda vulica mai vei Frederick G. Williams sai koya ni “se cava ga na malumalumu e tu vua, e tu vua na ivakarau ni bula tudei me [vakavouya] na nona yalodina vua na [Turaga,] na Parofita kei na … Lotu, ena gauna a rawarawa sara kina me yali yani ena yalorarawa.”¹⁹ Ena vulaitubutubu ni 1840, a laki vakaraitaki koya kina ena dua na koniferedi raraba, ka kere veivosoti ena yalomalumalumu me vosoti ena nona ivalavala ni veigauna sa oti ka vakaraitaka kina na nona yalayala me cakava na ka e vaka na loma ni Kalou ena veigauna mai muri. A matataki koya o Hyrum Smith, ka a vosoti kina. E a lewe ni Lotu yalodina tiko mai ena gauna a mate kina.

Au a qai sota wale tikoga oqo kei na peresitedi ni Valetabu e Recife Brazil o Fredrick G. Williams. A talanoataka na kena vakalougatataki na nona matavuvale kei na drau vakadrau na nona kawa ena nona vakatulewa na tukana vakatolu ena nona ivakarau ni bula.

Na veivakatarabetaki e itokani dauveivakacacani nei madua

Ena iVola i Momani, eda wilika kina na tadra i Liai me baleta na vunikau ni bula. Na raivotu oqo e tukuni ira tiko na yalo vakaturaga era a “sasaga mai ena butobuto loaloa, ka tautauri matua tiko ga ki na ititoko kaukamea,” ka ra yaco rawa ka kania na vuanikau.”²⁰

A vakamacalataka o Nifai na vuanikau o ya me “sa loloma ni Kalou,”²¹ e vuataka na vuana ni “sa vuabale [na] noqu marau.”²²

Ni tovolea oti na vuanikau, a raica ko Liai “e dua na vale vakaitamera ka vaka e tu e macawa … ka sinai kina na tamata … na qase kei na itabagone, … na tagane kei na yalewa; ka sa totoka dina na nodra isulusulu; ia era sa … dusi ira mai ka vakalialiai ira era sa kania na vuanikau.”²³ E vakamacalataka e dua na agilosi ni veivakalialiai, na veidusi ni veivakasewasewani sai koya na qaciqacia kei na vuku vakavuravura.²⁴

A kaya vakamatata kina o Nifai “ia keimami a sega ni kauwataki ira.”²⁵

E ka ni rarawa, ni so era sa sega soti ni kaukauwa. E tukuna na ivolanikalou, “Ia ena vuku ni nodra veivakalialiai era sa madua kina ko ira era sa kania oti na vuanikau, era sa muria na sala tani ka ra sa lako sese kina.”²⁶

Me vaka ni da sa tisaipeli i Karisito eda sa duatani mai na veika ni vuravura. Ena so beka na gauna eda na lomaleqataka kina na veivakacacani kei na cakitaki ni veika sa vakalou vei keda.²⁷ Sa veivakasalataki o Peresitedi Thomas S. Monson, “Vakavo sara kevaka sa kadre matua na wakatu ni nomu ivakadinadina, ena dredre vei iko mo sotava rawa na nodra veivakalialiai o ira era saqata tu na nomu vakabauta.”²⁸ E kaya ko Nifai, “Kakua ni [kauwaitaki] ira.”²⁹ E veivakauqeti kina ko Paula, “Ni sa sega ni solia mai vei keda na Kalou na yalo ni rere; … Mo qai kakua … ni maduataka na kena itukutuku ni noda Turaga.”³⁰ Eda na sega ni biuti Koya.

Ena noqu a gole vata kei Peresitedi Dieter F. Uchtdorf ki na Vualiku kei Iurope ena yabaki sa oti, au qoroya na nodra vakabauta kei na yaloqaqa na Yalododonu. A kaya kina vei keirau e dua na iliuliu ni matabete e Ukraine ni a kacivi ki na mataveiliutaki ni tabana ena vula itubutubu ni 1994 ni se qai oti toka e ono na vula na nona papitaiso. Ena gadrevi kina me na vakaraitaki raraba na nona vakabauta ka veivuke ena kena rejisitataki na Lotu ena koro levu o Dnipropetrovs’k. Oqo e dua na gauna ni bula veilecayaki e Ukraine, na kena vakaraitaki raraba tu na nona vakabauti Karisito kei na kosipeli vakalesui mai e rawa ni vakavuna na dredre, e rawa talega ni yaco kina me vakayalia na nona cakacaka vakapailate.

A kaya kina na liuliu ni matabete oqo, “Au a masu ka masu tikoga. E tiko na noqu ivakadinadina, kau sa cakava kina e dua na veiyalayalati. Au kila na ka e vinakata na Turaga meu cakava.”³¹ Ena yaloqaqa, erau a toso ga ki liu kei na watina ena vakabauta, ka sega ni madualaka na kosipeli i Jisu Karisito.

Eso era taroga, “E dodonu beka meu duatani mai vei ira tale eso?” “Ena rawa beka meu tisaipeli i Karisito kau sega ni vakasamataka vakabibi na noqu itovo?” “Ena rawa beka meu lomana na Karisito niu sega tiko ni maroroya na lawa ni tiko savasava?” “Ena rawa beka meu lomani Koya ka cakava ga na veika au gadreva ena Sigatabu?” A sauma ga vakarawarawa o Jisu: “Kevaka dou sa lomani au, dou talairawarawa ki na noqu vunau.”³²

Eso era taroga, “E vuqa beka na veivakabauta tale eso era lomana na Karisito?” Io era tiko! Ia, oi keda na lewe ni Lotu i Jisu Karisito ni Yalododonu Edaidai, eda kila ni sa bula tiko o Koya, sega walega mai na iVolatabu, ia mai na iVola i Momani talega; ka da kila ni sa vakalesui mai na Nona matabete ki vuravura; ka da vakayacora na veiyalayalati tabu meda muri Koya ka ciqoma na isolisoli ni Yalo Tabu; ka da sa vakaedaumeni ena kaukauwa ena Nona valetabu savasava, ka da sa tiki ni vakavakarau ki na lagilagi ni Nona lesu mai ki vuravura; eda sa sega kina ni vakatautauvatataki keda kei ira era se bera ni ciqoma na dina oqo. “Raica ko koya sa soli vakalevu vua ena tarogi vakalevu vua.”³³

E kaya na Turaga, “Sa soli tu vei iko mo lewa na ka mo kitaka.”³⁴

Au sa yalataka vei kemuni, ni ko ni sa digitaka mo ni kakua ni vakatarabetaki se madua, ko ni na vakila na Nona loloma kei na veivakadonui. Ko ni na vakila ni sa yaco tiko mo ni vakataki Koya.³⁵

Eda na kila vakavinaka beka na veika kecega? Sega sara ga. Eda na biuta tu mada vakawawa eso na taro me na qai saumi ga mai vakamalua.

Ena vakadodonutaki beka na veika kece? E sega sara. Eda na ciqoma eso na ka eda sega ni rawa ni walia, ka vosoti ira eso ni mosi vei keda.

Eda na sega beka ni vakatikitikitaki mai vei ira era tiko voliti keda? E dina sara.

Eda na kurabui beka ena so na gauna ni da raica eso era cudruva na Lotu ni Turaga, ka ra saga me ra kauta tani na nodra sasaga ni vakabauta o ira era malumalumu?³⁶ Io. Ia ena sega ga ni vakataotaka na tubu kei na inakinaki ni Lotu, ka na sega talega ni tarova na noda tubu cake vakayalo oi keda yadua na tisaipeli ni Turaga, o Jisu Karisito.

Au marautaka na qaqa ni sere oqo mai na dua na sere ni lotu au dau taleitaka:

Na vinaka sara e sega ni yaco ena bula oqo, ia eda sa vakabauta ga na Turaga, o Jisu Karisito, ka maroroya na noda veiyalayalati. Sa yalataka o Peresitedi Monson, “Na nomu ivakadinadina, ena taqomaki iko tiko, ke o dau vakabulabulataka ena veigauna.”³⁸ Eda na vakadromuca yani vakatitobu na wakada vakayalo, ka da kanamagiti e veisiga mai na vosa i Karisito ena ivolanikalou. Eda sa nuitaka kina na nodra vosa na parofita bula, sa voqataki e matada me vakaraitaka vei keda na sala. Eda na masu ka masu tikoga, ka vakarorogo ki na domo rogo malumu ni Yalo Tabu ka na liutaki keda yani, sa dau vosataka na vakacegu ki yaloda. Se cava ga na bolebole e yaco mai, meda kakua, ka kakua vakadua ni biuti Koya.

E tarogi iratou na Nona iApositolo na iVakabula, “Dou sa via lako tani talega koi kemudou?”³⁹

E sauma ko Pita:

“Kemuni na Turaga, keitou na lako vei cei? Sa tu ga vei kemuni na vosa ni bula tawamudu.

“… Ia keitou sa vakabauta ka kila, ni sai kemuni na Karisito, na Luve ni Kalou bula.”⁴⁰

Sa noqu ivakadinadina vakakina. Kau vakadinadinataka, ena yaca i Jisu Karisito, emeni.