2010–2019
Talairawarawa vei ira na Parofita
Okotova 2010


Talairawarawa vei ira na Parofita

Sa dua dina na veivakalougatataki cecere ni ra tu na parofita ena noda gauna!

O au e dua na saumaki mai ki na Lotu. Au vakavinavinakataka vakalevu ni sauma na noqu masu na Kalou ka solia vei au e dua na kila kei na dua na ivakadinadina kaukauwa ni nona sa parofita dina ni Kalou o Josefa Simici.

Taumada ni bera noqu vakatulewataka meu sa papitaiso ena Lotu i Jisu Karisito ni Yalododonu Edaidai, au a vulica na veika ka cavuti mai na ivolatukutuku baleti Josefa Simici. Au masu niu wilika oti vakavinaka na veiparakaravu yadua. Kevaka o na vinakata mo cakava oqo vakataki iko, e rawa me taura e 14 na auwa.

Ni oti noqu wiliwili, vakasamataka ka masu, e solia vei au na Turaga na veivakadeitaki ni o Josefa Simici e Nona parofita. Au vakadinadinataka kivei kemuni ni o Josefa Simici sa ikoya e dua na parofita, baleta niu ciqoma na kena isau oqo mai vua na Turaga, au kila ni o ira kece era sa sosomitaki koya era parofita talega. Sa dua dina na veivakalougatataki cecere ni ra tu na parofita ena noda gauna!

Na cava na vuna e bibi kina na parofita bula mera dusimaka na Lotu dina i Jisu Karisito kei ira na lewena?

Ena iDusidusi ki na iVolanikalou, eda raica kina na ivakamacala ni vosa parofita: “E dua na tamata sa kacivi mai vua ka vosa ena vukuna na Kalou. E italai ni Kalou, na parofita e ciqoma na vunau, parofisai, kei na ivakatakila mai vua na Kalou” (“Prophet,” scriptures.lds.org; raica talega na Bible Dictionary, “Prophet”).

Sa dua na veivakalougatataki levu meda ciqoma na vosa, ivakaro kei na veidusimaki ni Turaga ena veigauna dredre ka da donumaka tiko oqo e vuravura. E rawa me vakauqeti na parofita me raica na veika yaga me baleti ira na tamata ena gauna se bera mai.

E tukuni vei keda ni “dina ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nona italatala na parofita” Emosi 3:7. Eda vulica mai na ivolanikalou oqo ni Turaga ena vakaraitaka vua na Nona parofita na veika cava ga e vakila ni yaga me vakadewataka vei keda. Ena vakaraitaka na Nona lewa vei keda ka vakaroti keda o Koya mai vei ira na Nona parofita.

E yalataka vei keda na Turaga ni kevaka eda vakabauti ira na parofita, e dodonu meda rawata na bula tawamudu (raica na V&V 20:26). Ena ikaono ni Yavu ni Vakabauta eda vakaraitaka ni da vakabauti ira na parofita. Ni da vakabauta e kena ibalebale me da yalodina ka nuidei vei ira ka muria ka cakava na veika era kerea vei keda na parofita meda cakava.

Ena 1980, nona veiqaravi tiko o Peresitedi Ezra Taft Benson vaka-Peresitedi ni Kuoramu ni iApositolo Le Tinikarua, a wasea e dua na itukutuku momona sara me baleta na talairawarawa vei ira na parofita ena dua na soqoni ni BYU ena Marriott Center. A tara sara na lomaqu na nona iulutaga ni vosa cecere oqo “Fourteen Fundamentals in Following the Prophet.” Au vakila na kena vinaka vei au noqu a vakatulewataka meu muri ira na parofita ena vo ni noqu bula taucoko ena noqu a ciqoma meu papitaiso ena Lotu dina ni Turaga.

Au vinakata meu wasea vei kemuni eso na ivakavuvuli a vakatavulica o Peresitedi Benson:

“iMatai: Na parofita duadua ga ena vosa tiko ena vukuna na Turaga me baleta na veika kecega” (1980 Devotional Speeches of the Year [1981], 26).

Ena noda gauna, e kaya vei keda na parofita ni Kalou meda maroroya na ivakaro, ka meda lomani ira na wekada, me da veiqaravi, ka kauwaitaki ira na itabatamata era tubu cake tiko mai, meda laki vueti ira mai era sa lutu se malumalumu—meda cakava e vuqa na ka me vakatokai na vakaliuci vakaparofita. E gadrevi meda kila ni veika me vakaliuci oqo era vakaliuci va- Kalou kei na parofita e Nona gusu ni vosa ena kena vakadewataki vei ira taucoko na Lotu kei na vuravura.

Eda sa vakasalataki meda “muria na vosa kei na ivakaro kecega” (V&V 21:4). Eda vulica talega:

“Ia mo dou vakabauta ka muria na ka sa tukuna, me vaka ga au sa tukuna vei kemudou”

“Ia kevaka dou sa kitaka vakakina e na sega ni rawai kemudou na matamata ki etesi, ia ena vakamalumalumutaka na Turaga na Kalou na kaukauwa ni tevoro, raica ena yavavala ko lomalagi ena vukumudou me vakacaucautaki kina na yacana” (V&V 21:5–6).

iKarua ni yavu: “Sa ka bibi cake kina vei keda na parofita bula mai na ivolayavu ni cakacaka” (“Fourteen Fundamentals,” 26).

Na parofita bula sa ciqoma tiko na veivakatakila matata me baleti keda. Au nanuma lesu e vuqa na gauna noqu dau tiko ka rogoca na nodra vosa na italai ni Turaga ena dua na ka matata me baleta e dua na siti se vanua. Au nanuma ni tolu mada ga na parofita bula, daurairai ka dauvakatakila era a vosa me baleta na noqu vanua, o Brazil. E dua vei ira na italai oqo e kaya ni o Brazil ena yaco me dua na ivurevure ni ilavo levu duadua e vuravura, ka vagalalataki mai na tubu ni isau ni iyaya. Ena gauna o ya, e a vakaruataki na isau ni iyaya ena veivula yadua. E sa bau dredre dina vei ira e vuqa na tamata mera vakabauta na ka e kaya na parofita, ia au vakabauta. E rauta ni 5 ga na pasede na tubu ni isau ni iyaya e Brazil ena veiyabaki yadua ena vica vata na yabaki veitarataravi me yacova mai oqo. Sa yaco kina o Brazil me ikawalu ni rawa i lavo e vuravura, ka sa uasivi sara na toso ni vanua!

iKatolu ni yavu: “E bibi cake vakalevu vei keda na parofita bula mai na parofita sa mate” (“Fourteen Fundamentals,” 27).

Eda vulica e dua na lesoni cecere me baleta na ka oqo mai na ivolanikalou. Ena gauna nei Noa e rawarawa vei ira na tamata mera vakabauti ira na parofita era sa mate, ia sa bau dredre vei ira mera vakabauti Noa. Eda kila kina ni baleta na nodra sega ni vakabauta, era a vakaleqai ena Waluvu (raica na Vakatekivu 6–7).

iKava ni yavu: “Ena sega ni rawa vua na parofita me liutaka vakatani na Lotu” (“Fourteen Fundamentals,” 27).

Vakadua tale eda vuli mai vei ira na parofita bula. E kaya kina vakaoqo o Peresitedi Wilford Woodoruff: “Ena sega ni vakatara na Turaga vei au se dua tale e tu me Peresitedi ni Lotu oqo me liutaki kemuni vakatani. E sega ni tu ena parokaramu. E sega ni tu ena nona vakasama na Kalou. Kevaka meu tovolea oqori, ena vagalalataki au na Turaga mai na noqu itikotiko, ena cakava talega vakakina o Koya kivua e dua tale na tamata ka tovolea me liutaka na nodra vakamatabokotaki na luve ni tamata mai na veivakasalataki ni Kalou kei na nodra itavi” (Official Declaration 1).

iKalima ni yavu: “E sega ni gadrevi vua e dua na parofita me laki vuli se vakoroi me vosa kina ena dua na ulutaga se cakava e dua na ka ena kena gauna” (“Fourteen Fundamentals,” 27).

A kaciva naTuraga e dua na gonetagane, o Josefa Simici, me vakalesua mai na Nona Lotu. O nanuma beka ni cauravou o Josefa Simici e vuniwai ni cioloji se vuku? Eda kila ga ni o koya e gone tagane yalomalua ka sega ni vuli vinaka. Ia a digitaki mai vua na Turaga, ka ciqoma mai vua na Turaga na veika kece sara e gadrevi me rokovi ka vakalevutaka na ilesilesi ni dua na parofita ni Veivakalesuimai.

Tomana o Peresitedi Benson:

“iKaono: E sega ni gadrevi vua na parofita me kaya ‘Sa kaya vakaoqo na Turaga’ me solia mai na ivolanikalou. …

“iKavitu: E kaya vei keda na parofita na veika e dodonu meda kila, ka sega ni veika eda vinakata meda kila”(“Fourteen Fundamentals,” 27, 28).

A qai cavuta o Peresitedi Benson na 1 Nifai 16:1, 3:

“Koi au ko Nifai, niu sa vosa oti vei iratou na tuakaqu, e ratou sa qai kaya vei au: Ko sa tukuna vei keitou na ka rarawa ka sa dredere me keitou vosota. …Matabete iEroni kei na Goneyalewa 2011.

“Oi kemudou na tuakaqu, kevaka dou sa yalododonu ka sa lomamudou mo dou rogoca ka muria na ivakavuvuli dina mo dou ivalavala dodonu kina ena mata ni Kalou, ke dou a sega ni vosa kudrukudrutaka na ka dina ka kaya: Ko sa tukuna vei keitou na ka rarawa.”

iKawalu ni yavu: “E sega ni yalani na parofita mai na nodra vakaiulubale na tamata. …

“… E veiganiti toka beka me vakarusai na vukavuka ena kena tukuni vua e dua na tagane me laki sili vakavitu ena dua na uciwai digitaki? Ia oqo sara ga na ka a tukuna o Ilaisa na parofita vua e dua e tauvi vukavuka me cakava, ka sa vakabulai kina. (Raica 2 Tui 5:1–14.) (“Fourteen Fundamentals,” 28).

A qai tomana o Peresitedi Benson nona wasea na veivakavuvuli tale eso me baleta na talairawarawa kivua na parofita. Au na wilika e ono na kena iotioti ka sureti iko kei na nomu lotu vakamatavuvale e tarava mo dou vakasaqara na veivakavuvuli oqo ena vosa kei na nodra veivakatavulici na noda parofita bula, daurairai ka dauvakatakila ena gauna ni koniferedi raraba oqo.

“iKaciwa: Sa rawa vua na parofita me ciqoma na ivakatakila me baleta na veika cava ga—vakayago se vakayalo. …

“iKatini: Sa rawa me vakaitavi na parofita ena veika vakamatanitu. …

“iKatinikadua: Na ilawalawa e rua era dau dredre me muria na parofita sai ira era dokadoka ka ra tamata vuli kei ira na dokadoka era vutuniyau. …

“iKatinikarua: E sega ni gadrevi me kilai raraba na parofita e vuravura se vei ira sa vakavuravura. …

“iKatinikatolu: E ratou lewena na parofita kei rau na nona daunivakasala na Mataveiliutaki Taumada—na kuoramu cecere duadua ena Lotu. …

“iKatinikava: Na parofita kei na mataveiliutaki—na parofita bula kei na mataveiliutaki taumada—muri iratou ka mo vakalougatataki kina; cakitaki iratou ko na kune rarawa” (“Fourteen Fundamentals,” 29).

Eda sa kalougata ni da ciqoma na nodra vosa na noda parofita bula, daurairai ka dauvakatakila ena gauna ni koniferedi raraba vakasakiti oqo. Era na tukuna na lewa ni Turaga me baleti keda, na Nona tamata. Era na vakauta mai vei keda na vosa ni Kalou kei na Nona ivakasala. Vakarorogo ka vakamuria na nodra idusidusi kei na nodra vakatutu, kau vakadinadinataka kivei kemuni taucoko kina na veivakalougatataki ni nomuni bula.

O Jisu Karisito, na noda iVakabula ka Dauveivueti. Sa parofita bula ni Kalou o Thomas S. Monson, kei iratou na Mataveiliutaki Taumada kei na Kuoramu ni iApositolo Le Tinikarua era sa parofita, daurairai ka dauvakatakila. Ena yaca i Jisu Karisito, emeni