Te Haapa‘oraa i te Parau a te mau Peropheta

E melo faafariuhia vau no te Ekalesia. Ua mauruuru roa vau e ua pahono te Atua i ta‘u pure e ua horo‘a mai Oia ia‘u i te hoê iteraa e te hoê iteraa papû puai e e peropheta o Iosepha Semita na te Atua.

Hou vau a rave ai i te faaotiraa ia bapetizo i roto i te Ekalesia a Iesu Mesia i te Feia Mo‘a i te Mau Mahana Hopea Nei, ua tuatapapa vau i te mau tuhaa no roto mai i te aamu o Iosepha Semita. Ua pure au i muri a‘e i to‘u tai‘o-maite-raa i te irava tata‘itahi. Mai te mea e hinaaro outou iho ia rave atoa i te reira, e titauhia ïa ia outou e 14 hora.

I muri a‘e i to‘u tai‘oraa, feruriraa e pureraa, ua horo‘a mai te Fatu ia‘u te haapapûraa e peropheta o Iosepha Semita Na’na. Te faaite papû atu nei au ia outou e peropheta o Iosepha Semita, e no te mea ua farii au i teie pahonoraa no ô mai i te Fatu ra, ua ite au e e mau peropheta atoa te feia tei mono mai ia’na. Auê ïa haamaitairaa rahi e no te vairaa mai te mau peropheta i to tatou nei tau !

No te aha e mea faufaa ia vai mai te mau peropheta ora no te arata‘i i te Ekalesia mau a Iesu Mesia e i to’na mau melo ?

I roto i te Guide des Ecritures, e ite tatou i te auraa o te parau peropheta : « Te hoê taata tei piihia e ia parau no te Atua. Ei ve‘a no te Atua, e farii te peropheta i te mau faaueraa, te mau tohuraa e te mau heheuraa no ô mai i te Atua ra » (« Prophet », scriptures.lds.org ; hi‘o atoa Bible Dictionary, « Prophet »).

E haamaitairaa rahi roa i te fariiraa i te parau, te mau faaueraa e te arata‘iraa a te Fatu i roto i teie tau fifi i ni‘a i te fenua nei. E nehenehe te peropheta e faauruhia ia ite i te tau i mua nei no te maitai o te taata atoa.

Ua parauhia ia tatou e « aita a te Fatu ra a Iehova e peu i rave, maori râ ia faaite i ta’na parau i mo‘e i ta’na ra mau tavini i te mau peropheta » (Amosa 3:7) Te ite nei tatou na roto mai i teie papa‘iraa mo‘a e heheu mai ïa te Fatu i Ta’na mau peropheta i te mau mea atoa Ta’na e ite e mea faufaa ia faaite ia tatou. E heheu mai Oia i To’na hinaaro ia tatou e e haapii Oia ia tatou na roto mai i Ta’na mau peropheta.

Ua fafau mai te Fatu ia tatou e mai te mea e ti‘aturi tatou i te mau peropheta mo‘a, e noaa ïa ia tatou te ora mure ore (hi‘o PH&PF 20:26). I roto i te Hiroa Faaroo 6 te faaite hua nei tatou e te ti‘aturi nei tatou i te mau peropheta. Te ti‘aturi o te faatupuraa ïa i te faaroo e te ti‘aturiraa ia ratou e te peeraa e te raveraa i te mea ta te mau peropheta e ani ia tatou ia rave.

I te matahiti 1980, a tavini ai te peresideni Ezra Taft Benson ei peresideni no te Pŭpŭ no te Tino Ahuru Ma Piti Aposetolo, ua horo‘a oia i te hoê parau poro‘i puai mau no ni‘a i te haapa‘oraa i te mau parau a te mau peropheta i roto i te hoê rururaa i BYU i Marriott Center. Ua putapû roa to‘u aau i ta’na a‘oraa « Hoê ahuru ma maha Tumu parau no te Pee atu i te Peropheta ». Ua faatupu mai te reira i te mana‘o au maitai no to‘u raveraa i te faaotiraa ia pee i te mau peropheta i te taato‘araa o to‘u oraraa a farii ai au i te bapetizoraa i roto i te Ekalesia mau a te Fatu.

Te hinaaro nei au ia horo‘a atu ia outou te tahi o te mau tumu parau ta te Peresideni Benson i haapii :

« Te matamua : O te peropheta ana‘e te taata e parau na ni‘a i te i‘oa o te Fatu i roto i te mau mea atoa ». (1980 Devotional Speeches of the Year [1981], 26).

I to tatou nei tau, ua parau mai te peropheta ia tatou ia haapa‘o i te mau faaueraa, ia here i to tatou taata tupu, ia tavini, ia aupuru i te u‘i apî, ia faaho‘i mai i te feia paruparu o te ekalesia, ia rave i te mau mea atoa ta tatou e pii nei te mau titauraa rû a te peropheta. E ti‘a roa ia tatou ia maramarama e na te Atua teie mau titauraa rû, e o te peropheta ïa To’na reo no te faaite i te reira i te taato‘araa o te Ekalesia e i to te ao nei.

Ua a‘ohia tatou ia « haapa‘o i ta’na mau parau e i ta’na mau faaueraa atoa » (PH&PF 21:4). Ua haapii atoa tatou e :

« E farii ho‘i outou i ta’na parau mai te mea ra e, no roto i to‘u iho nei vaha, ma te faaoroma‘i e te faaroo.

« No te mea na roto i te raveraa i teie nei mau mea e ore roa outou e noaa i te mau uputa o hade ; oia ïa, e na te Fatu ra o te Atua e haapurara ê atu i te mau mana no te pouri mai mua atu ia outou, e e faaaueue ho‘i i te ra‘i ei maitai no outou na, e i to to’na i‘oa ra hanahana ho‘i » (PH&PF 21:5‐6).

Tumu parau piti : « E Mea faufaa rahi a‘e te peropheta ora i te mau buka papa‘iraa mo‘a » (« Hoê ahuru ma maha Tumu parau », 26).

Te farii nei te peropheta ora i te mau heheuraa papû maitai no tatou. E nehenehe ia‘u ia haamana‘o e rave rahi mau taime, i to‘u faarooraa i te hoê o te mau tavini o te Fatu a‘oraa no ni‘a i te hoê ohipa papû maitai no te hoê oire aore râ fenua. Te haamana‘o nei ihoa ra vau e toru o te mau peropheta ora, e mau hi‘o e e mau heheu parau o tei a‘o no ni‘a i to‘u nei fenua Paratira. Ua parau te hoê o teie mau tavini e e riro mai o Paratira ei fenua ona i roto i te ao nei e e aita e mâraaraa te moni hoo. I taua taime ra, ua mâraa tata‘ipiti te moni oraraa i ni‘a i te mau ava‘e atoa. E mea fifi no te mau taata e rave rahi ia ti‘aturi i te mea ta te peropheta i parau, ua ti‘aturi râ vau. Te ite nei te fenua Paratira e 5 i ni‘a i te hanere o te mâraaraa o te oraraa i te mau matahiti atoa e rave rahi i teie nei. Ua riro o Paratira te ivaraa o te fenua i roto i te oraraa tapihooraa o te ao nei, e te ruperupe nei te fenua !

Tumu parau toru : « E Mea faufaa rahi a‘e te peropheta ora no tatou i te hoê peropheta pohe » (« Hoê ahuru ma maha Tumu parau », 27).

Ua haapii mai tatou i te hoê haapiiraa rahi roa no ni‘a i te reira mai roto mai i te mau papa‘iraa mo‘a. I te tau o Noa e mea ohie a‘e i te mau taata i te ti‘aturi i te mau peropheta pohe, e mea fifi râ ia ratou i te ti‘aturi ia Noa. Ua ite tatou e no to ratou faaroo ore aita ratou i ora mai i te diluvi (hi‘o Genese 6-7).

Tumu parau toru : « Eita roa te peropheta e arata‘i ê atu i te Ekalesia » (« Hoê ahuru ma maha Tumu parau », 27).

Te haapii faahou mai nei tatou mai roto mai i te mau peropheta ora. Ua parau mai te peresideni Wilford Woodruff e : « E ore roa te Fatu e faati‘a ia‘u aore râ i te tahi atu taata o te ti‘a mai ei Peresideni no teie Ekalesia e arata‘i ê atu ia outou. Aita te reira i roto i te faanahonahoraa. Aita te reira i roto i te feruriraa o te Atua. Mai te mea e tamata vau ia na reira, e tatara ê te Fatu ia‘u i to‘u ti‘araa, e e na reira atoa Oia i te tahi atu o te tamata i te arata‘i ê atu i te mau tamarii a te taata, mai te mau ve‘a a te Atua e ta ratou mau hopoi‘a » (Official Declaration 1).

Tumu parau pae : « Aita e titauhia i te peropheta ia noaa ia’na te hoê tau haapiipiiraa i te pae tino aore râ e parau tuite no te a‘o no ni‘a i te tumu parau atoa aore râ ia rave i te mau ohipa atoa i te mau taime atoa » (« Hoê ahuru ma maha Tumu parau », 27).

Ua pii te Fatu i te hoê tamaiti apî, o Iosepha Semita, no te faaho‘i fahou mai i Ta’na Ekalesia. Te mana‘o ra anei outou e aivanaa o Iosepha Semita no te pae faaroo e no te ite ? Ua ite tatou e taure‘are‘a haehaa oia e te ite ore i te pae haapiiraa. Ua ma‘iti râ te Fatu ia’na, e ua farii oia mai roto mai i te Fatu i te mau mea atoa e hinaarohia no te faatura e no te faahanahana i te piiraa o te hoê peropheta no te tau faaho‘i-faahou-raa mai.

Te na ô faahou ra te peresideni Benson e :

« Te ono : Aita e titauhia i te peropheta ia parau e, ‘Teie ta te Fatu i parau’ no te horo‘a mai i te papa‘iraa mo‘a ia tatou…

« Te hitu : E parau mai te peropheta ia tatou te mea ta tatou e ti‘a ia ite, eiaha râ te mea ta tatou e hinaaro i te ite »(« Hoê ahuru ma maha Tumu parau », 27, 28).

E i muri iho ua faahiti te Peresideni Benson i te 1 Nephi 16:1, 3 :

« E faaoti a‘e ra vau o Nephi i ta‘u i parau i ta‘u nau tuaana, inaha, ua parau maira raua ia‘u, Ua faaite mai oe ia maua i te mau mea faahapa, e ore ho‘i e ti‘a ia maua ia faaoroma‘i. …

« E teie nei, e to‘u na tuaana, ahiri orua e na taata parau-ti‘a, e ua hinaaro orua i te faaroo i te parau mau, e e haapa‘o i te reira, ia haere ti‘a orua i mua i te aro o te Atua, e ore orua e amuamu no te parau mau, i te na ôraa mai e, ua parau maira oe i te mau mea faahapa ia maua nei ».

Tumu parau va‘u : « Aita te peropheta e taoti‘ahia e te mana‘o taata…

« … E mea ti‘a anei te mana‘o e e ora te ma‘i lepera na roto i te parauraa i te hoê taata ia hopu e hitu taime i roto i te hoê anavai pape taa ê ? O teie mau ta te peropheta Elisaia i parau atu i te hoê lepera ia na reira e ua ora oia. (A hi‘o 2 Te mau Arii 5:1-14). (« Hoê ahuru ma maha Tumu parau », 28).

E ua horo‘a â te peresideni Benson i te tahi atu â mau tumu parau no ni‘a i te haapa‘oraa i te parau a te peropheta. E tai‘o atu vau i na tuhaa hopea e ono e ia ani atu ia outou i roto i ta outou pureraa utuafare i mua nei ia imi i teie mau parau tumu i roto i te mau parau e te mau haapiiraa a to tatou mau peropheta ora, mau hi‘o e mau heheu parau i roto i teie amuiraa rahi.

« Te iva : E nehenehe ta te peropheta e farii i te heheuraa no ni‘a i te mau uiraa atoa i – te pae tino aore râ i te pae varua…

« Te ahuru : E nehenehe ta te peropheta e faa ô atu i roto i te mau ohipa tivira…

« Te ahuru ma hoê : Na pŭpŭ e piti e mea fifi roa na ratou i te pee i te peropheta o te feia te‘ote‘o maramarama ïa e te feia te‘ote‘o tei monihia…

« Te ahuru ma piti : Aita te peropheta e titauhia ia riro ei taata tuiroo i roto i te ao nei aore râ i to te ao nei…

« Te ahuru ma toru : E melo te peropheta e to’na na tauturu no te Peresideniraa Matamua – te pŭpŭ teitei roa‘e i roto i te Ekalesia…

« Te Ahuru ma maha : Te peropheta e te peresideniraa – te peropheta ora e te Peresideniraa Matamua – a pee ia ratou e ia farii i te haamaitairaa ; a pato‘i ia ratou e ia mamae. (« Hoê ahuru ma maha Tumu parau », 29)

E haamaitairaa rahi roa no tatou i te farii i te mau parau a to tatou mau peropheta ora, mau hi‘o, e mau heheu parau i roto i teie amuiraa rahi faahiahia. E parau mai ratou i te hinaaro o te Fatu no tatou, To’na nunaa. E faatae mai ratou i te parau a te Atua e Ta’na a‘o ia tatou. A haapa‘o maitai e a pee i ta ratou mau arata‘iraa e mau aniraa, e te faaite papû atu nei au ia outou e haamaitai hope-roa-hia to outou oraraa.

O Iesu te Mesia, to tatou Faaora e Arai. E peropheta ora o Thomas S. Monson na te Atua, e e mau peropheta, e mau hi‘o e e mau heheu parau te Peresideniraa Matamua e te Pŭpŭ no te Tino Ahuru Ma Piti Aposetolo. Na roto i te i‘oa o Iesu Mesia ra, amene.