2010–2019
“Tudei Ka Sega ni Yavalati”
Okotova 2010


“Tudei Ka Sega ni Yavalati”

Kevaka eda sa yalodina ka vosota me yacova na ivakataotioti, eda na ciqoma na nona veivakalougatataki kece na Tamada Vakalomalagi, o ya na bula tawamudu kei na bula vakacerecerei.

Au vakavinavinakataka na noqu tiko rawa ena soqoni oqo ni marama yalodina ena veiyasai vuravura. Au sa sotava e udolu vei kemuni ena veivanua duidui. E vakaukauwataki au na nomuni yalodina kei na nomuni gugumatua. E vakauqeti au na nomuni ivakaraitaki vinaka kei na nomuni yalodina ki na kosipeli. E vakavuna vei au na yalolokumi na nomuni veiqaravi vuni ena yalo e sega ni nanumi koya vaka ikoya vaka kina na nomuni vosa ni ivakadinadina kei na veivakadeitaki.

Ena bogi nikua au na tarogi kemuni vakayadudua ena veitaro vata ga au sa tarogi ira oti kina e vuqa vei kemuni ena noda veivosaki.

  1. Na cava e vukei kemuni moni tudei ka sega ni yavalati ena nomuni sotava na bolebole ka vakatovolea na nomuni vakabauta?

  2. Na cava e tokoni kemuni ena nomuni vakatovolei ka temaki?

  3. Na cava e vukei kemuni moni vosota ka yaco moni dua na tisaipeli dina i Karisito?

Eso na isaunitaro o ni tukuna vei au e okati kina:

  1. Na nomuni kila ni lomani kemuni ka kauwaitaki kemuni na Tamada Vakalomalagi.

  2. Na nomuni nuitaka tiko ni, ena isoro ni veivakaduavatataki nei Jisu Karisito ena vakayacori na veivakalougatataki kece sara a yalataki kivei ira na yalodina.

  3. Na nomuni kila na ituvatuva ni veivueti.

Na noqu itukutuku nikua ena vakalevutaka na vakadeitaki ni vakabauta e lako mai lomamuni.

Na Roma 8:16 e tukuna, “A Yalo oqo sa tukuna mai ki na yaloda ni da sa luve ni Kalou.” Na imatai ni gauna au nanuma rawa niu a vakila deivaki kina ni kilai au, lomani au, ka dau kauwaitaki au na Tamada Vakalomalagi ena gauna au a sobuta kina na wai ni veipapitaisotaki niu yabaki 15. Ni se bera o ya, au kila ni bula tiko na Kalou kei Jisu Karisito na iVakabula kei vuravura. Au vakabauti Rau kau lomani Rau, ia au sega vakadua ni bau vakila na Nodrau lomani au ka kauwaitaki au, vakaiau sara ga, me yacova na siga o ya ena noqu marautaka na noqu madigi meu vakayacora na veiyalayalati ni papitaiso.

Au sa qai kila na caka mana cecere a yaco ena noqu a kunei ka vakatavulici mai vei rau na daukaulotu, vakabibi ni lailai wale ga na daukaulotu ena kedra maliwa e rua na milioni na tamata! Au sa qai kila ena gauna o ya ni Tamada Vakalomalagi e kilai au ka lomani au ena dua na kena sala duatani ka yaco kina Vua me dusimaki rau mai na daukaulotu ki na noqu vale.

Au sa qai kila oqo ni sa Kalou dau loloma na Kalou. E ka dina oqo baleta ni da sa Luvena ka gadreva o Koya vei keda taucoko me da rawata na reki kei na marau tawamudu. Na nona cakacaka kei na nona lagilagi sai koya me da tucake tale mai na mate ka rawata na bula tawamudu.1 Oqori na vuna e vakarautaka kina e dua na ituvatuva ni marau me baleti keda. Na inaki ni noda bula sa ikoya me da rawata na bula tawamudu kei na bula vakacerecerei, ka vukei ira tale eso me ra rawata vaka kina. A bulia o koya na vuravura oqo me baleti keda me da rawata e dua na yago ka vakatovolei ena noda vakabauta. E solia vei keda o Koya na isolisoli talei ni galala ni digidigi, me rawa ni da digitaka kina na sala e tuberi keda ki na marau tawamudu. Na yavu ni veivakabulai nei Tamada Vakalomalagi e baleti iko kei au. E baleti ira kece na Luvena.

“A sa bulia na tamata na Kalou mei tovo vata kei koya, e nai tovo ni Kalou sa buli koya ko koya; na tagane kei na yalewa sa buli rau ko koya.

“A sa vakalougatataki rau na Kalou, a sa kaya vei rau na Kalou, Drau vakaluveni, ka tubu me lewe vuqa, ka vakatawai vuravura.”2

“A sa vakarota ko Koya me rau vakarokoroko vua na Turaga na nodrau Kalou. … A sa talairawarawa ko Atama ki na ivakaro ni Turaga.”3

Erau sa vakaluveni ko Atama kei Ivi, ka tomani tiko kina na ituvatuva.

Au kila ni o keda vakayadua e tu na noda itavi bibi ka yaga me vaka e dua na luvena yalewa na Kalou. E sa vakatikora o Koya kivei ira na luvena yalewa na ivakarau vakalou me baleta na inaki ni kena vakayacori tiko ga na Nona cakacaka. E sa solia na Kalou kivei ira na marama na cakacaka tabu ni vakasucu kei na nodra susugi na gone. E sega tale ni dua na cakacaka e bibi vakalevu cake. Sa ikoya e dua na ilesilesi tabu. Na itutu vakamarama duadua ni dua na marama sa ikoya na cakacaka tabu ni kena bucini na veimatavuvale tawamudu, vakabibi mai na veitokani vata kei na turaga watina.

Au kila tiko ni so vei ira na marama tacida era se bera tiko ni ciqoma na veivakalougatataki ni vakamau se vakaluveni. Au vakadeitaka vei kemuni ni na yaco mai na gauna o ni na ciqoma kina na veivakalougataki kece sara a yalataki kivei ira na yalodina. Mo dou “toso ki liu ka tudei vei Karisito, ena nomudou vakanuinui taucoko sara, … ka vosota me yacova na ivakataotioti” mo dou rawata na bula tawamudu.4 Ena rai tawamudu, na veivakalougatataki e yali tiko ena “lekaleka wale ga.”5

Me kena ikuri, e sega ni tukuni ni dodonu moni vakamau me maroroi kina na ivakaro kei na susugi ni matavuvale, itokani, kei ira o ni tiko veivolekati. Na nomuni isolisoli, taledi, kila, kei na kaukauwa vakayalo era gadrevi vakalevu ena kena tarai cake na matanitu. E vakararavi tu na Turaga ena nomuni yalo dina moni vakayacora na veitavi yaga oqo.

E kaya na Turaga:

“Kau [na] sega ni guilecavi iko.

“Raica, kau sa ceuti iko ena qeteqete ni ligaqu; a nomu bai sa tikotiko ga e mataqu.”6

E lomani kemuni na Turaga. E kila na nomuni inuinui kei na nomuni yalorarawa. Ena sega ni guilecavi kemuni baleta na nomuni mosi kei na nomuni leqa era tu e Matana ena veigauna.

Na ivakaraitaki ni loloma cecere duadua ni Kalou kivei keda sa ikoya na Nona lomasoli me tala mai na Luvena Lomani, o Jisu Karisito, me isoro ni noda ivalavala ca, me noda i Vakabula ka Dauveivueti.

Ena Joni 3:16 eda wilika, “Ni sa lomani ira na kai vuravuara vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.”

E kaya na i Vakabula: “Me vaka sa lomani au ko Tamaqu, au sa lomani kemudou vaka talega kina.”7

Na nona lomasoli ni solibula vakalami o Jisu Karisito sa ikoya e dua na ivakaraitaki ni Nona lomani Tamana ka vaka kina na Nona sa rui lomani keda vakatitobu.

E vakamacalataka o Aisea na nona vakararawataki na iVakabula:

“… E dina sa colata ko koya na noda rarawa, ka sa colata na rarawa ni lomada. …

“… sa vakamavoataki ko koya ena vuku ni noda talaidredre, ka sa qaqi ena vuku ni noda caka cala: … ia ena we ni Kena kuita, eda sa vakabulai kina.”8

Na Turaga e vakaraitaka Vakaikoya, “Raica ko i au na Kalou; au sa vosota oti na veika oqo, me ra bula kina ko ira era sa veivutuni.”9

Sa sereka kina o Koya oqo na i vau ni mate ka sa rawa kina vei ira na tamata kecega me ra tucake tale. E solia vei keda o Koya na isolisoli ni tawa mate rawa.

A colata O Jisu Karisito na noda ivalavala ca, vakararawataki, ka mate me vakayacori rawa kina na ka sa virikotori ena vunau ka rawa kina me da levea na vakararawataki kevaka eda veivutuni.

Eda vakaraitaka na noda ciqomi Jisu Karisito me noda i Vakabula ena noda vakabauti Koya, veivutunitaka noda ivalavala ca, ka ciqoma na cakacaka vakalotu ni veivakabulai e gadrevi me da tu kina ena iserau ni Kalou. Na cakacaka vakalotu ni veivakabulai oqo era ivakatakilakila ni veiyalayalati eda cakava. Na veiyalayalati ni talairawarawa ki na Nona lawa kei na ivakaro e vauci keda vua na Kalou ka vaqaqacotaka noda vakabauta. Na noda vakabauta kei na tudei vei Karisito ena solia vei keda na yalodei kei na nuidei eda gadreva me da sotava kina na veibolebole ni bula, ka ra tiki ni noda bula vakayago.

Ni oti ga nona kacivi na turaga watiqu me veiliutaki ena Tabana ni Kaulotu e Paraguay Asuncion ena 1992, keirau a tiko ena dua na koniferedi ena dua na tabana ni dua na itikotiko tu vakaikoya e Paraguayan Chaco.10 E va na auwa neirau lakova tiko e dua na sala simede ka qai vitu tale na auwa ena sala makawa. Na kena rerevaki kei na taqayataki ni ilakolako balavu oqo sa guileca sara ga ena neirau a marautaka yani na nodra veikidavaki na lewenilotu e Mistolar.

O Julio Yegros na peresitedi gone ni tabana, kei Margarita na watina, sai rau e dua vei ira na lewe vica walega na matavuvale era sa vauci oti ena valetabu. Au a kerei rau me rau wasea na veika erau sotava ena nodrau ilakolako ki na valetabu.

Ena gauna o ya, na valetabu voleka duadua sa ikoya na Valetabu e Buenos Aires e Argentina. Na ilakolako mai Mistolar e taura e 27 na auwa me yacovi yani kina na valetabu ka rau a kauti rau tale tiko ga na rua na luvedrau gonelalai. A donumaka sara tu ga e dua na vula ibatabata ca sara, ia ena solibula levu eratou a yaco rawa kina ki na valetabu ka ratou vauci vata me dua na matavuvale tawamudu. Ena nodratou ilesulesu mai, e rau a tauvimate bibi sara na gonelalai ka rau mani mate sara. E rau a buluti rau ena bati ni gaunisala ka rau lesu liga lala ivale. Erau a rarawa ka galili, ia e veivakurabuitaki, nodrau vakila na veikaroni kei na vakacegu. Erau kaya ena veika e rau sotava: “O rau na luvei keirau e rau sa vauci vei keirau ena vale ni Turaga. Keirau kila ni keitou na qai tiko vata tale me tawamudu. Keirau karoni ka vakacegui ena kila oqo. E dodonu me keirau kilikili tikoga ka yalodina ki na veiyalayalati keitou a vakayacora ena valetabu, oti o ya keitou na duavata tale kei rau.”

Me da na vakalevutaka vakacava na noda yalodina kei na inuinui me vakataki ira na lewenilotu yalodina oqo mai Paraguay?

E da vaqoqocotaka vakacava na vakadeitaki ni noda vakabauta kau sa dau rogoca vakawasoma mai vei ira e lewe vuqa vei kemuni, ni o ni vakabauta ni lomani kemuni na Kalou, ka o ni vakadinata ni o ni na ciqoma na Nona veivakalougatataki, ka vaka kina ni o ni kila na ituvatuva ni veivueti mai vua na iVakabula o Jisu Karisito kei na nomuni itavi bibi ena Nona ituvatuva?

Au na vakatututaka e va na ka ka sa vukei au: masumasu, vulici ni ivolanikalou, talairawarawa kei na veiqaravi.

Masumasu

Na masumasu sa ikoya na noda veitaratara kei Tamada Vakalomalagi. Ena gauna eda masu kina, eda vakaraitaka tiko ni da vakabauti Koya ka vaka kina na Nona kaukauwa me na vakalougatataki keda.

Ena Alama 37:37 eda wilika, “Mo vakarogotaka vua na Turaga na nomu sala kece ga; ia ena vakadodonutaka na nomu ilakolako ko Koya; mo soli iko vua na Turaga ni ko sa davo sobu ena bogi ka na vakatawai iko ko Koya; ia ni ko sa yadra ena mataka, mo vakavinavinakataka vua na Kalou; raica kevaka ko sa kitaka na veika oqo, ko na laveti cake ena siga mai muri.”

Vulici ni iVolanikalou

Na kilai kei na kilai vakavinaka sara ni ituvatuva nei Tamada Vakalomalagi ena vukei keda ena noda kila se o cei o keda kei na cava e dodonu me da yacova.

A vakarota na Turaga, “Dou sa vakasaqaqara ena ivolatabu; ni dou sa nanuma ni dou sa rawata kina na bula tawamudu: ia na ivola oqo sa tukuni au.”11

Sa gadrevi dina sara vakalevu vei ira na marama yadua me ra vulica na ivolanikalou. Ena gauna eda sa na kila vakavinaka kina na dina era tu ena ivolanikalou, sa na qai rawa meda bulataki ira ena noda bula ka sa na levu cake sara kina vei keda na kaukauwa me da vakavatukanataka na inaki ni Kalou. Na nomuni masumasu vakai kemuni ena veisiga kei na vulici ni ivolanikalou e sureta tale ga na veivakayarayarataki kei na kaukauwa ni Yalo Tabu ki na noda bula.

Talairawarawa

Sa kaya na Turaga, “Kevaka dou sa lomani au, dou talairawarawa ki na noqu ivunau.”12 Na noda talairawarawa ena yalodina ena vukea na noda tara cake na ivakarau vakalou ka veisautaka na yaloda.

Eda vakasalataki ena Vunau kei na Veiyalayalati:

“Mo nanuma tiko na veiyalayalati ko sa cakava. …

“Mo muria tikoga na noqu vunau, ia ko na rawata kina na isala ni yalododonu.”13

Na noda yalataka me da bulataka na kosipeli ena vakabulabulataka na noda vakabauta kei na inuinui vei Jisu Karisito.

Veiqaravi

E levu sara na noda madigi ni qaravi Koya. O ni sa kerei vakayadudua na marama mo ni vakasaqarai ira na dravudravua kei na vakaleqai tu ena keda maliwa kei ira era tu vakavolivoliti keda. Na “dravudravua kei na vakaleqai” e okati kina o ira na vakaleqai vakayalo kei na vakaleqai na lomadra. Oi keda vakayadua eda vakacolati ena nodra “vakabulai na mate,” ka rawa ni caka ena cakacaka ni tuva kawa se ena cakacaka ni valetabu. Eda sa vakaroti me da wasea na kosipeli vei ira tale eso, ka sa levu tale ga na sala ni vakaitavi ena cakacaka ni kaulotu. Sai ira oqo na veisala ni noda qarava na Turaga. Na Tamada Vakalomalagi e namaka vei ira era kaukauwa me ra vakaukauwataki ira na malumalumu, ka na vakaukauwataki na nomu vakabauta ni ko vakaukauwataki ira ka kauwaitaki ira na Luvena.

Au kila ni Tamada Vakalomalagi e lomani ira yadua vakavinaka, vakayadua sara, e veigauna na Luvena. Au kila ni tu na noda itavi yaga vakamarama, ena ituvatuva ni marau. Na noda sasaga vagumatua sara sai koya ga na ka e vinakata vei keda, ena tarai cake ni matanitu. E dina na Veisorovaki. Sa noda i Vakabula ka Dauveivueti o Jisu Karisito. Au vakadinadinataka ni kevaka eda yalodina ka vosota me yacova na ivakataotioti, eda na ciqoma na veivakalougatataki kece sara nei Tamada Vakalomalagi, na bula tawa mudu mada ga kei na bula vakacerecerei, ena yaca i Jisu Karisito, emeni.

  1. Raica na Mosese 1:39.

  2. Nai Vakatekivu 1:27–28.

  3. Mosese 5:5.

  4. 2 Nifai 31:20.

  5. Vunau kei na Veiyalayalati 121:7.

  6. Aisea 49:15–16.

  7. Joni 15:9.

  8. Aisea 53:4–5.

  9. Vunau kei na Veiyalayalati 19:16.

  10. Na vanua e mamaca tu vakatikina ka sega soti ni tawani vakalevu ena ra kei Paraguay.

  11. Joni 5:39.

  12. Joni 14:15.

  13. Vunau kei na Veiyalayalati 25:13, 15.