2010–2019
O R e Tolu o Filifiliga
Oketopa 2010


O R e Tolu o Filifiliga

Ua taitasi i tatou ma o mai i lenei lalolagi ma meafaigaluega uma e tatau ai, e faia ai filifiliga tonu.

Ou uso pele o le perisitua, o la’u tatalo ma le loto faamaoni i le po nei, ia mafai ona ou olioli i le fesoasoani mai o lo tatou Tama Faalelagi e tautala atu i na mea ua musuia a’u e faasoa atu ia te outou.

Sa ou mafaufau talu ai nei e uiga i filifiliga ma o latou taunuuga.Toetoe a leai se itula o le aso e alu e aunoa ma le moomia ona tatou faia o ni filifiliga mo lea mea ma lea mea. O nisi e le taua, a o nisi e matua taua lava. O nisi filifiliga e le afaina ai le faavavau, a o nisi o le a faia ai le eseesega o mea uma.

Ina ua ou mafaufau loloto i elemene eseese o le filifiliga, sa ou tuuina i ni faavasegaga se tolu: muamua, o le aia tatau [Right] o le filifiliga; lua, o le tiutetauave [Responsibility] o le filifiliga; ma le lona tolu, o taunuuga [Results] o le filifiliga. Ua ou faaigoaina ai o R e tolu o le filifiliga.

Ou te ta’ua muamua le aia tatau o le filifiliga. Ou te matua faafetai lava i se Tama Faalelagi alofa mo Lana meaalofa mo i tatou, o le faitalia, po o le aia tatau e filifili ai. Na saunoa Peresitene Tavita O. MaKei, le Peresitene lona iva o le Ekalesia, “E le gata i le tuuina mai ia i tatou o le ola, o le tuuina mai ia i tatou o le aia tatau e faatonutonu ai lena ola o le meaalofa aupito silisili lea a le Atua i le tagata.”1

Ua tatou iloa sa i ai lo tatou faitalia a’o lei faia lenei lalolagi, ma sa taumafai Lusifelo e aveesea mai ia i tatou. Sa leai sona talitonuga i le mataupu faavae o le faitalia po o i tatou, ma sa ia finau mo se faaolataga e fai faamalosi. Na ia tausisi pea o le a leai se tasi e leiloa i lana fuafuaga, ae sa foliga na te le’i iloaina—pe atonu foi e le’i popole o ia—e le gata i lena, o le a leai se tasi e faateleina se atamai, se malosi, se agaalofa po o se loto faafetai pe a na fai e mulimulita’ia lana fuafuaga.

O i tatou o ē na filifilia le fuafuaga a le Faaola, sa iloa o le a tatou ulu atu i se faigamalaga faigata ma le matautia, aua tatou te aofia ai i gaoioiga faalelalolagi, ma agasala ma tautevateva, ma motusia mai ai i tatou mai lo tatou Tama. Peitai, o le Ulumatua na Fanaua i Agaga, na Ia ofoina atu o Ia lava e avea ma taulaga e togiolaina agasala a tagata uma. E ala atu i mafatiaga e lē matalanoaina, na avea ai o Ia ma Togiola sili, o le Faaola o tagata uma, ma mafai ai ona tatou toe foi manuia atu i lo tatou Tama.

Ua ta’u mai e le perofeta o Nifae ia i tatou, “O lea, ua saoloto ai tagata i la le tino, ma ua foaiina mai ia te i latou mea uma e tatau i tagata. Ua saoloto foi i latou e filifili le saolotoga ma le ola faavavau talu le Puluvaga sili o tagata uma, pe filifili le faatoilaloina ma le oti, e tusa ma le faatoilaloina ma le mana o le tiapolo, aua na te saili ina ia malaia tagata uma e pei o ia lava.”2

Uso e, po o le a lava le faatuaoia o o tatou tulaga, o le a i ai pea lava pea ia i tatou le aia tatau e filifili ai.

O le isi, faatasi ai ma le aia tatau e filifili ai, ua ia i tatou le tiutetauave e filifili ai. E le mafai ona tatou tutu faavaeluatai; e le mafai ona tutu lē mautinoa ai pea. Ua silafia e le Alii lena mea; ua iloa foi e Lusifelo. Po o le a lava le umi tatou te ola ai i le lalolagi, o le a le lafoa’ia lava e Lusifelo ma ana ‘au lo latou faamoemoe ia latou mauaina o tatou agaga.

E le’i auina mai i tatou e lo tatou Tama Faalelagi i la tatou faigamalaga mo le faavavau, e aunoa ma le saunia o ni auala e mafai ai ona tatou maua mai ia te Ia le taitaiga e fesoasoani ai i lo tatou toe taliu saogalemu atu i le iuga o le olaga faitino. Ou te talanoa atu e uiga i le tatalo. Ou te talanoa atu foi e uiga, i le musumusuga mai lena leo malu, itiiti o i totonu o i tatou taitoatasi, o loo ou tautala atu foi e uiga i tusitusiga paia, na tusia e tautai na latou folau i manū i ogasami po o faigata o le olaga lea e tatau foi ona tatou laasia.

Ua taitasi i tatou ma o mai i lenei lalolagi ma meafaigaluega uma e tatau ai, e faia ai filifiliga tonu. Ua ta’u mai e le perofeta o Moronae ia i tatou, “Ua foaiina mai le Agaga o Keriso i tagata uma lava, ina ia iloa ai e i latou le lelei ma le leaga.”3

Ua siosiomia i tatou—o nisi taimi e osofaia ai—i feau a le tiapolo. Faalogo foi i nisi o na feau; o le mea moni ua outou masani ai: “Na o le tasi lava ma o le a lē afaina.” “Aua e te popole; o le a leai a se isi na te iloa.” “E mafai a ona tuu lau ulaula po o le inu po o le faaaogaina o fualaau oona i soo se taimi lava e te manao ai.” “O la e fai e tagata uma, o lona uiga la e le leaga.” E leai se gataaga o pepelo.

E ui o le a tatou feagai i le tatou faigamalaga ma pi’oga ma milosaga o le auala, e taugata tele le ui i se isi auala atonu e le mafai ona tatou toe foi mai ai. E iliina e lena Lusifelo, o ia o le ili fagufagu atamai, lana fati malie e tosina atu ai tagata e le o iloa ua faaseseina i latou, mai le saogalemu o lo latou ala na filifilia, ma aveese atu ai mai fautuaga a matua alolofa, ma le saogalemu o aoaoga a le Atua. Na te le sailia na o tagata ua faitaulia faapea e le aoga, a e o i tatou uma lava, e aofia ai tamalii ua filifilia e le Atua. Na faalogo i ai le Tupu o Tavita [i lena fati], ma faavaivaia ai, ona pau ai lea. Sa faapena foi Kaino i se vaitaimi na muamua atu, ma Iuta le Sekara i se taimi mulimuli ane. O ana auala e taufaasese; a ua le mafaitaulia i latou ua afaina ai.

Tatou te faitau e uiga ia te ia i le 2 Nifae: “O nisi na te faalotomalie, ma faamoe ia te i latou i le filemu i la le tino.”4 “O nisi foi na te viivii i ai ma fai atu ia te i latou e leai se seoli … seia faamauina i latou e ia i ana filifili matautia.”5 “E faapena ona olegia e le tiapolo o latou agaga, e ta’ita’i ifo ai i latou ma le faaeteete i seoli.”6

A oo ina tatou feagai ma filifiliga taua, e faapefea ona tatou faia le faaiuga? Pe tatou te gauai atu ea i le folafolaga o le faafiafiaina mo na o sina taimi? I mea ua tauanauina ma mea ua faamemelo i ai? I uunaiga a a tatou taaga a tupulaga?

Aua nei o tatou lē mautonu e faapei o Alise i le tala faamama’i a Lewis Carroll o le Alice in Wonderland. O le a outou manatua ina ua taunuu atu o ia i se magaala e valalua ni auala sa i ona luma, e taufai agai i luma ae e eseese itu. Sa fetaiai o ia ma le pusi fiafia, ma sa fesili i ai Alise, “O le fea auala ou te ui ai?”

Na tali atu le pusi, “E faalagolago i le mea e te fia alu i ai. Afai e te le iloa le mea e te fia alu i ai, e le afaina la po o le fea auala e te ui ai.”7

E le faapei la o Alise, aua ua tatou iloa uma lava le mea tatou te fia o i ai, ma e afaina po o le fea auala tatou te o ai, aua o le filifilia o lo tatou ala, o le filifilia lea o lo tatou taunuuga.

E tatau lava ona tatou faia pea lava pea ia faaiuga. Ina ia faia la ma le poto, e manaomia le lototoa—o le lototoa e fai atu ai “Leai,” o le lototoa e fai atu ai “Ioe.” O faaiuga e fuafua ai le taunuuga.

Ou te aioi atu ia te outou, ina ia faia nei loa lava se faaiuga iinei, i le taimi nei, e lē aluese lava mai le ala lea o le a tau atu i lau sini: o le ola e faavavau ma lo tatou Tama i le Lagi. I lena ala sa’o ma le moni o loo i ai foi isi sini: auauna atu faamisiona, faaipoipoga i le malumalu, toaga i le Lotu, suesue i tusitusiga paia, tatalo, galuega i le malumalu. E le mafaitaulia sini taua e tatau ona ausia, a o tatou faimalaga ai i le olaga. E manaomia la tatou tautinoga ina ia ausia.

O le mea mulimuli, uso e, ou te tautala atu e uiga i taunuuga o filifiliga. O a tatou filifiliga uma lava e i ai taunuuga, o nisi e laiti pe leai foi se faiā i lo tatou faaolataga e faavavau, a o isi o mea uma e faiā ma le ola e faavavau.

Pe e te ofuina se mitiafu lanumeamata po o le lanumoana, o le mea moni lava e leai a se eseesega. Peitai, pe tonu ia te oe e oomi se ki o lau komepiuta o le a aveina ai oe i ponokalafi, e mafai ona faia ai le eseesega uma i lou olaga. O le a na o se la’a ese lava mai le ala sa’o, ma le saogalemu. Afai e tauanau oe e se uo e inu se ava malosi, pe tofotofo i fualaau faasaina ma e gauai atu i le uunaiga, ua e ui ese ai mai le mea atonu e te le toe foi mai ai. Uso e, pe o tatou o ni tiakono ua ta’i 12 tausaga po o ni faitaulaga sili ua matutua, e lamatia lava i tatou. Ia taulai atu la tatou vaai, o o tatou loto ma a tatou faaiuga i lena sini lea e faavavau ma ta’uaogaina ai soo se tau o le a tatou totogiina, tusa lava po o le a le osigataulaga e tatau ona tatou faia ina ia ausia ai.

E leai se faaosoosoga, leai se uunaiga, leai se faatosinaga e mafai ona faatoilaloina i tatou sei vagana ua tatou faatagaina lena mea. Afai tatou te faia le filifiliga sese, e leai se tasi tatou te tu’ua’ia ae o i tatou lava. Na ta’ua e Peresitene Polika Iaga lenei mea moni i lona faatatauina lea ia te ia lava. Fai mai a ia, “Afai o le a uia e Uso Polika se ala sese ma lē fai ai mo ia le malo o le lagi, o le a lē tuua’ia lava se tasi a o Uso Polika lava ia. Ua na o au lava le tagata i le lagi, lalolagi, po o seoli e mafai ona tuua’ia.” Na ia faaauau, “E faatatau tonu foi lenei mea i tagata uma o le Au Paia o Aso e Gata Ai. O le faaolataga o se galuega a tagata taitoatasi.”8

Na faamautinoa mai ia i tatou e le Aposetolo o Paulo, “Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.”9

Ua tatou faia uma lava ni filifiliga e le sa’o. Afai tatou te le’i faasa’oina lava na filifiliga, ou te faamautinoa atu ia te outou e i ai se auala e faia ai. O lea ala ua ta’ua o le salamo. Ou te aioi atu ia te outou ina ia faasa’o mea sese sa outou faia. Sa maliu lo tatou Faaola ina ia maua ai e oe ma a’u lena meaalofa. E ui e le faigofie le ala, ae moni le folafolaga: “E ui lava ina pei o ofu mumu a outou agasala, e sisina ia e pei o le kiona.”10 “Ma o A’u le Alii, ou te le toe manatua lava.”11 Afai ua e agasala, o le vave ona amata o lou toe foi mai, o le vave foi lena o lou mauaina o le filemu matagofie ma le olioli lea e maua faatasi ma le vavega o le faamagaloga.

Uso e, o outou o se tupulaga tautupu. O le ola e faavavau i le malo o lo tatou Tama o la outou sini lea. O lena sini e le mafai ona ausia i se taumafaiga mamalu se tasi, ae o le taunuuga o le ola amiotonu i le olaga atoa, o se faaputuga o filifiliga poto, o le tumau faamaoni i le faamoemoega. E pei lava o soo se sini e i ai se taui taua, o le taui o le ola e faavavau e manaomia ai taumafaiga.

O loo manino mau:

“Ia outou anaana ia faia … faapei ona poloai mai ai o Ieova ia te outou: aua tou te afe i le itu taumatau, po o le itu tauagavale.

“Ia outou savavali i le ala uma lava na poloai mai ai Ieova lo outou Atua ia te outou.”12

I le faaiuga ou te fia faamatala atu se faataitaiga o se tasi na vave faia sana faaiuga i lona olaga mo ana sini o le a i ai. Ou te talanoa e uiga ia Uso Clayton M. Christensen, o se tasi o le Ekalesia, o loo avea ma polofesa o le pulega o mea tau pisinisi i le Aoga Faapisinisi i le Iunivesite o Harvard.

Ina ua 16 ona tausaga, sa tonu ia Uso Christensen, e i ai ma nisi mea, o le a le taalo lava i ni taaloga i le Aso Sa. I tausaga mulimuli ane, ina ua a’oga o ia i le Iunivesite o Oxford i Egelani, sa taalo i le tulaga tutotonu i le ‘au pasiketipolo. O le tausaga lena sa le’i faiaina ai lava i le taamilosaga ma sao atu ai i le tulaga lea e tutusa ai Peretania ma le mea lea ua ta’ua i le Iunaite Setete o le tauvaga pasiketipolo o le NCAA.

Sa faigofie lava ona latou manumalo i a latou taaloga o le taamilosaga, ma oo atu ai i le suega siamupini a le toafa. O iina na tilotilo ai Uso Christensen i le faasologa o taaloga, ma sa matua le fiafia o ia, ina ua vaai atu o le taaloga faaiu o le pasiketipolo e fai i le Aso Sa. Sa matua galulue malosi o ia ma le ‘au ina ia latou ausia le tulaga ua i ai, ma o ia foi o le tutotonu faaoso. Na alu o ia i le faiaoga o le ‘au ma faamatala atu i ai lana faafitauli. Sa leai se manatu alofa o lona faiaoga ma sa ia fai atu ia Uso Christensen, ia taalo i le taaloga.

Peitai, a o loma le taaloga faaiu, sa i ai se taaloga i luma mai. Paga lea, ua fati le tauau o le tutotonu faaleoleo, ma ua faateleina ai le uunaiga ia Uso Christensen e taalo i le taaloga faaiu. Na alu o ia i lona potu i le faletalimalo ma tootuli ai i lalo, ma fesili atu i lona Tama Faalelagi pe i ai se afaina, pau lava lea, pe a taalo i lena taaloga i le Aso Sa. Fai mai a ia, a’o lei uma lana tatalo, na ia maua le tali: “Clayton, aisea ua e fesili mai ai? Ua e iloa le tali.”

Na alu o ia i lona faiaoga, ma faamalie i ai o le a le taalo i le taaloga faaiu. Ona alu ai lea o ia i le lotu i le Aso Sa i le uarota iina, a o taaalo lana ‘au e aunoa ma ia. Sa ia tatalo ina ia manuia. Sa malo le ‘au.

O lena faaiuga taua, ma le faigata na faia i le silia ma le tolusefulu tausaga talu ai. Fai mai Uso Christensen, a o mavae atu aso, ua manatu lava o ia o se tasi lea o faaiuga e aupito sili ona taua ua ia faia. Semanu e faigofie lava le faapea atu, “E te iloa, i se tulaga lautele lava, o le tausia o le paia o le aso Sapati o le poloaiga sa’o, ae i o’u lava tulaga ta’uamiotonuina, e le afaina, na o le pau lava lea, ona oo foi lea i se isi taimi tulai mai se mea e matua manaomia lava ma taua, e sili atu foi ona faigofie ona toe laasia le tuaoi. O le lesona na ia aoaoina, e faigofie atu ona tausia poloaiga i le 100 pasene o taimi nai lo le 98 pasene o taimi.13

O’u uso pele, ia faatumuina i tatou i le lotofaafetai mo le aia tatau e filifili ai, talia le tiutetauave o filifiliga ma ia mataala i taunuuga o filifiliga. I le avea ai ma ni ē tauaveina le perisitua, o i tatou uma ua tuufaatasia ia tasi, e mafai ona agavaa mo le uunaiga taiala a lo tatou Tama Faalelagi a o tatou filifili ma le faaeteete ma le sa’o. O loo tatou punouai i le galuega a le Alii o Iesu Keriso. O i tatou, ua faapei o aso anamua, ua tali atu i Lana valaau. Ua tatou i ai i Lana feau. O le a manuia i tatou i lenei poloaiga paia: “Ia mama outou o e tauave ipu a Ieova.”14 Ia faapea ona fai, o la’u tatalo lea ma le lotomaulalo, i le suafa o Iesu Keriso, amene.

  1. Aoaoga a Peresitene o le Ekalesia: Tavita O. MaKei (2003), 208

  2. 2 Nifae 2:27.

  3. Moronae 7:16.

  4. 2 Nifae 28:21.

  5. 2 Nifae 28:22.

  6. 2 Nifae 28:21.

  7. Sii mai i le Lewis Carroll, Alice’s Adventures in Wonderland (1898), 89

  8. Aoaoga a Peresitene o le Ekalesia: Polika Iaga (1997), 195.

  9. 1 Korinito 10:13.

  10. Isaia 1:18.

  11. Mataupu Faavae ma Feagaiga 58:42.

  12. Teuteronome 5:32–33.

  13. Tagai Clayton M. Christensen, “Decisions for Which I’ve Been Grateful” (Brigham Young University–Idaho devotional, June 8, 2004), www.byui.edu/presentations.

  14. Isaia 52:11.