E Tae noa’tu i te Taime e Farerei faahou ai Tatou

E au mau taea‘e e au mau tuahine, ua î roa to‘u aau i te mauruuru a opani ai tatou i teie amuiraa rahi nehenehe a te Ekalesia. Ua faaamuhia tatou i te pae varua na roto i to tatou faarooraa i te a‘o e te mau iteraa papû o te mau taata atoa tei ohipa i roto i te mau tuhaa pureraa tata‘itahi. Ua papû ia‘u e, te parau nei au no te mau melo atoa na te mau vahi atoa, a faaite ai au i te mauruuru rahi no te mau parau mau tei haapiihia ia tatou. E nehenehe ta tatou e faahiti faahou i te mau parau no roto mai i te Buka a Moromona, a te feia tei faaroo i te a‘oraa a te arii rahi ra o Beniamina e « pii [atu]… ma te reo hoê, i te na-ô raa mai, e, ua faaroo matou i te parau atoa ta oe i parau mai ia matou ; e ua ite ho‘i matou e, e parau mau te reira, na roto i te varua o te Fatu puai hope ».¹

Te ti‘aturi nei au e, e rave tatou i te taime no te tai‘o i te mau a‘oraa o te amuiraa, o te nene‘ihia i roto i te mau ve‘a Ensign e Liahona, no te mea e mea faufaa roa te reira ia tai‘ohia e tatou.

Aue te haamaitairaa i haaputuputuhia tatou i ô nei, i roto i teie Fare Amuiraa nehenehe, ma te hau e te au maite e te pe‘ape‘a ore. E mea faahiahia mau te haapurororaa o teie amuiraa na roto i te mau fenua e te mau moana i rotopu i te mau taata i te mau vahi atoa. Noa’tu e, e mea atea roa matou ia outou e rave rahi, te ite nei matou i to outou varua e te faatae atu nei matou i to matou aroha e te mauruuru ia outou na.

I to matou mau taea‘e tei haamauruuruhia i roto i teie amuiraa, te hinaaro nei au e faaite atu i te aau haamaitai no matou paatoa, no te mau matahiti e rave rahi no to outou taviniraa maitai. E rave rahi o ratou tei haamaitaihia na roto i ta outou tautururaa i te ohipa a te Fatu.

Ua horo‘a mai te Pŭpŭ Himene o te Fare Menemene e te tahi atu mau pŭpŭ himene o tei ohipa mai i roto i te mau tuhaa pureraa, i te mau himene no te ra‘i mai o tei haamaitai e o tei faanehenehe i te mau ohipa i tupu. Te haamauruuru atu nei au ia outou no to outou faaiteraa mai ia matou i to outou mau tareni e te aravihi.

Te here nei au e te mauruuru nei au i to‘u na tauturu haapa‘o maitai, te peresideni Henry B. Eyring e te peresideni Dieter F. Uchtdorf. E na taata teie tei î roa i te paari e te ite, e aita e nehenehe e parau i te ohipa ta raua e rave nei. Aita e ti‘a ia‘u ia faoti i te mau ohipa atoa tei faauehia ia‘u ia rave ahiri e, aita raua no te tauturu mai ia‘u. Ua here roa vau e te faahiahia nei au i to‘u mau taea‘e no te Pŭpŭ no te Tino Ahuru Ma Piti Aposetolo e o ratou paatoa i roto i te Pŭpŭ Hitu Ahuru e i roto i te Episekoporaa Faatere Rahi. Te tavini nei ratou ma te hi‘o ore ia ratou iho e ma te maitai. Te faaite atoa nei au i to‘u mauruuru i te mau vahine e te mau tane e tavini nei ei mau ti‘a faatere no te mau pŭpŭ tauturu rahi.

Ua haamaitaihia tatou i te fariiraa i te evanelia a Iesu Mesia i faaho‘i-faahou-hia mai. Na te reira e horo‘a mai i te mau pahonoraa i te mau uiraa no hea mai tatou, no te aha tei ô nei tatou, e e haere tatou i hea ia faaru‘e mai tatou i teie oraraa. E horo‘a mai te reira i te auraa e i te tumu e i te tia‘iraa no to tatou oraraa.

Te ora nei tatou i roto i te hoê ao arepurepu, e ao no te mau titauraa e rave rahi. Tei ô nei tatou i ni‘a i teie fenua no te rohi i roto i ta tatou mau titauraa tata‘itahi, ma to tatou aravihi atoa, no te haapii na roto mai e no te upooti‘a i ni‘a i te reira mau titauraa. E mea ti‘a ia tape‘a noa e tae noa’tu i te hopea, no te mea, ta tatou opuaraa o te ora mure ore ïa i mua i te aro o to tatou Metua i te Ao ra. Ua here Oia ia tatou e aita’tu To’na e hinaaro rahi maori râ, ia manuïa tatou i roto i te reira opuaraa. E tauturu mai Oia ia tatou e e haamaitai mai ia tatou a pii ai tatou Ia’na na roto i ta tatou mau pure, a tuatapapa ai tatou i Ta’na mau parau, e a haapa‘o ai tatou i Ta’na mau faaueraa. I reira e itehia ai te pe‘ape‘a ore ; i reira e itehia ai te hau.

Ia haamaitai mai te Atua ia outou e au mau taea‘e e au mau tuahine. Te haamauruuru atu nei au ia outou no ta outou mau pure no‘u e no te mau Hui Mana Faatere Rahi atoa. E mauruuru rahi to matou ia outou e no te mau ohipa atoa ta outou e rave nei no te basileia no ananahi o te Atua i ni‘a i te fenua nei.

Ia vai mai te mau haamaitairaa o te ra‘i i ni‘a ia outou. Ia î to outou mau fare i te here e i te auraro e i te Varua o te Fatu. E mata na outou i te faaamu tamau noa i to outou iteraa papû no ni‘a i te evanelia, ia riro ho‘i te reira ei paruru no outou i mua i te mau arepurepuraa a Satane.

Ua hope te Amuiraa i teie nei. Ia ho‘i tatou i to tatou mau fare, a haapa‘o maitai. Ia vai noa te varua ta tatou i farii i ô nei i roto ia tatou a ho‘i ai tatou i roto i te mau ohipa ta tatou e rave nei i te mau mahana atoa. E mata na tatou i te faaite i te maitai rahi a‘e i te tahi e te tahi ; e rave ana‘e tatou i te ohipa a te Fatu.

Ua here au ia outou ; te pure nei au no outou. A haere ana‘e e tae atu i te taime e farerei faahou ai tatou i te ono ava‘e i muri nei. Na roto i te i‘oa o to tatou Fatu e Faaora, o Iesu Mesia ra, Amene.