Eaha ta Oe i Rave i To‘u I‘oa?

I te apîraa o te peresideni George Albert Smith, ua fâ mai to’na papa ruau i pohe, o George A. Smith, i mua ia’na i roto i te hoê moemoea e ua ani maira, « te hinaaro nei au ia ite e, eaha ta oe i rave i to‘u i‘oa ». Ua pahono atu ra te peresideni Smith, « aita vau i rave i te hoê noa a‘e mea i to oe i‘oa e haamâ ai oe ».¹

Ia rave tatou i te oro‘a i te mau hepetoma atoa, e fafau tatou ma te euhe e, e rave tatou i te i‘oa o Iesu Mesia i ni‘a ia tatou, e haamana‘o tamau noa tatou Ia’na, e e haapa‘o ho‘i i Ta’na ra mau faaue. Mai mea ua ti‘a ia tatou ia na reira, ua fafauhia mai ia tatou nei taua haamaitairaa ra faahiahia roa – e vai noa ho‘i To’na Varua i roto ia tatou.²

Mai ta te peresideni George Albert Smith i faaite i to’na papa ruau no te ohipa ta’na i rave i to’na ra i‘oa, i te hoê mahana e titauhia tatou tata‘itahi ia faaite i to tatou Faaora, o Iesu Mesia, eaha ta tatou i rave i To’na ra i‘oa.

Te faufaa rahi no te fariiraa i te hoê i‘oa maitai ua faaitehia ïa i roto i te buka Maseli, i te na-ô-raa e, « o te i‘oa maitai tei hau i te tao‘a rahi ra ; e te ite-maitai-hia mai i te ario e te auro ra »³ e « e haamaitaihia [te i‘oa o] te feia parau-ti‘a ia mana‘ohia ra ! »⁴

A feruri noa ai au i ni‘a i teie mau irava e i te faufaa o te hoê i‘oa maitai, ua puta maira i roto i to‘u feruriraa te tahi mau mea no ni‘a i te i‘oa maitai e no ni‘a i te faufaa ai‘a ta to‘u na metua i vaiiho mai na to‘u na taea‘e e maha, to‘u na tuahine e piti e na‘u nei. Aita a to‘u na metua e tao‘a rahi no teie nei ao, aita atoa e ario e aore râ, e auro. E iva matou rahiraa i roto i te hoê fare e piti piha taotoraa e hoê fare pape e te tahi tamaru i muri i reira to‘u mau tuahine e taoto ai. Ia pohe a‘e ra to‘u na metua, ua haaputuputu a‘e ra to‘u mau taea‘e e na tuahine e o vau no te opere i ta raua faufaa i te tino nei, e mea iti roa. Ua vaiiho mai to‘u metua vahine i te tahi mau ahu, te tahi mau tauhaa fare tahito, e te tahi atu mau mea na’na iho. To‘u metua tane, ua vaiiho mai oia i te tahi mau tauhaa tamuta, te tahi mau pupuhi auau puaa tahito, e te tahi atu mau mea rii. Te tahi noa mau mea e aufauhia i te moni o te hoê ïa fare iti ha‘iha‘i roa e te tahi tino moni iti haaputu i te fare moni.

Ua oto matou paatoa, i te faaiteraa i te mauruuru, ma te ite e, ua vaiiho mai raua ia matou nei i te hoê mea hau roa’tu i te faufaa i te moni e aore râ, i te auro. Ua horo‘a mai raua ia matou nei i to raua here e to raua taime. Ua faaite pinepine raua i to raua iteraa papû no ni‘a i te parau-ti‘a o te evanelia, o te ti‘a ia matou i teie nei ia tai‘o i roto i to raua mau buka aamu. Ua haapii mai raua ia matou ia rave itoito i te ohipa e ia riro ei taata parau-ti‘a, e iti a‘e na roto i te parau, e rahi a‘e râ na roto i te hi‘oraa, e ia aufau i te hoê tuhaa ahuru ti‘a. Ua horo‘a mai raua i te hoê hiaai ia tamau noa i ta matou haapiiraa, ia rave i te hoê misioni, e hau atu i te faufaa rahi ia imi i te hoê hoa mure ore, ia faaipoipo i roto i te hiero e ia faaoroma‘i e tae roa i te hopea. Oia mau ua vaiiho mai raua i te faufaa o te hoê i‘oa maitai no te reira matou i mauruuru ai e amuri noa’tu.

A haamaitaihia ai te peropheta here o Helamana e ta’na vahine i te fariiraa e piti na tamaiti, ua topa a‘e ra raua i to raua i‘oa o Lehi e o Nephi. Ua faaite atu ra Helamana i ta’na na tamaiti i te tumu i piihia ai raua i te i‘oa o to raua na tupuna e piti, tei ora na i ni‘a i te fenua nei fatata e 600 matahiti hou to raua fanau-raa-hia mai. Ua parau oia :

Na ô atu ra oia e, « Inaha e ta‘u na tamarii… i topa’tu vau ia orua i te i‘oa o to tatou ta‘u metua (Lehi e o Nephi)… e i na reira vau, ia tupu to orua hinaaro ia raua, a haamana‘o atoa i ta raua ra mau ohipa; e te haamana‘o ra orua i ta raua mau ohipa ; ia ite atoa i tei parauhia e tei papa‘ihia ho‘i, o te na ô maira e, e tau taata maitatai raua.

« No reira e ta‘u pue tamarii nei, ia rave orua i tei maitai ra, ia parauhia e ia papa‘i-atoa-hia te parau no orua mai tei parauhia e i papa‘ihia no raua ra.

« … Ia roaa ia orua taua mea popou ra, o te ora mure ore ».⁵

E te mau taea‘e e te mau tuahine, i roto i te 600 matahiti i muri nei, nahea te haamana‘o-raa-hia to tatou i‘oa ?

A parau ai oia no ni‘a i te huru e ti‘a ai ia tatou ia rave i te i‘oa o te Mesia i ni‘a ia tatou, e a paruru ai i to tatou i‘oa maitai, ua haapii mai o Moroni e :

« Te a‘o faahou atu nei au ia outou e haere mai outou i te Mesia, e e tape‘a i te mau mea maitatai i horo‘ahia mai, eiaha e rave noa’tu i te mea ino e te viivii ra …

Oia mau, e haere mai i te Mesia, ia maitai roa outou ia’na, e tape‘a ia outou iho eiaha e rave noa’tu i te mea paieti ore ra ».⁶

I roto i te buka iti faauruhia ra, No te Puai o te Feia Apî, te tai‘o nei tatou e, na te Atua i horo‘a mai i te ti‘amâraa ia ma‘iti, e parau tumu mure ore ïa e tei roto i te reira te mau hopoi‘a morare no te mau ma‘itiraa i ravehia. « E ti‘amâraa to tatou ia ma‘iti no (tatou iho), aita râ (tatou) i ti‘amâ no te ma‘iti i te mau hopearaa o ta (tatou) mau ohipa. Ia rave ana‘e (tatou) i te hoê ma‘itiraa, e farii (tatou) i te mau hopearaa no taua ma‘itiraa ra ».⁷

I muri noa a‘e i to‘u faaipoipo-raa-hia e to‘u hoa here o Devonna, ua faaite maira oia ia‘u i te hoê aamu no ni‘a i te huru o to’na iteraa i roto i to’na apîraa i teie tumu haapiiraa faufaa roa, oia ho‘i, e ti‘amâraa to tatou ia ma‘iti, aita râ to tatou e ti‘amâraa no te ma‘iti i te mau hopearaa o ta tatou mau ohipa. Na roto i te tauturu a ta‘u tamahine o Shelly, te hinaaro nei au e faati‘a’tu ia outou i te iteraa o te tuahine Arnold :

« I te 15raa o to‘u matahiti, e mea pinepine au i te feruri e, ua rahi roa te ture e te faaueraa. Aita vau i papû e, e nehenehe anei te hoê tamahine arearea e oaoa i roto i te oraraa na roto i teie rahiraa faatureraa. Taa ê noa’tu te reira, te rahiraa hora ta‘u e rave i te ohipa i roto i te faaapu a to‘u metua tane, ua rave rahi roa ïa te reira i roto i to‘u mau taime i piha‘iho i to‘u mau hoa.

« I roto i teie pu‘e tau mahanahana taa ê, te hoê o ta‘u mau ohipa o te hi‘opo‘araa ïa e, aita anei te mau puatoro i ni‘a i te mou‘a i vavahi i te aua e a haere atu ai i roto i te faaapu titona. Ia amu ana‘e te puatoro i te mau titona apî, e nehenehe oia e oru, e piri te hutiraa aho e pohe atu ai. Te vai ra hoê puatoro e tamata noa oia i te patia i to’na upoo i roto i te aua. I te hoê po‘ipo‘i, a faahoro ai au i ta‘u puahorofenua na te hiti aua no te hi‘opo‘a i te nana, ua ite a‘e ra vau e, ua vavahi te reira puatoro i te aua e ua haere i roto i te faaapu titona. Ua ri‘ari‘a vau, e ua taa a‘e ra ia‘u e, ua amu noa oia i te maa titona no te tahi tau taime te maoro no te mea ua oru a‘e na oia mai te hoê opupu te huru. Feruri a‘e ra vau e, ‘e puatoro maamaa teie ! Teie aua, no te paruru ïa ia oe, ua vavahihia râ e oe, e ua rahi roa ta oe titona i amu, e fifi oe i teie nei.’

« Ua horo atu ra vau i te fare faaapu no te haere e tii i to‘u papa. Tera râ, i to maua ho‘iraa’tu, ua ite atu ra vau ia’na te tarava noa ra i ni‘a i te repo, ua pohe. Ua oto roa vau no taua puatoro i mo‘e ra. Ua faataa matou i te hoê vahi mou‘a nehenehe no te amu i te aihere e te hoê aua no te faaatea ia’na i te ati o te titona, area râ, ua vavahi oia i te aua ma te maamaa e ua imi i to’na iho pohe.

« A feruri ai au i te ohipa o te aua, ua ite a‘e ra vau e, o te hoê ïa paruru, mai te mau faaueraa e te mau ture a to‘u na metua tei riro atoa ei paruru. Ua riro te mau faaueraa e te mau ture ei maitai no‘u iho. Ua ite a‘e ra vau e, ia haapa‘o ana‘e au i te mau faaueraa, e nehenehe te reira e faaora ia‘u i te pohe tino e i te pohe varua. Ua riro taua iteraa ra ei taime faufaa rahi no‘u i roto i to‘u oraraa ».

Ua haapii mai te tuahine Arnold e, ua horo‘a mai to tatou Metua here, maitai e te paari i te Ao ra ia tatou i te mau faaueraa – eiaha no te haavî ia tatou, mai te diabolo e hinaaro nei ia ti‘aturi tatou – no te haamaitai râ i to tatou oraraa e no te paruru i to tatou i‘oa maitai e ta tatou faufaa ai‘a no ta tatou mau huaai tamarii amuri a‘e, mai tei na reirahia ia Lehi e o Nephi. Mai te puatoro tei farii i te mau hopearaa o ta’na ma‘itiraa, e mea ti‘a atoa ia tatou tata‘itahi ia ite e, aita te aihere i ô mai i te aua i hau atu i te matie – aita roa’tu no te mea, « e ere roa te parau ino i te oaoa ».⁸ E farii tatou tata‘itahi i te mau hopearaa o ta tatou mau ma‘itiraa ia hope ana‘e teie oraraa. E mea maramarama maitai te mau faaueraa, e paruru te reira, eita ra e haavî, e aita e hopearaa to te mau haamaitairaa nehenehe o te haapa‘o !

Ua ite to tatou Metua i te Ao ra e, e hape tatou paatoa. E oaoa rahi to‘u no te Taraehara, e ti‘a ai ho‘i ia tatou tata‘itahi ia tatarahapa, e rave i te mau faatiti‘aifaroraa e titauhia ia ti‘a ho‘i ia tatou ia parahi faahou i piha‘iho i to tatou Faaora, e ia ite i te hau marû o te faaoreraa hara.

Te ani mai nei to tatou Faaora ia tatou i te mau mahana atoa ia tamâ i to tatou i‘oa e ia ho‘i i mua i To’na aro. Ua î Ta’na faaitoitoraa i te here e te marû. A apiti mai na ia‘u no te hi‘o i te here o te Faaora a tai‘o ai au i teie mau parau Ta’na, « e ore anei outou e fariu mai ia‘u i teie nei, e tatarahapa ho‘i i ta outou mau hara, e e faaroo mai, ia faaorahia outou e au ra ?⁹

I teie mahana te hinaaro nei au e faatae atoa’tu ia outou tata‘itahi i teie titauraa a to‘u na metua, i faatae mai ia‘u nei, o te haamana‘ohia ho‘i e amuri noa’tu no to raua i‘oa maitai. Hou a rave ai outou i te hoê mea, a feruri e, te ti‘a noa ra te Faaora i piha‘iho ia outou e a ui ia outou iho e, « e feruri anei oe, e parau anei oe, e aore râ, e rave anei oe, ma te ite e, tei reira Oia ? » No te mea, tei reira mau Oia. E mea pinepine to tatou peresideni here o Monson, e o ta‘u e faaite papû nei e, e peropheta oia, i te faahiti i teie irava o te papa‘iraa mo‘a ia parau ana‘e oia no ni‘a i to tatou Fatu e Faaora : « No te mea e haere au na mua i to outou mata. E vai ho‘i au i to outou pae atau e i to outou pae aui, e ei roto ho‘i to‘u Varua i to outou mau aau ».¹⁰

Ia tae i taua mahana hanahana ra, a ti‘a ai tatou i mua i to tatou Faaora here no te faaite i te ohipa ta tatou i rave i To’na ra i‘oa, e ti‘a anei ia tatou ia parau e, « i tô na vau i te tôraa maitai, ua oti to‘u hororaa, i mau maite na vau i te parau ».¹¹ « Ua faatura vau i to Oe i‘oa ». Te faaite papû nei au e o Iesu te Mesia. Ua pohe Oia ia ora tatou. Na roto i te i‘oa o Iesu Mesia ra, amene.