Pe a Tatou Taumavae

Ou uso e ma tuafafine, ua tumu lo’u loto a o tatou oo mai i le faaiuga o lenei konafesi. Sa tatou matua lagonaina le liligi mai o le Agaga o le Alii. E momoli atu la’u faafetai tele faapea foi tagata o le Ekalesia i soo se mea, ia i latou uma sa auai i lona faatinoina, e aofia ai i latou sa fofogaina tatalo. Ia tatou manatua pea lava pea ia savali sa tatou faalogo i ai. Pe a tatou mauaina lomiga o le Ensign ma le Liahona, lea o le a lolomiina ai nei savali, ia tatou faitau ma suesue i ai.

Ou te toe faapea atu, sa matagofie musika i sauniga uma. E momoli atu la’u lava faafetai ia i latou sa naunau e faasoa mai ia i tatou a latou taleni, ua pa’i mai ai ma musuia i tatou i lona faagasologa.

Sa tatou lagolagoina, e ala i le siilima, ia uso sa tofia i tofiga fou i lenei konafesi. Matou te mananao ia latou silafia, ua matou sagisagi atu e galulue faatasi ma i latou i le galuega a le Alii.

E momoli atu o’u alofaaga ma le agaga talisapaia i o’u fesoasoani pele, Peresitene Henry B. Eyring ma Peresitene Dieter F. Uchtdorf. O i la’ua o ni tamalii e i ai le tofa loloto ma le malamalama. E taua tele la la’ua tautua. Ou te alofa ma lagolagoina o’u uso o le Korama a Aposetolo e Toasefululua. Latou te galulue ma le mataalia aupito sili, ma ua latou matua tuuto atoatoa i le galuega. Ou te momoli atu foi o’u alofaaga i uso o Fitugafulu ma le Au Epikopo Pulefaamalumalu.

Tatou te feagai ma le tele o luitau i le lalolagi i nei ona po, ae ou te faamautinoa atu ia te outou e silafia e lo tatou Tama Faalelagi i tatou. E alofa o Ia ia i tatou taitoatasi ma o le a faamanuiaina i tatou pe a tatou saili atu ia te Ia e ala i le tatalo ma le taumafai e tausi Ana poloaiga.

O i tatou o se ekalesia ua aofia ai le lalolagi. Ua i ai o tatou tagata auai i le lalolagi atoa. Ia avea i tatou o ni tagatanuu lelei o atunuu o loo tatou ola ai, o ni tuaoi lelei i o tatou nuu, aapa atu ia i latou o isi faatuatuaga faapea foi i latou o lo tatou faatuatuaga. Ia avea i tatou ma faataitaiga o le faamaoni ma le amiosa’o i soo se mea lava tatou te o i ai, ma soo se mea tatou te faia.

Faafetai atu mo a outou tatalo mo a’u, uso e ma tuafafine, faapea foi mo le Au Pulega Aoao o le Ekalesia. E matua o’oo’o lo matou agaga faafetai mo outou, ma mo mea uma o loo outou faia e faalautele ai le galuega a le Alii.

Pe a outou taliu atu i o outou aiga, ia taliu atu ma le saogalemu. Ia i ai faamanuiaga a le lagi i o outou luga.

Ia, ae tatou te lei tuua i le aso, ou te fia faasoa atu lo’u alofa mo le Faaola ma Lana taulaga togiola mo i tatou. Toe tolu vaiaso, ona faamanatuina lea e le lalolagi Kerisiano atoa le Eseta. Ou te talitonu e leai se tasi o i tatou e mafai ona malamalama i le taua o le mea sa faia e Keriso mo i tatou i Ketesemane, ae ou te faafetai i aso taitasi o lo’u ola mo Lana taulaga togiola mo i tatou.

I le toe taimi lava, semanu e mafai lava ona Ia toe fo’i. Ae sa le’i foi o Ia. Sa ia o’o atu i le taele o mea uma ina ia mafai ai ona Ia faasaoina mea uma. O le faia o lena, sa Ia ofoina mai ai mo i tatou le ola i talaatu o le olaga faitino. Sa Ia toe aumaia i tatou mai le Pau o Atamu.

E oo ifo o le lualoto o lo’u lava agaga, ou te matua faafetai ia te Ia. Sa Ia aoaoina i tatou i le ala e ola ai. Sa Ia aoaoina i tatou i le ala e oti ai. Sa ia faamautinoaina lo tatou faaolataga.

I le faaiuga, se’i ou faasoa atu lava ia upu faamomoiloto na tusia e Emily Harris, o loo matua faamatalaina ai o’u lagona a o fotuai mai le Eseta:

Ia outou manuia, o’u uso e ma tuafafine. I le suafa o Iesu Keriso, lo tatou Faaola, amene.