2010–2019
I te Taa-ê-raa
Eperera 2011


I te Taa-ê-raa

Te ti‘aturi nei au e, aore hoê o tatou e nehenehe e feruri i te faufaa rahi o te ohipa ta te Mesia i rave no tatou i Getesemane, tera râ, te mauruuru nei au i te mau mahana atoa o to’u oraraa no Ta’na tusia taraehara.

E au mau taea‘e e au mau tuahine, te oaoa nei to’u aau i te hopea o teie amuiraa. Ua ite a‘e nei tatou i te niniiraa rahi o te Varua. Te faaite atu nei au i to’u mauruuru e i te mauruuru o te mau melo o te Ekalesia i te mau fenua atoa, i te mau taata atoa tei ohipa mai, tae roa’tu i te feia tei horo‘a i te mau pure. E mata na tatou i te haamana‘o maite i te mau parau poro‘i ta tatou i faaroo a‘e nei. Ia farii ana‘e tatou i te ve‘a Ensign e te Liahona tei roto teie mau parau poro‘i te papa‘i-raa-hia, e mata na tatou i te tai‘o e i te tuatapapa i te reira.

E mea nehenehe mau â te mau himene i roto i te mau tuhaa pureraa atoa. Te faaite nei au i to’u iho mauruuru i te mau taata tei farii ia faaite mai ia tatou i to ratou mau taleni, tei haaputapû e tei faauru ia tatou i roto i teie amuiraa.

Ua paturu a‘e nei tatou, na roto i te afa‘iraa i te rima i ni‘a, i te mau taea‘e tei piihia i ni‘a i te mau ti‘araa apî i roto i teie amuiraa. Te hinaaro nei matou ia ite ratou e, te oaoa nei matou ia rave i te ohipa e o ratou i roto i te ohipa a te Fatu.

Te faatae nei au i to’u here e to’u mauruuru i to’u na tauturu itoito, te peresideni Henry B. Eyring e te peresideni Dieter F. Uchtdorf. E na taata paari teie e te haroaroa. Aita e nehenehe e parau te faufaa o ta raua ohipa. Te here nei au e te paturu nei au i to’u mau taea‘e no te Pŭpŭ no te Tino Ahuru Ma Piti Aposetolo. E mea maitai ta ratou ohipa, e ua horo‘a hope roa ratou ia ratou i roto i te ohipa. Te faatae atoa nei au i to’u here i te mau melo o te Hitu Ahuru e i te Episekoporaa Faatere Rahi.

Te farerei nei tatou i te mau fifi e rave rahi i roto i te ao nei i teie mahana, tera râ, te haapapû atu nei au ia outou e, te ara mai nei to tatou Metua i te Ao ra i ni‘a ia tatou. Ua here Oia ia tatou tata‘itahi, e e haamaitai Oia ia tatou mai te mea e, e imi tatou Ia’na na roto i te pure e e faaitoito tatou i te haapa‘oraa i Ta’na mau faaueraa.

E Ekalesia no te ao atoa nei ta tatou. Te itehia nei to tatou mau melo na te ao atoa nei. E mata na tatou i te riro ei mau taata ai‘a maitai i roto i te mau fenua ta tatou e ora nei, e ei mau taata tupu maitai i roto i to tatou mau oire, ma te tauturu i te mau taata no te tahi atu faaroo e no to tatou iho faaroo. E mata na tatou i te faaite i te hi‘oraa maitai no te haavare ore e te parau-ti‘a i te mau vahi atoa ta tatou e haere e i roto i te mau ohipa atoa ta tatou e rave.

Mauruuru no ta outou mau pure no’u, e no te mau taea‘e e te mau tuahine, e no te mau Hui Mana Faatere Rahi atoa o te Ekalesia. E mauruuru rahi to matou ia outou e no te mau mea atoa ta outou e rave nei no te faahaere i te ohipa a te Fatu i mua.

A ho‘i ai outou i to outou mau ti‘ahapa, a ho‘i ana‘e ma te hau. Ia vai mai te mau haamaitai to te ra‘i i ni‘a ia outou.

I teie nei, hou a ho‘i ai tatou i teie mahana, te hinaaro nei au e faaite atu ia outou i to’u here i to tatou Faaora e i Ta’na tusia taraehara rahi no tatou. I roto e toru hepetoma i muri nei, e faahanahana te ao Keteretiano taatoa i te Pasa. Te ti‘aturi nei au e, aore hoê o tatou e nehenehe e feruri i te faufaa rahi o te ohipa ta te Mesia i rave no tatou i Getesemane, tera râ, te mauruuru nei au i te mau mahana atoa o to’u oraraa no Ta’na tusia taraehara no tatou.

Tae roa’tu i te taime hopea, e nehenehe â Ta’na e otohe. Aita râ oia i na reira. Ua pou râ Oia i raro a‘e i te mau mea atoa ra ia ti‘a Ia’na ia faaora i te mau mea atoa ra. Ua horo’a mai Oia i te ora ia tatou nei i muri a‘e i teie oraraa tahuti. Ua faaora oia ia tatou i te Hi‘araa o Adamu.

Te mauruuru nei au Ia’na i roto roa i te păpă o to’u aau. Ua haapii mai Oia ia tatou nahea ia ora. Ua haapii mai oia ia tatou nahea ia pohe. Ua paruru oia i to tatou faaoraraa.

No te opaniraa, te hinaaro nei au e faaite atu ia outou i te tahi mau parau nehenehe tei papa‘ihia e Emily Harris, o te tatara nei i to’u mau mana‘o, i te taime a fâ mai ai te Pasa.

Te ahu vehi i tape‘a na Ia’na, aore ïa e ohipa to roto.

Te vai noa ra,

Ma te apî e te uouo e te mâ.

Ua matara noa te uputa.

Ua huri-ê-hia te ofa‘i,

Fatata e nehenehe ta’u e faaroo i te mau melahi ia arue Ia’na.

Eita Oia e mau i te ahu vehi

Eita Oia e mau i te ofa‘i.

E vevo te mau parau na roto i te piha araea aore e ohipa i roto,

« Aore Oia i ô nei ».

Te ahu vehi i tape‘a na Ia’na, teie ïa aore hoê ohipa i roto.

Te vai noa ra,

Ma te apî e te uouo e te mâ

Aue, haleluia, aore e ohipa i roto.1

E ia outou na te mau haamaitaitairaa e te mau taea‘e e te mau tuahine. Na roto i te i‘oa mo‘a o Iesu Mesia, to tatou Faaora, amene.

  1. Emily Harris, « Empty Linen », New Era, Eperera 2011, 49.