Yaco Me Vaka e Dua na Gone Lailai

E vakauti ira mai ki vuravura oqo na Luvena tagane kei na yalewa vakayalo, na Tamada Vakalomalagi, ena Nona vuku cecere kei na loloma. Era lako mai vaka isolisoli vakamareqeti ki na veimatavuvale vata kei na ivakarau kei na ilesilesi vakalou. E kila tu na Tamada Vakalomalagi ni o ira na gonelalai era iyaragi ni veivuke vei keda me da yaco meda ucui Koya. E rawa ni da vulica e levu sara na ka mai vei ira na gonelalai.

Na ivakadinadina ni dina bibi oqo a vakaraitaki ena vica na yabaki sa oti ena nona ilesilesi ki Hong Kong e dua na lewe ni Vitusagavulu. A sikova kina e dua na tabanalevu dravudravua ka vakaleqai tu ena vuqa na sala, ka ra sega ni rawa me vakarautaka na veika era gadreva vakataki ira. Ena nona vakamacalataka na bisopi na kedra ituvaki, a vakila na Vakaitutu Raraba na ivakaraitaki me ra sauma na lewenilotu na nodra ikatini. Ena nona sa kila tiko o bisopi, na leqa era sotava tiko, e sa lomaleqataka se me ra na vakayacora vakacava na ivakasala oqori. A vakasamataka tiko ka sa lewa me lai vosa mada yani kivei ira eso na lewenilotu yalodina sara vakalevu ena nona tabanalevu ka kerei ira me ra sauma na nodra ikatini. A lako ki na Lalai ena Sigatabu ka tarava.A vakavulici ira na gonelalai me baleta na lawa ni ikatini ni Turaga ka kerea ke rawa me ra na sauma na nodra ikatini mai na ilavo era rawata. Era kaya na gonelalai ni na vakakina. Ka ra cakava sara.

E muri a qai lako o bisopi kivei ira na itaba qase cake ena tabanalevu ka wasea vata kei ira ni o ira na nodra gonelalai yalodina era sa sauma tiko na nodra ikatini ena loma ni ono na vula sa oti. A taroga se na rawa me ra muria na nodra ivakaraitaki na gonelalai oqo ka vakayacora vaka kina. E tarai ira sara ga na nodra solibula na gonelalai ka lomadra me ra cakava na ka kece era rawata me ra sauma na nodra ikatini. Ka ra sa tadola na katuba kei lomalagi. Ena nodra ivakaraitaki na gonelalai yalodina oqo, a tubu cake sara kina na tabanalevu ena talairawarawa kei na ivakadinadina.

A vakavulica sara ga vei keda o Jisu Karisito Vakaikoya meda dau raici ira vakaivakaraitaki na gonelalai. E volai ena Veiyalayalati Vou na isau ni Nona taro ena nodra veiletitaka na Nona iApositolo se o cei e dodonu me cecere duadua ena matanitu mai lomalagi. A sauma na nodra taro o Jisu ena dua na lesoni lailai ia e ivakavuvuli kaukauwa sara. A kaciva mai e dua na gone ka vakatikora ena kedra maliwa ka kaya:

“Kevaka dou sa sega ni saumaki mai, ka yaco me vaka na gone lailai, dou na sega sara ni curu ki na matanitu vakalomalagi.

“Ia ko koya yadua sa vakamalumalumutaki koya me vaka na gone lailai oqo, ko koya ga sa levu cake ena matanitu vakalomalagi” (“Maciu 18:3–4).

Na cava e dodonu meda vulica mai vei ira na gonelalai? Na itagede cava e tu vei ira kei na ivakaraitaki cava era vakaraitaka ni rawa me vukea noda vakatorocaketaki vakayalo?

O ira na luve ni Kalou vakamareqeti oqo era lako mai vei keda ena yalo ni veivakabauti. Era vakasinaiti ena vakabauta ka dau ciqoma vakarawarawa na Yalotabu. Era dau ivakaraitaki ni yaloraramusumusu, talairawarawa, kei na loloma. E vakawasoma ni ra dau imatai me ra loloma ka imatai me ra veivosoti.

Meu wasea mada eso na veika e sotavi ena ivakarau e rawa ni ra vakalougatataka kina na noda bula o ira na gonelalai ena nodra sega ni cala ka ivakaraitaki kaukauwa ena ituvaki va-Karisito.

Ena dua na gauna lekaleka sa oti rau a lako vata kei tinana, o Todd, e dua na cauravou lailai se qai yabaki rua ki na dua na vale ni maroroi yaya makawa ni droini ka vakaraitaki tiko kina e dua na droini totoka kilai tani ni iVakabula. Ena nodrau lako sivita na ivakatakarakara vakamareqeti oqo, a rogoci nona gonetagane lailai ni kaya tiko ena vakarokoroko na yaca “Jisu.” A rai sobu ka raica ni roqota tu na ligana ka cuva sobu ena nona raica tiko na droini. E rawa beka ni da vulica mai vei Todd eso na ka me baleta na ivakarau ni yaloraramusumusu, ni vakarokoroko, kei na loloma me baleta na Turaga?

Ena vulaimago sa oti, au a raica na ivakaraitaki ni dua na gonetagane yabaki 10 mai Armenia. Ni keitou waraka tiko me tekivu na soqoni ni sakaramede, a raica nona yaco mai na lewenilotu qase duadua ena tabana. A lako vakatotolo yani vua, dodoka yani na ligana me vakataudeitaka na tataivatia ni nona cavuikalawa. A kauti koya sara ki na iyatu dabedabe ni valenilotu iliu me rawarawa kina nona vakarorogo. E rawa beka ni da vuli mai na nona cakacaka lailai ni loloma ni o ira era cecere sara ena matanitu ni Turaga sai ira era vakasaqara na madigi me ra vukei ira kina na tani?

O Katie, e dua na goneyalewa yabaki ni bula ni Lalai, e vakavulici keda ena noda raica na nona veivakauqeti ena nona matavuvale. A tiko ena Lalai ka vakayarayarataki ki na ivakavuvuli ni kosipeli. Ena tubu cake ni nona vakabauta kei na ivakadinadina, a biuta koto e dua na ivola o Katie ena nodrau ilokoloko na nona itubutubu. A vola kina ni sa “tu e lomana na kosipeli.” A wasea na nona gagadre kaukauwa me voleka vei Tamana Vakalomalagi, me dau talairawarawa ki na Nona ivakaro, ka vauci na nodratou matavuvale ena valetabu. Na ivakadinadina rawarawa ni luvedrau goneyalewa totoka oqo a tara vakaukauwa sara na lomadrau na nona itubutubu. Eratou a ciqoma o Katie kei na nona matavuvale na cakacaka tabu vakamareqeti ni vauci tawamudu e valetabu. Na yalo ni veivakadinati i Katie kei na ivakaraitaki ni vakabauta a vukea na kena kau mai ki na nona matavuvale na veivakalougatataki tawamudu. E rawa beka me liutaki keda na nona ivakadinadina dina kei na nona gadreva me muria na nona ituvatuva na Turaga me da raica vakamatata sara kina na veika e bibi duadua?

Keitou vuli tiko mai vakamatavuvale vua e dua na wekai keitou voleka, yabaki ono, o Liam. Na yabaki sa oti a tauvi koya e dua na kenisa ni mona e ca vakalevu sara. Ni oti e rua na veisele dredre, sa lewai ni na yaga me vakayagataki talega na misini ni veivakatakatari. Ena gauna ni veivakatakatari oqo, sa gadrevi vei koya me tiko duadua ga ka davo tu vakadua. A sega ni vinakata o Liam me vakamoceri baleta ni sega ni taleitaka na ka e dau yaco kina vua. A vakadeitaka ni kevaka e rawa wale ga me rogoca na domoi tamana ena biaulivaliva, sa rawa vua me davo tu ga vakadua ka kakua ni vakamoceri.

Ena gauna ni nuiqawaqawa oqo, e dau cavuta vua o tamana na veimalanivosa ni veivakayaloqaqataki kei na loloma. “I Liam, e dina o sega ni raici au rawa, au tu sara ga qo. Au kila ni rawa mo cakava. Au lomani iko.” A rawata vakavinaka o Liam e 33 na veiqaravi ena misini ni veivakatakatari ena nona tu vakadua tu, e dua na ka ratou vakasamataka na nona vuniwai ni na sega ni vakayacora rawa e dua na gonelailai vakataki koya ke sega ni vakamoceri. Ena loma ni vica na vula ni mosi kei na dredre, a ivakaraitaki qaqa ni kena sotavi na dredre ena inuinui kei na marau sara mada ga na iserau ni mamarau kei na vakanuinui nei Liam. O ira na nona vuniwai, nasi, kei na so tale ka sega ni wili rawa era a vakauqeti mai na nona yaloqaqa.

Eda sa vulica kece tiko mai vei Liam na veilesoni bibi—na veilesoni me baleta na digidigi ni vakabauta kei na vakanuinui vua na Turaga. Me vakataki Liam ga, e sega ni rawa me da raica na Tamada Vakalomalagi, ia e rawa me da rogoca na Domona me solia vei keda na kaukauwa eda gadreva me da vosota kina na veibolebole ni bula.

E rawa beka ni vukei keda na ivakaraitaki nei Liam me da kila vakavinaka cake na vosa nei Penijamini na Tui meda vaka na gonelailai —talairawarawa, yalomalua, yalomalumalumu, dauvosota, ka dauloloma? (Raica na Mosaia 3:19).

O ira na gonelalai oqo era sa ivakaraitaki ni so na itovo yaga vagone e gadrevi meda vakatorocaketaka se raici keda lesu tale me rawa kina meda curu ena matanitu mai lomalagi. Era sa yalosavasava ka se sega ni tauvi ira na duka ni veika vakavuravura—ka ra sa vakavulici rawarawa ka sinai ena vakabauta. Sa rauta me dau duatani na nona lomani ira ka vakavinavinakataki ira na gonelalai na iVakabula.

Ena maliwa ni veika lelevu sega ni vakaiyalayala mai na nona a veisiko na i Vakabula ki Amerika, e dua tani tu ga na Nona veiqaravi malumu vei ira na gonelalai. Ena gaunisala malumu a toso yani kina o Koya kivei ira vakayadua na gone.

“A sa keveti ira yadua na gone lalai ka vakalougatataki ira ka masulaki ira vei Tamana.

“A sa tagi ni sa vakalougatataki ira oti. …

“Sa qai vosa vei ira na lewe vuqa ka kaya: Dou raici ira na nomudou lalai (3 Nifai 17:21–23).

E vakavulica vei keda o Elder M. Russell Ballard na kena bibi na ivakasala ni iVakabula mo “dou raici ira nomudou lalai” ena nona kaya, “Raica ni sega ni kaya o Koya ‘raikiviti ira’ se ‘raici ira rawa ga’ se ‘vagauna nomu raica nodra ilakolako.’ Kaya o koya dou raici ira na nomudou lalai.’ E kaya o koya dou raiciira. Kena ibalebale vei au o ya ni dodonu meda mokoti ira vata kei na matada kei na lomada; e dodonu meda raica ka vakavinavinakataki ira me vaka ni sai ira o ya: na luvena vakayalo na Tamada Vakalomalagi ka ra ivakarau vakalou” (“Behold Your Little Ones,” Tambuli, Oct. 1994, 40; vakamatatataki).

E sega tale ni dua na vanua e vinaka cake meda raici ira kina na noda lalai me vaka ena noda matavuvale. Na vuvale sa ikoya na vanua e rawa meda vuli taucoko kina ka tubu vata kece. E dua na noda sere totoka ni Lalai e vakavuvulitaka na dina oqo:

Ena noda matavuvale sara ga, ena ituvaki ni loloma, na vanua eda raica ka vakavinavinakataka vakaikeda na nodra ivakarau vakalou na Luvena vakayalo. Ena noda matavuvale sara ga e rawa me vakamalumalumutaki kina na yaloda ena yaloraramusumusu ka da gadreva meda veisau, me vakataki ira na gonelalai. Sa ikoya na sala me rawa kina ni da ucuya na Karisito.

Sa kauta tani beka vei iko eso na yalo vakabauta kei na vakabauta vagone a dau tu voli vei iko eso na ka o sotava ena nomu bula? Kevaka e vakakina, raici ira mada na gone ena nomu bula. Ka qai raica tale. O ira beka na gone ga ni matavuvale, mai na tai ni sala kadua, se ena Lalai ni nomudou tabanalevu. Kevaka e tiko vei keda na yalo me da vulica kei na lomasoli me da muria na nodra ivakaraitaki na gonelalai, ena rawa ni kune mai na nodra itovo ni bula vakalou na idola me dolavi kina na tubu ena noda bula vakayalo.

Au na dau marautaka tu ga na veivakalougatataki ni luvequ. Sa vakavulici au ena lesoni au gadreva mai na nodra ivakaraitaki yadua. Era sa vukei au meu veisau ki na vinaka cake.

Au wasea noqu ivakadinadina malumalumu ka tudei ni o Jisu na Karisito. Sai koya na Luvena sa taucoko—ka sa talairawarawa, yalomalua, yalomalumalumu, dauvosota, ka sinai vutuvutu ena loloma. Me tu vei keda vakayadua na yalo me da muria na Nona ivakaraitaki, me da yaco me vaka e dua na gonelailai, ka yaco sara meda lesu ki na noda vuvale vakalomalagi, sa noqu masu ena yaca i Jisu Karisito, emeni.