Avea e Faapei o se Tama Itiiti

I le poto tele ma le alofa o lo tatou Tama i le Lagi, ua Ia auina mai ai Ona atalii ma afafine agaga i lenei lalolagi, o ni tamaiti. Latou te o mai i aiga o ni meaalofa taua ua i ai se natura ma se taunuuga paia. Ua silafia e lo tatou Tama Faalelagi o tamaiti o se ki lea e fesoasoani ia tatou avea e faapei o Ia. E tele naua mea e mafai ona tatou aoao mai taimaiti.

Na molimauina lenei upumoni taua i ni nai tausaga ua mavae, a o malaga atu se Fitugafulu i se tofiga i Hong Kong. Sa asiasi atu o ia i se uarota faatauvaa sa tele mea na latou tauivi, sa le mafai ona taulimaina ona lava manaoga. A o faamatala e le epikopo lo latou tulaga, sa lagona e le Pulega Aoao se uunaiga e tatau i tagata o le au paia ona totogi a latou sefuluai. Sa popole le epikopo pe o le a faapefea ona latou faatinoina lena fautuaga, aua sa ia silafia le ogaoga o lo latou tulaga. Sa ia mafaufau i ai ma sa tonu ai o le a ia talanoa atu i ni tagata e sili ona faatuatua o le latou uarota, e totogi a latou sefuluai. O le Aso Sa na sosoo ai, na alu ai o ia i le Peraimeri. Sa ia aoaoina tamaiti e uiga i le tulafono a le Alii i le sefuluai ma fesili pe mata o le a latou naunau e totogi le sefuluai i tupe latou te maua. Sa fai mai tamaiti e mafai. Ma sa latou faia.

Sa mulimuli ane ona alu lea o le epikopo i tagata matutua o le uarota, ma faamatala atu i ai, o masina e ono ua mavae, sa totogiina ai lava e a latou fanau faatuatua a latou sefuluai. Sa fesili o ia pe mata o le a latou naunau e mulimuli i le faataitaiga a nei tamaiti ma faia foi le mea lea. Sa ootia loto o tagata i osigataulaga sa naunau tamaiti e fai ma sa latou faia le mea e tatau ona fai ina ia totogi ai a latou sefuluai. Ma sa tatala mai pupuni o le lagi. O le faataitaiga a nei tamaiti faamaoni, na oo ina ola ai se uarota i le usiusitai ma molimau.

O Iesu Keriso lava Ia na aoao mai i tatou e vaavaai i tamaiti e fai ma faataitaiga. O loo tusia i le Feagaiga Fou Lana tali ina ua fefinauai Ana Aposetolo po o ai e tatau ona sili i le malo o le lagi. Na tali e Iesu la latou fesili i se lesona faatino laitiiti ae mamana. Na ia aumaia se tamaitiiti ia te Ia ma faatu i o latou luma ma faapea atu:

“A le liua outou ma avea ia pei o tama iti, tou te le sao lava i le malo o le lagi.

“O lenei o sē faamaulalo o ia ia te ia e pei o le tamaitiiti nei, e sili lea i le malo o le lagi” (Mataio 18:3–4).

O le a la le mea e tatau ona tatou aoao mai tamaiti? O a uiga auau mama o ia i latou a o a foi faataitaiga latou te faia e mafai ona fesoasoani i lo tatou lava atinaega faaleagaga?

E o mai nei fanau faapelepele a le Atua ia i tatou ma loto e talitonu. E tutumu i latou i le faatuatua ma le gauai i lagona o le Agaga. Latou te faataitai maia le lotomaulalo, usitai, ma le alofa. E tele lava o i latou e muamua alolofa, ma e muamua foi maua le loto faamagalo.

Se’i ou faamatala atu ni nai aafiaga i auala e mafai ona faamanuiaina ai e le fanau o tatou olaga i a latou faataitaiga lotomama ae mamana o uiga e faapei o Keriso.

O Todd, o se tamaitiiti e na o le lua tausaga le matua, na o talu ai nei ma lona tina i se falemataaga o faatufugaga sa faia se faaaliga faapitoa o atavali mananaia o le Faaola. A o la savavali atu i nei ata paia, sa lagona atu e le tina le ta’uina ma le faaaloalo e le tamaitiiti le igoa “Iesu.” Sa tilotilo ifo i lalo ua piilima le tamaitiiti ma punou lona ulu, a o matamata i le ata. Pe mafai ona tatou aoao maia se mea ia Todd e uiga i le uiga faaalia o le lotomaulalo, o le migao, ma le alofa i le Alii?

O le tautoulu talu ai, sa ou matauina se faataitaiga a se tamaitiiti e 10 tausaga le matua i Aremania. A o matou faatalitali i le amataina o le sauniga faamanatuga, sa ia matauina le taunuu mai o le tagata aupito matua o le paranesi. O ia le tagata na vave ona savali atu i ona autafa, ma tuu atu lona lima e fesoasoani ai i ana la’a tautevateva. Na ia aveina le olomatua i le nofoa pito i luma o le falesa, e mafai ai ona ia lagona mea. Pe mafai e lenei taga laitiiti o le agalelei ona aoaoina ai i tatou, o i latou e silisili i le malo o le Alii o i latou ia e vaavaai mo avanoa e auauna atu ai i isi?

O Katie, o se teineitiiti o le Peraimeri, sa ia aoaoina i tatou a o tatou vaaia lana uunaiga i lona aiga. Sa i ai o ia i le Peraimeri ma sa tosina atu i aoaoga o le talalelei. O le faatupulaia o lona faatuatua ma lana molimau, na ia tuua ai se tusi i luga o aluga o ona matua. Sa ia tusia e faapea, ua maua e upumoni o le talalelei se “fale i lona loto.” Sa ia faamatala lona naunau ia latalata i lona Tama Faalelagi, ia usiusitai i Ana poloaiga, ma ia faamauina lo latou aiga i le malumalu. O le molimau faigofie ma le manaia a lo la afafine, sa ootia ai loto o ona matua i se ala e ese le mamana. Sa maua e Katie ma lona aiga ia sauniga paia o le malumalu ua fusia faatasi ai e faavavau lo latou aiga. O le loto talitonu o Katie ma le faataitaiga o le faatuatua, ua fesoasoani e aumaia ai faamanuiaga o le faavavau i lona aiga. Pe mafai ona taitaiina i tatou e lana molimau mai le loto ma lona naunau e mulimuli i le fuafuaga a le Alii, ia manino atili ai la tatou vaai i mea e sili ona taua?

Ua aoao mai lo matou aiga mai se tamaitiiti e ono tausaga o lo matou aiga, o Liam. O le tausaga na te’a nei na tauivi ai o ia ma le kanesa faigata o le fai’ai. Ina ua maea ni taotoga faigata se lua, sa tonu ai e manaomia foi le togafitiga e fanasa’o mai ‘ave o le eletise. I le taimi o nei togafitiga uma, sa manaomia ai ona tuua na o ia ma ia matua faasasa’o lelei. Sa lei manao Liam e fai se vaimoe aua sa le manao i ona lagona e maua ai. Sa tonu ia te ia, afai tau lava ina mafai ona ia faalogo i le leo o lona tama i luga o le alaleo, o le a mafai ona ia taoto faasasa’o e aunoa ma se vaimoe.

I nei taimi atuatuvale, sa tautala atu lona tama ia te ia i upu faamalosiau ma le alofa, “Liam, e ui e le mafai ona e vaai mai ia te au, ae o lea ou te i ai ii. Ou te iloa e te mafaia. Ou te alofa ia te oe.” Sa manuia togafitiga e 33 na manaomia a o taoto faasasa’o, o se togafitiga sa manatu ona faomai e le mafai ona faia e aunoa ma le faamoeina ona o lona laitiiti tele. I le tele o masina o le tiga ma faigata, na avea le faamoemoe susulu o Liam ma faataitaiga mamana o le faafetaia’ia o mafatiaga i le faamoemoe ma le fiafia. Na musuia ona fomai, tamaitai tausimai, ma le anoano o isi i lona lototele.

Ua tatou aoaoina uma ni lesona taua mai ia Liam—o lesona e uiga i le filifili o le faatuatua ma faalagolago i le Alii. Faapei o Liam, e le mafai ona tatou vaai i lo tatou Tama Faalelagi, ae e mafai ona tatou faalogoina Lona siufofoga e aumaia ia i tatou le malosi tatou te manaomia e onosaia ai luitau o le olaga.

Pe le mafai ea e le faataitaiga a Liam ona fesoasoani tatou te malamalama atili ai i upu a le Tupu o Peniamina ia avea e faapei o se tamaitiiti—ua fia usiusitai, agamalu, faamaulalo, ma onosai, ma ua tumu i le alofa? (tagai i le Mosaea 3:19).

Ua aumaia e nei tamaiti ni faataitaiga o nisi o uiga auau mama faatamaitiiti e manaomia ona tatou atiina ae pe toe faaolaola ia i tatou lava ina ia mafai ai ona tatou ulu atu i le malo o le lagi. O i latou o agaga susulu e lei pona’ia i le lalolagi—e gauai gofie ma e tumu i le faatuatua. E leitioa ona i ai o le alofa faapitoa o le Faaola ma le talisapaia o fanau iti.

O nisi o mea maoae na tutupu i le asiasiga a le Faaola i Amerika, e tulaga ese lava Lana auaunaga i tamaiti. I se ala faamomoiloto na Ia aapa atu ai i tamaiti taitoatasi.

“Ua ave foi e Ia o latou tamaiti taitoatasi ma faamanuia ia te i latou, ma ua tatalo i le Tama mo i latou.

“Ina ua uma ona fetalai atu o ia i nei upu, ua tagi o ia. …

“Na ia fetalai atu foi i le motu o tagata, ua faapea atu ia te i latou: Vaai ia i o outou tamaiti” (3 Nifae 17:21–23).

Na aoao mai i tatou e Elder M. Russell Ballard i le taua o le apoapoaiga a le Faaola “vaai i o tatou tamaiti” ina ua ia saunoa, “Ia matau e lei fetalai mai o Ia ‘tepa atu ia i latou’ pe ‘na ona vaavaai atu ia i latou’ pe ‘tilotilo ia i latou i nisi taimi i lo latou taitaiga aoao.’ Sa Ia fetalai mai ia faauta ia i latou. Ia te a’u lava ia, o lona uiga o lena mea e tatau ona tatou opogi mai i latou i o tatou mata ma o tatou loto; e tatau ona tatou vaai ma talisapaia i latou i o latou uiga moni: o ni fanau agaga a lo tatou Tama Faalelagi, ua ia i latou ni uiga paia” (“Faauta I A Outou Tamaiti,” Liahona, Oke. 1994, 40; faaopoopo le faamamafa).

E leai se isi nofoaga e sili ona atoatoa e vaai ai o tatou tamaiti nai lo o tatou aiga. O le aiga o se nofoaga lea e mafai ona tatou aoao uma ai e ola faatasi. Ua aoao mai e se tasi o pese matagofie a le Peraimeri nei upumoni:

O iinei lava i o tatou aiga, i se siosiomaga o le alofa, tatou te vaai ai ma talisapaia i se ala patino ia uiga paia faaleatua o Ana fanau agaga. O iinei lava i o tatou aiga e mafai ai ona faamaluluina o tatou loto, ma manaomia ai le lotomaulalo e suia ai, ia avea e faapei o se tamaitiiti. O se faagasologa e mafai ai ona tatou avea atili e faapei o Keriso.

Pe ua i ai ni aafiaga o le olaga ua aveeseina mai ai ia te oe le loto talitonu ma le faatuatua e faapei o se tamaitiiti lea sa ia te oe? Afai o lea, vaavaai solo i tamaiti i lou olaga. Ona toe tilotilo atu lea. Atonu o ni tamaiti i lou aiga, po o le isi ituala, po o le Peraimeri i lau uarota. Afai e i ai so tatou loto e aoao mai ma se naunautaiga e mulimuli i faataitaiga a tamaiti, e mafai e o latou uiga faaleatua ona umia se ki e tatalaina ai lo tatou lava tuputupu a’e faaleagaga.

O le a ou faafetai pea lava pea mo faamanuiaga o la’u lava fanau. O faataitaiga a i latou taitoatasi ua aoaoina ai a’u i lesona ou te manaomia. Ua fesoasoani ou te faia ai suiga mo le mea e sili atu.

Ou te tuuina atu la’u molimau faamaulalo o Iesu o le Keriso. O Ia o le Alo atoatoa e toatasi—ua fia usiusitai, agamalu, lotomaulalo, onosai, ma tumu i le alofa. Ia tofu maua e i tatou uma se loto e mulimuli ai i Lana faataitaiga, ia avea e faapei o se tamaitiiti, ma tatou toe foi atu ai i lo tatou aiga faalelagi, ou te tatalo ai i le suafa o Iesu Keriso, amene.