Piihia ia riro ei feia mo‘a

E au mau taea‘e e au mau tuahine here, te pure nei au ia tauturu mai te Varua Maitai ia’u no te horo‘araa’tu i ta’u parau poro‘i.

I roto i to’u mau tere farerei e te mau tere no te amuiraa i roto i te mau tĭtĭ, te mau paroita e te mau amaa, e oaoa rahi to’u ia farerei au i te mau melo o te Ekalesia, te mau taata o tei piihia i teie mahana mai tei piihia i te afa ti‘a o te mau tau ra, te feia mo‘a. Ua ite au i te varua hau e te here a parahi ai au i rotopu ia ratou, e na te reira i tauturu ia’u ia ite e, tei roto vau i te hoê o te mau tĭtĭ no Ziona.

E rave rahi o ratou no roto mai i te mau utuafare a piti u‘i e aore râ, hau atu, i te riroraa ei melo no te Ekalesia, e rave rahi o ratou e mau melo faafariu-apî-hia ïa. No teie mau melo apî te faahiti faahou atu nei matou i te mau parau manava a te aposetolo Paulo i to Ephesia ra :

« E teie nei, e ere atu ra outou i te taata êê e te purutia, hoê atoa râ to outou oire e te feia mo‘a, e no te fetii o te Atua ;

« I patuhia i ni‘a iho i te niu a te mau aposetolo e te mau peropheta ra, e o Iesu Mesia iho te tihi rahi » (Ephesia 2: 19–20).

Tau matahiti i ma‘iri a‘e nei, te tavini ra vau i roto i te piha toro‘a o te Mau Ohipa Haaparareraa Parau a te Ekalesia i Mehiko, e ua anihia mai matou ia amui atoa’tu i roto i te hoê faanahoraa aparauraa i roto i te ratio. Te fâ no taua aparauraa ra no te tatara ïa e no te tuatapapa i ni‘a i te mau haapa‘oraa e rave rahi i te ao nei. E piti maua tei ma‘itihia ei ti‘a no te Ekalesia no te pahono i te mau uiraa e uihia mai i roto i teie huru faanahonahoraa. I muri iho e rave rahi mau faatianianiraa, mai te au e parau-noa-hia na roto i te ratio, na ô a‘e ra te taata arata‘i i te faanahoraa e : « tei rotopu ia tatou i teie pô e piti na peresibutero no te Ekalesia a Iesu Mesia i te Feia Mo‘a i te Mau Mahana Hopea Nei ». Ua faaearii oia maa taime iti e ua ani maira e, « no te aha teie huru i‘oa roa o te Ekalesia ? Aita ta outou e nehenehe e rave i te tahi i‘oa poto a‘e e aore râ, te tahi i‘oa matarohia ? »

Ua ataata a‘e ra maua o to’u hoa i taua uiraa nehenehe mau, e ua haamata maua i te faataa e, e ere na te taata i ma‘iti i te i‘oa o te Ekalesia. Na te Faaora te reira i horo‘a mai na roto i te hoê peropheta i teie mau mahana hopea nei : « No te mea o teie te i‘oa e topahia i ni‘a i ta’u ekalesia i te mau mahana hopea nei, oia Te Ekalesia a Iesu Mesia i te Feia Mo‘a i te Mau Mahana Hopea Nei » (PH&PF 115:4). Ua pahono oioi maira te taata faatere ma te faatura e, « na reira, e faahiti ïa matou i te reira ma te oaoa rahi ». I teie nei aita vau e haamana‘o ra ehia taime to’na faahitiraa i te i‘oa faahiahia o te Ekalesia, tera râ, ua ite au te varua marû i taua taime ra a tatara ai maua, eiaha i te auraa noa o te i‘oa o te Ekalesia, i te parau atoa râ no te mau melo o te Ekalesia—te feia mo‘a i te mau mahana hopea nei.

Te tai‘o nei tatou i roto i te Faufaa Tahito e, ua piihia te mau melo o te Ekalesia a Iesu Mesia e mau keretetiano no te taime matamua i Anetiohia (a hi‘o Te Ohipa 11:26), tera râ ua pii ratou ia ratou iho e feia mo‘a. Aue ïa to ratou mahanahana ia faaroo i te aposetolo Paulo ia pii mai ia ratou e « hoê atoa râ to outou oire e te feia mo‘a, e no te fetii o te Atua » (Ephesia 2:19), e oia’toa « haapa‘ohia ei feia mo‘a » (Roma 1:6–7; faahauhia te faatomaraa).

E haamo‘ahia te mau melo o te Ekalesia, te tahi vahi iti i ni‘a i te tahi vahi iti, e i te tahi taime, e aita roa e ite-mata-hia ra, ia au i te huru o to ratou oraraa i te evanelia e to ratou haapa‘oraa i te a‘o a te mau peropheta. Te mau melo haehaa o te Ekalesia o te faatupu i te mau mahana atoa i te pure fetii e i te tai‘oraa i te mau papa‘iraa mo‘a, o te rave i te aamu utuafare e o te horo‘a i to ratou taime no te haere pinepine i te hiero, ua riro ratou e feia mo‘a. O ratou ïa o tei faatupu i te mau utuafare mure ore. O ratou atoa ïa o tei faataa i te taime i roto i to ratou oraraa ohipa no te faaora i te feia o tei paruparu i roto i te Ekalesia e ua faaitoito ia ratou ia ho‘i mai e ia parahi faahou i te amuraa maa a te Fatu. O ratou ïa o te mau taea‘e e te mau tuahine orometua, e te mau tane e te mau vahine faaipoipo o te pahono nei i te piiraa ia tavini ei mau misionare na te Fatu. Oia ïa, e au mau taea‘e e au mau tuahine, e riro ratou ei feia mo‘a tei tupu i te rahi e ua itehia ia ratou taua mahanahana ra e taua mana‘o nehenehe ra tei parauhia, e aroha, e aore râ, te here mau o te Mesia (a hio Moroni 7:42–48).

Ua haapii atoa mai te feia mo‘a, e aore râ te mau melo o te Ekalesia ia ite i to tatou Faaora na roto i te mau ati e te mau tamataraa. Eiaha ia mo‘ehia ia tatou e ua mamae atoa Oia no te mau mea atoa. « E e faaoroma‘i oia i to’na poheraa, i tatara’i oia i te mau tape‘a o te pohe i ruuruuhia’i to’na ra mau taata ; e e rave oia i to ratou paruparu i ni‘a ia’na iho ia faaîhia to’na ra aau i te aroha i au i te tino, ia ite oia na roto i te tino i te rave‘a e faaora’i i to’na mau taata i to ratou paruparuaraa ra. (Alama 7:12).

I roto i te mau matahiti e rave rahi i ma‘iri a‘e nei, ua ite mata vau i te mauiui o te mau taata e rave rahi, tae roa’tu i to tatou feia mo‘a e rave rahi. Te pure tamau nei matou no ratou, ma te taparu i te tauturu a te Fatu eiaha to ratou faaroo ia paruparu, e ia haere ratou i mua ma te faaoroma‘i. Te faahiti faahou atu nei matou i teie mau taata i te mau parau tamahanahana a te peropheta Iakoba, i roto i te Buka a Moromona :

« E teie nei, e tau mau taea‘e here e, a haere mai na i te Fatu ra, i Tei Mo‘a. E haamana‘o outou e, ua titi‘aifaro to’na mau haere‘a. Inaha, ua piriha‘o te e‘a no te taata nei, area tei mua ti‘a ia’na, e ua titi‘aifaro ho’i, e te tia’i uputa ra, o Tei Mo‘a ïa i Iseraela nei ; e aore ho’i oia i tarahu i te tavini i reira râ ; e aore ho’i e e‘a ê, maori râ, na taua uputa ra ; e ore oia e vare, no te mea, o te Fatu ra o te Atua to’na i‘oa.

« E o te patoto ra, e iritihia ïa ia’na » (2 Nephi 9:41–42).

E ere te mau huru oraraa, te mau tamataraa e aore râ te mau titauraa e haati nei ia tatou i te mea faufaa roa ; te papû-maitai-raa i te haapiiraa tumu a te Mesia e to’na tusia taraehara, e riro ïa te reira ei tumu no to tatou puai e te hau. Oia ïa, e te mau taea‘e e te mau tuahine, taua hau i roto ra, tei horo‘ahia mai e te varua e o ta te Fatu e horo‘a i te feia mo‘a haapa‘o. Te faaamu nei oia ia tatou i te na-ô-raa e : « E hau ta’u e vaiiho ia outou nei… Eiaha e taiâ to outou aau, eiaha ho‘i e măta‘u » (Ioane 14:27).

I roto i te mau matahiti e rave rahi ua ite mata vau i te haapa‘o o te mau melo o te Ekalesia, feia mo‘a no te mau mahana hopea nei, ma te faaroo i roto i te faanahoraa a to tatou Metua i te Ao ra e i roto i te Taraehara a to tatou Faaora, o Iesu Mesia, inaha, ua upooti‘a ratou i roto i te mau pe‘ape‘a e te mau ati ma te itoito e te oaoa rahi, ma te haere tamau maite noa i ni‘a i te e‘a titi‘aifaro e te piriha‘o o te haamo‘araa. Aita ta’u e parau e au no te faahiti i to’u mauruuru e to’u faahiahia i taua mau feia mo‘a faaroo ra ta’u i farerei !

Noa’tu e, e ere to tatou ite i te evanelia i te mea hohonu roa mai to tatou iteraa papû i te parau mau, tera râ, mai te mea e, e tuu tatou i to tatou ti‘aturiraa i roto i te Fatu, e paturuhia ïa tatou i roto i to tatou mau fifi atoa, to tatou mau tamataraa e to tatou mau ati (a hi‘o Alama 36:3). Aita teie fafauraa ta te Fatu e parau nei e, aita roa’tu tatou e roohia i te mauiui e aore râ, i te mau tamataraa, e paturuhia râ tatou e e ite tatou e, na te Fatu i paturu ia tatou.

E au mau taea‘e e au mau tuahine here, ua haamaitaihia tatou i te amuiraa mai i rotopu i te autaatiraa o te feia mo‘a i te mau mahana hopea nei ! Ua haamaitaihia tatou i te mea e, ua hoê to tatou iteraa papû no ni‘a i te Faaora mai to te mau peropheta i tahito ra e i teie nei tau !

Te faaite papû nei au e, te ora nei to tatou Fatu, Tei Mo‘a i Iseraela, e Na’na e arata‘i nei i Ta’na Ekalesia, te Ekalesia a Iesu Mesia i te Feia Mo‘a i te Mau Mahana Hopea ei, na roto i to tatou peropheta here, o Thomas S. Monson. Na roto i te i‘oa o to tatou Fatu o Iesu Mesia ra, amene.