Manao

Ua ou filifili e talanoa atu e uiga i le taua o le manao. Ou te faamoemoe o le a vaili e i tatou taitoatasi o tatou loto e iloa ai pe o a tonu mea tatou te mananao ai ma pe faapefea foi ona tatou faatulagaina o tatou manaoga e sili ona taua.

E faaleoina e manao mea tatou te faamuamua, e fatuina e mea e faamuamua a tatou filifiliga, ma o filifiliga e iloa ai a tatou amioga. O manao tatou te faatinoina e iloa ai lo tatou suiga, o mea ua tatou ausia ma tagata e avea ai i tatou.

Muamua, ou te talanoa atu i nisi o manao ua taatele. I le avea ai ma tagata soifua, e i ai ni mea faaletino faavae tatou te manaomia. O o tatou manao e faamalie nei tulaga manaomia, e uunaia ai a tatou filifiliga ma fuafua ai a tatou taga e fai. E tolu ni faataitaiga o le a faailoa atu ai le auala i nisi taimi tatou te faasili ai le tasi manao i lo isi manao lea tatou te manatu ua sili atu ona taua.

Muamua, o meaai. E i ai so tatou manao faavae mo meaai, ae mo se taimi o lena manao e mafai ona solipala e se manao malosi atu ia anapogi.

Lona lua, malutaga. A o 12 ou tausaga sa ou teenaina ai se manao mo se malutaga ona o lou manao tele e ausia se mea manaomia a Tama Sikauti ina ia faaalu se po i se togavao. O au o se tasi o tamaiti na tuua le saogalemu o faleie ma maua se ala e fau ai se malutaga ma faia se moega faaanamua mai mea faalenatura na mafai ona matou maua.

Lona tolu, o le moe. E oo foi lava i lenei manao faavae e mafai lava ona solipala lē tumau e se manao e sili atu ona taua. A o avea ma se fitafita talavou i le Puipuiga Faalemalo i Utah, sa ou aoaoina ai se faataitaiga o lenei mea mai se taitai ua i ai le tomai masani i taua.

I uluai masina o le Taua i Korea, sa i ai se vaegaau faaauupegaina mai Richfield i le Puipuiga Faalemalo a Utah, na valaauina i le taua. O lenei vaegaau na taitaia e Kapeteni Ray Cox ma pe tusa ma le 40 alii Mamona sa i ai. Ina ua maea ni aoaoga faaopoopo ma faamalosiauga mai i soo se itu, sa auina atu loa i latou i Korea, lea na latou oo ai i nisi o fetauaiga matautia tele i lena taua. I le tasi o fetauaiga na tatau ai ona latou sosola ese mai se osofaiga tuusao a le faitau selau o le fili o fitafita, o le ituaiga o osofaiga e solipalaina ma faaumatiaina ai isi fanafanua faaauupegaina.

O le a la le mea a lenei taua e fai i le faatoilaloina o le manao e moe? I se tasi o po matautia lava, a o osofai mai pea le fili mai luma ma agai atu i tua i nofoaga o loo i ai ia fanafanua, na ta’i atu e le Kapeteni ia laina telefoni i lona faleie ma faatonuina ana leoleo tuaoi e telefoni patino atu ia te ia i itula uma o le po atoa. O le mea lena na ala ai pea le au leoleo, ae o lona uiga foi na fai ma faalavelave ia Kapeteni Cox i lana malologa. “Na mafai faapefea ona e faia lena mea?” Na ou fesili atu ai ia te ia. O lana tali na faaalia ai le mana o se manao na puleaina.

“Sa ou iloa afai e oo ona matou toe foi atu i le fale o le a ou feiloai atu i matua o na tamaiti i luga o le ala i si o matou taulaga laitiiti, ma ou te le manao e faafesagai ma i latou pe afai e lei toe foi atu i le fale o latou atalii ona o se mea na ou lē faia a o avea ma o latou taitai.”¹

E maeu sea faataitaiga o le mana o se manao e pulea ai mea e faamuamua ma amioga! E maeu sea faataitaiga mamana mo i tatou uma o e nafa ma le manuia o isi, mo matua, matua o matua, ma taitai o le Ekalesia ma faiaoga!

I se faaiuga i lena faataitaiga, i le vaveao ina ua mae’a se po sa le maua ai se moe, na taitai ai e Kapeteni Cox ana fitafita i se fetauaiga ma le fili. Na latou avea faapagota le 800 o fitafita ma e na o le toalua na manunua. Na faamamaluina Cox mo le toa, ma na maua e lana autau fanafanua se Faailoga Faaleiunite a le Peresitene mo lo latou lototoa silisili. Ma e pei foi o le autau taulelea a Helamana (tagai Alema 57:25–26), na latou toe foi uma atu i le fale.²

O le Tusi a Mamona o loo i ai le tele o aoaoga e uiga i le taua o le manao.

Ina ua mae’a le tele o itula o augani atu i le Alii, na ta’u atu ai ia Enosa ua faamagaloina ana agasala. “Ua oo ina tupu [ia te ia] le manao” mo le manuia o ona uso (Enosa 1:9). Na ia tusia: “Ua … uma ona ou tatalo ma galue foi ma le filiga uma, ua fetalai mai le Atua ia te au: Ou te tuuina atu ia te oe e tusa ma ou manao ona o lou faatuatua” (fuaiupu 12). Ia matau mea taua e tolu lea e muamua atu i faamanuiaga folafolaina: manao, galue, ma le faatuatua.

I lenei lauga i le faatuatua, na aoao atu ai e Alema e mafai ona amata le faatuatua “i [se] manao i le fia [talitonu]” pe afai o le a tatou “tuu ia lenei manao e galue i totonu ia te [i tatou]” (Alema 32:27).

O le isi aoaoga maoae e uiga i le manao, aemaise lava i mea e tatau ona avea ma o tatou manao silisili, o loo tupu i le aafiaga o le tupu o sa Lamana lea na aoaoina e le faifeautalai, o Arona. Ina ua fiafia o ia i le aoaoga a Arona, na fesili atu le tupu, “Se a ea se mea ou te faia ina ia fanauina au i la le Atua” ma “maua ai lenei ola faavavau?” (Alema 22:15). Alema 42:15. Na tali atu Arona: “Afai foi ua e manao i lenei mea, … afai e te salamo i au agasala, ma faasifo atu i luma o le Atua, ma valaau atu i lona suafa ma le faatuatua, o loo talitonu o le a e maua ai, ona e maua lea o le mea ua e manao i ai” (fuaiupu 16).

Ona faia lea e le tupu, ma i le tatalo malosi na tautino mai ai, “Ou te lafoaiina au agasala uma ina ia ou iloa ai lau afio … ma ia faaolaina au i le aso gataaga” (fuaiupu 18). Faatasi ai ma lena tautinoga ma lena faailoaga o lona manao silisili, na taliina ai faavavega ana tatalo.

Na i ai i le perofeta o Alema se manao tele e alagaina le salamo i tagata uma, ae na ia malamalama e le tatau ona ia manao i le mana faamalosi o le a manaomiaina aua, na ia faaiu mai e faapea, “[o se] Atua amiotonu … ua tuuina mai e ia i tagata e tusa ma lo latou manao, pe oo i le oti, pe oo i le ola” (Alema 29:4). E faapena foi, i faaaliga o ona po nei na folafola mai ai e le Alii e faapea “o le a [Ia] faamasinoina tagata uma e tusa ma a latou galuega, e tusa ma manaoga o o latou loto” (MFF137:9).

Pe ua tatou saunia moni ea e tuu mai e lo tatou Faamasino e Faavavau le tulaga taua tele i mea tatou te mananao moni ai lava?

E tele mau o loo tautala i mea tatou te mananao ai e tusa ma mea tatou te sailia. “O le vave saili ia te au o le a maua au, ma e le tuulafoaiina” (MFF 88:83). “Ia matua saili atu i meaalofa sili” (MFF 46:8). “O le saili ma le filiga e iloa e ia” (1 Nifae 10:19). “Ia faalatalata mai ia te au ona ou faalatalata atu ai lea ia te outou; ia saili ia te au ma le filiga ona outou maua ai lea o au; ia ole mai ona outou maua ai lea; ia tu’itu’i mai, ona toina ai lea ia te outou” (MFF 88:63).

O le fetuunaia o o tatou manao ina ia tuu atu ai le faamuamua silisili i mea o le faavavau, e le faigofie. O loo faaosoosoina uma lava i tatou ia mananao i mea faalelalolagi e fa, o meatotino, mamalu, faamaualuga, ma le pule. E mafai ona tatou mananao i ai, ae e le tatau ona tatou faatumauina e fai ma mea e aupito sili ona tatou faamuamua.

O i latou e i ai le manao aupito sili ia maua ni meatotino ua pauu atu i mailei o mea faalelalolagi. Ua latou le fia faalogo i le lapataiga: “Aua le saili oloa po o mea le aoga a lenei lalolagi” (Alema 39:14; tagai foi Iakopo 2:18).

O i latou e mananao i le mamalu po o le pule e tatau ona mulimuli i le faataitaiga a le Taitai Au faamaoni o Moronae, o lē e lei auauna atu mo “le mamalu” po o “viiga a le lalolagi” (Alema 60:36).

E faapefea ona tatou atiina ae ia manaoga? E toaitiiti o le a i ai le ituaiga o mala lea na uunaia ai Aron Ralston,³ ae o lona aafiaga na maua ai se lesona taua e uiga i manao e tulai mai. A o savali sopo ia Ralston i se vanu tofe e mamao ese ma le aai i Iuta i Saute, na faafuasei ona see se papa e 800 pauna ma taomia ai lona lima taumatau. Na ia tauivi mo le lima aso na tuua toatasi ai o ia e faasaoloto ia lava. Ina ua toetoe lava a ia faavaivai ma talia le oti, na ia maua se vaaiga mamao o se tamaitiiti e 3 tausaga o tamoe atu ia te ia ma ia tago atu ma sii i lona lima agavale. I lona malamalama ai i lenei mea o se vaaiga mamao o lona atalii i le lumanai ma se faamautinoaga e mafai lava ona ia ola pea, na maua ai e Ralston le lototele ma faia ai se faatinoga ogaoga e laveai ai lona ola a o lei uma lona malosi. Na ia gauia ivi e lua o lona lima taumatau ua taomia ona ia faaaogaina lea o le agaese e tipi ese ai lona lima lena. Ona ia savali sopo lea i lona malosi o totoe mo le 5 maila (8 km) mo se fesoasoani⁴ E maeu sea faataitaiga o le mana o le manao ua lofituina! A i ai sa tatou vaaiga mamao o mea e mafai ona avea ai i tatou, ona matua faateleina lea o lo tatou manao ma lo tatou malosi e galue ai.

O le toatele o i tatou o le a le feagai ma sea mala matautia, ae o i tatou uma e feagai ma mailei e mafai ona taofia ai lo tatou alualu i luma i lo tatou taunuuga e faavavau. Afai e lava le malosi atoa o o tatou manaoga amiotonu, o le a latou uunaia i tatou e tipi ma vane ese i tatou ia saoloto mai vaisu ma isi faaosoosoga o le agasala ma mea o loo faamuamua, o loo taofia ai lo tatou alualu i luma e faavavau.

E tatau ona tatou manatua o manaoga amiotonu e le mafai ona faata’eta’ealuga, pe tupu faafuasei, pe le tumau foi. E tatau ona faamaoni a’ia’i, e le fetotoa’i, ma ia mausali. Ia matua faaosofia lava, o le a tatou sailia ai lena tulaga e pei ona faamatalaina e le Perofeta o Iosefa Samita, tatou te “faatoilaloina ai mealeaga [o o tatou olaga] ma galoma atu ai manaoga uma mo le agasala.”⁵ O se faaiuga patino tele lena. E pei ona saunoa mai Elder Neal A. Maxwell:

“Pe a faamatalaina tagata ua “leai so latou manao i le agasala,’ o i latou ia, ma ua na o i latou lava, ua filifili ma le loto i ai e lafoaia na manaoga sese e ala i le loto malie e ‘lafoaiina [a latou] agasala uma’ ina ia iloa ai le Atua.

“O lea, o le mea tatou te mananao pea lava pea i ai, o le mea lena o le a avea ai i tatou, ma o le mea foi lena o le a tatou maua i le faavavau.”⁶

E pei lava ona taua le lafoaia o manao uma i le agasala, e sili atu foi mea e manaomia e le ola e faavavau. Ina ia ausia lo tatou taunuuga e faavavau o le a tatou mananao ma galulue mo uiga lelei e manaomia e avea ai ma se tagata e faavavau. Mo se faataitaiga, o tagata e faavavau e faamagalo atu i tagata uma ua sese mai ia i latou. Latou te faamuamua le tulaga manuia o isi nai lo i latou lava. Latou te alolofa foi i fanau uma a le Atua. Afai e foliga mai e faigata tele lenei mea—ma e mautinoa lava e le faigofie mo soo se tasi o i tatou—ona tatau lea ona tatou amata i se manao mo sea uiga lelei, ma ole atu i lo tatou Tama Faalelagi alofa mo se fesoasoani i o tatou lagona. Ua aoao mai i tatou e le Tusi a Mamona e tatau ona tatou “tatalo atu ai i le Tama ma le malosi uma o le loto, ina ia faatumuina i [tatou] i lenei alofa, ua foaiina mai ia te i [tatou] uma o e ua fai ma soo faamaoni o lona Alo o Iesu Keriso” (Moronae 7:48).

Ou te faaiu atu i se faataitaiga mulimuli o se manao e tatau ona faasilisilia mo alii ma tamaitai uma—o i latou ua faaipoipo ma i latou o loo nofofua. E tatau ona mananao ma galulue ma le manatu mamafa i ai tagata uma ia faatumauina se faaipoipoga mo le faavavau. O i latou uma ua uma ona faaipoipo i le malumalu e tatau ona faia mea uma latou te mafaia e faasaoina ai. O i latou o loo nofofua e tatau ona mananao i se faaipoipoga i le malumalu ma faia ni taumafaiga o mea e faamuamua ina ia ausia ai. E tatau i le autalavou ma talavou nofofua ona tetee atu i manatu faavae e sa’o i faiga faapolokiki ae sese i le faavavau ia e ta’ufaatauvaaina le taua o le faaipoipoina ma le mauaina o fanau.⁷

Alii nofofua, faamolemole mafaufau i le luitau o i lenei tusi na tusia e se tuafafine nofofua. Na augani mai mo “afafine amiotonu o le Atua ia o loo saili atu ma le faamaoni mo se soa agavaa, ae foliga mai lava o loo faatauasoina alii ma lē mautonu pe o so latou tiutetauave ea pe leai le sailia o nei afafine filifilia ma le matagofie o lo tatou Tama Faalelagi ma faamalamalama atu ia i latou ma naunau e osia ma tausia feagaiga paia i le maota o le Alii.” Na ia faaiu mai: “E toatele alii nofofua o le AAG iinei o loo fiafia e o e tafafao ma fiafia, ma tafafaovale, ae e matua leai lava se manao e faia se ituaiga o tautinoga i se tamaitai.”⁸

Ou te mautinoa o nisi o alii talavou o loo saili ma le naunautai o le a mananao ou te faaopoopo atu e faapea, o loo i ai foi nisi o tamaitai talavou e matua maualalalo o latou manaoga mo se faaipoipoga agavaa ma ni fanau, nai o latou manaoga mo se matata faalegaluega po o isi tulaga iloga faaleolaga nei. E manaomia e alii ma tamaitai uma ni manaoga amiotonu ia o le a taitai atu ai i latou i le ola e faavavau.

Ia tatou manatua o o tatou manaoga e faaleoina mea tatou te faamuamua, e fatuina e mea e faamuamua a tatou filifiliga, ma o filifiliga e iloa ai a tatou amioga. E le gata i lea, o a tatou amioga ma o tatou manaoga e mafua ai ona avea i tatou ma se ituaiga o tagata, pe o se uo faamaoni, o se faiaoga faamanuiaina, po o se tasi ua agavaa mo le ola e faavavau.

Ou te molimau atu ia Iesu Keriso, le ona le alofa, o ana aoaoga ma lana Togiola ua mafai ai mea uma. Ou te tatalo o le a tatou mananao, e sili atu i lo isi mea uma, ia te Ia ina ia i ai se aso e mafai ai ona tatou toe foi atu i Lona afioaga e maua ai le atoaga o Lona olioli. I le suafa o Iesu Keriso, amene.