Faatulagaina o se Aiga e Faatutotonu ai Keriso

I le amataga o la’u auaunaga o se faifeautalai talavou i Iurukuei ma Parakuei, sa ou iloa ai o le tasi o faatosinaga maoae ia i latou e saili ia iloa atili e uiga i Le Ekalesia a Iesu Keriso o le Au Paia o Aso e Gata Ai, o lo latou fia iloa lea o a tatou aoaoga faavae e faatatau i le aiga. O le mea moni, talu mai le Toefuataiga o le talalelei a Iesu Keriso, ua tosina mai ai tagata sailiili o le upumoni i le aoaoga faavae e faapea, e mafai ona faavavau aiga.

O le mataupu faavae o aiga e faavavau o se elemene taua lea i le fiafiaga sili a le Tama Faalelagi mo Lana fanau. O le mea taua i lena fuafuaga o le malamalamaaga lea o loo i ai so tatou aiga faalelagi faapea foi ma se aiga faalelalolagi. Ua aoao mai i tatou e le Aposetolo o Paulo e faapea, o le Tama Faalelagi o le tamā o o tatou agaga:

“Ina ia latou saili i le Alii … ma latou iloa o ia, …

“Aua o ia o loo ola ai i tatou, ma gaoioi ai, o loo i ai foi i tatou talu o ia; … Aua o lana fanau i tatou.”¹

O le avea ma fanau a se Tama Faalelagi agalelei o se mataupu faavae autu lea o le talalelei a Iesu Keriso, lea o loo tautino atu foi e a tatou fanau lona moni a o latou usuina le pese Peraimeri “O A’u o se Atalii o le Atua.” Manatua foi ia upu?

O le iloaina o loo i ai so tatou aiga faalelagi e fesoasoani tatou te malamalama ai i le natura paia o o tatou aiga faalelalolagi. Ua aoao mai i tatou e le Mataupu Faavae ma Feagaiga e faapea, o le aiga e taua i le faatulagaga o le lagi: “O lea lava mafutaga foi o loo ia i tatou iinei o le a ia i tatou iina, a e faaopoopo i ai le mamalu faavavau.”³

O le malamalama i le natura e faavavau o le aiga o se elemene taua lea i le malamalama ai i le fuafuaga a le Tama mo Lana fanau. Ae i le isi itu, ua manao ai le tiapolo e faia mea uma i lona malosi e faataumaoi ai le fuafuaga a le Tama Faalelagi. I lana taumafaiga e faatoilalo le fuafuaga a le Atua, ua ia taitaia ai se osofaiga e le’i tupu muamua e faasaga i le faalapotopotoga o le aiga. O nisi o auupega ua sili ona malolosi o loo ia faaaogaina i ana osofaiga o le manatu faapito, faaloloto, ma ponokalafi.

O lo tatou fiafia e faavavau e le o se tasi lea o faamoemoega o Satani. Ua ia iloa o se vaega taua i le le fiafia o alii ma tamaitai ia pei o ia lava, o le faoa lea mai ia i latou o mafutaga faaleaiga o le a favavau. Ona ua iloa lelei e Satani o le fiafia moni i le olaga nei ma i le faavavau e maua lea i tulaga o le aiga, ua ia faia ai mea uma i lona malosi e faataumaoia ai.

Ua ta’ua e le perofeta anamua o Alema le fuafuaga a le Atua mo Lana fanau “o le ala sili o le fiafia.”⁴ Ua tuuina mai e le Au Peresitene Sili ma le Korama a Aposetolo e Toasefululua, o e ua tatou lagolagoina o perofeta, tagatavaai, ma talifaaaliga, ia lenei fautuaga e faatatau i le fiafia ma le olaga faaleaiga: “O le aiga ua faauuina e le Atua. O le faaipoipoga i le va o le alii ma le tamaitai e taua i Lana fuafuaga. E tatau ona fanauina fanau i totonu o feagaiga o le faaipoipoga, ma ia tausia e se tamā ma se tina o e ua faamamaluina ma le faamaoni atoatoa feagaiga faaleulugalii. E maua le fiafia i le olaga faaleaiga pe a faavae i aoaoga a le Alii o Iesu Keriso.”⁵

O lenei fiafia e pei ona talanoa mai ai Alema ma sa saunoa mai talu ai nei le Au Peresitene Sili ma le Korama a Aposetolo e Toasefululua, o le a mautinoa lava le tele ina maua i le fale ma le aiga. O le a tele le fiafia e maua pe a tatou faia mea uma i lo tatou malosi e fausia ai se aiga e faatutotonu ai Keriso.

Sa ma aoaoina ma Sister Maynes nisi o mataupu faavae taua a o ma amataina le faagasologa o le faatulagaina o se aiga e faatutotonu ai Keriso i le popofou o le ma faaipoipoga. Sa ma amataina i le mulimuli i le fautuaga a o tatou taitai o le Ekalesia. Sa ma faapotopotoina mai le ma fanau ma fai i vaiaso uma ni afiafi faaleaiga faapea foi ma tatalo ma le suesueina o tusitusiga paia i aso uma. Sa le o taimi uma na faigofie, fetaui, pe manuia ai, ae i le aluga o taimi, na avea ai faatasiga faatauvaa ma tu masani faapelepele [a lo matou] aiga.

Sa ma iloaina foi, atonu e le manatuaina e le ma fanau i le aluga o le vaiaso ia mea uma e uiga i lesona o le afiafi faaleaiga, ae latou te manatuaina sa matou faia. Sa ma iloaina i se taimi mulimuli ane o le aso i le aoga, atonu o le a latou le manatuaina foi ia upu tonu o mau po o le tatalo, ae latou te manatua sa matou faitauina tusitusiga paia ma sa fai la matou tatalo. Uso e ma tuafafine, e i ai se mana malosi ma le puipuiga mo i tatou ma o tatou tagata talavou i le faia o tu ma aga faaselesitila i totonu o le aiga.

O le aoaoina, aoao atu, ma le ola ai i mataupu faavae o le talalelei a Iesu Keriso i totonu o o tatou aiga e fesoasoani e fatuina ai se aganuu lea e mafai ona mafuta ai le Agaga. O le faatulagaina o nei tu ma aga faaselesitila i o tatou aiga, o le a mafai ai ona tatou faatoilaloina tu ma aga sese a le lalolagi ae iloa ona faamuamua ia manaoga ma popolega o isi tagata.

O le tiutetauave o le faatulagaina o se aiga e faatutotonu ai Keriso e fitoitonu lea i matua ma le fanau. O matua e nafa ma le aoaoina o a latou fanau i le alofa ma le amiotonu. O le a faamasinoina matua i luma o le Alii i le ala na la faatinoina ai o laua tiutetauave paia. E aoao e matua a latou fanau i le upu ma e ala i faataitaiga. O le solo lenei a C.C. Miller ua faaautuina, “O Le Siuleo,” ua faaalia ai le taua ma le aafiaga e faia e matua a o latou uunaia a latou fanau:

O taunuuga o matua o e taitai sese a latou fanau ua fofola mai e le Alii i o tatou luma i le Mataupu Faavae ma Feagaiga: “O lenei foi, afai e maua fanau e matua i Siona … e le aoao atu ia te i latou ia malamalama le mataupu o le salamo, ma le faatuatua ia Keriso, le Atalii o le Atua soifua, ma le papatisoga ma le meaalofa o le Agaga Paia i le faaeeina o lima … o le a pau lea agasala i matua.”⁷

E faigata ona soona faamamafa atu le taua o matua i le aoaoina o a latou fanau i tu ma aga faaselesitila e ala i le upu ma faataitaiga. Ua i ai foi i fanau so latou tiute taua i le faatulagaina o se aiga e faatutotonu ai Keriso. Sei ou faasoa atu se tautalaga puupuu na tuuina atu talu ai nei e Will, le atalii e valu tausaga o lo’u afafine, e faamalamalama ai lenei mataupu faavae:

“Ou te fiafia ma te o ma lo’u tamā e tietie solofanua ma sele solofanua ma povi. O se maea e i ai ni manoa eseese e milo faatasi ia malosi ai. Afai e na o le tasi se manoa o le maea, o le a le mafai ona fai ai le galuega. Ae ona e tele manoa e galulue faatasi, e mafai ona ma faaaogaina i ni auala eseese se tele ma e malosi.

“O aiga e mafai ona pei o maea. Afai e na o le toatasi le tagata e galue malosi ma fai le mea sao, o le a le malosi le aiga e pei o le malosi pe a taumafai tagata uma e fesoasoani le tasi i le isi.

“Ou te iloa a ou faia le mea sa’o, ua ou fesoasoani i lo’u aiga. A ou faia faalelei lo’u tuafafine o Isapela, ma te fiafia uma ma e fiafia ai foi lo’u tina ma lo’u tamā. A manao lo’u tina e fai se mea, e mafai ona ou fesoasoani ia te ia e ala i le ma taaalo faatasi ma lo’u uso laitiiti o Joey. E mafai foi ona ou fesoasoani i lo’u aiga i le tausisia o le mamā o lo’u potu ma fesoasoani atu i soo se taimi e mafai ai ma se uiga faaalia lelei. Talu ai o a’u o le ulumatua i lo’u aiga, ua ou iloa ai e taua le avea ma se faataitaiga lelei. E mafai ona ou taumafai malosi e filifili le mea sa’o ma mulimuli i poloaiga.

“Ou te iloa e mafai e tamaiti ona fesoasoani i o latou aiga ia malolosi e pei o se maea. A fai e tagata uma le mea sili latou te mafaia ma galulue faatasi, e mafai ona fiafia ma malolosi ia aiga.”

A pulefaamalumalu matua i le aiga i le alofa ma le amiotonu ma aoao a latou fanau i le talalelei a Iesu Keriso e ala i le upu ma e ala i faataitaiga, ma a alolofa ma lagolago e fanau o latou matua e ala i le aoaoina ma le faia o mataupu faavae e aoao atu e o latou matua, o le taunuuga o le a faatulagaina ai se aiga e faatutotonu ai Keriso.

Uso e ma tuafafine, i le avea ai ma tagata O Le Ekalesia a Iesu Keriso o le Au Paia o Aso e Gata Ai, ua tatou malamalama ma talitonu i le natura e faavavau o le aiga. O lenei malamalamaaga ma le talitonuga e tatau ona musuia ai i tatou e faia mea uma i lo tatou malosi e faatulaga ai se aiga e faatutotonu ai Keriso. E tuuina atu la’u molimau afai tatou te taumafai e fai lenei mea, o le a sili atu ona tatou ola i le alofa ma le auauna atu lea sa faataitaia i le soifuaga ma le Togiola a lo tatou Faaola, o Iesu Keriso, ma o se taunuuga, o le a mafai moni ona pei o tatou aiga o le lagi i le lalolagi. I le suafa o Iesu Keriso, amene.