Soo o Keriso

Ia Oketopa talu ai, na matou malaga ai ma lo’u toalua ma Elder ma Sister Neil L. Andersen mo le suatiaina o le eleele o se malumalu fou i Cordoba, Atenitina. E pei lava o le tu ma aga, e sosoo ma se faatalanoaga ma le aufaasalalau pe a maea le sauniga. O se tagata tusitala, e le o se tagata o le Ekalesia, na ia faapea mai ua ia matauina le lelei tele o le auala e taulimaina ai e alii o latou taitoalua. Ona faafuasei lea ona ia fesili mai, pe moni ea lena mea pe o se talafatu? Ou te mautinoa na ia vaai ma lagonaina se mea sa ese lava mai o tatou tagata. Atonu na ia vaaia le naunau o o tatou tagata e mulimuli ia Keriso. E i ai lena naunau i tagata o le au paia i le lalolagi atoa. E faitau miliona foi i latou e le o ni tagata o le Ekalesia o loo i ai se manao e mulimuli ia te Ia.

Talu ai nei lava na faafiafiaina tele ai i ma’ua ma lo’u toalua e tagata na ma vaai i ai i Ghana ma Nigeria. O le tele lava e le o ni tagata o la tatou Ekalesia. Sa ma fiafia lava e vaaia lo latou manao e mulimuli ia Keriso na faailoa i le tele o a latou talanoaga i o latou fale, i a latou taavale, i o latou puipui ma a latou laupapa o faasalalauga. E ma te lei vaaia muamua lava i se anoanoai o lotu Kerisiano e sosoo le tasi ma le isi.

I le avea ai ma Au Paia o Aso e Gata Ai, o lo tatou tiute o le valaaulia lea o le faitau miliona e pei o ia tagata e o mai ma vaai i mea e mafai ona faaopoopo atu e la tatou Ekalesia i mea lelei ua ia te i latou. Soo se tagata lava mai soo se konetineta, tau, po o aganuu e mafai ona iloa mo i latou lava na vaai le Perofeta o Iosefa Samita i le Tama ma le Alo i se faaaliga. E mafai ona latou iloa na toefuatai mai e avefeau faalelagi le perisitua ma o le Tusi a Mamona o se tasi molimau ia Iesu Keriso. I le fetalaiga a le Alii ia Enoka, “[Ua auina atu] foi mai le lagi le amiotonu; ae [ua auina atu] le upumoni mai le lalolagi, e [molimau] i le Toatasi na Fanaua [e le Tama].”¹

Na folafola mai e le Faaola, “O le mulimuli mai ia te au, e le savali o ia i le pouliuli, a e ia te ia le malamalama o le ola.”² E mamanuina e soo o Keriso o latou olaga i le Faaola ia savavali ai i le malamalama. E lua ni uiga e mafai ona fesoasoani ia i tatou e iloa ai pe o le a le lelei tatou te mulimuli ai ia te Ia. Muamua, o soo moni o Keriso o ni tagata alolofa. Lona lua, o soo moni o Keriso latou te osia ma tausia ia feagaiga.

O le uiga muamua, o le loto alofa atonu o le mea lea e tasi na matauina e le tusitala i Cordoba i tagata o la tatou Ekalesia. Tatou te mulimuli ia Keriso ona tatou te alolofa ia te Ia. Pe a tatou mulimuli i le Togiola ona o le alofa, ua tatou mulimuli lea i Ana lava faataitaiga. E ala i le alofa, na usiusitai ai le Faaola i le finagalo o le Tama i soo se tulaga lava. Na usiusitai lo tatou Faaola e tusa lava pe oo i tiga faaletino ma lagona, e tusa lava pe oo i le sasaina ma le tauemuina, e oo i le sauaina o Ia e Ona fili a o tuulafoaiina o Ia e Ana uo. O le taulaga togiola, lea e tulagaese i le misiona a le Faaola, o le faailoaga aupito silisili lea o le alofa ua i ai. “O le aoaiga e filemu ai tatou sa i ona luga lea; o ona faalavalava foi ua malolo ai i tatou.”³

E faapei ona mulimuli Keriso i le Tama i soo se tulaga lava, e tatau foi ona tatou mulimuli i Lona Alo. Afai tatou te faia lena mea, e le afaina pe o le a le ituaiga o ta’usalaga, puapuaga, faanoanoaga, po o “laau talatala i la le tino”⁴ tatou te feagai. E le tuulafoaiina i tatou. O le a fesoasoani Keriso ia i tatou. O lona alofa mutimutivale o le a tatou malolosi ai i soo se tulaga.⁵

O le mulimuli ia Keriso e mafai ona faauigaina o le lafoaia o le tele o mea faapelepele faapei ona faia e Ruta, le sa Moapi. I le avea ai ma se tagata fou liliu mai, o lona alofa mo le Atua ma Naomi, na ia tuua ai mea uma ina ia ola i lana tapuaiga.⁶

E mafai foi ona faauigaina o le onosaia o faigata ma faaosoosoga. I lona talavou, na faatau atu ai Iosefa o se pologa. Na aveeseina o ia mai mea uma na ia fiafia i ai. Mulimuli ane na faaosoosoina o ia e soli le ola mama. Na ia teenaina le faaosoosoga ma fai atu, “Pe faapefea ona ou faia lenei mea leaga tele ma ou agasala ai i le Atua?”⁷ O lona alofa mo le Atua na sili atu ona malosi nai lo soo se faigata po o faaosoosoga.

O aso nei ua ia i tatou ni Ruta ma ni Iosefa i le lalolagi atoa. Ina ua maua e Uso Jimmy Olvera mai Guayaquil, Ecuador, lana valaauga o le misiona, o loo tauivi tele i le taimi lena lona aiga. I le aso na ia tuua ai, na ta’u atu ai ia te ia afai o le a ia ulufafo ma le faitotoa, o le a le toe i ai sona aiga. Faatasi ai ma se loto nutimomoia, na ia savali atu ai i fafo ma le faitotoa. A o i ai o ia i le misiona, na talosagaina ai o ia e lona tina ina ia faaumiumi lana misiona ona ua tele faamanuiaga ua latou mauaina. O le asō ua avea Uso Olvera ma se peteriaka o le siteki.

O Keriso o Lē alofa faamaoni ua sauniaina le malosi e manaomia e mulimuli ai ia te Ia. Na faaali mai e le Alii lava Ia lenei mea ina ua Ia fesiligia faatolu Peteru “Pe e te alofa mai ia te au?” Na manaomia ona malamalama Peteru o le alofa i le Matai o le a tuu atu ai ia te ia le malosi e manaomia e feagai ai ma faigata o le a oo atu. Na toe faamautu leotele atu e Peteru e alofa o ia i le Alii. Ona oo mai lea o le valaau: “Mulimuli mai ia te au.” O le fesili a le Faaola ia Peteru e mafai foi ona fesiligia ai i tatou: “Pe e te alofa mai ia te au,” ona mulimuli mai ai lea ma le valaau e faatino: “Mulimuli mai ia te au.”⁸

O le alofa mo lo tatou Faaola e musuia ai i tatou e tausi Ana poloaiga. O le alofa mo tina, tama, po o se toalua e mafai ai foi ona musuia lo tatou usitai i mataupu faavae o le talalelei. O le ala tatou te taulimaina ai isi e atagia mai ai le lelei o lo tatou mulimuli i lo tatou Faaola i le alofa atu o le tasi i le isi.⁹ Tatou te faaali atu lo tatou alolofa ia te Ia pe a tatou tutu e fesoasoani atu i isi, pe a tatou “faamaoni lava ma amiotonu i mea uma lava,”¹⁰ ma pe a tatou osia ma tausia feagaiga.

O le uiga lona lua lea e i ai i soo o Keriso o le osia ma le tausia o feagaiga, e pei ona Ia faia. Na faasino mai e Moronae e faapea “o le faamaligiina o le toto o Keriso … o lo le feagaiga lea o le Tama, e iu i le faamagaloina o a outou agasala, ina ia liua outou ina ia paia ma le le pona.”¹¹

Na aoao mai e le perofeta o Iosefa Samita e faapea a o lei faatulagaina lenei lalolagi, na osia lava feagaiga i le lagi.¹² Na osia e perofeta anamua ma peteriaka ia feagaiga.

Na tuuina mai e le Faaola lava Ia le faataitaiga. Na papatisoina o Ia ina ia faataunuuina mea tonu uma, e lē o loo i ai le pule sa’o. O Lona papatisoga, na molimau atu ai le Faaola i le Tama o le a Ia usiusitai i le tausia o poloaiga uma a le Tama.¹³ E pei o aso anamua, tatou te mulimuli foi ia Keriso ma osia feagaiga e ala i sauniga o le perisitua.

O le osia o feagaiga o se mea e mafai ona faaopoopo atu e le fia miliona e le o ni tagata o le Ekalesia i mea lelei e tele ua uma ona latou maua. O le osia o feagaiga o se faailoaga o le alofa. O se auala e ta’u atu ai ia te Ia, “Ioe, o le a ou mulimuli i lau Afio ona ou te alofa i lau Afio.”

O feagaiga e aofia ai ia folafolaga, “e oo i le ola e faavavau.”¹⁴ O le a galulue faatasi mea uma mo lo tatou lelei pe a tatou manatuaina a tatou feagaiga.¹⁵ E tatau ona osia ma tausia ina ia maua ai le atoatoa o folafolaga o loo i ai. O le alofa i le Faaola ma le manatuaina o a tatou feagaiga o le a fesoasoani ai ia i tatou e tausia na feagaiga. O le taumafa i le faamanatuga o se tasi lea o auala e manatua ai na feagiga.¹⁶ O le isi auala o le auai soo atu lea i le malumalu. Ou te manatua se ulugalii talavou i Amerika i Saute na mananao e tetea ona la te lei mafai ona galulue faatasi. Na fautuaina i la’ua e se taitai perisitua ina ia auai i le malumalu ma gauai faapitoa atu i upu ma folafolaga o feagaiga o loo osia iina. Na la faia ma na faasaoina ai le la faaipoipoga. O le mana o a tatou feagaiga e sili atu nai lo soo se luitau lava o tatou feagai ai pe atonu tatou te feagai ai.

Ia i latou o tagata o le ekalesia ua le toaaga i le talalelei, faamolemole toe foi mai. Ia lagonaina le faamanuiaga o le manatuaina ma le faafouina o feagaiga e ala i le faamanatuga ma le auai i le malumalu. O le faia o lea mea o se faailoaga lea o le alofa ma faaalia ai se naunautaiga ia avea ma soo moni o Keriso. O le a faaagavaaina ai oe e maua uma faamanuiaga folafolaina.

Ia i latou e le o ni tagata o la tatou ekalesia, ou te valaaulia outou ia faatino le faatuatua, salamo, ma agavaa ina ia maua feagaiga o le papatisoga i le Ekalesia a Iesu Keriso o le Au Paia o Aso e Gata Ai. I le faia o lea mea, o le a outou faaalia ai lo outou alofa i lo outou Tama Faalelagi ma lo outou naunautaiga e mulimuli ia Keriso.

Ou te molimau atu e sili atu lo tatou fiafia pe a tatou mulimuli i aoaoga o le talalelei a Iesu Keriso. A o tatou tauivi e mulimuli ia te Ia, o le a oo mai faamanuiaga o le lagi ia i tatou. Ou te iloa o le a faataunuuina Ana folafolaga a o tatou osia ma tausia ia feagaiga, ma avea o ni soo moni o Keriso. Ou te molimau atu ai i Lona alofa tele mo i tatou taitoatasi ma faia ai i le suafa o Iesu Keriso, amene.