2010–2019
Sa Gauna Tale ni Koniferedi
Epereli 2011


Sa Gauna Tale ni Koniferedi

Vinaka vakalevu na nomuni vakabauta kei na yalodina ki na kosipeli, vakakina na nomuni loloma kei na veikauwaitaki vei ira tale e so kei na veiqaravi ko ni vakayacora tiko.

Ena navuci ni tara ni vale oqo, eda nanuma ni da na sega ni vakasinaita rawa. Ia ni raica mada oqo.

Kemuni na taciqu kei na ganequ lomani, sa dua na ka vinaka ni da sa baci mai sota ka tekivutaka tale na ika 181 ni Koniferedi Raraba Vakayabaki ni Lotu i Jisu Karisito ni Yalododonu Edaidai.

Na ono na vula sa mai cava sa sivi totolo sara ka sa levu sara ga na ka au a vakaitavitaki kina. E dua vei ira na kena veivakalougatataki levu o ya na kena laki vakatabui tale na Valetabu mai Laie Awai, ka mai taucoko sara na kena vakavoui ena rua na yabaki sa oti. E ratou a tomani au o Peresitedi kei Sisita Henry B. Eyring, Elder kei Sisita Quentin L. Cook, vakakina o Elder kei Sisita William R. Walker. Ena yakavi ni siga ka tarava yani na siga ni vakatabui, o ya ena vula o Noveba, keitou a vakamarautaki mai vei ira e 2,000 na itabagone ena iwase ni vanua ni veiqaravi ni valetabu, ena Cannon Activities Center ni BYU–Hawaii. A vakatokai na ikau ni nodra vakatasuasua me“Na Vanua ni Sota” (The Gathering Place) ka vakaraitaki sara kina vakamatata na itukutuku ni Lotu ni vanua, kei na veika makawa me baleta na valetabu. Sa dua na yakavi taleitaki!

Na siga ka tarava sa dua na siga ni kanamagiti vakayalo ena kena sa mai vakatabui na valetabu ena tolu na soqoni. Keimami sa vakasinaiti sara ga ena Yalo ni Turaga.

Eda sa tomana tikoga na tara valetabu. Sa noqu madigi meu mai vakaraitaka ena mataka nikua ni sa vakarautaki oti tu na vanua mera na tara tale kina e tolu na valetabu, ena vica na vula kei na yabaki mai oqo ki na veivanua oqo: Fort Collins, Colorado; Meridian, Idaho; kei Winnipeg, Manitoba, Canada. Era sa na kalougata kina vakalevu o ira na noda lewenilotu ena veivanua oqori.

E milioni na cakacakatabu vakalotu e qaravi ena valetabu ena veiyabaki. Kevaka walega e rawa, meda sa na tosoya tikoga na qaravi ni cakacakatabu vakalotu baleti keda kei ira talega na wekada era sa takali ka ra sega ni rawa ni qarava ga vakai ira.

Sa tosoya tikoga na Lotu na veivuke raraba ena gauna ni leqa vakaca. Se qai vakayacori walega oqo na veivuke ki Japani ena kena vakacacani ena uneune kei na sunami vakakina na bolebole ni leqa mai na niukilia. Eda sa solia rawa e sivia na 70 na tani na iyaya ni veivuke wili kina na kakana, wainigunu, itutuvi, iyaya ni moce, iyaya ni veivakasavasavataki, isulu kei na waiwai. Era sa veivuke vakavolodia o ira na itabagone qasecake ena nodra vaqarai o ira sa yali ena vakayagataki ni initaneti, niusiveva kei na iyaya ni vakauitukutuku vou ni gauna oqo, na tekinolaji vou sa basika edaidai. Era sa veivuke tiko na lewenilotu ena kena veisoliyaki na veivuke mai na Lotu ena vakayagataki na motopai ena vanua ka dredre me ciciva na motoka. Sa tekivutaki na kedra biubiu vata na ka ni veivuke ni iyaya ni tataqomaki, kei na iyaya ni veivakasavasavataki ena levu sara na iteki kei na veitabanalevu mai Tokio, Nagoya kei Osaka. Me yacova mai oqo, sa sivia na 40,000 na aua ni veiqaravi era sa solibula kina na volodia. Ena tomani tikoga na noda veivuke ki Japani kei na veivanua ena gadrevi kina na noda veivuke.

Kemuni na taciqu kei na ganequ, vinaka vakalevu na nomuni vakabauta kei na yalodina ki na kosipeli, vakakina na nomuni loloma kei na veikauwaitaki vei ira tale e so kei na veiqaravi ko ni vakayacora tiko ena nomuni tabanalevu kei na tabana, vakakina ena iteki kei na tikina. Vinaka vakalevu talega na nomuni yalodina tiko ena saumi ikatini kei na isolisoli tale eso kei na nomuni yalololoma ena soli-ka ki na veiumailavo tale eso ni Lotu.

Ena mua ni yabaki 2010, era sa kaulotu tiko e 52,225 na daukaulotu ena 340 na itikotiko ni kaulotu ena veiyasai vuravura. Na cakacaka ni kaulotu sa ikoya na drabula ni matanitu. Meu vakatura mada ni kevaka e rawa, mo ni yalovinaka ka bau dodoliga yani ka cau ki na Umailavo Raraba ni Kaulotu. (General Missionary Fund)

Ia oqo, kemuni na taciqu kei na ganequ, meda sa na vakarorogo sara yani kina itukutuku era na vakadewataki vei keda nikua vakakina ni mataka. O ira era na vosa tiko vei keda, era a kerea na veivuke kei na veidusimaki vakalomalagi ena nodra vakarautaka na nodra vosa. Sa noqu masu ni da na vakasinaiti ena Yalo ni Turaga ka laveti cake ka vakauqeti ena noda na vakarorogo ka vuli. Ena yaca i Jisu Karisito, emeni.