E Amuiraa Faahou

I te taime a mana‘ohia’i teie fare, ua mana‘o matou eita roa matou e faaoti i te reira. A hi‘o na ra i teie nei.

E to’u mau taea‘e e mau tuahine here, e mea maitai i te farerei faahou â a haamata ai tatou i te hanere vau ahuru-ma-hoê-raa o te amuiraa rahi matahiti a te Ekalesia a Iesu Mesia i te Feia Mo‘a i te Mau Mahana Hopea Nei.

E au ra ua tere oioi noa na ava‘e e ono i mairi a‘e nei a rave ai au i te mau hopoi‘a e rave rahi. Te hoê o te mau haamaitairaa rahi i roto i taua taime ra o te haamo‘araa ïa i te hiero nehenehe no Laie Hawaii, tei faaapî-roa-hia fatata e piti matahiti te maoro. Ua apeehia vau e te peresideni e te tuahine Henry B. Eyring, te taea‘e e te tuahine Quentin L. Cook, e te taea‘e e te tuahine William R. Walker. I te pô hou te haamo‘araa, tei tupu i te ava‘e novema ra, ua mata‘ita‘i matou e 2.000 feia apî no te mataeinaa no te hiero a faaî ai ratou i te Cannon Activities Center i te Fare Haapiiraa Teitei no BYU-Hawaii e ua ori mai ratou no matou. Te i‘oa no ta ratou ha‘utiraa o « Te Vahi Haaputuputuraa » ïa tei faati‘a nehenehe mai i te aamu o te mau mea tei tupu i roto i te Aamu o te Ekalesia e te aamu o te hiero. Auê ïa arui faahiahia e !

Te mahana i muri mai o te hoê ïa ta‘urua varua a haamo‘ahia’i te hiero i roto i na oro‘a e toru. Ua tae rahi mai te Varua o te Fatu i rotopu ia matou.

E tamau noa matou i te patu i te mau hiero. Te oaoa nei au i teie po‘ipo‘i ia faaara’tu e toru faahou hiero o te faanahohia ra te mau vahi e, i roto i te mau ava‘e e te mau matahiti i mua nei, e patuhia i te mau vahi i muri nei : Fort Collins i Colorado ; Meridian i Idaho ; e i Winnipeg, Manitoba i Canada. E mea papû e riro te reira ei hoê haamaitairaa no to tatou mau melo i roto i teie mau vahi.

I te mau matahiti atoa e rave rahi milioni oro‘a e ravehia nei i roto i te mau hiero. Ia tamau noa tatou i te itoito i te raveraa i taua mau oro‘a ra, eiaha no tatou ana‘e, no to tatou atoa râ mau taata tei herehia e tatou o te ore e nehenehe ia rave i te reira no ratou iho.

Te tamau noa nei te Ekalesia i te horo‘a i te tautururaa i te tau ati. Aita i maoro a‘e nei, ua tupu to tatou aroha e ua tauturu atu tatou i te nunaa no te fenua Tapone i muri a‘e i te aueueraa fenua e te miti faaî e te mau fifi no te mau fare haamaniraa uira atomi. Ua opere matou hau atu i te 70 tane tauhaa, mai te maa, te pape, te mau ahu mahanahana, te ro‘i, te mau mea no te ea, te ahu e te mori arahu. Ua horo‘a ta tatou feia apî paari i to ratou taime no te ma‘imi i te mau melo tei mo‘e ma te faaohipa i te Itenati, te mau rave‘a apî no te tuatiraa e te tahi atu â mau rave‘a apî no te paraparauraa. Ua horo‘a te mau melo i te tauturu na roto i te faaohiparaa i te mau pereoo tataahi uira tei horo‘ahia e te Ekalesia, i te mau vahi e fifi i te haere na ni‘a i te pereoo uira. Ua faanahohia te mau opuaraa tauturu no te faaineine i te mau puohu no te ea e te mau puohu tamâraa i roto i te mau tĭtĭ e te mau paroita e rave rahi i Tokyo, Nagoya e Osaka. E tae noa mai i teie nei, hau atu i te 40.000 hora taviniraa tei horo‘ahia e na hau atu i te 4.000 taata. E tamau noa â ta tatou tautururaa i te fenua Tapone e i roto i te tahi atu mau vahi e hinaarohia.

E to’u mau taea‘e e mau tuahine, te haamauruuru nei au ia outou no to outou faaroo e to outou itoito i te evanelia, no te here e te haapa‘o ta outou e faaite te tahi i te tahi e no te taviniraa ta outou e horo‘a nei i roto i ta outou mau paroita e te mau amaa e te mau tĭtĭ e te mau mataeinaa. Mauruuru atoa ia outou no to outou haapa‘oraa i te aufauraa i ta outou tuhaa ahuru e te mau ô e no to outou maitai i te horo‘araa no te tahi atu mau tufaa moni a te Ekalesia.

I te hopea matahiti 2010 te vai ra e 52.225 misionare e tavini nei i roto e 340 misioni na te ao taatoa nei. Te ohipa misionare o te toto ora ïa no te basileia. Te parau atu nei au, e mai te mea e nehenehe ia outou, a feruri i te horo‘a i te tahi moni i te Afata Misionare a te Ekalesia.

I teie nei, te mau taea‘e e te mau tuahine, ua ineine tatou i te faaroo i te mau parau poro‘i o te hohorahia mai i mua ia tatou i teie mahana e ananahi. Ua imi te feia o te a‘o mai ia tatou i te tautururaa e te arata‘iraa a te ra‘i a faaineine ai ratou i ta ratou mau parau poro‘i. Ia î tatou i te Varua o te Fatu e ia haamaitaihia e ia faauruhia tatou a faaroo ai e a haapii ai tatou o ta’u ïa pure. Na roto i te i‘oa o Iesu Mesia ra, amene.